Ioane 1

Ko te Kupu o te Ola

1Nae i te kāmataga te Kupu, ma nae iei fakatahi ma te Atua, ma ko te Kupu ko te Atua. 2Nae iei ia i te kāmataga ma te Atua. 3Na fai e te Atua nā mea uma e ala i te Kupu; e hēai foki he mea e fokotahi i te lagi ma te lalolagi na fai, kae hē iei te Kupu. 4Ko te Kupu ko te puna o te ola,#1.4 Ko te Kupu ko te puna o te ola pe Ko te mea na gaohia nae iei te ola i te māfutaga ma te Kupu ma ko te ola tēnei na kaumaia te mālama ki tagata uma. 5Ko te mālama e huhulu i loto o te pōuli, ma e hēki mafai lele e te pōuli oi tāmate.

6Na uga mai e te Atua tana kavefekau, ko Ioane tona igoa,#Mat 3.1; Mlk 1.4; Luk 3.1-2 7na hau ke fai ma molimau, ma ke fakailoa atu ki tagata e uiga ki te mālama, kae ke talitonu uma ai kilātou ona ko ia. 8E hē ko ia te kaumaia te mālama ki tagata; kae na hau ke molimau e uiga ki te mālama. 9Ko te mālama moni tēnei—ko te mālama e hau ki te lalolagi ma huhulu atu ki luga o tagata uma, kae ke kilātou kitea ai te meamoni.

10Ko te Kupu nae i te lalolagi, ma ko te lalolagi na gaohia e ala ia te ia, kae nae hē iloa ia e te lalolagi. 11Na hau ki tona nuku, kae na hēki talia ia e ona tagata. 12Kae ko kilātou uma na taliagia ia ma talitonu ki ei; na ia tuku atua ki ei te haolotoga, ke kavea ai kilātou ma fānau a te Atua. 13E hēki kavea kilātou ma fānau a te Atua, e vē ko te tūlaga māhani faka-te-tagata, e fānanau mai ni fānau e a he tamana; kae ko te Atua lava ia, ko to lātou Tamana.

14Na liu tino tagata te Kupu ma nae mau fakatahi ma kimātou, ma tumu i te alofa tūnoa ma te fakamāoni. Na kikila kimātou ki tona mamalu, te mamalu o te Ataliki e toka tahi o te Tamana.

15Na molimau ia Ioane e uiga kia te ia, ma nae taukalaga vēia, “Ko tēnei te tino na lea atu ai au, i toku lea atuga vē, ‘E hau mulimuli ia ia te au, kae e hili lele atu ia i lo au, auā na iei ia ka ko hēki fānau mai au.’ ”

16Ona ko te lahi o tona alofa tūnoa, kua fakamanuia ai kitātou uma e ia, ma maua ai e kitātou nā fakamanuiaga hautualahi. 17Ko nā Tūlāfono, na tuku mai e te Atua kui mai ia Mohe; kae ko te alofa tūnoa ma te meamoni, na kui mai ia Iehu Keliho. 18E hēai he tino na kua ia kitea te Atua. Ka ko te Ataliki e toka tahi e nofo i tafa o te Tamana, ko ia te kua ia fakailoa maia te Atua.

Ko te Molimau a Ioane te Papatiho

(Mat 3.1-12; Mlk 1.1-8; Luk 3.1-18)

19Ko tēnei te molimau a Ioane, i te uga atuga e nā takitaki Iutaia i Ieluhalema ni ohitāulaga ma ni tino ha-Levī ke fehili vē ki ei, “Ko ai koe?”

20E hēki fakafiti ia Ioane ke tali ki ei, kae kua fakamanino lelei lava e ia kia te kilātou, i te leaga vē ki ei, “E hē ko au te Mehia.”

21“Ko ai la koe?” kua fehili vē mai kilātou. “Ko koe nei ko Elia?”

“Hēai, e hē ko au,” na tali atu ai ia Ioane.

“Ko koe nei la ko te Pelofeta?”#1.21 te pelofeta E tokalahi nā tino Iutaia nae fakatalitali ke uga mai e te Atua he pelofeta e vē ko Mohe (kikila ki te Teutelonome 18.15,18), ma nae fakamoemoe e ia fakailoa maia te haele mai o te Mehia kua lea mai ai kilātou.

“Hēai,” na tali atu ai ia Ioane. #Teu 8.15, 18; Mal 4.5

22“Taku mai la kia te kimātou pe ko ai koe,” na toe lea mai ai kilātou. “E tatau ke olo kimātou ma he tali ki nā tino na uga maia kimātou. Lea mai ake pe ko ai koe?”

23Ka kua tali atu ia Ioane i nā kupu a te pelofeta ko Ihaia:

“Ko au ‘ko te leo o he tino e taukalaga i te vao,

fakahakohako te auala o te Aliki!’ ” #Iha 40.3 (LXX)

24Ko nā kavefekau na uga atu e te kau Falehaio,#1.24 Ko nā… kau Falehaio pe Ko kilātou na uga atu, ni Falehaio 25kua fehili vē mai kia Ioane, “Heā la te papatiho ai e koe nā tino kāfai ko koe e hē ko te Mehia, pe ko Elia pe ko te Pelofeta?”

26Na tali atu ia Ioane, “E kō papatihoa koutou i te vai, kae e i kinā ia te koutou he tino, e hē koutou iloa. 27E mulimuli mai ia ia te au, kae e hē aogā au ke tatala e au ona hēvae.”

28Ko nā talatalanoaga iēnei, nae fai i Petania i te itū i hahae o te Vaitafe ko te Iolitana, te mea nae fai ai te papatihoga a Ioane.

