Ehoto 28
28
Nā Kofu o nā Ohitāulaga.
(Eho 39.1-7)
1“Kaumai ia Alona te uho o koe, ma ona ataliki ko Natapu, ko Apihu, ko Eleahala, ma Itamala. Ko kilātou iēnei e fakatō mai tagata Ihalaelu, ke fai ma ohitāulaga e kaukauna mai kia te au. 2Fai ni kofu tapu mo tō uho ko Alona, ke mamalu ai ia ma gali i te kikila ki ei. 3Fakamāopōpo mai nā tino iēia kua kō fōkia ki ei te tomai, ma lea ki ei ke hui nā kofu o Alona, kae ke fakauku ai ma ohitāulaga ke kaukauna mai kia te au. 4Ko nā kofu tapu iēnei e hui e kilātou: he punifatafata, he efota, he kofuloloa, he kofutino lalaga, he faufautū, ma he fuhipaku kie. Ko nā lākei tapu iēnei mo tō uho ko Alona ma ona ataliki, ke tautua mai ai kilātou kia te au i nā tofi ohitāulaga. 5E fakaaogā e nā tino popoto hui kofu nā vulu lanu aulo, lanu moana, lanu violē, ma lanu kukula, ma nā kie lino e hili te lelei.
Te Efota
6“E fai e kilātou te efota i nā vulu lanu moana, lanu violē, lanu kukula, ma te lanu aulo, ma i te kie lino e hili te lelei. 7Ko nā paave e lua e kui i luga o nā takuau, e hohoko ai te pito ki mua ma te pito ki tua. 8E fai ma he fuhipaku kie e lalaga fakalelei i nā mea foki lava iēnei, ma e fakapipiki ki te efota ke kavea ai ko he mea e fokotahi. 9Kave ni fatu hatonike e lua ma vane ki luga nā igoa o nā ataliki e toka hefulu lua o Iakopo, 10e fakaholo ifo i te ulumatua. E ono ia igoa i tētahi fatu ma ono i tētahi. 11Vane ki luga o nā fatu e lua e vē oi vane e he tino tipi fatu mānanaia, nā igoa o nā ataliki o Iakopo, ma fai ni tūlaga mo nā fatu i te aulo. 12Fakamau nā fatu mānanaia iēnei ki nā paave o te efota ke hui ai nā puikāiga e hefulu lua o Ihalaelu. I te faiga tēnei, ka taukave ai e Alona o lātou igoa i ona takuau, kae ke manatua ai pea e au, te Aliki, oku tagata. 13Fai ni tūlaga aulo e lua, 14ma ni filifili e fai i te aulo mamā, oi milo ai e vē ni maea ma fakapipiki ki nā tūlaga.
Te Punifatafata
(Eho 29.8-21)
15“Fai he punifatafata mo te Ulu Ohitāulaga, ke fakaaogā i te hakiliga o te finagalo o te Atua. E fai foki lava i nā mea na fai ai te efota, ma e vēnā foki oi hui ni teuteu ki luga. 16E fakatāfafā ma gagau tualua, e 22 henitimita te loa ma 22 henitimita te lauefa. 17Fakapipiki ki luga ni atu fatu tāua e fa. I te atu muamua, e fakapipiki ki ei he lupi, he topahi ma he kalaneti; 18i te atu e lua, he himalato, he hafilo, ma he taimani; 19i te atu e tolu, he huakito, he aketoni, ma he ametuto; 20ma i te atu e fa, he pelulo, he hationu ma he iahepi. Ko nā fatu tāua#28.17-20 Ko nā fatu tāua iēnei e 12 e hē mautinoa pe ni fatu vēhea iēnei e fakapipiki ki luga o ni tūlaga aulo. 21Ko nā fatu tāua takitahi iēnei e hefulu lua, e vane ki luga te igoa o he ataliki e fokotahi o Iakopo, ke fai ma hui o nā puikāiga o Ihalaelu. 22Mo te punifatafata, fai ni filifili i te aulo mamā, e fifili e vē ni maea. 23Fai ni mama aulo e lua ma fakapipiki ki nā tulimanu e pito ki luga o te punifatafata, 24ma nonoa nā filifili aulo e lua ki nā mama aulo e lua. 25Nonoa iētahi pito e lua o nā filifili ki nā tūlaga e lua, ma i te faiga tēnei, e fakamau ki mua ki nā paave o te efota. 26Oi fai ai ni mama aulo e lua ma fakapipiki ki nā tulimanu i te itū ki lalo o te punifatafata, i te pito ki loto e hohoko ki te efota. 27Fai ni iētahi mama aulo e lua, ma fakamau ki te itū ki lalo, i mua o nā paave o te efota, i tafa o te hokoga ma i luga ake o te fuhipaku kie kua lalaga fakalelei lele. 28Nonoa nā mama o te punifatafata ki nā mama o te efota i he līpine lanu moana, kae ke tātia tonu ai te punifatafata i luga ake o te fuhipaku kie, ma ke nahe matala lele ai.
