Matio 26
26
Vé wòŋe táŋ menàŋ me Jesus
(Maak 14.1‑2; Luk 22.1‑2; Joon 11.45‑53)
1Jesus fèr vinyo ve wù‑uù taʼ, e yeʼéy wíri shó vìn, ví mày, e nèn a suúy e wón və́ lìme jii, 2«Vèn kì jii, bèr ne vishiíy vibaà, aá wáa ker *Ŋkǎʼ Yáʼayshaà, a sì ghán se á wíy lì ŋgaà wo yírí dzəə̀n *Wanwìr və̀n, e fo ji á yúyrí é kintam.»
3Ku nèn a dzə e ghan fóo fèy, vitú ve atàá cù wùn à vé wòŋe tár e Kayfar woo taà cù wo kuʼǔn ntoʼ, 4a sìysì mo dzə̀ á yiì, e bóo nyaʼtí, e koo Jesus, e yuy. 5Á wáa sìysì bèy, a suúy jii, bó yòʼ dzə̀ á mùm kinyo kee shooy e kishiíy ké kiŋkàʼ fo wíri kaáy, e kèʼ a melaà.
Maria yóʼ Jesus e Betani
(Maak 14.3‑9; Joon 12.1‑8)
6Jesus yiì lò, e dù e ntèʼ yee Betani, e dù kiŋgàn e wìr wùmǒʼ lav, aá yoŋ ji Simon woo ŋgaà shìvnsay. 7Á lòo yikír, wiíy wùmòʼ nəə́, a wù kér kiyóʼóy ké bìʼ yímóʼó, a yí lùm e kav e ŋàŋ, wù shaà fo Jesus kì dzə́, e bòr biʼ rə̀y e kitu wo. 8Wón lìm Jesuse yén bey, e nèn a ŋeèy, a sə̀mnìn jii, «Wiíy və̀n sà jìvír biʼ rə̀n kisáŋ bèn ji ka á? 9Á kì yíi fiìnè biʼ yee shoon mbàm nyanyày, e jàv a mbàm e vé ŋgeʼe.»
10Á lòo sə̀mnìn bèy, Jesus kiíy, e dzə̀r aáwune jii, «Vèn sáʼ wiíy və̀n fo gha? Wù yiì a dzə̀ kinyo ke juŋ ki e mò féyì. 11Vèn à vé ŋgeʼe wíy a dzə ghán sidzə̀m, yii bèy, a bó vèn yòʼ wíy a yen mo. 12Biʼ ye wiíy və̀n sə̀tìn e mǒ wùn rə́ne dzə̀ ji wù nàŋsín ne wún wóm lèn, e yòʼ, é bo ghán sé dzəə̀mè si wìy a gheén. 13Vèn wáa kiíy rú jii, virə́ʼ ve á wíy a fìʼtì sáʼka Nyùy wo juŋ sho kitú ke nsay kidzə̀m, á wíy a fìʼtì sa kinyo ke wiíy və̀n yiìn, a kuumé wun.»
Judar kár menàŋ e Jesus bàm
(Maak 14.10‑11; Luk 22.3‑6)
14Wàn lìm Jesus wùmòʼ fo vee nshòv sibaà e ghvə̀me nèn lò, aá yoŋ yír rə́ ji Judar Iskariyor, e dù, e yèn vitú ve atàá cù, 15e dzə̀r jii, a wun sà wày Jesus aáwuné wo, á fò ka e wun a? Á yú bey, e nèn tàŋ mbàm mtaár,#26.15: Mbàm see mtaár sìn si dzə̀ se nàʼ wìr woó Isray‑iì yúyri kwǎn wìr, wù làʼ shó. (Leey: Fəə 21.32). e fò shó. 16Wù nèn kèʼ fo ghan fóo fèy, a shweʼ mo dzə̀ wù ghàn, e bóo way Jesus e wír vìyí wo.
Jesus wùn à wón və́ lìme yíkír, e jòʼsì
(Maak 14.12‑21; Luk 22.7‑13,21‑23; Joon 13.21‑30)
17Ghán sé Ŋkǎʼ Yáʼayshaà sìy si nèn wìy ghèén, a kù dzə̀ə́ kishiíy ké mbìy ki fó vishiíy fóo fèy ve wír veé Israyi yii yí *kibán kee là nyaà, wón lìm Jesuse dzə́r shó jii, «À taʼ ji vèr náŋsín wan njiì wo á yii yí e kishiíy fen a dzə̀ feé?» 18Wù bìnèr jii, «Vèn du é mvə̀mlaʼ, yén kày, vèn sùúy shó jii, Ŋgaà Yèʼéy suuy a ji ghán sə́ sí ghèén a ne, a wun taʼ ji wùn à wón və́ lìme ku yì Ŋkǎʼ Yáʼayshaà a dzə̀ e wùn lav.» 19Wón və́ lìme nèn yiì mo wù suuyin, e dù, e nàŋsín vifá ve kiŋkàʼ kìy fo.
20Yiì lòo dzə e ŋkuùr, Jesus wùn à wón və́ lìm vee nshòv sibaà e ghvə̀me tár fó adzə̀m. 21Á lòo yikír, wù suúy jii, «M suuy ven kinyo ke ru kí jii, wìr yíi lò fo věn ŋgoo, e fo mo áàŋgaà vém vibàné.» 22Wù suúy bey, áwune nèn a rə̀m kinyo kee shooy, a sòv vitú, a wìr dzə́r jii, «Tàr, dzə̀ wàa dzə rú mo á?» 23Wù bìnèr jii, «Dzə̀ wír wo vèr wun sə̀ʼə̀n nshèv láŋ e mòʼón. 24A m suuy jii, ŋgaà wo yírí dzəə̀n Wanwìr və̀n sí yìi dù mo Ŋwàʼ Nyùyi suuyì. Yii bèy, a lòné dzə̀ wó wìr woo shó wo wù yíi fo mo áàŋgaà vém vibàné ji á yúyrí. Kí bòŋ ji bo bó á yòʼ‑oò lo dzə̀ə́ ŋgaàŋ.» 25Judar woo ŋgaà və menàŋ və̀y nèn dzə̀r sá jii, «Tàr, a dzə̀ wàa dzə mo á?» Jesus kòrìr jii, «Kù sùúy wò.»
Jesus fó ntò se vifa və́ vé yi
(Maak 14.22‑26; Luk 22.14‑20; 1 Korin 11.23‑25)
26Á ku nèn a yikír bèy. Jesus yiì lò, e lì ntuʼ kiban, e beèrì Nyùy, e bèʼtí, e jàv e wón və́ lìme, e sùúy jii, «Vèn ko, e yì, dzə̀ wún wóm.» 27Wù nèn kfə̀n lì bàr, e beèrì Nyùy, e fò aáwune, e sùúy jii, «Vèn nó fó fo wír adzə̀m. 28Dzə̀ mensə́ mem me Nyùy wíy gwàr *mensaŋ sho, a mè leem fo wíri anín, é Nyùy laysin ajay vév. 29Vèn wáa kiíy jii, bó m yòʼ dzəə́ wìy no meluʼ me *vayin mèn, e meé e ghan se Nyùy woo Tàr wor wíy a saʼ vifon və́, é bo vèsən nó meé ndzə ye fíy.» 30Wùn à Jesus nèn yòv luŋ, e sùyrì Nyùy sho, e fəə̀, a koʼ e Gwan Vicì vé Oliv.
