Kintaŋ 36
36
Vitsə́ʼ vé wón Tsəlofehad vee vikìy
1Atǎr kfəə Gileadi nèn wìy lò, e wìy e kinyo ki. Gilead‑iì dzə̀ wan Makir wo dzəə̀n wan Manasse woo wan Joosev. Á wìy, e yèn Mooser wùn à vilìmbìy ve dzəə̀n atǎr kfəə seé Isray vi, 2a ghay sho jii, «Nyùy Tàr‑iì yòŋ e taàtá wor ji wù wàá tar á, e bóo toʼtí nsay, e fo a e wír veé Israyi ji vitsə́ʼ vév. Wù kfə̀n‑eè yòŋ ji tàr wor fó á vitsə́ʼ vé fər wor Tsəlofehad e wón və́ vee vikìyí. 3Yii bèy, aá lò, e yèn alúm a dzə̀ fo rám seé Isray se sən sí, bo á sí wìy sə vitsə́ʼ vé atàr vév, e dù, e dzə̀sì vé ram se áwune dùkìn shó. Bo mbìv ye vé‑eè leèmèn ji yéer fàr ne wún. 4A wíy lòo dzə e ghan se *Kiyá ke Nsiìr Vifa keé Isray ki gheenen ne, é vitsə́ʼ vév ví nèn dù a dzə̀ e rám see fo áwune yenen alúm si, bo vitsə́ʼ vév ví bùŋ ne fo vitsə́ʼ ve yì‑iì dzəə̀n vé ram sé atàr vér.»
5Bìʼ bey, Mooser nèn fò sáʼ Nyùy Tàr, e yòŋ e wír veé Israyi jii, «Kinyo ke rám ye yí ràmtìn fo Joosevi suuy ki dzə̀ á rú. 6Ke Nyùy Tàr yòŋèn kùm wón Tsəlofehad vee vikìy kí nén a dzə jii, a dzə̀ áwune yèn alúm ve á koŋè, dzə̀ cáʼ ji á ku yèn alúm, a dzə̀ á aàtàr véví ram. 7Bó vitsə́ʼ veé Isray vi yòʼ wíy a liysín fo ram yímóʼó, a dù e yímóʼó, bìʼ fo wìr Isray e dzə̀m kù kér fó wìy tàŋèn e wun nsay, é yì goʼ mo vé‑eè foon áàtǎr ram yéví ji vitsə́ʼ. 8Wan woo wiíy woó Isray e dzə̀m wo wù kooyin nsay yee vitsə́ʼ vé ram, kù kér fó yen lúm a dzə̀ áàtǎr ram vəə́ kfəə. Kí kú a dzə bèy ji wìr woó Isray e dzə̀m kú a ker nsay ye á foon áàtàr véví ji vitsə́ʼ vé ram. 9Bo dzə̀ ji vitsə́ʼ ví yòʼ wíy a liysín fo ram yímóʼó, a dù e yímóʼó. Rám seé Isray si kù wíy a tàŋèn aáwuné nsay.»
10Á bèy, wón Tsəlofehadi ku nèn yiì mo Nyùy Tàr‑iì yòŋèn e Mooser. 11Aáwune dzə̀ jii, Maala wùn à Tirsa, à Hogla, à Milka, e lì Noa. Á nèn yèn alúm a dzə̀ lúmér se tàr wov. 12Mo áwune yenen alúm a dzə̀ é kfəə se dzəə̀n rám Manasse woo wan Joosev, vitsə́ʼ vév ví nèn gòʼ e ram ye dzəə̀n yé tàr wov.
13Á nsər si wùn à ntò se vinyò se Nyùy Tàr‑iì foon e wír veé Israyi, e shaà fo Mooser, aá dzə̀ é mboʼ yeé Moav, e ghaa Jordan, a fóo dzə̀ é ŋkìʼnìn Jeriko.
Currently Selected:
Kintaŋ 36: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
