Misāwā 18

Pɔ́l ɓɛ̌ khandǎ Kolɛ̂ŋt

1Phúla ték ɛ́, Pɔ́l ɛ ɓúzī tyáá ɓɛ̌ Atɛ́n tí ɛtɔ́ ɓɛ̌ khandǎ Kolɛ̂ŋt. 2Kɛ̄ kǔm pyaāŋ nák ɛ́, ɛ ɓúzī ɓoma nɛ nɔ̄l Yúɗɛn ɗín lɛ̄ Akílas, mot pák ɓwaās pɔ́ŋ ɗí a a lwɔ̂ɔ kúl tí ɛɗüǐs ɓɛ pák ɓwaās Ítalí ɓá nɛ myɛ̌l wɛ̄ Piisîl. Nɛ dɔ nāá, kūmāndē Kolót ā ɓɛ ɛ́ ɛ́ nwɔ̌ŋ cyūklā nāá, Oyúɗɛn ɓyɛ̂ɛs ɓɛ̄ twôl khanda Lôm. Pɔ́l ɛ ɓú kɛ̄ ɓyela ɓɛ̂. 3Ɗakɛ Pɔ́l ā ɓɛɛ nāá, ɓá nɛ nɔ̄ɔ̄ ɓɛ́ nɛ ló-sɛ̄ɛ̄ ŋgwát, sɛ̄ɛ̄ ɛ́sá íphālā ékɛ́, ɛ ɓú kɛ̄ ɗǐ ɓɛ yɔ̄ɔ̄, ɓá nɛ nɔ̄ɔ̄ ɓɛ̄ sīsālā ndɔŋ. 4Isaɓá ɓyɛ̂ɛs, Pɔ́l ā ninwɔŋ ɛkɛ́l twóó njāā míndakla tí ɛsisáŋ nāá, Oyúɗɛn nɛ Igɛlɛ́k ɓɛ̄ myám Yésus.

5Tɛ́m Sílas nɛ Timoté ɓā tyâa ɓɛ pák ɓwǎs Maseɗwán tí ɛzī ɓyela Pɔ́l ɓɛ̌ Kolɛ̂ŋt ékɛ́, í tí tɛ́m ték Pɔ́l ā nyɛl ɛlɛ́ɛ́ Oyúɗɛn ɛkɛ́l ɛ̄ mí Zɛɛ̄mb tɛ́m yɛ̂ɛs é nāá, í Yésus ɗí Kūmāndē Zɛ́mb ā kɛs ɔ̂. 6Sá gwát, Oyúɗɛn ɓɛ̄ ɓú lilûmla nɛ sá Pɔ́l ā lilɛ́ɛ́ ê, ɓɛ̄ lilə̄ə̄ ɛ̂. Pɔ́l ɛ dá pup mɛ́puūmb tí mikānd myɛ̄ nyɛ nāá: «Ɓí wā ɓyen ɛ́ɗǐ lɛt nɛ Zɛɛ̄mb nâk, náǎŋ í kā jüák ɓyɔ̂ɔ ɓot otêk, yá a ká ɓɛ̌ tɔɔ̄p wâm. Tí ɛnyɛl ɛ́chāak ɛ́, má á kā tɔ́ tel ɓɛ ɓót ō ɗí ta ɓɛ Óyúɗɛn ɓâk.» 7Pɔ́l ɛ ɓúzī gbɔ́m náǎŋ, ɛ tɔ̄ ɓɛ ɗáá nɔ̄l mót gɛlɛ́k ɗín lɛ̄ Titǘs Yustǘs ā ɓɛ tí ɗúɛl Zɛ́mb. Njāā wɛ̄ wā ɓɛ ndumɛ nɛ njāā míndakla. 8Kilispǘs, ndə́ə́ njāā míndakla ɛ ɓúzī ɓûkla Ɗá tí nɛ ɓot ō njāā wɛ̄ ɓyɛ̂ɛs. Thūnd ɓót o kolɛ̂ŋt ɓā gwókɛl Pɔ́l ɓák ɛ́, ɓɛ̄ ɓúzī ɓûkla, ɓɛ̄ ɗúú ɓɛ̂.

