Kintaŋ 31
31
Ŋkfə́tír woo wír veé Midiané kitu
1 Nyùy Tàr yòŋ e Mooser jii, 2«Siìr ŋkfə́tír e wír veé Midiané kitu. Kee shooy ki shaa, áà nèn kpù, e dù, e tàtí atàr vé ve vé‑eè duùn ne fo mbìy.» 3Mooser nèn sùúy e wír veé Israyi jii, «Vèn báʼtí vilum ámóʼó fo věn mvəm, aá du, e màʼ wír veé Midian e rə́r sí, e siìr ŋkfə́tir Nyùy Tàr aáwuné kitu. 4Vèn yíi a fəə́r wíri nsə̀kì nsə̀kì fo věn ram sí, bìʼ rə́r see shooy.» 5Wír veé Israyi ku nèn fə̀tí vé rərí nsə̀kì e mòʼón mòʼón fo ram yee shó. Vé rər adzə̀me nèn a dzə ansə̀kì nshòv sibaà e ghvə̀m. 6Mooser nèn tsə̀nsí áwune é shùu rər wír nsə̀kì nsə̀kì fo ram yee shó, e wày e Finehas wo dzəə̀n wan taà cù Eleasar kiwo, wù wáa dù, a ker vikáŋ veé lav cù, à sóŋ se vé‑eè yíi a dù, a toŋ si. 7Á nèn dù, e fùnèn wír veé Midian, e yùyrí vilum adzə̀m, kù mo Nyùy Tàr‑iì yòŋèn e Mooser. 8Vé‑eè yùyrí wíri fó, e tàtí afon veé Midian atàn, aá dzə̀ jii, Evi wùn à Rekem, à Tsur, à Hur, e lì Reba. Vé‑eè yùyrí sá Balaam woo wan Beor.
9Wír veé Israyi nèn koòrí vikìy veé Midian wùn à wóné, e kùúy ŋgoo se nyàm sév sidzə̀m, e lì sé bvəy, e kùúy káv woo fó e dzə̀m. 10Áwune‑eè tòn ŋkà se laʼ see fo wír veé Midiane‑eè dzə́ sidzə̀m e və́yí, e kfə̀n tòn sa viláʼáy vév vidzə̀m. 11Vé‑eè kùúy kéŋ yév e dzə̀m ji nsàʼmboʼ, e tàtí nyám si wùn à wíri, 12e nèn dù e wír ve vé‑eè kooriné wùn à vifá ve vé‑eè kuuyin ví, e yèn Mooser wùn taà cù Eleasar sho, à màŋgòŋ woó Isray, aá dzə̀ é kibeèy é mboʼ yeé Moav e ŋguùŋè Jordan, a fóo dzə̀ é ŋkìʼnìn Jeriko.
Shúu rərí kfə́n é bàm
13Á lòo wìy, Mooser wùn à taà cù Eleasar, à vilìmbìy veé Isray vi nèn fəə̀ kibeey, e fíʼ səəsí áwune. 14Mooser nèn lò, e shwìíy kilòŋ wùn à vitú ve rər ve ví‑iì wiy fo shùu rər ví, aámóʼó dzə̀ ve vé‑eè wám wír nsə̀kì nsə̀kì, aámóʼó wám wír wií wií. 15Wù dzə́r aáwune jii, «Vèn yèe, e bóo màʼtì vikìy adzə̀m atin? 16Dzə̀ áwune vin ve vé‑eè jùmrìn ntir Balaam, e lèvtí wír veé Isray, á bìn ndzə̀m e Nyùy Tàr, é bo kifə̀ʼ#31.16: Kinyo kìn ki‑iì kòóy e Peor. (Leéy 25.1‑9). ki wiy, e teè màŋgòŋ wìr Nyùy Tàr. 17Bo dzə̀ lèn jii, vèn yúyrí wón vee vilum adzə̀m, e yùyrí vikìy wùn à wónlě ŋgòn ve á kiiyin ne lumène adzə̀m. 18Yii bèy, a vèn yíi bavtí wónlě ŋgòn ve á yóʼ ne kìíy lumèn adzə̀m, e lèm atin ji vén. 19Wìr dzə̀m fo věn mvəm wo wù kì yuyrin wír, kìn wo wù kì kùmèn dzə́n wìr yíi dzə̀ʼə̀m e shweesí kibeèy kishiíy saàmbà. Lóo dzə e kishiíy kee taár wùn à kee saàmbà ki, é vèn *kfə́mrí vitú vén, e kfə̀mrí vé wìr ve vèn koorin. 20Vèn yíi kfəmrí ndzə̀y sidzə̀m, à kifá kidzə̀m ke á fèrìn e jùv, kìn e wúy bvəyi, kìn e kicí kí.»
