Ehoto 18
18
Kua Āhiahi ia Ietelo kia Mohe
1Kua fakalogo ia Ietelo te ohitāulaga o Mitiana, ma ko te tamana foki ia o te āvaga a Mohe, ki nā mea uma na fai e te Atua mo Mohe ma nā tino Ihalaelu, i te takitaki kehega o tagata Ihalaelu e te Aliki mai Aikupito. 2#Eho 2.21-22Oi na hau ai ia Ietelo kia Mohe ma kaumai ia Hīpola te āvaga a Mohe, tēia na tuku e Mohe kae fano, 3#Gāl 7.29fakatahi ma ona ataliki e toka lua. Ko te igoa o tētahi ko Kelehoma (auā na vē ake ia Mohe, “Ko au he tino nukukehe i te fenua tēnei”#18.3 Kelehoma Ko te igoa tēnei e tāli vē te fakaleoga ko te kupu Epelu mo te tino kehe.) 4ka ko te igoa o tētahi, ko Eliehe,#18.4 Eliehe Ko te igoa tēnei e tāli vē ko te fakaleoga o te kupu Epelu mo ko te Atua ko toku fehoahoani (auā na vē ake ia Mohe, “Ko te Atua o toku tamana ko toku fehoahoani ia, ma na ia fakahaoa au mai te pelu a te tupu ko Falao”). 5Kua fano ia Ietelo ki te vao, ko ia ma te āvaga ma nā ataliki e toka lua o Mohe, kua olo ki te mea kua fakatū ai te api a Mohe i te mauga o te Atua. 6Na kave ai te faifekau a Ietelo kia Mohe e vē, “Ko au ma tau āvaga, ma ō ataliki e toka lua, e ōatu kia te koe.” 7Oi fano ai ia Mohe ki fafo oi feiloaki ma te tamana o tana āvaga. Kua ifo atu ma hogi kia te ia, ma fetau fehilihili ki te tūlaga e iei te ola mālōlō o kilāua tau toka tahi, ma na olo ai loa ki loto o te falekie. 8Na taku e Mohe kia Ietelo nā mea uma na fai e te Aliki ki te tupu ko Falao ma ki nā tino Aikupito, kae ke fakahao ai ia tagata Ihalaelu. Na vēnā foki oi ia takua ki ei nā mea faigatā uma na fetaiaki ma kilātou i to lātou auala, ma te lāveakiga o kilātou e te Aliki. 9Na fiafia lele ia Ietelo i te fakalogo atuga ki nā mea lelei uma kua fai e te Aliki mo tagata Ihalaelu, i te lāveakiga e ia o kilātou mai nā tino Aikupito. 10Kua lea ia Ietelo, “Ke vīkia te Aliki, tē na ia lāveakia koe mai nā tino Aikupito, ma mai te tupu ko Falao. 11Kua iloa e au i te taimi nei, ko te Aliki e hilihili lele atu tona mālohi i lo iētahi atua uma, auā kua ia lāveakia ia tagata Ihalaelu mai nā tino Aikupito.” 12Oi na kaumai ai e Ietelo, te tamana o te āvaga a Mohe, he tāulaga mū ke huhunu uma fakatahi ma iētahi tāulaga ki te Atua; ma na ōmamai ai ia Alona ma nā takitaki uma o Ihalaelu, oi kakai fakatahi i te kaiga ma te tamana o te āvaga a Mohe, i mua o te Atua.
Te Tofiga o nā Fakamahino
(Teu 1.9-18)
13I te aho na hohoko ai, na nofoia ai e Mohe te nofoa fakamahino mai te tāeao ke pa ki te pō, ke tukutuku tonu nā fekehekeheakiga i te vā o tagata, kae ko nā tino kua tutū fakatakamilo ia te ia. 14Kua kitea e Ietelo nā mea uma a Mohe nae fai, oi na lea vē atu ai kia Mohe, “Niā kō ta koe e fai ki nā tino? Heā te fai tautahi ai e koe nā mea uma iēnā, kae tutū tauānoa atu ia tagata fakatakamilo ia te koe, mai te tāeao ki te pō?”
15Na tali mai ia Mohe, “E tatau ke kō faia nā mea iēnei, auā ko nā tino e ōmamai kia te au kae ke kilātou iloa e uiga ki te mea e fofou ki ei te Atua. 16Kāfai e iei ni fekehekeheakiga i to lātou vā, e ōmamai kia te au, ma fai ai e au te tonu pe ko ai te hako, ma fakailoa kia te kilātou nā fakatonuga ma nā tūlāfono a te Atua.”
17Kua lea atu ia Ietelo, “Ko te mea a koe e fai e hē lelei. 18E hē mataloa nei ko koe ma nā tino iēnei ka fifiu lele. Auā ko te gāluega e lahi ātili lele ke fai e koe tautahi. 19Fakalogo mai la ke kavatu haku fautuaga kia te koe, ma ke fakatahi te Atua ma koe. E tatau koe ke fai ma hui o nā tino i mua o te Atua, ma tuku atu e koe nā mea e fekehekehe ai kilātou, ki te Atua. 20Akoako kia te kilātou nā vāiniuga ma nā fakahinoga a te Atua, ma fakailoa ki ei te olaga e tatau ke ola ai, ma nā mea e tatau ke fai e kilātou. 21Ma ka filifili foki e koe ni tino e lelei i te faiga o nā gāluega ma e mātataku i te Atua; ni tino e fakamoemoegia, ma hē kilātou taliagia ni mea e maua i ni auala pikopiko. Tofi nā tino vēnei ke fai ma takitaki o nā taki toka afe, nā taki toka helau, nā taki toka lima hefulu ma nā taki toka hefulu. 22Ka kavea kilātou ma fakamahino tūmau mo tagata. E mafai ke kaumai e kilātou nā fakamahinoga faigatā kia te koe, kae fai e kilātou nā fakaikuga o iētahi fakamahinoga. Ka faigōfie lele ai mo koe, auā ka taukave fakatahi e koutou te kavega a koe. 23Kāfai e kē faia e vē oi fakatonu atu ai koe e te Atua, oi ka hē fiu lele ai koe i te gāluega, ma ko nā tino foki ka olo ki o lātou kāiga ma o lātou loto kua fakamaliliegia.”
24Na uhitaki ia Mohe ki te fautuaga a te tamana o tana āvaga, ma na fai uma e ia nā mea na lea ake ai kia te ia. 25Na filifili e Mohe ni tino e lelei i te faiga o nā gāluega, mai tagata Ihalaelu uma, ma tōfia kilātou ma takitaki o nā taki toka afe, nā taki toka helau, nā taki toka lima hefulu ma nā taki toka hefulu. 26Ma na fai ai kilātou iēnei ma fakamahino tūmau; na kave e kilātou nā fakamahinoga faigatā ke fai e Mohe, kae fakaiku e kilātou nā fakamahinoga faigōfie.
27Oi na fakamāvae ai ia Mohe ki te tamana o tana āvaga, ma tuku ai ke toe foki ki tona fenua.
Currently Selected:
Ehoto 18: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