Jesus tóʼ ji Pita yíi meŋ a wun
(Maak 14.27‑31; Luk 22.31‑34; Joon 13.36‑38)
31 #
Sekariya 13.7. Á lòo dù, Jesus wáa suúy aáwune jii, «Vitsə́ʼ vé lán vi yíi kùʼ, é vèn bin ndzə̀m e mò adzə̀m. A dzə̀ mo vé‑eè saŋen ji Nyùy suuy jii, ‹M wíy yuy nshìy, é ŋgoo njiì táʼrí.› 32Yii bèy, Nyùy ghán fəə́r mo fó kpu, é m du fó mbìy, é vèsən tár é mbìv wòŋ yee Galeli.» 33Wù suúy bey, Pita nèn sùúy sho jii, «A wìr dzə̀m fə̀m bìn ndzə̀m e wò, bo bó yòʼ dzə̀ m bìn gheéy.» 34Jesus bìnèr jii, «Kú a kiíy rú jii, kù yíi a dzə vitsə́ʼ vé lán vi, é bo lúm ŋgvəvi wáa toŋ, aà méŋ ne mo akàŋ ataár.» 35A Pita kù tíy kfə́ jii, «A fə̀m dzə̀ ji m kpú wòsò, la m yòʼ mèŋ wò gheéy.» Wón lìm Jesuse ku nèn bìnsí sa bèy adzə̀m.
Jesus bunrì e kày yeé Gesemane
(Maak 14.32‑42; Luk 22.39‑46)
36Wùn áwune dù, e nə̀ə́ e kày ye á yoŋ ji Gesemane, Jesus suúy jii, «Vèn dzəʼəm fen, é m tsəʼ wún, e dù, e bùnrì fèsə.» 37Wù lì Pita wùn à wón Sebedi vee abaà, wùn áwune tsə̀ʼ wún. Wù nèn kèʼ, a rə̀m kinyo ke kí yíi koóy, shilív sə́ shí wáa buʼ. 38Wù suúy aáwune jii, «Kindzə́m ke kí dzəə̀n e mǒ shiliv kí dzə̀ ke dzə̀ kí yùyrí mo. Vèn kú a dzə fèn e mǒ ghaŋ, a kìʼ, a bùnrì.» 39Wù nèn kòʼtí fo mbìy shishàr, e nàsì fo nsay kfə̀ə́kfəv, a bùnrì jii, «Éè Tàr wor, a fèn dzə̀ ji dzə̀ à yiì, la m yòʼ nò fó bàr ŋgeʼ fèn, à kù yiì. Yii bèy, ku yiì a dzə̀ ke koŋ wò ki, lá à yòʼ yiì ke koŋ mo.»
40Wù bùnrì bèy, e kfə̀n fo wón və́ lìm vee ataár vìyi kì dzə́, e yèn, aá buúne. Wù nèn yòŋ Pita jii, «Bó yòʼ dzə̀ vèn wàa kìʼ shintàm, é vèsən wáa bùnrì adzə̀m à? 41Vèn wáa kìʼ, a bùnrì fo vinyo ve ví mum ven ví gháʼ ven. Vèn wáa kiíy jii, mo shilív shí fə̀m koŋ fó yiì kinyo, wúné waà sháʼninè.» 42Wù nèn kfə̀n dù fo akàŋ vee abaà, a bùnrì jii, «Éè Tàr wor, a dzə̀ ji m ku nò fó bàr ŋgeʼ fèn, bo dzə̀ m nò.» 43Wù lòo kfən fo wón və́ lìm vìyi, e yèn, aá kù buúne, bìʼ fo mbuùné sí‑iì dzəə̀n aáwuné si ŋkóŋkóŋ. 44Wù nèn kfə̀n dù fo akàŋ vee ataár, a bùnrì mo wù kì bunrì. 45Wù kfə́n, e dzə̀r e wón və́ lìm vìyi jii, «Vèn kù sìíy, a buuné ji á meemè à? Kí ghèén ne. Sì ghán se á sí wáy ŋgaà wo yírí dzəə̀n Wanwìr və̀n e wír ve bií wo. 46Vèn nanen, é vesən wáa dù, ŋgaà wom menàŋ sí wiyì.»
