Cù 23
23
Ntò se vinyò see kùm ŋkàʼ sé a ghvəm Nyùy Tàr
1 Nyùy Tàr yòŋ e Mooser jii, 2«Suúy e wír veé Israyi jii, ŋkàʼ se dzəə̀n sé Nyùy Tàr se vèn wíy lòo banén ji á bunrì mo woo Nyùy Tàr é ghan sí ghan sí sí dzə̀kìr. A sí dzə̀ jii, 3vèn lim lim yéné vishiíy ntuùfú, yii bèy, kee saàmbà ki dzə̀ kishiíy ké bam ke vèn meeme é mbòŋén fo věn antàʼtìn, e bàʼtí, a bùnrì mo é virə̀ʼ vidzə̀m ve vèn dzə́ sho. Lá vèn yòʼ yiì lim yímóʼó gheéy. Dzə̀ kishiíy ké bam ke Nyùy Tàr.
4«Ŋkàʼ sé Nyùy Tàr sí nén a dzə se a dzə̀ vèn wìy a kaarí, a bùnrì mo shó, woo shó, e sə́ see ghán sí.
Ŋkǎʼ Yáʼayshaà wùn à wó Kiban kee là Nyaà
(Kintaŋ 28.16‑25)
5«Lóo dzə e ŋkuùr kishìíy kee nshòv sikweè e ghvə̀m fo ŋwee mbìyi, á yiì Ŋkǎʼ Yáʼayshaà,#23.5: Leéy: Fəə 12.21‑27. e ghvə̀m Nyùy Tàr. 6Lóo dzə, e kèʼ fo kishiíy kee nshòv sitàn e ghvə̀m, kù é ŋwee foo fèy, é vèn yii Ŋkǎʼ Kiban kee là Nyaà,#23.6: Leéy: Fəə 12.15‑20. a ghvəm Nyùy Tàr, aá kù wíy a yiì kishiíy saàmbà, a yi kibán a dzə̀ kee là nyaà. 7Lóo dzə e kishiíy ké mbìy ki fó vishiíy ve dzəə̀n vé ŋkàʼ vən, vèn kaàrí, a bùnrì Nyùy Tàr. Lá wìr yòʼ yiì lim ye wù yii yii e vishiíy vee viy e kishiíy fen. 8Vèn cu Nyùy Tàr e cu ye tonèné kishiíy saàmbà. Lóo dzə e ke kí meen ji saàmbà ki, vèn kfə̀n kaàrí, e bùnrì Nyùy Tàr. Lá wìr yòʼ lìm lim e kishiíy fen moó vishiíy vímóʼ ví.»
Ŋkǎʼ Ŋgòn se Vifa
9 Nyùy Tàr kfən yòŋ e Mooser jii, 10«Suúy e wír veé Israyi jii, vèn wíy nəə e wòŋ woo fo m li ven, e dù sho, káv vifá, vèn tòmbìy lì ŋgòn se vifa, e sə̀ə́y, e dù, e yèn taà cù sho. 11Taà cù yíi nàn cu rə̀n e Nyùy Tǎr si ji Nyùy fiʼ biìmé ŋgaà cù. Wù yíi nàn a dzə̀ é kishiíy ke kí jùmrìn kishiíy ké bam. 12Lóo dzə, a kù dzə̀ é kishiíy ke á yii cu ye nanèn rə́ne, á kù seè wan kiyaʼ woo kiyá woo là nsem ji cu Nyùy Tàr ye tonèné. 13Cu vifa ve yii yíi a dzə meŋkfəŋ me kpuún mè akilu abaà, aá shwír meŋgvə́r shó. Kù dzə̀ cu ye və́yí bin fo fo, a kirəm kfə́ kí boŋ Nyùy Tàr. Á ku tàtí sa cu melùʼ fo, lita mòʼón#23.13: lita mòʼón: Keé Lǎm Hibru ki dzə̀ jii, kintóʼ ke hin kimòʼón fo vee vikweè vi. (Leéy: Fəə 30.24).. 14Lá wìr mùm, e yì ŋgòn se vifa, kìn sí dzə̀ sikó, kìn sikáŋén, kìn á tòn a dzə̀ kibán sho, a bó á yií ne cu rə̀n. Dzə̀ nsər ye vèn wíy a lèm e ŋgwàʼ sí ŋgwàʼ si, e virə̀ʼ vidzə̀m ve vèn dzə́ sho.
