Gāluega 3
3
Kua Fakamālōlō he Pipili
1I tētahi aho na olo ai ia Petelu ma Ioane ki te Mālumalu i te tolu i te afiafi, ko te itūaho ia nae fai talohaga ai ia tagata. 2I kinā i te Alapupuni Gali, e vē ona fakaigoa ai e tagata, nae iei ai he tino nae pipili i tona olaga kātoa. I aho uma nae hiki mai ai ki te faitotoka tēnei ke kaitagōgō tupe ai ki tagata nae holo ki loto o te Mālumalu. 3I te ia kitea atuga o Petelu ma Ioane ka ulu atu ki te Mālumalu, oi na gogō ai ki ei ki hana mea. 4Kua kikila hako atu ia Petelu ki te pipili, na vēnā foki ia Ioane, oi na lea vē atu ai ia Petelu, “Kikila mai kia te kimāua!” 5Oi na kikila ai te pipili ki te toka lua, ma tona manatu ka fōki ake hana mea. 6Kae na lea vē atu ia Petelu ki ei, “E hēai haku tupe e fokotahi, kae ka kō fōki atua te mea e ia te au; i te igoa o Iehu Keliho o Nahaleta, e lea atu ai au kia te koe, tū ki luga oi havali!” 7Oi na tago atu ai ia Petelu ki te lima taumatau o te pipili ma fakatū ki luga. I te taimi lava tēnā na mālohi ai nā vae ma nā tapuvae o te pipili; 8na oho loa lava ki luga te pipili, kua tū ki luga ma kāmata oi hāvalivali. Oi na fano ai ki loto o te Mālumalu fakatahi ma te toka lua, ma nae havali lava ma tūtaoho ma viviki ake ki te Atua. 9Na kitea atu ia e tagata e havali ma viviki ki te Atua; 10ma i te matea atuga e kilātou ko te tino tēnei ko te pipili nae māhani nofo i te Alapupuni Gali o te Mālumalu ma kaitagōgō ki tagata, na matuā tēteki lele ma ōfo ki te mea kua tupu kia te ia.
Kua Tautala ia Petelu i loto o te Mālumalu
11Ka koi pipiki atu te pipili kia Petelu ma Ioane i loto o te Poletito o Holomona, e vē ko te igoa nae fakaigoa ai e tagata, na ōfo lahi lele ia tagata ma na lolofi mai ai kia te kilātou. 12I te kitea atuga e Petelu o nā tino, oi na lea vē atu ai kia te kilātou, “Oku uho Ihalaelu, heā te tēteki ai koutou i te mea tēnei, ma heā foki te kikila vēnā mai ai outou mata kia te kimāua? E vēake koutou ko he mana e o kimāua lava, pe ko kimāua e lelei i te kikila a te Atua, te na mafai ai e kimāua oi fakahavali te tino tēnei? 13Ko te Atua o Apelaamo, o Ihaako ma Iakopo, te Atua o nā tupuna o kitātou, na ia fōkia te mamalu kia Iehu tana kaukauna. Kae na koutou tukulima atua ia ki takitaki o Iutaia, ma teteke e koutou i mua o Pilato, e ui lava na tonu ia Pilato ke fakahaoloto.#Eho 3.15 14Kae na teteke e koutou te tino āmiotonu ma te paia, ka kua talohaga kia Pilato ke tatala fakahaoloto te tino tāmate tino.#Mat 27.15-23; Mlk 15.6-14; Luk 23.13-23; Ioa 19.12-15 15Na tāmate e koutou te tino e takitakia ia tagata ki te ola moni, kae na toe fakatū ia e te Atua mai te oti—ma ko kimātou ni molimau ki te mea tēnei. 16Ko te mana o Iehu te na toe mālohi ai te pipili. Ko te mea kua kikila koutou ki ei ma iloa e koutou, na fai e ala i te fakatuatua ki tona igoa; ko te fakatuatua o kimāua kia Iehu, te na mafai ai ke fakamālōlō te pipili i mua o koutou uma.
17“Ko te mea ia oku uho Ihalaelu, e iloa e au ko te mea a koutou ma outou takitaki na fai kia Iehu, na māfua ona ko koutou e hē mālamalama. 18Na folafola e te Atua i nā aho kua leva e ala i te kau pelofeta uma, ko tana Mehia e tatau ke maua i nā puapuagā; ma na ia faia ke taunuku tēnei vāloaga i te auala tēnei. 19Ko te mea ia, halamō loa ma liliu ki te Atua, kae ke fakamāgalo ai autou agahala. Kāfai e koutou faia te mea tēnei, 20ka mafai ke kavatu e te Aliki kia te koutou he taimi mo te fakafōugia o nā agaga o koutou, ma ka ia uga maia ia Iehu, ko ia te Mehia kua uma te ia tōfia mo koutou. 21E tatau ke nofo pea ia i te lagi ke pa ki te taimi e fakafōugia ai ia mea uma, e vē ona folafola e te Atua e ala i te kau pelofeta paia nae tautua mo ia i nā aho kua loa. 22Auā na lea vēia ia Mohe, ‘Ko te Aliki te Atua ka ia uga atua he pelofeta kia te koutou, e vē lava ona uga atu au e ia,#3.22 e vē lava… au e ia pe e vē ko au ma ko he tino lava mai ia te koutou. E tatau koutou ke fakalogo kia te ia i ho he mea e lea atu ai. #Teu 18.15, 18 (LXX) 23Ho he tino e hē fakalogo ki te mea e lea atu ai te pelofeta tēnā, ka fakateka kehe ia mai tagata o te Atua, ma fakaumatia.’#Teu 18.19 24Ma ko nā pelofeta uma na kui mai ai he fekau mai te Atua, e aofia ai ia Hamuelu ma kilātou i tua mai o ia, na folafola foki e kilātou nā mea e tutupu i nā aho nei. 25Ko nā folafolaga a te Atua na kui mai i nā pelofeta, e mo koutou, ma ko koutou e aofia i te feagaiga na ohi e te Atua ma outou tupuna. E vē ona vāgana te Atua kia Apelaamo, ‘Ka kō fakamanuiagia ia tagata uma i te lalolagi, e ala i nā lāpuna o koe.’ #Ken 22.18 26Ma na filifili ai e te Atua tana Kaukauna ko Iehu, ma na uga muamua atu ai kia te koutou, ke fakamanuia koutou, e ala i te takitaki kehega o koutou uma e ia, mai nā uiga kino o koutou.”
Currently Selected:
Gāluega 3: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust