Eheta 7
7
1Oi na olo ai te tupu ma Hamanu ki te kaiga a te Mahiofo ko Eheta, 2ko te fakalua tēnei o taimi. Ka koi inu a lātou uaina, kae kua toe fehili vē atu te tupu kia Eheta, “Eheta te Mahiofo, heā te fofou koe ki ei? Ka fōki atu e au mo koe ho he mea lava e leamai koe ki ei? E tuha pe ko te āfa o toku mālō, ka fōki atu lava e au.”
3Na tali vē atu te Mahiofo ko Eheta, “Kāfai kita kua alofagia e tau Afioga te Tupu, ma kāfai e finagalo koe ki ei, ko au e talohaga atu ke fakahao kō toku ola ma te ola o oku tagata. 4Auā ko kimātou kua fakatau, ia au ma oku tagata, ke fakatāugā, ke tāmate, ma ke fakaumatia. Ānei ake lava kimātou na fakatau ke fai oioti ma pologa, ia tamāloloa ma fafine, ko au foki e hēki fakalavelave atu kia te koe; kae ko o mātou puapuagā e hē tāua ke fakalavelave tauānoa atu ai ki Tau Afioga te tupu.”
5Oi na fehili vē atu ai te Tupu ko Ahahuelu ki te Mahiofo ko Eheta, “Ko ai te ia mafaia oi fai he mea vēnā? E i fea te tino tēnā?” 6Na tali atu ia Eheta, “Ko te tino e ia faia kimātou ma ona fili, ma e fakahāuā lele mai kia te kimātou, ko Hamanu!”
Oi na mataku lahi lele ai ia Hamanu i mua o te tupu ma te mahiofo. 7Kua tū ki luga te tupu i ona fekai, ma fano ki fafo ki te togā lākau o te maota o te tupu, ka ko Hamanu kua nofo oi fakatagi kia Eheta ke lāveaki ki tona ola, auā kua ia kitea ko te tupu kua fofou lava ko ia ke tāmate. 8Kua fakapakū atu ia Hamanu ki luga o te hofa nae luga ai ia Eheta ma aioi atu ki ei, kae na fetaui lava ma te toe ulu mai ki loto o te tupu mai te togā lākau, ma na kalaga vē ai te tupu, “Ka ohofaki nei foki e te tagata nei te mahiofo i mua o oku, i loto o toku fale!”
Ka koi hau ki fafo nā kupu i te gutu o te tupu, ka kua tatao e nā eunuke te ulu o Hamanu. 9Oi na lea vē atu ai ia Halapona, ko hētahi o nā eunuke nae i kinā, “Kikila, ko te fata hihitino na fau e Hamanu mo Moletekai, tē na lāveakia te ola o te tupu, e tū i te fale o Hamanu, ma e lua hefulu lua mita te maualuga.”
Ma na lea atu loa te tupu, “Fakatāutau ia Hamanu i luga i te mea tēnā!”
10Oi na hihi ai e kilātou ia Hamanu i luga o te fata hihitino na ia faua mo Moletekai. Ma na māona atu ai foki lava ma te ita o te tupu.
Bible Society New Zealand Charitable Trust