Ehoto 30
30
Te Fata Faitāulaga e Huhunu ai nā Meamanogi
(Eho 37.25-28)
1“Fau he fata faitāulaga i te lākau ko te hitahi, ke huhunu ai nā meamanogi. 2E fakatāfafā, e 45 henitimita te loa, 45 henitimita te lauefa, ma iva hefulu henitimita te maualuga. Ko ona nifohua i nā tulimanu e vane i te lākau lava e fokotahi e fau ai, ma e kavea ai ko he mea e fokotahi. 3E tatao i te aulo mamā ia luga o te fata ma ona itū e fa, ma vēnā ma ona nifohua; ma e fai foki ni teuteu aulo e fakatakamilo ai. 4Fai ni mama aulo e lua ke hiki ai ma fakapipiki ki lalo o nā teuteu i nā itū e lua, ke hulu ki loto nā amo e hiki ai. 5Fai nā amo iēnei i te lākau ko te hitahi ma tatao i te aulo. 6Oi tuku ai te fata faitāulaga tēnei ki mua o te kiepupuni tēia e tautau i luga ake o te Puha o te Feagaiga, i mua o te tāpuni.#30.6 Pe nofoa o te alofa fakahao Ko kinā te ka fetaui ai au ma koe. 7I tāeao o aho taki tahi uma kāfai ia Alona e hau oi hāuni nā lāmepa, e huhunu ai foki e ia nā meamanogi i te fata faitāulaga tēnei. 8E tatau ke fai e ia te mea foki lava tēnei, kāfai e ia tutua nā lāmepa i te afiafipō. Ko te tāulaga meamanogi tēnei e fakatino pea lava i mua o te Aliki, e augā tupulaga uma lele. 9E hē kē ofo atua i luga o te fata faitāulaga tēnei, ni tāulaga meamanogi e fakahā, pe ni tāulaga mū, pe ni tāulaga haito, ma nahe liligia foki ni tāulaga uaina ki luga. 10E fakafokotahi i te tauhaga oi fai e Alona te hāuniga mo te fakamamāgia o te fata faitāulaga; e vali ai nā nifohua i nā tulimanu i te toto o te manu e fai ai te tāulaga mo nā agahala. Ko te mea tēnei e fai i tauhaga takitahi uma lava. Ko te fata faitāulaga tēnei e hili atu te paia kia te au, te Aliki.”
Te Lāfoga mo te Falekie Tapu
11Kua vāgana mai te Aliki kia Mohe, 12“Kāfai e fai e koe he tuhigā igoa o tagata o Ihalaelu, ko nā tino tau toka tahi uma e totogi mai kia te au he tau mo tona ola, kae ke hē pakū ai ki ona luga he mala i te taimi o te tuhigā igoa. 13#Eho 38.25-26; Mat 17.24Ko nā tino uma e lehitala mo te tuhigā igoa, e tatau ke totogi e kilātou tau toka tahi he āfa hēkeli#30.13 Ko te hēkeli ko he fuamamafa e maua te 11.5 kalama. E tutuha ma te 20 kelaha hiliva e tuha ai ma te fua māhani o te nofoaga paia. Ko tagata uma e tatau ke totogia te tupe tēnei ke fai ma tāulaga kia te au. 14Ko nā tino uma kua lehitala mo te tuhigā igoa—nā tino kua lua hefulu tauhaga pe hili atu, ka totogi mai e kilātou te tupe tēnei kia te au. 15Ko te tino maukoloa e hē hili ake tana tupe e totogi, e vēnā foki te tino mativa, e hē pakū ifo tana tupe e totogi, kāfai e totogi mai e kilātou kia te au te tupe tēnei mo o lātou ola. 16Ao te tupe tēnei mai nā tino Ihalaelu uma lele, ma fakaaogā mo te kikilaga o te Falekie Tapu e afio ai au. Ko te lāfoga tēnei e mo te totogiga mo nā ola o kilātou, ma ka manatua ai e kilātou ko o lātou ola e āku.”
