Efeho 3
3
Ko te Gāluega a Paulo mo Tagata Nukukehe
1Ona ko te mea tēnei, ko au ko Paulo, te pāgotā a Keliho Iehu, e tatalo ki te Atua mo koutou tagata nukukehe. 2E talitonu au kua fakalogo koutou ki te alofa tūnoa o te Atua kua ia tuku maia ai kia te au te gāluega tēnei ke fai, kae ke maua ai e koutou he fehoahoani. 3Na fakailoa mai e te Atua kia te au tana fuafuaga lilo i he fakaaliga, e vē lava oi tākua i taku tuhi. 4Kāfai e faitau koutou ki te mea kua tuhi atu ai au, oi ka iloa ai e koutou e uiga ki toku mālamalama ki te mealilo e uiga kia Keliho. #Klh 1.26-27 5I nā aho kua teka, ko te mealilo tēnei e hēki fakailoa ki tagata, kae nei kua fakaalia e te Atua e ala i tona Agaga, ki tana kau apohitolo ma tana kau pelofeta paia. 6Ko te mealilo la ko tēnei. Ona ko Keliho Iehu, kua maua ai e tagata nukukehe he vāega o te tofi na folafola e te Atua ki tagata Iutaia, e ala i te tala lelei. Kua tuku atu foki e te Atua ia tagata nukukehe ke kavea ma vāega o he tino e tahi.
7Ko au na kavea ma kaukauna a te tala lelei e ala i te alofa tūnoa, te meālofa fōki tauanoa a te Atua, na ia fakagaluegia i loto ia te au e ala i tona mana. 8E ui lava ko au ko te tino ia e pito hili ona fakatauvā i lo tagata uma o te Atua, kae na tuku mai te alofa tūnoa o te Atua kia te au, ke kō tālakia ki tagata nukukehe e uiga ki nā fakamanuiaga e hē mafai he fuafuagia te lahi e maua ia Keliho, 9ma ke fakakikila ia tagata uma ki te fuafuaga lilo a te Atua ma tona fakatinoga. Nae mumuni e te Atua, tē na gaohia ia mea uma, tana fuafuaga lilo mai te kāloā, 10kae ke fai ai te Ekalehia i nā aho nei, ma auala ke iloa ai e te kau āgelu pule ma mālohiaga i te lagi, te matalahi o te poto o te Atua. 11Na fai e te Atua te mea tēnei e tuha ai ma tana fuafuaga na fai i te kāmataga, tēia na ia fakatāunukua e ala ia Keliho Iehu to tātou Aliki. 12Ona ko te hokotaga vāvālalata a kitātou ma Keliho ma to tātou fakatuatua kia te ia, kua loto toa ai kitātou ke ōatu ki mua o te Atua ma te mautinoa kātoatoa. 13Ko te mea ia e lea atu ai au kia te koutou, ia koutou nahe fakavāivai ona ko au e maua i puapuagā mo koutou; ko te mea tēnei e mo te manuia o koutou.
Ko te Alofa o Keliho
14Ko te ala ia e tōtuli ma tatalo ai au ki te Tamana, 15tē e ia faia ke tūmau pea lava ona iei ia māopōpoga takitahi uma i te lagi ma te lalolagi. 16Ko au e tatalo ki te Atua ke fōki atu kia te koutou mai te lahi o ana fakamanuiaga, te mālohi e ala i tona Agaga, ke mākekeke ai outou loto; 17ma ko au e tatalo ko Keliho ke mau i nā loto o koutou e ala i te koutou fakatuatua. Ko au e tatalo ke mautū lelei te koutou fakavae i luga o te alofa, 18kae ke maua ai e koutou fakatahi ma tagata uma o te Atua, te mālohiaga ke iloa ai te lauefa ma te loa, te maualuga ma te loloto, o te alofa o Keliho. 19Io, ko au e tatalo ke iloa e koutou tona alofa, e ui lava e hē mafai ke iloa kātoatoa te uiga kehe o tona alofa—ma ke fakatumulia kātoatoa ai koutou i te nātula o te Atua.
20Kia te ia, tē e galue i loto ia te kitātou e ala i tona mana, ma faia nā mea e hili lele atu te lahi i lo nā mea e gogō atu kitātou ki ei, pe māfaufau foki ki ei: 21ke i te Atua nā vīkiga a ala i nā Ekalehia ma Keliho Iehu, i nā aho uma lele, ke pa ki fakavavau fakavavau lava! Amene.
Currently Selected:
Efeho 3: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