29“Kāfai ia Alona e ulu atu ki loto o te Nofoaga Paia, ka kofu e ia te punifatafata kua vane ki luga nā igoa o nā puikāiga o Ihalaelu, kae ke manatua ai pea e au, te Aliki, e oku tagata. 30#Nūm 27.21; Teu 33.8; Ehe 2.63; Nem 7.65Tuku te Ulima ma te Tumima#28.30 Ulima ma te Tumima Ni mea e lua nae fakaaogā e te ohitāulaga ke hakili ai te finagalo o te Atua; e hē manino lelei pe nae vēhea oi fakaaogā nā mea iēnei ki loto o te punifatafata, kae ke taukave ai e Alona, kāfai e hau ki loto i te mea e iei ai au. I nā taimi vēnā, e tatau ke kofu i taimi uma lava tona punifatafata, kae ke ia mafaia ai oi fai he tonu e tuha ai ma te mea e finagalo au ki ei, mo nā tino Ihalaelu.
Iētahi Kofu Ohitāulaga
(Eho 39.22-31)
31“Ko te kofuloloa e kofu pito ki loto o te Efota, e fai kātoa i te vulu lanu moana. 32Fai he pū mo te ulu, e fakamākeke i he meakie lalaga e fakatāmilo ai kae ke nahe gahae. 33Ko te fele o te kofuloloa e hui ki ei nā līmoni#28.33 līmoni He fuālākau kaina mai te lākau e igoa foki lava i te igoa tēnei i nā vulu lanu moana, violē ma kukula, ma e fakapipiki fakavāvā ki ei ni logo aulo. 34Ko nā logo aulo ma nā līmoni e fakavāvā fakatāmilo i te fele o te kofu. 35E kofu e Alona te kofuloloa tēnei kāfai e tautua i tona tiute ohitāulaga. Kāfai e hau ki te mea e iei au i loto o te Nofoaga Paia, pe kāfai foki ka toe fano ki fafo, ka lagona te tagitagi o nā logo, ma ka hē tāmatea ai ia.
36“Fai he fakatuha o he tiale i te aulo mamā, ma vane nā kupu iēnei ki luga e vē ona vane he mama fakamau fakailoga, ‘Kua Fakatō mo te Aliki.’ 37Fakamau te tiale ki mua o te faufautū i he līpine lanu moana. 38Ko te tiale e tuku ki te muāulu o Alona, kae ke talia ai e au, te Aliki, nā meālofa paia kua ofo mai e tagata Ihalaelu kia te au, e tuha lava pe kāfai nae iei ni hehē o tagata i te ofo maiga e kilātou.
39“Lalaga he kofutino ma he faufautū mo Alona i te kie e hili te lelei, ma he fuhipaku kie e hui ki ei ni teuteu.
40“Mo nā ataliki o Alona, fai ni o lātou kofutino, ni fuhipaku kie, ma ni pūlou ke mamalu ma ke gali ai kilātou i te kikila. 41Fakakofu ia Alona, te uho o koe, ma ona ataliki, i nā kofu iēnei, oi fakauku ma fakapaia ai kilātou i te lolo olive, kae ke mafai ai ke tautua mai kilātou kia te au i nā tofi ohitāulaga. 42E fai foki ma ni o lātou kofuvaeloto i te kie lino, e fanaifo mai te taugātiti ki luga ake o nā tulivae, ke malu lelei ai o lātou tino. 43E tatau ke kokofu ia Alona ma ona ataliki i nā kofu iēnei i taimi uma e olo ai ki loto o te Falekie Tapu e afio ai au, pe kāfai foki e ōmamai ki te fata faitāulaga ke tautua ai i o lātou tofi ohitāulaga i loto o te Nofoaga Paia, kae ke hē hala ai kilātou ma feoti ai. Ko te folahaga tēnei e tūmau pea lava mo Alona ma ona lāpuna e mulimuli mai ia te ia.
Currently Selected:
Ehoto 28: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
