Kintaŋ 4
4
Ntàʼtìn wìr vee kfə́ə Kohat
1 Nyùy Tàr nèn yòŋ e Mooser wùn Aaron jii, 2«Yiì kintaŋ ki, e tàŋ wír veé ram Levìi lèn ve dzəə̀n kfə́ə Kohat, e tàŋ é lav sí lav si mo vitàr vév ví dzə̀kìn. 3Ku tàŋ vilum adzə̀m vee kèʼ fó kiya mtaár, e dù, e meé kiyá mtàn ve dzə̀ á yiì antàʼtìn veé *kibàn ké ntàsíné. 4Lim yéví yíi a dzə vifá vee kùm kibàn ké ntàsín vee jeéy ví féyì feyì.
5«Lóo dzə e ghan se wíri ŋáʼay fo kibeèy kee shó, é ku tòmbìy nə̀ə́ Aaron wùn à wón vəə́ é kibàn, e shòʼ raŋ, e sə̀tí ŋkùv mensàŋ sho, 6e nèn kfə̀n sùm e jùv nyàm ndzə̀v, e sàŋrì ndzə̀y ye yì səə́ne moo yúv é kitu wo, e nèn wàyrí vintoòr və́.
7«Ké kidàŋ ke kiban ke kí tíy e Nyùy si, á wíy a sàŋrì sa ndzə̀y se sí səə́ne moo yúv é kitu wo, a bó á yòʼ tsəʼ kibán kee fó. Aá nèn lì vikáŋ vee fó wùn aàláŋ ve á ton kiláy shóo, e kfə̀n lì sa vighín wùn aànsiŋ vee vé ncùmelùʼu, e bàʼtí e kitu wo, 8e nèn kfə̀n sàŋrì ndzə̀y yee làv wo wù baŋ ji rèm e kitu wo, e bóo sùm kidzə̀m e jùv nyàm ndzə̀v, e nèn wayrí vintoòr və́.
9«Á yíi lì sa ndzə̀y ye yì səə́ne moo yúv, e sùm kitiir ke làm sho wùn à lam sə́ sí, à vimfar vi, à wón vikaŋ vəə́, à mbìʼ sé meŋgvə̀r me á wáy e làm si. 10Aá nèn ndzə̀m lèn wùn à vifá və́ ví vidzə̀m e jùv nyàm ndzə̀v, e nèn wàyrí vintoòr.
11«Á kfə̀n wíy sàŋrì ndzə̀y se sí səə́ne moo yúv é kitu ke kiy cù wo á fèrìn e *kisha ke mbàm ke baar kí, e sùm e jùv nyàm ndzə̀v, e nèn wayrí vintoòr və́. 12Ké vifa ve ker veé kibàn vidzə̀m, á wíy lì, e ndzəm e ndzə̀y ye yì səə́ne moo yúv, e sùm e jùv nyàm ndzə̀v, e nèn neèr e kintaà ke á beʼ sho. 13Aá nèn fə̀ə́r kibvə́ fo kiy cù woo kisha kee *brons ki, e sàŋrì ndzə̀y ye yì səə́ne moo yòm e kitu wo, 14e neèr vifá veé ghaa kiy cù vidzə̀m ve á yii lim sho e kitu wo, a dzə̀ vikáŋ wùn à vinsòv vi, à viŋkwaà vi, à vighín ví. Aá nèn sàŋrì juv nyàm ndzə̀v é kitu wo, e nèn wàyrí vintoòr və́.
15«Aaron wùn à wón vəə́ maysì, sə́ti vifá vìn ve dzəə̀n vee jeéy ví, à vifá vév vee fó ghaŋ vi vidzə̀m, màŋgòŋ lóo ŋaʼáy ji á waà sí du, é wír Kohati nèn wìy, e bèʼèy vifá vee shooy. Yii bèy, á lóo bèʼèy, lá wìr yòʼ mùm, e kùm wún vifa vee shooy, fóo kpu. Á vifá ve kibàn ké ntàsín ve wír Kohati wíy a beʼ.