9Tí wūl pum ɛ́, Ɗá Yésus ɛ ɓúzī zye Pɔ́l tí líma nyɛ ta ɓɛ tí dɔ̂, nyɛ nɛ nāá: «Wa a gwók ɓwɔ̄ŋ, sá gwát tɔ̄ nɛ ɛlɛ́ɛ́ ɛ́kɛ̂l, wa a ɗyuɛ̌l nup, 10myam ɗí tí ɛkɛ nɛ nɔɔ̄. Mot a á gbá ɔ́ mbɔ́ tí nól tí nāá, ɓá á sá ɔ́ ɛɓyôo. Nɛ dɔ nāá, í nɛ ɓot ɓám ɛ́ɓuuɓu tí khanda énɛ́ɛ̌ŋ.» 11Pɔ́l ɛ ɓúzī thaŋgɛl mbú nɛ oŋgɔn twōō tí ɛlyákɛl ɛ́kɛ́l ɛ̄ mí Zɛɛ̄mb náǎŋ tí khandǎ Kolɛ̂ŋt.

12Pɔ́l ā ɓɛ ɛ jína náǎŋ tɛ́m Galyɔ̌ŋ ā ɓɛ ŋgɔ́mina pák ɓwǎs Akaí ê. Oyúɗɛn ɓɛ̄ ɓúzī ɗi cyūŋ inɔɔ̄n, ɓɛ̄ mɛ̄t Pɔ́l tí nāá, ɓá á tɔ́ nɛ nɛ̄ ɓɛ phānj mitɔɔ̄p. 13Pyǎŋ ɓɛ phānj mitɔɔ̄p ɛ́, ɓɛ̄ ɓúzī put ɛ́, ɓɔ̂ɔ nāá: «Motóm ɔ́kɛ́, ɛ tí ɛtínd ɓót nāá, ɓɛ̄ ɗúɛl Zɛɛ̄mb wūl mbǐ ndūūlā süís ɗí ta dala nɛ ɗɛ mɛtyuūŋ mɛ lɛ́ɛ́ ê.» 14Pɔ́l ɛ ɓúzī gwók mɛ́puta. Tɛ́m ɛ́ mú tí ɛsáŋ ɛ́ɓɛ́s ékɛ́, Galyɔ́ŋ ɛ dá nwɔŋ ɛ́kɛ́l nyɛ nɛ Oyúɗɛn nāá: «Í ɓɛ̄ nāá, ɛ dō môt, gú thɔ́k ɛ sā yīl sá ɓyōō nâk, phú mí í nwɔŋ tɛ́m tí ɛgwókɛl ɓyɔ̂ɔ Oyúɗɛn. 15Sá gwát ɗɛ ɗí nāá, mbunuk wēn ú jüāk tɔɔ̄p mɛ́kɛ́l nɛ mín, nɛ ilɔ́a ɓyēn ékɛ́, yízaāŋ í jüāk ɓén. Ma a ɓɛ̄ tí ɛdɔ́s wūnɛ́ɛ̌ŋ mbi mitɔɔ̄p!» 16Galyɔ́ŋ ɛ ɓúzī ɓúlɛl ɓɛ̂. 17Ɓɛ́ ɓyɛ̂ɛs ɓɛ̄ ɓúzī mɛ́t Sostɛ́n ndə́ə́ njāā míndakla Óyúɗɛn ɓɛ̄ ɓī ɛ́ sɔ̂kphɔ̌mb phānj mitɔɔ̄p. Sá gwát yá a lɛ́ɛ Galyɔ́ŋ yīl sínɔŋ.