Te Tānoa Apamemea
17Kua vāgana te Aliki kia Mohe, 18#Eho 38.8“Fai he tānoa apamemea vēnā ma hona tūlaga apamemea. Fakatū i te vā o te Falekie ma te fata faitāulaga, ma tuku ni vai ki loto. 19E fakaaogā e Alona ma ona ataliki te vai ke fufulu ai o lātou lima ma o lātou vae, 20ka ko hēki ulu atu kilātou ki loto o te Falekie Tapu, pe ōatu ki te fata faitāulaga ke ofo mai he meālofa meakai i te afi. Oi ka hē tāmatea ai kilātou. 21E tatau ke fufulu o lātou lima ma o lātou vae, kae ke hē mamate ai kilātou. Ko te folahaga tēnei e tatau ke mulimuli pea lava kilātou ma o lātou lāpuna ki ei, ke pa ki te hēgata.”
Te Lolo Fakauku
22 #
Eho 37.29
Kua vāgana te Aliki kia Mohe, 23“Kave nā mea fakamanogi meakai e hili te manogi—e ono kilokalama o te mulo kua fakaliu, e tolu kilokalama o te kinamona manogi, e tolu kilokalama o te mutiavai manogi lelei, 24ma te ono kilokalama o te kahia (e tuha ai ma te fua māhani o te hēkeli i nofoaga paia), ma fakaopōpo ki ei he fa lita o te lolo olive, 25ma fai ai e koe i nā mea iēnei he lolo fakauku e tapu, e palu e vē ko te gaohiga o te hauhau. 26Fakaaogā te lolo tēnei ke fakauku ai te Falekie Tapu e afio ai au, te Puha o te Feagaiga, 27te laulau ma ona kope e hāuni ai nā tāulaga, te tūgālāmepa ma ona kope, te fata faitāulaga e fakamū ai nā meamanogi, 28te fata faitāulaga e huhunu ai nā tāulaga mū, fakatahi ma ona kope uma lele, ma te pēhini fafano ma tona tūlaga. 29E fakapaia e koe nā mea iēnei ke paia kātoatoa, ma ko ho he mea e paki atu ki ei, ka paia ai foki. 30Oi fakauku ai e koe ia Alona ma ona ataliki ke kavea ma ohitāulaga, ke tautua mai kia te au. 31E lea atu foki koe ki te fakapotopotoga a Ihalaelu vēnei, ‘Ko te lolo tēnei ka kavea ma aku lolo fakauku paia i augā tupulaga uma o koutou. 32E hē fakaaogā lele mo te ukuga māhani o te tino, ma e hē fakaaogā foki nā mea e fai ai te lolo tēnei, ke fai ai ni iētahi itūkāiga lolo. E paia, ma ke vēnā foki oi paia kia te koutou. 33Ko ai lava e ia faia he lolo vēnei, pe ia fakaaogā ki hētahi tino e hē ko he ohitāulaga, ka hē toe takua ia ko hētahi o oku tagata.’ ”
Nā Meamanogi
34Kua vāgana te Aliki kia Mohe, “Kave ni vāega tutuha takitahi o nā mea fakamanogi meakai iēnei—te pulu natapa, te hekeleta, te pulu helepena, ma te pulu lipano mamā. 35E fakaaogā nā mea iēnei ke fai ai nā meamanogi, e palu e vē ko nā mea fakamanogi. E tuku ki ei te māhima ke tūmau ai tona mamā ma tona paia. 36Tuki he vāega o ia ke fai ma pauta, oi kave ai ki loto o te Falekie Tapu e afio ai au, ma hauhau ai ia mua o te Puha o te Feagaiga. Ka kavea te meamanogi tēnei ko he mea e hili te paia kia te koutou. 37Nahe fakaaogā e koutou te paluga o te meamanogi tēnei, ke fai ai ni autou hauhau vēnā mo koutou lava. Ka kavea te mea tēnei ko he mea kua fakatō mo oku. 38Kāfai he tino e ia faia he meamanogi vēnei ke fakaaogā e vē he hauhau, ka hē toe takua te tino tēnā ko hētahi o ōku tagata.”
Currently Selected:
Ehoto 30: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