Ko te Punuāmāmoe a te Atua

29I te aho alafaki na kitea atu ai e Ioane ia Iehu nae āgai mai kia te ia, oi na lea atu ai vē, “Kikila, tēia te Punuāmāmoe a te Atua e kave kehe e ia, ia agahala a te lalolagi! 30Ko tēnei te tino na lea atu ai au, i toku lea atuga vē, ‘E iei he tino e mulimuli mai ia te au, kae e hili lele atu ia i lo au, auā na iei ia ka ko hēki fānau mai au.’ 31Nae hē kō iloa pe he tino vēhea, kae ko au na hau ke papatiho i te vai, kae ke fakailoa atu ai ia, ki tagata o Ihalaelu.”

32Ma na fai ai te takutinoga tēnei a Ioane: “Na kitea e au te Agaga Paia e fanaifo mai te lagi e vē he lupe, ma na nofo ai i ona luga. 33Nae hē kō iloa pe he tino vēhea, kae ko te Atua, na ia uga maia au ke papatiho i te vai, na vāgana vē mai kia te au, ‘Ka kitea e koe te Agaga e fanaifo oi nofo i luga o he tino; ko ia tēnā te ia papatihoa i te Agaga Paia.’ 34Kua kitea e au,” na lea vēnā atu ia Ioane, “ma e lea atu au kia te koutou, ko ia tēnei ko te Ataliki o te Atua.”

Ko nā Hoko Muamua o Iehu

35I te aho alafaki, na toe tū ai foki ia Ioane i kinā fakatahi ma ona hoko e toka lua, 36ma i te ia kitea atuga o Iehu e havali ake, oi na lea ai vē, “Kikila, tēia te Punuāmāmoe a te Atua!”

37Na lagona atu e nā hoko e toka lua o ia te mea tēnei, oi na olo ai kua mulimuli kia Iehu. 38Kua liliu mai ki tua ia Iehu, oi na ia kitea ai te toka lua e mulimuli ake kia te ia, oi na fehili vē atu ai ki ei, “Heā ta koulua e hakili?”

Na tali mai kilāua, “Lāpi, ko koe e nofo i fea?” (Ko te uiga o te kupu tēnei, “Te Faiākoga.”)

39“Ōmamai oi kikila,” na tali atu ai ia Iehu. I te taimi tēnā kua ta te fa i te afiafi. Oi na olo ai te toka lua ma Iehu, ma kua kitea e kilāua te mea nae nofo ai Iehu, ma na nonofo ai lava fakatahi ma ia i kinā, i te aho tēnā.

40Ko tētahi o kilāua iēnei, ko Anitelea, te uho o Himona Petelu. 41Na maua muamua e ia tona uho ko Himona, oi na lea vē atu ai ki ei, “Kua maua e kimāua te Mehia” (Ko te uiga o te kupu tēnei “Keliho.”) 42Oi na kave ai e ia ia Himona kia Iehu.

Kua kikila atu ia Iehu kia Himona, oi na vāgana atu ai ki ei, “Ko te igoa o koe ko Himona te ataliki o Ioane, kae ko koe ka fakaigoa kia Kefa.” (Ko he kupu i te gagana Alamaika e tutuha ma te igoa Petelu i te gagana Eleni, ko tona uiga “papa.”)

Kua Kalaga ia Iehu kia Filipo ma Natanielu

43I te aho alafaki, na tonu ai ia Iehu ko ia ka fano ki Kalilaia. Na maua atu e ia ia Filipo, oi na lea vē atu ai ki ei, “Mulimuli mai kia te au.” 44Ko Filipo e hau mai Petehaita, te kakai e nonofo ai ia Anitelea ma Petelu. 45Kua maua e Filipo ia Natanielu, oi na lea atu ai ki ei, “Kua maua e kimātou te tino na lea ai ia Mohe i te tuhi o te Tūlāfono, ma na tākua foki i nā tuhituhiga a te kau pelofeta. Ko Iehu tona igoa, te ataliki o Iohefa mai Nahaleta.”

46“Kogā nei e iei he mea lelei e mafai ke hau mai i Nahaleta?” Na lea vēnā atu ia Natanielu.

“Hau oi kikila,” na tali mai ai ia Filipo.

47I te kitea atuga e Iehu ko Natanielu e hau kia te ia, oi na lea vē atu ai, “Kikila, he Ihalaelu moni tēnei; he tino e hē mafai ke pepelo!”

48Oi na fehili atu ai ia Natanielu kia Iehu, “Na kē iloa vēhea au?”

Na tali mai ia Iehu, “Na kō kitea koe i lalo o te mati, ka ko hēki kalaga atu ai ia Filipo kia te koe.”

49“Te Faiākoga,” kua tali atu ia Natanielu, “ko koe ko te Ataliki o te Atua! Ko koe ko te Tupu o Ihalaelu!”

50Oi na vāgana atu ai ia Iehu kia te ia, “Ko koe nei kua talitonu ona ko au na lea atu, na kō kitea koe i lalo o te mati? Ka kitea e koe nā mea e tutupu, e hili lele atu te ofōfogia i lo te mea tēnei!” 51Ma na toe lea vē atu ia Iehu, “E takutino atu e au kia te koutou te meamoni; ka kitea e koutou te lagi e matala, ma nā āgelu a te Atua e ōake ki luga ma ōifo ki lalo i luga o te Ataliki o te Tagata.”#1.51 e ōake ki… o te Tagata I te vili kehega o Iakopo (kikila ki te fuaikupu 47) mai tona uho ko Ehau, na ia kitea i hana miti, nā āgelu e ōake ki te lagi ma ōifo ki te lalolagi i he kākega (kikila ki te Kenehe 32.22-32) #Ken 28.12

Currently Selected:

Ioane 1: TOKU

Highlight

Copy