Kintaŋ 10
10
Sóŋ see kisha ke mbàm ke fəvír kí
1 Nyùy Tàr lò, e yòŋ e Mooser jii, 2«Fèr sóŋé e baà e *kisha ke mbàm ke fəvír, ke á dzə̀vtìn kí. Á wíy a toŋ sóŋ é ghan se á báʼti wír veé Isray, a toŋ e ghan se wír veé Israyi sí yiì a ŋaʼáy, a dù. 3Á wíy lòo toŋ sóŋ yee baà e dzə̀m, bo dzə̀ ji màŋgòŋ woó Isray e dzə̀m ku bàʼtí e wò si e shùu *kibàn ké ntàsín. 4Yii bèy, aá tòŋ sóŋ e mòʼón cáʼ, bo ló baʼtí vilìmbìy ve wìr veé Isray ve dzəə̀n atǎr ram e wò si. 5A sóŋé dìy, e tònén, bo rám se sí dzəə̀n é kibeèy e mbìv yee fo shùy yii tó si lo, e ŋaʼáy, a dù. 6Sóŋé diy, e tònén fo kàŋ wo wù meen ji baà, bo rám se sí dzəə̀n é kibeèy é mbìv yee tsə́n sí lo, e ŋaʼáy, a dù. Sóŋ yee dìy, e tònéne dzə̀ kisəəm kee ji á sí ŋáʼay, a dù. 7Yii bèy, lóo dzə e ghan se á taʼ e baʼtí màŋgòŋ báʼtín, bo á tóŋ sóŋ, á bèy, e làa yòʼ toŋ, é yí diy, e tònén.
8«Kù wíy a toŋ wón Aaron sóŋ, áwune ve dzəə̀n atàá cù. Sóŋ ye toŋéné kù wíy a dzə nsər ye yì jòʼsìn fo vèn mo ŋgwàʼ sén sí wíy a dzə. 9Vèn wíy lòo dzə e věn nsay, aŋgaà vén vibàné lóo ghiʼ ven, vèn áwune lóo tam, é vèn wáa toŋ sóŋ, é yí wáa dìy, a tonén, é mo woo Nyùy Tàr woo Nyùy won nèn kuùmé ven, e sə̀ ven fo aŋgaà vén vibàné wo. 10Wíy lóo dzə e ghan se vèn banen, a sheʼrí Nyùy, kìn dzə̀ ŋkàʼ wo á lèmèn ji woó ghan see shó, kìn dzə̀ woo bìʼ ŋwee wo fíyi, vèn tòŋ sóŋ é kitu ke cù ye tonèné, e kfə̀n tòŋ é kitu ke cù kikòŋnìn, é mo woo Nyùy Tàr wáa kuumé ven, a sə ven. Kù dzə̀ mo Nyùy Tàr woo Nyùy won.»
Wír veé Israyi ŋáʼáy fó Gwan Sinay
11Yì‑iì dzə̀ é kishiíy kee mbaà fó ŋwee wo wú‑uù meen ji baà, e kiya ke kí meen ji baà mo wír veé Israyi‑iì loòn fó Ejiv, mbàʼ nèn lò fo kitu ke kibàn ké ntàsín. 12Áwune nèn ŋàʼáy#10.12: Wír veé Israyi‑iì ŋàʼáy fó woʼ yee Sinay, a dù, aá dzə́ʼə́m ne fo ŋwee nshòv mòʼón e ghvə̀m. (Leéy: Fəə 19.1‑2). A kfə̀n‑eè sì sá ji vishiíy nshòv bvə̀ʼə̀ e ghvə̀m mo vé‑eè yiìn kintaŋ ke mbìy ki. (Leéy: 1.2). fo woʼ yee Sinay fèy, a dù. Mbàʼ nèn wìy dù, e gbù e woʼ yee Paran.#10.12: wóʼ yee Paran: Kirə́ʼ kin ki dzə̀ kuy fo Gwan Sinay.
13Vé‑eè kèʼ ghán, a fəə, kù mo Nyùy Tàr‑iì yòŋèn, e shaà fo Mooser. 14Káŋ wo wù‑uù fəən mbìy‑iì dzə̀ rám se sí‑iì dzəə̀n e rám Judàá kilaʼáy, aáwuné sar cícíwàr, a kilìmbìy kév kí dzə̀ Naashon woo wan Amminadav. 15Kilìmbìy ke rám Issakar ki nén a dzə Netanel woo wan Tsuyar, 16a ké rám Sebulun ki dzə̀ Eliav woo wan Helon.