Á koó Jesus
(Maak 14.43‑50; Luk 22.47‑53; Joon 18.3‑12)
47Kù mo Jesus suuy bèy, Judar woo wír fo wìr vee nshòv sibaà e ghvə̀me nèn bvə̀y wùn à ŋgoo wìr ve vitú ve atàá cù wùn à vé wòŋe tumen. Aá wiy, kér nyùy sí wùn à vibur vi. 48A ŋgaà menàŋ və̀y kì sìysì ne wùn áwune jii, wír wo wun du, e baamé dzə̀ á ŋgaàŋ woo shó. Á bàm á kijuŋ. 49Wùn áwune wìy, wù ku nèn shaà, e dù fo Jesus wùn, e yòŋ jii, «Tàr, m shaʼtì wò», e baàmé. 50Jesus yòŋ jii, «Ŋkar yèm, yiì ri mo à kì taʼ, e yiì.»#26.50: ŋkar yèm, yiì ri mo à kì taʼ, e yiì; Kìn jii: ŋkar yèm, à wìy ji ka? Wír vìyi nèn tò, e bàm Jesus, e ghàr kitávín.
51Wìr wo wùn à Jesus kì dzəə̀n wùmòʼ dzə̀n nyùy, e lò ji wun gwar wír sho, a dzə̀ kwǎn taà cù wo kuʼùn, nyùy shaà, e shòʼ a dzə̀ kituʼùr. 52Jesus suúy e ŋgaàŋ jii, «Siìr nyùy yè fo. Kú a kiíy jii, wír ve á shóʼ nyùyí wíy kpu kpú nyùy. 53Bó à yòʼ kì jii, a kì dzə̀ ji vindzəʼ, m lòn, Tàr wor tsə̀nsí nshèelav sə́ ansə̀kì ansə̀kì kàŋ mòʼón à? 54A m lò, e yiì bèy, é kinyo ke vé‑eè saŋen é Ŋwàʼ Nyùy ji kí kér fó wìy koóy ki ghán é le, e bóo koóy?»
55Jesus suúy bey, e dzə̀r e màŋgòŋ və̀y jii, «Vèn kì wiy ji vèn koó mo, wiy e nyùy sí wùn à vibur vi ben, a m dzə̀ shóŋ a? Mò‑oò rə́si yéʼey wíri é lav cù kishiíy mo kishiíy kí‑iì dzəə̀n, shém ka fo vèn koó mo é ghan see shooy? 56A kinyo ke kí kooy kìn ki kòóy bèn ji kinyo ke aŋgàa ntum Nyùyi‑iì saŋen kí fiʼ ghèén.» Mo á koon Jesus, wón və́ lìme nèn shwèy wun adzə̀m, e lèʼkír.
Vé wòŋe wáy nsaʼ Jesus
(Maak 14.53‑65; Luk 22.54‑55,63‑71; Joon 18.13‑14,19‑24)
57Wír ve á kì koon Jesus vìyi nèn lì, e dù sho e Kayfar woo taà cù wo kuʼǔn laʼ. A wír ve á duŋrì nsər Nyùy wùn à vé wòŋe kì bàʼtí ne fo. 58Á lòo dù sho, Pita wáa jùmrì fo bàm kwaʼda. Wù dù, e mèé e taà cù wo kuʼùn və̀y maàndzə, e nèn dzə̀ʼə̀m fo wùn à nshèelav si, a yuurí mo kinyo ke Jesus ki yíi tuúy.
