Rŏma 11

Kib́ĭcè Adèthakhòwè Israè̆lpho

1Jè kè d́è̆tca Mò̄kô thĭ domo be; Kib́ĭcè bāphlòḿĭgè abijakhwĭpho ā? Za da bāphlòmĭ ńò. Jè thĕne ḿî Israè̆lpho, Abraham apho d́ŏ Bènjamĭno akhwĭthèlè̆ abu nu. 2Kib́ĭcè de hwĕphlòḿĭ pĭpi abijakhwĭpho Zô rôhtagè hlĕ akhahtîkhab́ò̆ nu. Thĭ gomohtani Cè Tcahtĭ d́ò̆sa Elĭjah awîakè̆ nu ā? Cò d́ò̆sa Kib́ĭcè Israè̆lpho tòcò adèphîdèmè kî cò d́ò, 3“Ŏ B́ĭcè, cè tòcò mèthĭ hwă Ńò prò̆fèt tòcò nu, ze deladēphagè Nè dèthèb́è̆kho. Jè dèbwè lò, òdawe, kî cè tòcò thaè mèthĭ tèpwè jè,” cò d́ò do. 4Kib́ĭcè d́ò d́ò̆ cè cadè̄? “Jè lè̄lagè Ji nikhĭ bija abwèthăthô dòhtò htè ado dōhnŏla Băala ahlò̆mò̄ hnî̆ńò nu.” 5Khŏnujo ḿî dèmè ane gōnu lò. D́ŏ ahluată akhoacè̆ bija ab́èrôhta akholakăsè òwe tèpwè. 6Thĭ tcahtî tèpwè htè aḿî ahluată, tè b́è dèmè awîaè ńò, dî ḿî ńò d́ō, ahluată dî ḿî tèpwè ahluată ahnèhnè ńò.

7Mègōnu kò d́ò d́ò̆ cadè̄? Israè̆lpho tòcò da pahtî dè htè cè tòcò wāhlègè nu ńò. Bija atcahtî ò tikîpho bwè htè Kib́ĭcè rôhtagè tòcò nu, ḿî alewe tòcò anigu toŏ kî dî thîhè̆ Kib́ĭcè adèjo ńò. 8Acab́ô̆ Cè Tcahtĭ d́ò, “Kib́ĭcè ila cè dèthohtothaba, kî htô̆ khŏnujo cè tòcò da tcahtî ńò, dî thîhè̆ ńò ńò.” 9Dăvid d́ò;

“Cè tòcò kè̄ b́è thagwănikò̆ dēkha b́ĕ cî d́î̆wāhtî nu,

za gā ladēhlŏkò̆ kî b́èphòb́ècŏkò̆!

10Za gādŭ gī khi kî gā da tcahtî zakò̆ dè ńò,

Za jadē gò̄ còkhŭkò̆ d́ŏ dèb́idèzā hto acè̆ nu,” cò d́ò do.

11Mègōnu jè d́è̆tcagè; Jŭdapho tòcò htè̆thukŭ d́ō, za lakhu kî kè̆ôlōgè ā? Tè b́è gōnu ńò. Ḿî cè tòcò mè dèkhòwè acè̆ dèhlô̆htage dohtî bwèthŭkupho tòcò cab́ô̆htè cè tòcò gā thaklab́èbò̄ lōwa nu. 12Jŭdapho adèkhòwè lei cè tòcò dèhôwî òèòò d́ŏ Lākho, kî zè dèssègnè̆bòdò d́ŏ thotha lei bwèthŭkupho tòcò dèhôwî òèòò lò. Mègōnu d́ō, Jŭdapho gī phîni ma dèhlô̆htage lŏcăcè d́ō, d́olĭ kî anu zi gī nib́èkò̆ dèhôwî.

Bwèthŭkupho Adèmèhlô̆htage

13Ŏ bwèthŭkupho tòcò, ibò̄ jò d́ò̆sa thĭ dè tîkî. Jè b́è thodŏlegè d́ŏ bwèthŭkupho tòcò ò, acab́ô̆ zè bwè bōhmubicè dèbwè nu kî ji phîdophîmu tèpwè je ne acè̆. 14Barasă awîakè̆ ḿî agè̄ mè ja bijakhwĭpho thaklai thĭ tòcò nu, agî̄ ḿîbò̄ agè̄ mèhlô̆htage cè tòcò cò nu. 15Kib́ĭcè adèbāphlòmĭ thĭ ḿî dè mèthè̆ge Lākho kî thîhè̆bò̄ zè dè b́èthodŏ ḿî danè̄ nu ā? Tèb́è dè alewe dimĭ ńò, ḿî dèhtaboge dèthĭ aklè̆ lò.