17Vé‑eè shòʼóy kibàn ké Nyùy, wír veé kfəə Gershon wùn à veé kfəə Merarìi nèn ŋàʼáy, e bèʼèy, a dù.
18Kaŋ wìr ve vé‑eè dzəə̀n e rám Ruben kilaʼáyí nèn ŋàʼáy, a dù e viŋkǎŋ viŋkàŋ, aáwuné sar cícíwàr. Kilìmbìy kév kí‑iì dzə̀ Elisur woo wan Shedeur. 19Kilìmbìy ke rám Simeon ki nén a dzə Shelumiel woo wan Tsurishadday, 20a ké rám Gad ki dzə̀ Eliasav woo wan Deyuel.
21Wír veé ram Levi ve dzəə̀n kfə́ə Kohati nèn fəə̀, a dù, aá béʼ vifá vee jeéy ví veé mvə̀m kibàn. Á yiì lòo meé fo vé‑eè du, aá tuúy ne kibàn.
22Káŋ wo wù‑uù jùmrìn nén a dzə wo wìr ve vé‑eè dzəə̀n e rám Efrayimé kilaʼáy. Á fəə́, a dù e viŋkǎŋ viŋkàŋ, aáwuné sar cícíwàr, a kilìmbìy kév kí dzə̀ Elishama woo wan Ammihud. 23Kilìmbìy ke rám Manasse ki nén a dzə Gamaliel woo wan Pedasur, 24a ké rám Benjamin ki dzə̀ Abidan woo wan Gidiyone.
25Káŋ wo wù‑uù sərin bám nén a dzə wo wìr ve vé‑eè dzəə̀n e rám Dané kilaʼáy. Á fəə́, a dù aáwuné sar cícíwàr, a kilìmbìy kév kí dzə̀ Ahiyeser woo wan Ammishadday, 26a ké rám Asher ki dzə̀ Pagiel woo wan Okran, 27a ké rám Navtali ki dzə̀ Ahira woo wan Enan.
28Á dzə́ə ye vé‑eè sìysìn wír veé Isray sho, á wáa fəə e ŋgoo sí ŋgoo si.
29Mooser lò, e yèn sə́ və Hobav. Hobav‑iì dzə̀ wan Ruel woo wir Midian, a dzə̀ tàr à wiiy Mooser. Mooser suúy shó jii, «Vèr sí du e kirə̀ʼ ke Nyùy Tàr‑iì yòŋèn ji wun wíy fo e vèr. Wìy ri, é vèsən du fó, é vèr yiì a leéy fo wò kijuŋ. Nyùy Tàr kàʼ ne ji wun yíi a leéy a fo wír veé Israyi.» 30Hobav bìnèr jii, «M yòʼ du. M lo, a kfən a dzə̀ e věr wòŋ, e dù, e yen wír vém.» 31Mooser kú a lon wun jii, «Kii wò, lá à yòʼ màʼtì ver. A dzə̀ kù kìíy wò fo vèr yíi lòo dù, aá wáa tam e woʼ. À yíi a dzə moo sí yér bey. 32Aà wìy, vèsən du, bo kifá ke juŋ ke Nyùy Tàr yíi a yiì e vèr, kìn dzə̀ kee ka, bo vèr yíi a yiì sa e wò.»
33Áwune nèn lò fo Nyùy Tǎr gwan, e ghàn vishiíy vitaár. Aá ghán bèy, a ŋkùv mensàŋ Nyùy Tàr du aáwuné mbìy, taʼ kirə́ʼ ke áwune bee shó. 34Á yií lóo fəə fo kibeèy, mbàʼ Nyùy Tàr kù a daà aáwuné kitu e shùy. 35Á yií lóo bèʼèy ŋkùv mensàŋ ji á waà sí du, Mooser nèn yòŋ jii:
«Éè Nyùy Tàr, ŋáʼáy, e tàʼár aŋgaà vé vibàné,
é wír ve á dzə wúu yée léʼkír.»
36Mbàʼ yií du, tiimè, kìn dzə̀ é ghàn ka, Mooser yòŋ jii,
«Éè Nyùy Tàr, kfə́n é bàm fo wír vée wùn,
wír veé Isray ve á dzəə̀n ansə̀kì ansə̀kì.»
Currently Selected:
Kintaŋ 10: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