59A vitú ve atàá cù wùn à vé wòŋe sí tar kinyo ke Jesus, taʼ wír ve á wáa toy vinyo e bàm wó, aá fíʼ tinén ji á yúy, 60yii bèy, e làa yòʼ a ker kinyo gheéy. Kí gháʼ, wír ámóʼó nèn lò, e kòʼtí fo mbìy abaà, 61a suúy jii, vé‑eè yù, a jwè və̀n suuy jii, a dzə̀ wun kèr lav ye á cu Nyùy sho, e bòm ye sən vishiíy vitaár. 62Taà cù wo kuʼùn nànèn, e dzə̀r e Jesus jii, «À kù yòʼ yú vinyo ve á suuy e wò bàm vin a? Bó à yòʼ kér kinyo kée bìnèr à?» 63Jesus ku nèn a tiy, e làa yòʼ a ghay. Taà cù wo kuʼùn və̀y nèn kfə̀n sùúy sho jii, «Ku lìʼ, e kàn yír Nyùy wo wù gòʼòn kàŋ mòʼón. Dzə̀ wò *Mfə̀ə́r woo Wan Nyùy moo ŋgáŋ á?» 64#Nsùyrì Nyùy 110.1; Daniel 7.13. Jesus bìnèr jii, «Kí dzə̀ mo à suuy bèy. Vèn wáa kiíy jii, vèn wíy yen, a ŋgaà wo yírí dzəə̀n *Wanwìr və̀n dzə́ e Nyùy woo Ŋgaà Vitaàví koy yìyí, e kfə̀n wìy yen, a wù wiy e mvə̀m mbàʼ.»
65Taà cù wo kuʼùn yú kinyo kìy, kí nyár wun, wù sàr ndzə̀y fó wùn, e sùúy jii, «Wìr və̀n tsə́y kóy wùn Nyùy. Bó yòʼ dzə̀, á kfə̀n a tàʼ wír wùmòʼ ji á dzə́r kinyo sho. Vèn lo yù sá mo wù tsə́y kóy wùn Nyùy. 66Vèn tìnén kén ji ka?» Á bìnèr adzə̀m jii, «Á yúy yuyín.» 67Á nèn kèʼ, a cu mentíy e Jesus si, a fùn. Ámóʼó wáa wooné, a dzə̀v, a sheʼ jii, 68«Wò woo Mfə̀ə́r wo à yii yén virə́ʼ, suúy ri wír wo wù dzəv wò.»
Pita méŋ Jesus
(Maak 14.66‑72; Luk 22.56‑62; Joon 18.15‑18,25‑27)
69Mo Pita kù dzə́ e maàndzə fèy, wánlè wiíy wo wù‑uù lim fo yén, e sùúy sho jii, «À dzə́ bèn, a wò‑oò dzə̀ sá vèn à Jesus woó Galeli və̀y.» 70Pita nèn shàʼnín e wìr dzə̀m si jii, «Bó m yoʼ kìíy kinyo ke à táŋri kìn.» 71Wù lò fo fo, e dù, e lòo tiy e shùu kishem, wánlè wiíy wùmòʼ kfən yèn, e sùúy e wír ve vé‑eè tíy foo jii, «Wìr və̀n kì dzə̀ e Jesus woó Naasarer və̀sə ŋgoo.» 72Pita nèn kfə̀n shàʼnín, e lìʼ jii, «Bó m yòʼ fə̀m kì wír wo á yoŋ və̀n.» 73Shintàm shi lòo dàr, wír ve á kì tíy fo vìyi kóʼtí, e sùúy e Pita jii, «À dzə̀ rú é ŋgoo fo. Kisúŋnìn ké ki dzə̀ ké wìr woó Galeli.» 74Pita nèn a kàn kitú kfə́ lèn, a lìʼtì feyì jii, «M yòʼ kì wír woo shó.» Kù mo wù baʼ fo shuù, kiyuú ki nèn tòŋ. 75Wù nèn kuùmé kinyo ke Jesus kì suuyin jii, «Kiyuú ki yíi lòo jì ji kí tóŋ, aà méŋ ne mo akàŋ ataár.» Mo Pita kuumen, e nèn fəə̀ fó ndzə, a gheèsì, a dìy.
© 2022 CABTAL