16Toko akăhtî tîb́î kè̄ b́è hluhtai ma Kib́ĭcè d́ō, thèd́è̆khlo ḿî tèpwè Cè è̆; kî b́eḿĕ thokhawi kè̄ b́è hluhtai ma Kib́ĭcè d́ō, thomēthophă tòcò ḿî tèpwè Cè è̆ è̆. 17Òlĭvo ad́ŏ aphăpho tòcò cò b́èglakè̆ htŏ kî cab́ô̆ òlĭvoami aphăpho tòcò b́è phod́òglo ma d́ŏ òlĭvo ad́ŏ alò nu, htè akhawi ḿî òlĭvo ad́ŏ akhawi nu d́ō, anib́è òlĭvo ad́ŏ akhawi ahtoatcă akhò̆, thĭ bwèthŭkupho tòcò tô thô̆htôge thokhawi htè Jŭdapho ńò, Jŭdapho thô̆htôge thĭ dòkhò̆. 18Mègōnu d́ō, gomo sciphobò̄ ḿè amēphophăpho ahtè̆dū tòcò nu ḿè. Thĭ gè̄ bè̄htajî d́ò̆ thĭ ne cadè̄? Thĭ ḿî aphă lò. Thĭ di ikhoiă za mè akhawi ńò, ḿî akhawi iă thĭ dòkhò̆.

19Thĭ kò d́òwe mò̄? “Thomēthophă ab́è bēhtè̆dū tòcò ḿî jè kè̄ b́è d́òphă anikhĭ lò.” 20Ab́è tèpwè. Zè dèb́u tò ò ńò akhoacè̆ cè b́èbēkè̆d́akè̆kò̆, thĭ kò òhmeòglo we ḿî d́ŏ thĭ dèb́u acè̆ lò. Thôrô̆ dè ajo gè̄ mè thwido thĭ nu, amò mèscisă thĭ dòkhò̆. 21Kib́ĭcè dò khòthad́ò̆i Jŭdapho htè thomēthophă alila ńò d́ō; thĭ gomo ḿî Zò gò̄ khòthad́ò̆i d́ò̆ thĭ ā? 22Sòthô̆bò̄hnèbò̄ ḿè htè Kib́ĭcè ḿî athosôthasô kî akhòwè za dè nu. Bija alakhu tòcò nu, Ca tha sa lōwa tòcò akho, kî Co thowîthamò thĭ kho nu pwĕ Ca tha lō lò, dî ḿî do ńò thĭ gā tcahtîkò̆ htè thĭ b́è bāphlòmĭ nu. 23Kî Jŭdapho tòcò gā bāphlòmĭ ma adè tu b́u ńò d́ō, cè tòcò kè̄ b́è phôd́òplogebò̄ ze lele. Manè̄ d́ō, Kib́ĭcè ḿî amèzadè gōnu acè̆ lò. 24Thĭ bwèthŭkupho tòcò mè acab́ô̆ òlĭvoami kî b́è klăkè̆ lō hwă d́ŏ thĭ ò nènò aphă nu d́ō, thĭ b́è phôd́òploge htŏ d́ŏ òlĭvo ad́ŏaphă lò akhoacè̆ nu. Jŭdapho tòcò mè acab́ô̆ tho ad́ŏ dumu jo acè̆, agò̄ hjŏ d́osèkò̆ cè tòcò anikhĭ, manè̄ d́ŏ cè b́è phôd́òplogè ze mē za phă alila akhoacè̆ nu.

