Cù 7
7
Nsər se cù ye yí laʼ njò
1Ké cù yee bìʼ njò kí dzə̀ jii, dzə̀ cu yee jeéyí féyì. A nsər se cù sìn si dzə̀ jii, 2á wíy a see nyam cù rə̀n a dzə̀ é kirə̀ʼ kee fo á yii seé ye cù ye á ton nyám e dzə̀m, lóo see, aá wáa waŋrí mensə́ mvə é virəv vé kiy cù vidzə̀m. 3Á yíi fo fóm si sidzə̀m e Nyùy. Fóm seé kùn, fóm se sí dzəə̀n é wǔn vito, 4ndzəʼ see sibaà wùn à fóm sə́ se sí dzəə̀n é shintay si, à kimbày ke bày ke ŋgaà cù kù fəər wùn à ndzəʼ si. 5Taà cù wíy tòn e kiy cù. Dzə̀ cu Nyùy Tàr ye və́yí bin fo fo, a dzə̀ cu ye yí laʼ njò. 6Ké jav nyàm, a dzə̀ lumèn woo atàá cùú mvə̀m kfəə, wù yì, a wù yí a dzə̀ é kirə̀ʼ kee jeéy kí. Dzə̀ kifá kee jeéy kí féyì.
7Nsər cù yee bìʼ njò kù dzə̀ moo ye cù ajay. Taà cù wo wù manrin jay dzə̀ wo wù yíi yòv nyam cù. 8Taà cù wo wù yiìn cu wìr ye tonèné, jùv nyàm cù yee shooy yíi a dzə rə́ə. 9Cu vifa ve yi ve á naŋsin, e fèr e dzə̀me wíy a dzə yé taà cù wo wù yiìn cu yee shooy, kìn dzə̀ vifá ve yi ve á naŋsin, e tòn, kìn ve á kaŋen é kikaŋ ke sətín kí, kìn e kee tèéter ki. 10Cu vifa ve yi ve kó vi e dzə̀me nén a dzə yé atàá cù adzə̀m, áwune vee wón Aaron, aá jav réŋréŋ, kìn dzə̀ vifá ve yi ve á tatin meŋgvə́r shó, kìn vee là meŋgvə́r.
Cu kikòŋnìn
11Nsər see bìʼ cu ye wìr fó e Nyùy Tàr ji cu kikòŋnìn si sìne. 12A wìr lò a yiì cu rə̀n, a dzə̀ yée beèrì Nyùy, bo wù yii e nyàm cù kikòŋnìn, e bóo kfə̀n dzə̀sì kibán kee là nyaà shó, kfəə́ e taár, ke á tovin meŋgvə́r shó, à ke á vèmèrìn, e bóo yoʼ meŋgvə́r shó yoʼón kí, à ke á fèrìn a dzə̀ e meŋkfəŋ me kpuún mè, e tòv e meŋgvə́r mè. 13Wù lóo yiì cu kikòŋnìn rə̀n, yee ji wun beerì Nyùy Tàr, é wù kfən fò sá ntuʼ se kiban símóʼ sí, a dzə̀ see kibán ke nyaà kí. 14Fo kfəə se kiban sìn, aá ku bàytì ntuʼ e mòʼón mòʼón jeéy jeéy ji ké Nyùy Tàr, é taà cù wo wù kì waŋrin mensə́ me nyàm cù nèn lì mbìv yee shooy. 15Á kù wíy kfər nyam cù kikòŋnìn ye dzəə̀n cu yée beèrì Nyùy Tàr a dzə̀ e wun kishiíy ké cù. Bó wìr yòʼ wíy lèm kifá fo fo, é kí meé kijàvndzə.
16Yii bèy, wáa dzə ji wìr wiy e cu kikòŋnìne, a dzə̀ ji wun lem ŋkàʼmé, kìn ji yé kimbòŋwùné, bo á yí e kishiíy ke wù yii cu rə́. Yì rán kibvəə́shí, a kifá ki bér, bo dzə̀ á yì. 17Á bèy, wáa dzə e kishiíy kee taár, a nyàm dzə̀ə́ sho, bo á kù ton, é yì shwí. 18A kifá ki bèr fó nyàm cu kikòŋnìn, e meé e kishiíy kee taár, wìr yí, bo wìr wo wù kì yii cu lày ne, a bó Nyùy yoʼ səə̀sí cu rə́. Bo sì lor, wìr wo wù yiin lí lòn fó fo. 19A nyàm cù rə̀n kùm kifá ke *kifàn kí, bo bó yòʼ dzə̀ á dzəə yì, bo á sí ton tònèn, é yì shwí.
