Ioane 14
14
Ko Iehu ko te Ala ki te Tamana
1Kua vāgana atu ia Iehu ki ona hoko, “Koutou nahe popole pe mātataku; talitonu ki te Atua, ma talitonu mai foki kia te au. 2E lahi nā potu i te fale o toku Tamana, ma ko au e fano oi hāuni he mea ke nonofo ai koutou. E hē mafai au ke lea atu vēnei, ānei ake e hēai.#14.2 E lahi nā potu… ānei ake e hēai pe E lahi nā potu i te fale o toku Tamana; ānei ake e hēai, e mafai vēhea ke lea atu au, ko au e fano oi hāuni he mea ke nonofo ai koutou? 3Ma kāfai au e fano oi hāuni he mea ke nonofo ai koutou, ko au e toe hau oi kavatu koutou, kae ke iei ai koutou fakatahi ma au, i te mea e iei ai au. 4E iloa e koutou te ala ki te mea e fano au ki ei.”
5Kua lea atu ia Toma kia te ia, “Te Aliki, e hē kimātou iloa te mea e fano koe ki ei, kae e vēhea la ona iloa e kimātou te ala e fano ki ei?”
6Oi na tali mai ai ia Iehu ki ei, “Ko au ko te ala—te ala moni e maua ai te ola; e hēai he tino e fano ki te Tamana, vaganā e kui mai ia te au. 7Nei la kua koutou iloa au,” na lea vēnā atu ia Iehu kia te kilātou, “ka koutou iloa#14.7 Nei la kua koutou iloa au… ka koutou iloa Ko iētahi tuhituhiga e lea mai; Ānei na iloa au e koutou… na koutou iloa foki toku Tamana, ma e kāmata atu nei, kua koutou iloa ia, ma kua koutou kiteagia ia.”
8Ma na lea atu ai ia Filipo kia Iehu, “Te Aliki, fakahino mai kia te kimātou te Tamana; ko tēnā oioti lava te mea e fofou kimātou ki ei.”
9Na tali mai ia Iehu, “Filipo, kai te mataloa lele o te taimi talu te fakatahi o oku ma koutou, kae ko hēki kē iloa lava au? Ko ai lava e ia kitea au, kua ia kitea te Tamana. Heā la te lea ai koe, ‘Fakahino mai kia te kimātou te Tamana’? 10Ko koe e hē talitonu ko au e i te Tamana ma ko te Tamana e ia te au?” Oi vāgana atu ai ia Iehu ki ona hoko, “Ko nā kupu e tautala atu ai au kia te koutou e hē mai ia te au. Ka ko te Tamana tē e tūmau ia te au, e fai lava e ia ana gāluega. 11Talitonu mai kia te au kāfai au e lea atu kia te koutou, ko au e i te Tamana ma ko te Tamana e ia te au. Kā hēai, talitonu la ona ko nā mea e kō faia. 12E takutino atu e au kia te koutou te meamoni, ko nā tino e talitonu mai kia te au, ka kilātou faia nā mea e kō faia; ma ka kilātou faia nā mea e hili atu te lalahi, auā ko au e fano ki te Tamana. 13Ho he mea lava e gogō atu koutou ki ei i toku igoa, e fai e au, kae ke fakailoa ai te mamalu o te Tamana, e ala i te Ataliki. 14Kāfai koutou e gogō mai kia te au#14.14 Ko iētahi tuhituhiga e hē i loto te kia te au i ho he mea i toku igoa, ka kō faia lava.
Kua Folafola e Iehu te Fehoahoani a te Agaga Paia
15“Kāfai koutou e alolofa mai kia te au, tauhi la ki aku fakatonuga. 16Ko au ka tatalo ki te Tamana, ma ka ia fōki atua kia te koutou hētahi Fehoahoani, ke fakatahi pea ma koutou ke pa ki te fakavavau. 17Ko ia ko te Agaga e fakailoagia te meamoni e uiga ki te Atua. E hē mafai ke talia ia e tagata o te lalolagi, auā e hē kilātou kitea pe iloa ia. Kae e koutou iloa ia, auā e tūmau ia ma koutou, ma e#14.17 e ko iētahi tuhituhiga e lea mai ka i loto ia, ia te koutou.
18“Ko koutou e hē kō tuku tīakia ke vē ni tamaiti mātua oti; ko au e toe hau kia te koutou. 19Toeititi oi hē toe kitea au e te lalolagi, kae ka kitea au e koutou; ma e ona ko au e ola, ka ola ai foki koutou. 20Kāfai e pa ki te aho tēnā, ka iloa e koutou ko au e i te Tamana ma ko koutou e ia te au, e vē lava ona iei au ia te koutou.
21“Ko nā tino e talia e kilātou aku fakatonuga ma uhitaki ki ei, ko kilātou iēnā e alolofa mai kia te au; ma ko nā tino e alolofa mai kia te au, ka alofa ki ei toku Tamana; ma ka vēnā foki ona alofa au ki ei, ma kō fakailoa au kia te kilātou.”
22Oi na lea atu ai ia Iuta (e hē ko Iuta Ihikaliota), “Te Aliki, e vēhea ona mafai ke kē fakailoa mai koe kia te kimātou, kae hē fakailoa ki te lalolagi?”
23Na tali mai ia Iehu ki ei, “Ko nā tino e alolofa mai kia te au, ka uhitaki ki aku akoakoga. Ka alofa toku Tamana kia te kilātou, ma ka ōatu kimāua ma toku Tamana kia te kilātou ma nonofo fakatahi ma kilātou. 24Ko nā tino e hē alolofa mai kia te au, e hē uhitaki foki ki aku akoakoga. Ma ko nā akoakoga kua fakalogo koutou ki ei, e hē āku, kae e mai te Tamana na ia uga maia au.
25“Ko au kua lea vēnei atu i nā mea iēnei ka koi fakatahi au ma koutou. 26Ko te Fehoahoani, te Agaga Paia, tē ka uga mai e te Tamana i toku igoa, ka ia akoako atua kia te koutou nā mea uma lele, ma ka koutou manatua ai nā mea uma na lea atu ai au.
27“Ko te fīlēmū e tuku e au ia koutou; ko toku lava fīlēmū e fōki atu e au kia te koutou. E hē kō fōki atua kia te koutou e vē ona fai e tagata o te lalolagi. Nahe atuatuvale outou loto; nahe koutou mātataku. 28Na lagona e koutou toku lea atuga, ‘Ko au e fano kehe, kae ko au e toe hau kia te koutou.’ Kāfai koutou e alolofa moni mai kia te au, e tatau koutou ke fiafia ko au e fano ki te Tamana; auā e hili atu tona tāua i lo oku. 29Ko au kua lea atu nei kia te koutou i nā mea uma iēnei ka ko hēki tutupu, kae ke talitonu mai ai koutou kia te au, kāfai e pa ki te taimi e tutupu ai. 30Ka hē toe mafai ke fai atu ni aku tala kia koutou, auā te pule o te lalolagi nei kua hau. E hē ia mafaia oi pule mai kia te au, 31kae e tatau ke iloa e te lalolagi ko au e alofa ki te Tamana; ko te mea ia e fai ai e au nā mea uma e fakatonu mai e ia.
“Tutū loa ki luga, keina tātou olo kehe ma kinei.
Currently Selected:
Ioane 14: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
