Ehoto 22
22
Nā Tūlāfono fakatatau ki te toe Totogi Atu
1“Kāfai he tino e kaihohoa e ia he pōvi pe he māmoe, ma tāmate e ia, pe fakatau atu foki, e toe totogi e ia i he lima o pōvi mo te pōvi e fokotahi, ma i he fa o māmoe mo te māmoe e fokotahi.
2-4“E tatau ke totogi e ia mo nā mea na kaihohoa e ia. Kāfai e hēai ni ana meatōtino, e tatau ke fakatau atu ke fai ma pologa ke totogi ai mo nā mea na kaihohoa e ia. Kāfai te manu na kaihohoa, pe he pōvi, he āhini, pe ko he māmoe, e maua koi ola, e tatau ke lua ia manu e totogi e ia mo te manu e fokotahi.
“Kāfai he tino e hao ki loto o he fale i he pō ke kaihohoa, ma e oti ina kua kini e tē tino e ona te fale, ko te tino na ia tāmatea e hē hala. Kae kāfai na tupu te mea tēnei i te ao, e hala la ia i te tāmate tino.
5“Kāfai he tino e fakataga e ia ana manu ke kakai i te vao i he fātoaga pe i loto o he tōvine, pe ia tukua tana lafumanu ke kakai i he fenua o hētahi tino, e tatau ke totogi e ia mo te fakaaogāga e ia o nā fenua o iētahi tino, mai nā fua e hili te lelei o tona fātoaga pe o tona tōvine.
6“Kāfai e hahao he afi ma hoholo atu mai nā lākau tālatala ki te fenua o hētahi tino, ma mū uma ai te haito kua fakaputu pe ko te haito ko hēki helehelea, e tatau ke totogi e te tino na ia tutua te afi, mo nā mea kua fakakino.
7“Kāfai he tino e malie ke ia tāofia ni tupe ma iētahi mea tāua ma taugatā a hētahi tino, ma e kaihohoa nā mea iēnei mai tona fale, kāfai te tino kaihohoa e maua, e fakaluaina te mea ka ia toe totogia. 8Kae kāfai te tino kaihohoa e hē maua, ko te tino e o ia te fale e tatau ke kave ki mua o te Atua,#22.8 te Atua pe nā fakamahino ke iloa ai pe na ia kavea nā koloa a tona tuākoi.
9“I ho he mōliaga e fakatatau ki te tino moni e ā ia ni meatōtino, e vē ko he pōvi, he āhini, he māmoe, ni kofu, pe ni iētahi lava mea e gagalo, ko te toka lua e āfia i te mōliaga e tatau ke olo ki mua o te Atua.#22.9 te Atua pe nā fakamahino Ko te tino o kilāua e fakailoa mai e te Atua e hala, e tatau ke fakaluaina te mea e ia totogia ki tētahi tino.
10“Kāfai he tino e malie ke ia tauhia he āhini, he pōvi, he māmoe, pe ko hētahi manu a tona tuākoi, ma kua mate te manu pe kua lavea, pe kua kaihohoa kae e hēki kitea e he tino, 11e tatau te tino tēnā ke fano ki mua o te Aliki oi fai hana tautōga e hēki kaihohoa e ia te manu a tona tuākoi. Kāfai te manu e hēki kaihohoa, e tatau ke talia e te tino e ā ia, ko tana manu kua galo ma e hē totogia akea e tētahi tino he tupe kia te ia; 12kae kāfai te manu na kaihohoa, e tatau la ke kave e te tino na ia tauhia te manu ki tē e ā ia te manu, he totogi-taui mo tana manu kua kaihohoa. 13Kāfai na tāmate e ni manu fekai, e tatau ke kaumai e te tino nā mea na totoe ke fai ma fakamāoniga, ma e hēai he totogi-taui mo te manu na tāmate e nā manu fekai.