21Taà cù Eleasar nèn a naàrì nsər se Nyùy Tàr yòŋèn e Mooser e vé rər ve á kì dzəə̀n é shùu rərí. 22A sí dzə̀ jii, kifá ke á fèrìn e kisha ki, kìn dzə̀ ké mbàm ke baar kí, kìn ke fəvír kí, kìn kee *brons, kìn dzə̀ kisha kee kiy, kìn kee tin, kìn kee *led, 23kifá kidzə̀m ke yòʼ dzə̀ və́yí tòn, á kù lì, é kí shaa é və̀y, e bó a dzə kiránén, là *kifàn. Yii bèy, aá kù kfə́mri sa e mendzə́v me ŋkfəmrì mè. Kifá kidzə̀m ke a dzə̀ kí shwì é və̀y, aá kfə́mrí kee shooy e mendzə́v me ŋkfəmrì#31.23: mendzə́v me ŋkfəmrì: Leéy: 19.9. mè cáʼ. 24Lóo dzə e kishiíy kee saàmbà, é wíri ku sù ndzə̀y sév, e nèn a dzə aránén là kifàn. Bo a dzə̀ lèn, á nə̀ə́ é kibeèy.
Kijav ke nsàʼmboʼ
25 Nyùy Tàr suúy e Mooser jii, 26«Vèn à taà cù Eleasar, à vilìmbìy ve kfəə seé Isray vi yíi taŋ vifá ve á kuuyin fó kwaʼ rər vidzə̀m, e wìy sho. Á ku tàŋ wíri, e tàŋ nyám si. 27Á táŋé, aá tóʼnín é ntìntìn, é mbìv yìmòʼ du e vé rərí, é yìmòʼ du e kibér ke màŋgòŋ ki. 28Fo mbìv vifa ye yì du e vé rərí, aá fəə́r nsùʼ Nyùy Tàr fó fo. Á yíi fəə́r kifá kimòʼón fo vee ghii tàn vi. Á ku fə̀ə́r, kìn dzə̀ fo wíri, kìn dzə̀ fo anàʼa, kìn dzə̀ fo vimbèʼbìy ví, kìn dzə̀ fo bvə́y si. 29Á fəə́r nsùʼ və̀n fo áwuné mbìv vifa, e fò e taà cù Eleasar ji cu Nyùy Tàr. 30Fo mbìv vifa ve ví du e màŋgòŋ woó Isray, aá fəə́r kifá kimòʼón fo vee mtàn vi. Á ku fə̀ə́r, kìn dzə̀ wíri, kìn anàʼ, kìn dzə̀ vimbèʼbìy, kìn dzə̀ bvə́y si, kìn dzə̀ nyám símóʼ sí. Á fəər bèy, á fò e wír veé ram Levìi, áwune ve á leey fo kibàn ké Nyùy Tàr kí.» 31Á bèy, Mooser wùn taà cù Eleasar ku nèn yiì mo Nyùy Tàr‑iì yòŋèn e Mooser.
32Vé‑eè tàŋ vifá ve vé‑eè kuuyin fó kwaʼ rər, e wìy sho, a bó á yoʼ wày ve wìr mòʼón mòʼón‑eè turin, ví wáa dzə jii, bvə́y see njiì kishóv ghií ntuùfú aànsə̀kìi nshòv sitàn e msaàmbà e ghiì ntuùfú (675,600), 33anàʼ nsə̀kì nshòv sibaà e msaàmbà (72,000), 34vimbèʼbìy nsə̀kì nshòv mòʼón e mntuùfú (61,000), 35e bóo lì vikìy ve á yóʼ ne kìíy lumèn nsə̀kì nshòv sibaà e mtaár (32,000).
36Kintoʼnìn ke vé‑eè foon e wír ve vé‑eè duùn rə́r kí nèn a dzə jii, bvə́y see njiì kishóv ghii tàn aànsə̀kìi nshòv saàmbà e mtaár e ghii taár (337,500), 37a nsùʼ Nyùy Tàr fó mbìv fen dzə̀ njiì nshòv sitàn e msaàmbà e ghiì ntuùfú (675). 38Anàʼa‑aà dzə̀ nsə̀kì nshòv ntuùfú e mtaár (36,000), a nsùʼ Nyùy Tàr‑iì dzə̀ fó fo, anàʼ nshòv sibaà e msaàmbà (72). 39Vimbèʼbìy ví‑iì dzə̀ kishóv ghii tàn aànsə̀kìi mtaár (30,500), nsùʼ Nyùy Tàr wáa dzə fo fo, vimbèʼbìy nshòv mòʼón e mntuùfú (61). 40Wíri wáa dzə nsə̀kì nshòv ntuùfú e ghvə̀m (16,000), nsùʼ Nyùy Tàr wáa dzə fo fo, wír nshòv sibaà e mtaár (32). 41Mooser nèn lì nsùʼ Nyùy Tàr, e fò e taà cù Eleasar, kù mo Nyùy Tàr‑iì yòŋèn e wun.
42Kintóʼ ke kí‑iì duùn e wír veé Israyi, ke Mooser‑iì toʼnin vifá, e bày fo ké vé rər kí, 43kí nen a dzə jii, bvə́y see njiì, kishóv ghii tàn aànsə̀kìi nshòv saàmbà e mtaár e ghiì taár (337,500), 44anàʼ nsə̀kì nshòv ntuùfú e mtaár (36,000). 45Vimbèʼbìy kishóv ghii tàn aànsə̀kìi mtaár (30,500). 46Wíri wáa dzə nsə̀kì nshòv ntuùfú e ghvə̀m (16,000). 47Fo vintóʼ ve vifa ve ví‑iì duùn e wír veé Israyi vin, Mooser‑iì fə̀ə́r kifá kimòʼón kimòʼón fo vee mtàn vi. Wù fəə́r fó mbìv wíri, e fə̀ə́r fo mbìv nyàm, e nèn fò e wír veé ram Levìi, áwune ve á leey fo kibàn ké Nyùy Tàr réŋréŋ mo Nyùy Tàr‑iì yòŋèn e wun.
48Á bèy, vitú ve rər ví nèn yèn Mooser, 49e sùúy sho jii, «Aŋgàa lìm vée tàŋ ne vé rər ve á dzəə̀n e věr sar adzə̀m, a bó wìr mòʼón yoʼ lày fo věr mvəm. 50Vèr nen wìy e vifá ve sùsù vi ve dzəə̀n *kisha ke mbàm ke baar kí ji cu Nyùy Tàr. Kù dzə̀ vifá ve wìr mòʼón mòʼón‑eè toon shó, e kwaʼ rər, e tùr, a ví dzə̀ jii, visáʼ wùn à mfuy si, andzə̀ŋgwáŋ, ayèreŋ, e lì ashàŋ. Vèr nén a wìy sho, e fo e Nyùy Tàr ji vèr tín á vitú vér bìʼ kiŋ ye wù kìŋsìn ver.» 51Mooser wùn taà cù Eleasar ku nèn sə̀ vifá vee kisha ke mbàm ke baar kí viy fo áwune, a vidzə̀m vi kù‑uù dzə̀ vifá ve kisù ke wùn. 52Vé‑eè fìʼ vifá vee kisha ke mbàm ke baar kí, ve vitú ve rər ví‑iì foon ji cu Nyùy Tàr, ví wáa dzə e shùu akilu ghii baà.#31.52: Lám Hibrùu kér jii, ashekel 16,750. Leéy mbìv Mfìʼ si. Kù‑uù fò vitú ve rər ve ví‑iì wám wír nsə̀kì nsə̀kì, à ve ví‑iì wám wír wií wií ví. 53Kù dzə̀ vifá ve wìr mòʼón mòʼón‑eè tùrìn kitú kfə́, e bòŋ fó kwaʼ rər. 54Á vifá vee kisha ke mbàm ke baar kí ve Mooser wùn taà cù Eleasar‑iì səən fo vitú ve rər ve ví‑iì wám wír nsə̀kì nsə̀kì, à ve ví‑iì wám wír wií wií ví. Áwune sə́, e dù lèm e *kibàn ké ntàsín ji vifá ve ví wíy a yiì, é Nyùy Tàr wáa kuumé wír veé Isray.
Currently Selected:
Kintaŋ 31: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