Pɔ́l ɛ́ ɛ́ ɓúla ɓɛ̌ Aŋtiôs

18Phúla isá ɓīnɛ́ɛ̌ŋ ɛ́, Pɔ́l ɛ ɓúzī sá mɛ́lú ɓɛ̌ Kolɛ̂ŋt. Náǎŋ ɛ́, ɛ́ ɛ sâ Zɛ̌mb ikɛs. Ɛ ɓúzī dána nɛ oɓúkɛl, ɛ kálɔɔ́ kukɛ tí nāá, á á ɓúlǎ ɓɛ̌ Silí ɓá nɛ ɓɔɔ Piisíl nɛ Akílas. Ɗɛ ɓɛ́ kɛ̄ kǔm ɓɛ̌ Saŋkelé ékɛ́, ɛ ɓúzī caŋaá ló tí ɛlwóndɛl íkɛs ā ɓā sâ Zɛɛ̄mb ɓîk. 19Ɓɛ̄ ɓúzī kɛ̄ kǔm ɓɛ̌ Efɛ̂ɛz. Ɛ ɓúzī ɓɛ́sa nɛ Akílas ɓá nɛ myɛɛ̄l, ɛ tɔ̄ ɓɛ̌ njāā míndakla tí ɛkɛ̄ lɛ́ɛla ɓá nɛ Oyúɗɛn. 20Ɓɔ̂ɔ nɛ Pɔ́l nāá, ɛ ɓáka sá ɛ́ɓīm ɛ̄ mɛ́lú ɓá nɛ nɔ̄ɔ̄ ndɔŋ. Sá gwát nyɛ nāá, a a nī. 21Tɛ́m ā ɓɛ ɛ ɛ́ kpáŋ ékɛ́, nyɛ nɛ nɔ̄ɔ̄ nāá: «Má á ɓākā zye tí yīl kɛnd, Zɛ̌mb wā ka nâk.» Ɛ ɓúzī kalɔɔ́ kukɛ ɓɛ̌ Efɛ̂ɛz. 22Ɛ ɓúzī kǔm ɓɛ̌ Sezalê, ɛ súl ɛ tɔ̄ ɓɛ̌ Yotósalɛm tí ɛkɛ̄ sües gós-óɓúkɛl. Phúla ték ɛ́, ɛ khɛ̄ɛ̄ tí ɛtɔ́ ɓɛ̌ khandǎ Aŋtiós gūm nɛ Silí ê. 23Ɛ ɗí pɛ́s tɛ̂m, phúla ték ɛ́, ɛ kpâŋ. Ɛ tháŋ ɓɛ pák ɓwǎs Galasí nɛ ɓɛ pák ɓwǎs Fiizí tí ɛtɔ́ nɛ ɛlelɛl óphōn ɓyɛ̂ɛs.

Apolós ɓɛ̌ khandǎ Efɛ̂ɛz nɛ ɓɛ̌ Kolɛ̂ŋt

24Nɔ̄l Yúɗɛn ɗín lɛ̄ nāá, Apolôs, ā ɓɛ nyɛ̄t khandǎ Alɛkzaŋdilî, ɛ ɓúzī kúl ɓɛ̌ Efɛ̂ɛz. Ā ɓɛ ŋgwát tí ɛgú ɛ́lüii, nɛ ŋgūā ɛ́kɛ́l ɛ mí Zɛɛ̄mb. 25Ɓā ɓɛ ɓɛ́ ɛ́ lyákɛl ɛ́ ɗɛ zyé mí Ɗá ɗí ê. Ā ɓɛ tí ɛlilyákɛl nɛ ɛlɛ́ɛ́ tɔɔ̄p mí Yésus ɛ́dalá nɛ lyém wɛ̄ wɛ̂ɛsa. Sá gwát, ā da gigú nje ték nduān mí Zwâŋ. 26Ɗɛ ɛ́ zī kǔm ɓɛ̌ Efɛ̂ɛz ékɛ́, ɛ ɓúzī tɔ́ ɓɛ̌ njāā míndakla Óyúɗɛn, ɛ lüíí ta gwók ɓwɔ̄ŋ. Sá gwát, ɗɛ̌ Piisíl nɛ ndóm wɛ̄ Akílas ɓā gwók ɛ tí ɛlüii ékɛ́, ɓɛ̄ ɓúzī nwɔŋ ɛ́, ɓɛ̄ kɛ́ gū timbɛl ɛ́nwɔŋnwɔŋ ɗakɛ zyé mí Zɛɛ̄mb ɗí ê. 27Ɗakɛ Apolós ā ɓɛ nɛ njeā ɛ́tɔ́ ɓɛ pák ɓwǎs Akaí ékɛ́, oɓúkɛl ɓɛ̄ ɓúzī jüe ɛ́ khul, ɓɛ̄ tíl mɛ́kanā tí ɛsú lɛ́ oɓúkɛl ō pák ɓwaās ték nāá, ɓɛ̄ ɓákɛl ɛ̄ ɛ́nwɔŋnwɔŋ. Kɛ̄ kǔm pyaāŋ nák ɛ́, Zɛ̌mb ɛ ɓú jijüe ɛ́ khul, ɛ līlélɛ̄l óɓúkɛl. 28Ɛ ɓúzī lilüii sɔ̂kphɔ̌mb mot nyɛ̂ɛs ɛ́nwɔŋnwɔŋ ɗɛ ɗí nāá, Oyúɗɛn ɓá a ɓyela jüas tí nāá, ɓá á ɓɛ́s ê. Ɛ ɓú ɓiɓɛla nɛ Mɛkanā mɛ̄ Zɛ́mb tí ɛlyákɛl ɓɛ́ nāá, Yésus ɛ Kūmāndē Zɛ́mb ā kɛs ɔ̂.

Currently Selected:

Misāwā 18: MPU

Highlight

Copy

Compare