16«Eleasar woo wan taà cù Aaron wíy a leéy fo meŋgvə̀r me làm, à virə̀ʼtìn ve kilay ví, à cu vifa ve yi yee ghán sidzə̀me, à meŋgvə́r me yoʼ mè. Kù leey wun fo kibàn ké ntàsín kí kidzə̀m, à fo wúntí kibàné, à fo vifá veé mvəm wó vi vidzə̀m.»
17 Nyùy Tàr nèn sùúy e Mooser wùn Aaron jii, 18«Vèn wáa yen fo kinyo ki koóy kfə́ə Kohat, aáwune lay fo rám Levìí mvəm. 19Kú a ker áwune é dzəə ye á wáa dzə sho, e làa yòʼ kpukír e ghan se á wìyìn é ghaa vifa vee jeéy ví féyì. Kù wíy a nəə́ Aaron wùn à wóné é kibàn, e bó a lèm wír Kohat e shuù se lìm, a naàrì wír kifá ke wù wáa lìm, à ke wù wáa beʼ ki. 20Yii bèy, lá wìr woó kfəə Kohat yòʼ mùm ji wun nəə́, e lèéy kifá fo vifa vìn ve dzəə̀n vee jeéy ví. A fə̀m dzə̀ ji wù shún sí, e lèéy sho, a wù mùm, bo wù kpú.»
Ntàʼtìn wìr veé ram Levi vee kfə́ə Gershon
21 Nyùy Tàr kfən sùúy e Mooser jii, 22«Yiì kintaŋ ki, e tàŋ sá wón vee vilum vee kfə́ə Gershone, e lav sí lav si mo vitàr vév ví dzə̀kìn. 23Ku tàŋ wir dzə̀m woo kèʼ fó kiya mtaár, e dù, e meé kiyá mtàn, a dzə̀ ji wír ve dzə̀ á yiì antàʼtìn veé kibàn ké ntàsín. 24Ntàʼtìn wov wíy a dzə ambìtì vee fó wùn à vifá ve beʼèyìn ví. 25Áwune wíy a beʼ *kibàn ké ntàsín, a dzə̀ jii, ndzə̀y se keerìn see fó mvəm, à kikfə́vsì kee juv nyàm ndzə̀v ke kí dzəə̀n fó kitu ki, à nshìy shuù wo wú nəə e kibàn ké ntàsín, 26à ndzə̀y se á keerì, kaári maàndzə kibàn ké ntàsín shó si, à kíy cùu, à nshìy yeé shuù wo wú nəə e maàndzə ye yì kaarin kibàn ké Nyùy wùn aàkfəə̀ vee fóo, e lì vifá ve lìm vee fó vidzə̀m. Á kú a yiì vinyo vidzə̀m vee bìʼ vifá vìn. 27Lím wón Gershon e dzə̀me dzə̀, a kù wíy a yòŋ Aaron wùn à wón vəə́ kifá ke dzə̀ á bèʼèy, à ke dzə̀ á yiì kí. Á kù wíy dùŋrì vifá vidzə̀m ve dzə̀ áwune bèʼèy. 28Á lím wìr vee Gershon e kibàn ké ntàsín, a taà vitu wo wù wíy a leéy dzə̀ Itamar woo wan taà cù Aaron.