Kib́ĭcè Adèkhòwèhmòb́è Bija Lŏcăcè

25Thè̆buwe tòcò, dè ajo lŏcăcè anikhĭ, dèòhu ò dèdè̆ htè ja thaèni thĭ gî̄ thîhè̆ nu, dî ḿî ńò d́ō, thĭ gō gomo d́olĭ kî thĭ mè nu. Israè̆lpho ò tòcò adè thosathasa tè b́è ḿî thèjô̆ ńò. Barasă dā bwèthŭkupho tòcò lenī hwă adèd́ô pĕhta akhî lò, alekă Israè̆lpho akăsè tòcò ḿî ḿî gô̄ hlô̆hta tèpwè b́ĕ nu. 26Kîd́ò̆ ajo ḿî klè htè Israè̆lpho lŏcăcè gī nib́è dèhlô̆htage nu. Acab́ô̆ Cè Tcahtĭ d́ò;

“Amèhlô̆htagedè dèbwè hè ò d́ŏ Zion khòlò̆kho kî Za gā lakò̆.

Za gā bāphlòḿĭkò̆ Jăkòb akhwĭthèlè̆ tòcò nu.

27Kî dè ajo ḿî Jè dèlagla Jè gè̄ mèni cè tòcò

b́ĕ Jî phîkè̆ hwă zè dèkhòwè tòcò nu.”

28Jŭdapho tòcò phî̆hta Kib́ĭcè athè̆d́ĕd́ò ḿî ab́èkja Vanzĕlō akhoacè̆, kî thĭ kho thĭ cè̆ lò; barasă acab́ô̆ bija b́èrôhlè akhwĭ nu, Kib́ĭcè b́èlò̄ we tèpwè cè kîd́ò̆ dèb́èlò̄ zi phĭ zu phŭ tòcò akhoacè̆ cè̆ 29Kib́ĭcè dî phîge Zè dèila tòcò ńò kî Za da b́ăkhlè Zè dèrôhlè ńò ńò. 30Acab́ô̆ thĭ b́ăkhlèhtagè hlĕ adò sòkhĕńe Kib́ĭcè alē ńò ḿî khŏnujo anib́è dèkhòwèhmòb́è, d́ŏ Jŭdapho tòcò dò sòkhĕńe dè ńò acè̆ nu. 31Cab́ô̆ gōnu akhò̆, d́ŏ dèkhòwèhmòb́è thĭ nibègè acè̆, khŏnujo Jŭdapho adò sòkhĕńe Ze lē ńò tòcò gī nib́èkôkò̆ Kib́ĭcè adèkhòwèhmòb́è nu. 32Kib́ĭcè b́è̆nī bija lŏcăcè dèkî̆dî̄ abu d́ŏ zè dèsòkhĕńelēthèhô̆ tò ò ńò acè̆ ḿî cab́ô̆htè Cè kè̄ d́è̆lî̄bò̄ lōwa dèkhòwèhmòb́è acè̆ nu lò.

Dèhtăhtai Kib́ĭcè

33Kib́ĭcè adèjèdā ḿî adokò̆ pwedè̄? Zè dèzadèbla kî Zè dèthîhè̆ dokhò̆kò̆ pwedè̄? Zè dèkŏdèkja tòcò ḿî acòklîkò̆ pwedè? 34Cè Tcahtĭ d́ò;

“Bò̄bwè thîhè̆ za Kib́ĭcè adègomo bwè?

Bò̄bwè ikŏikja Cè bwè?

35Bò̄bwè ilòiphî za Cè,

cab́ô̆htè Ce gē plege lōwa anikhĭ nu bwè?”

36Dèlŏcăcè ḿî aò d́ŏ Cò ò lò. Aphî̆htakô Cè, kî aḿî Zi nikhĭ lò. Dèdòdèthe kè̄ b́è thèjô̆ d́ò̆è Cè lahtŭlablo! Amèn.

Currently Selected:

Rŏma 11: GRNT21

Highlight

Copy

Compare

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament

Popular Bible Verses from
Rŏma 11

Videos for Rŏma 11

Romans 5-16

BibleProject

Romans 9-11

BibleProject

Romans 9:30-11:36

Spoken Gospel

Romans 9-16

Eyewitness Bible Series

Rŏma 11

Popular Bible Verses from
Rŏma 11

Videos for Rŏma 11

Romans 5-16

Romans 9-11

Romans 9:30-11:36

Romans 9-16

Bible:

Karen, Geba

Version: Geba Roman New Testament - GRNT21

Rŏma 11

Rŏma 11

Popular Bible Verses from Rŏma 11

Videos for Rŏma 11

Romans 5-16

Romans 9-11

Romans 9:30-11:36

Romans 9-16

Bible:

Karen, Geba

Version: Geba Roman New Testament - GRNT21

Rŏma 11

Popular Bible Verses from
Rŏma 11