Wìr wáa dzə e ránén, là kifàn, bo a dzə̀ wù yì nyam cù kikòŋnìn. 20Wìr wáa ker kifàn, e yì, bo á yíi fəə́r wun fo wír Nyùyí mvəm. 21A wìr lòo dzə, e kùm kifá ke kifàn ke kí loòn fo wìr, kìn ke kí loòn fo nyàm, kìn dzə̀ kfə́ə kifàn kiné kí, e yiì lò, e yì nyám ye á cuùn Nyùy Tàr shó ji cu kikòŋnìn, bo á kù yíi fəə́r ŋwèrín fo wír Nyùyí mvəm.
22 Nyùy Tàr kfən yòŋ Mooser, 23e fò ntò se vinyò símóʼ sí se dzə̀ wír veé Israyi wàa lèm. A sí dzə̀ jii, lá wìr yòʼ wìy yì fóm, kìn dzə̀ sé nàʼ, kìn sé njiì, kìn sé bvəy loŋ. 24A dzə̀ á lì fóm se nyàm ye yì kpuun kpuún, kìn ye yuyrin nyám ye bi, e yiì kifá ke sən kí shó, yii bèy, lá kí yòʼ kòóy ji wìr yí. 25Wìr yí fóm se nyàm ye á cuùn Nyùy Tàr shó,#7.25: Kìn jii: wìr yí fóm se nyàm ye dzə̀ á cù Nyùy Tàr shó. e cu ye və́yí bin fo fo, bo á fəər ŋgaàŋ fo wír Nyùyí mvəm. 26Lá vèn yòʼ wìy yì sá mensə́, a fə̀m dzə̀ me gha, kìn dzə̀ me shinə̀n, kìn dzə̀ me nyàm. Lá vèn yòʼ wìy yì e kirə̀ʼ kidzə̀m fo vèn wíy a dzə. 27Wìr gbu nsər rə̀n, bo á kù fəər ŋwèrín fo wír Nyùyí mvəm.
28 Nyùy Tàr kfən fò ntò se vinyò símóʼ sí e Mooser, 29se dzə̀ wír veé Israyi wàa lèm. A sí dzə̀ jii, wìr yii cu kikòŋnìn, bo wù kù fəər mbìv yìmòʼ ji cu Nyùy Tàr ye tayíné, 30e wìy sho e kiwó kfə́ kí ji cu Nyùy Tàr ye və́yí bin fo fo. Wù wiy e fóm se nyàm yee shooy wùn à shúu shiliví, aá nan shúu shiliv é yuv, e dìn e Nyùy Tàr ji cu rə́. 31Taà cù yíi tòn fóm si é kiy cù, é shúu shiliví nèn dù aàtàá cùu. 32Á bèy, é ŋgaà cù nèn kfə̀n fò kibiy ke yìy kí ji mbìv ye wù tayin fo wun cù kikòŋnìn ji ye taà cù. 33Wàn Aaron woo shó, wo wù kì yiìn cu e mensə́ mè, e yiì e fóm si, dzə̀ wùwun wo wù yíi a ker mbìv yee shooy. 34Fo mvə̀m cu kikòŋnìn wìr veé Isray, Nyùy Tàr shòʼ ne shúu shiliv wo á nanè, à kibiy ke nyàm ye á yiìn cu sho ki, e fò ji mbìv Aaron woo taà cù wùn à wóné. Dzə̀ mo wír veé Israyi kù sí wìy a yiì ghán sidzə̀m. 35Fo cù ye á yii ji yé Nyùy Tàr ye və́yí bin fo fo, á mbìv ye vé‑eè shoʼon ji ye Aaron wùn à wóné, e kèʼ fo ghan se vé‑eè yoʼon áwune ji atàá cù Nyùy Tàr. 36Wáa dzə e kishiíy ke vé‑eè yóʼ áwune, Nyùy Tàr yòŋ ji á mo wír veé Israyi kù sí wìy a fo mbìv rə̀n mo ŋgwàʼ sév sí wíy a dzə.
37Á nsər se cù ye tonèné wùn à sé cù vifa ve yi, à sé cù ajay, à sé cù yee bìʼ njò, à sé cù kinjoʼo, e lì sé cù kikòŋnìn. 38Dzə̀ mo Nyùy Tàr‑iì yòŋèn e Mooser e Gwan Sinay e kirə̀ʼ ké woʼ kí, e kishiíy ke wù‑uù yòŋèn ji wír veé Israyi yii á cu.
Currently Selected:
Cù 7: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