Ntàʼtìn wìr veé ram Levi vee kfə́ə Merari
29«Fo ké wón Merari ki, à wíy taŋ áwune mo kfə́ə sév sí dzə̀kìn, e vitǎr vitàr. 30Ku tàŋ wir dzə̀m woo kèʼ fó kiya mtaár, e dù, e meé kiyá mtàn, a dzə̀ ji wír ve dzə̀ á yiì antàʼtìn veé *kibàn ké ntàsín. 31Lím wìr vee fó e dzə̀me wíy a dzə ji á wáa beʼ vifá veé kibàn ké ntàsín vee ji vintàràŋ wùn à mbàŋ si, à vitóm vi, à viyiy vi, 32à vitóm ve kày ye yí kaarin fó vi, à viyiy vév ví, à viŋkùm vi, aàkfə̀ə́, e lì vifá ve lìm vee fó vidzə̀m, à vifá veé ghaŋ wo vi. Á wíy bàʼ kifá kidzə̀m e kitu kitu mo kí din ji dzə̀ áwune bèʼèy. 33Á lím wón Merari e dzə̀m yeé kibàn ké ntàsín, a taà vitu wo wù leeyì dzə̀ Itamar woo wan taà cù Aaron.»
Kintaŋ ke aŋgàa lìm vee rám Levi
34Mooser wùn à Aaron, à vilìmbìy ve wìr veé Isray vi nèn tàŋ vilum vee kfə́ə Kohat e lav sí lav si mo vitàr vév ví dzə̀kìn, 35a kù dzə̀ vee kèʼ fó kiya mtaár, e dù, e meé kiyá mtàn, a dzə̀ wír ve dzə̀ á yiì antàʼtìn veé *kibàn ké ntàsín. 36Á táŋ bey, á wáa dzə wír kishóv mtàn e ghiì saàmbà aànsə̀kìi abaà (2,750). 37Á mo wír veé kfəə Kohat adzə̀m ve vé‑eè lim e kibàn ké ntàsíné‑eè dzəə̀n. Mooser wùn Aaron‑eè tàŋ áwune réŋréŋ mo Nyùy Tàr‑iì yòŋèn e Mooser.
38Á kfən tàŋ vilum veé kfəə Gershon e lav sí lav si mo vitàr vév ví dzə̀kìn, 39a kù dzə̀ vee kèʼ fó kiya mtaár, e dù, e meé kiyá mtàn, a dzə̀ ji wír ve dzə̀ á yiì antàʼtìn veé kibàn ké ntàsín. 40Á táŋ bey, á wáa dzə kishóv mtaár e ghiì ntuùfú aànsə̀kìi abaà (2,630). 41Á mo wír veé kfəə Gershon vee vilum adzə̀m ve vé‑eè lim e kibàn ké ntàsíné‑eè dzəə̀n. Mooser wùn Aaron‑eè tàŋ áwune réŋréŋ mo Nyùy Tàr‑iì yòŋèn e Mooser.
42Á kfən tàŋ vilum veé kfəə Merari e lav sí lav si mo vitàr vév ví dzə̀kìn, 43a kù dzə̀ vee kèʼ fó kiya mtaár, e dù, e meé kiyá mtàn, a dzə̀ ji wír ve dzə̀ á yiì antàʼtìn veé kibàn ké ntàsín. 44Á táŋ bey, á wáa dzə kishóv ghii baà aànsə̀kìi ataár (3,200). 45Á wír veé kfəə Merari ve Mooser wùn Aaron‑eè taŋen réŋréŋ mo Nyùy Tàr‑iì yòŋèn e Mooser.
46Á mo Mooser wùn à Aaron, à vilìmbìy veé Isray vi‑iì taŋen wír veé ram Levi adzə̀m e lav sí lav si mo vitàr ví‑iì dzə̀kìn. 47Vé‑eè tàŋ, e kèʼ fo kiya mtaár, e dù, e meé kiyá mtàn, a dzə̀ ji wír adzə̀m ve dzə̀ á yiì antàʼtìn veé kibàn ké ntàsín, e kfə̀n a beʼ vifá. 48Wìr dzə̀m wo vé‑eè taŋen wáa dzə kishóv mwaamé e ghiì tàn aànsə̀kìi waamé (8,580). 49Vé‑eè lèm áwune é shuù se lìm, e dùŋrì vifá ve dzə̀ á wàa beʼ.
Mooser‑iì lo tàŋ áwune réŋréŋ mo Nyùy Tàr‑iì yòŋèn e wun.
Currently Selected:
Kintaŋ 4: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