14“Kāfai he tino e fakaaogā e ia he manu a hētahi tino mo he taimi, ma e lavea te manu pe mate kae e hē iei te tino e ā ia, e tatau ke fōki e ia he totogi-taui e kātoatoa ki te tino e ā ia, mo tana manu kua mate. 15Kae kāfai e tupu te mea tēnei kae e i kinā te tino e ā ia te manu, oi e hēai la he totogi-taui e kavea ki ei. Kāfai te manu na totogi mo te fakaaogāga, e lava lava i te tupe kua totogi mo tona fakaaogāga, ke toe totogi ai mo tona mate.
Nā Tūlāfono mo Aho uma o te Olaga
16 #
Teu 22.28-29
“Kāfai he tamāloa e fakavalea e ia he tautiti tāupou e hēki fakamau ke āvaga, ke momoe ma ia, e tatau ke totogi e ia te tau o te teine fakaipoipo ma fakaipoipo ki ei. 17Kae kāfai te tamana o te tautiti e muhu oi tuku tona afafine ke fakaipoipo ma te tamāloa, e tatau ke totogi e te tamāloa ki te tamana he tupe e tutuha ma te tau o he teine fakaipoipo tāupou.
18 #
Teu 18.10, 11 “Tāmate ho he fafine e ia faia ni mea fakataulāitu.
19 #
Lev 18.23; 20.15-16; Teu 27.21 “Tāmate ho he tamāloa e uhu ki he manu.
20 #
Teu 17.2-7
“Ko ai lava e ofo atua ni tāulaga ki hētahi atua e kehe ai mai te Aliki, e tatau ke matuā fakatāugāgia lava.
21 #
Eho 23.19; Lev 19.33-34; Teu 24.17-18; 27.19 “Nahe koutou fakahāuā pe fai kino ki tagata nukukehe; ke manatua ko koutou nae fai ma tagata nukukehe i Aikupito. 22Nahe koutou fakamāhiahia ho he fafine kua oti tana tāne, pe he tamāmanu. 23Kāfai e koutou faia te mea tēnā, ko au, te Aliki, ka tali kia te kilātou, kāfai e tagi mai kilātou kia te au mo he fehoahoani, 24ma ka mū ai toku tōkahā, ma tāmate ai koutou e au i te pelu. Oi ka kavea ai nā āvaga a koutou ma āvaga tukua, ma nā fānau a koutou ma tamāmanu.
25 #
Lev 25.35-38; Teu 15.7-11; 23.19-20 “Kāfai e fōki ni au tupe ke kaitālafu e ōku tagata e mātitiva, nahe kē fakaopōpoa he tupe ola ki te kaitālafu e vē ko nā tino fai pihinihi. 26#Teu 24.10-13Kāfai e kē kavea he kofutatao o he tino ma tāmau mo tana kaitālafu, e tatau ke toe fōki e koe kia te ia ka ko hēki goto te lā, 27auā oioti ai lava te mea e tatao ai tona tino. Heā hētahi mea ke fakamāfanafana ai ia kāfai e moe? Ma kāfai ka tagi mai ia kia te au mo he fehoahoani, ka tali au kia te ia, auā ko au e agaalofa.
28 #
Gāl 23.5
“Nahe kē tautala i ni kupu mātagā e uiga ki te Atua,#22.28 te Atua pe nā fakamahino nahe kē fetukua foki he takitaki o tō nuku.
29“Nahe tuai lele oi ofo mai au tāulaga haito, uaina, ma te lolo olive, i nā taimi e tatau ke ofo mai ai.
“Ko nā ulumatua tama a nā ataliki o koutou e fōki mai e koutou kia te au.
30“E tatau foki ke kaumai e koutou kia te au nā ulumatua a nā pōvi ma a nā māmoe a koutou. Tuku ke fakatahi ma nā mātua o kilātou i ni aho e fitu, oi kua ofo mai ai kia te au i te valu o aho.
31 #
Lev 17.15
“Ko koutou ka kavea ma oku tagata kua fakapaiagia. Ko te mea la ia, ko koutou e hē tatau ke kakai ki ni kanofi o ni manu na tāmate e ni manu fekai; e tatau ke togi e koutou nā mea iēnā ki nā maile.
Currently Selected:
Ehoto 22: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