Ŋkǎʼ Vifa ve Kavín ví
(Kintaŋ 28.26‑31)
15«Vèn ku tàŋ ŋgàm si saàmbà, e kèʼ fo kishiíy ke kí batin kishiíy ké bam, a kù dzə̀ kishiíy ke vèn wìyìn e nsə̀ə́y ŋgòn se vifa ji cu Nyùy Tàr. 16A kí dzə̀ jii, vèn ku tàŋ kishiíy mtàn, e dù, e meé e kishiíy ke kí batin kishiíy ké bam ke kí meen ji saàmbà, e nèn yiì cu Nyùy Tàr yee yé vifa ve yi ve fíy vi. 17Vèn lóo wìykìr fo věn virə̀ʼ vé dzə, kfə́ə e mòʼón mòʼóne lì ntuʼ se kiban sibaà sibaà ji cu ye nanèné, e wìy cù Nyùy Tàr shó ji cu vifa ve yi ve ví biyin fó mbìy. Aá kù fer ntuʼ mòʼón mòʼón e meŋkfəŋ me kpuún mè akilu abaà e nyaà shó. 18Nyám se vèn wíy a tatí cu vifa ve yi vìn sho si wíy a dzə jii, wón viyaʼ saàmbà vee kiyá kiyá wùn à nàʼ woo lumèn, à viyáʼ vi vibaà, a nyám sìn si kù dzə̀ là nsem sidzə̀m. Sí yíi a dzə ji cu Nyùy Tàr ye tonèné, aá kù yii sa cu vifa ve yi, à yé melùʼu fó ghaŋ. Dzə̀ cu ye və́yí bin fo fo, kirəm kfə́ kí boŋ Nyùy Tàr. 19Vèn ku fò sá kibév ji cu ajay, e fò wón viyaʼ abaà vee kiyá kiyá ji cu kikòŋnìn. 20Taà cù wíy nàn ntuʼ se kiban ke vifa veé sum vé mbìy vi ji cu Nyùy Tàr ye nanèné, e nàn sa wón viyaʼ vee abaà. Dzə̀ cu Nyùy Tàr yee jeéyí, a yí du a dzə̀ áàtàá cùu. 21Lóo dzə e kishiíy fóo fèy, vèn jàŋ ŋkàʼ, e kaàrí, a bùnrì Nyùy Tàr. Lá wìr yòʼ lìm lim e kishiíy fen moó vishiíy vímóʼ ví vee viy. Sì nsər ye vèn wíy a lèm mo ŋgwàʼ sén sí wíy a dzə e virə̀ʼ vidzə̀m ve vèn dzə́ sho.
22«Vèn wíy lóo kav vifá fo sum, lá á yòʼ a dìy ji á síy á súm siyín, e dù, e meé e ŋguùŋè si, kìn dzə̀ ji á kfə́nrí wuú, e sìyrí. Vèn lem vee shooy vi ji vé aghéʼncey wùn à viŋgwìy vi. Dzə̀ mo Nyùy Tàr woo Nyùy won.»
Ŋkǎʼ Sòŋ ye Toŋéné
(Kintaŋ 29.1‑6)
23 Nyùy Tàr kfən yòŋ e Mooser jii, 24«Suúy e wír veé Israyi jii, lóo dzə e kishiíy ké mbìy ki, é ŋwee woo saàmbà,#23.24: Leéy: 16.29; 23.39. vèn kù lèm ji kishiíy ké bam, e rə̀sí, aá tóŋ sóŋ, é wíri kaárí, a bùnrì Nyùy, é wù fíʼ a kuumé ven. 25Lá vèn yòʼ wìy lìm lim e kishiíy fen moó vishiíy vímóʼ ví. Vèn kú a cù a dzə̀ Nyùy Tàr e cu ye və́yí bin fo foo.»
Kishiíy ké Kiman
(Kintaŋ 29.7‑11)
26 Nyùy Tàr kfən yòŋ e Mooser jii, 27«Lóo dzə e kishiíy kee ghvə̀m, kù é ŋwee wo wú meen ji saàmbà, é wáa dzə *Kishiíy ké Kiman, a wíy a dzə ghán se vèn kaári, a bùnrì mo. Vèn kù wíy nə̀ʼsì vitú vén, a vèn kfə̀n wíy a cù Nyùy Tàr e cu se və́yí bin fo fo si. 28Lá vèn yòʼ lìm lim e kishiíy fóo fèy. Dzə̀ Kishiíy ké Kiman ke á mán vinyo vén e Nyùy Tàr woo Nyùy wón si. 29A dzə̀ wír, e làa yòʼ nə̀ʼsì kitú kfə́ é kishiíy fen, á kù fə̀ə́r wun fo wír Nyùyí mvəm. 30Wìr lim lim e kishiíy fen, bo m laar ŋgaàŋ fo wír vəə́ mvəm. 31Lá wìr yòʼ wìy lìm kifá. Sì nsər bèy, e wìy dù, e mày mo ŋgwàʼ sén sí wíy a dzə e virə̀ʼ vidzə̀m ve vèn wíy a dzə sho. 32Kù wíy a dzə kishiíy ké meèmè kee jeéy kí fo vèn, a vèn kù wíy a tèr fo vifa veé shií, e kèʼ fo ŋkuùr kishìíy kee bvə̀ʼə̀, e meé e ŋkuùr kishìíy kee ghvə̀m. Vèn ku lèm kishiíy kin ki.»
Ŋkǎʼ Tàv sé Ghan
(Kintaŋ 29.12‑40)
33 Nyùy Tàr kfən yòŋ e Mooser jii, 34«Suúy e wír veé Israyi jii, lóo dzə e kishiíy kee nshòv sitàn e ghvə̀m, kù é ŋwee woo saàmbà, vèn kèʼ ŋkǎʼ Nyùy Tàr wo dzəə̀n Wó Tàv sé Ghan, e yiì kishiíy saàmbà. 35Lóo dzə e kishiíy ké mbìy ki fó vishiíy fen, vèn kaàrí, e bùnrì Nyùy Tàr. Lá wìr yòʼ lìm lim e kishiíy fen moó vishiíy vímóʼ ví. 36Vèn ku cù Nyùy Tàr e cu se və́yí bin fo fo si, vishiíy saàmbà, lóo dzə e kishiíy ke kí meen ji waamé, vèn kù kaàrí, a bùnrì Nyùy Tàr, a cù wun e cu ye və́yí bin fo foo. Dzə̀ kishiíy ké bùnrì kímóʼ kí jeéy, é la wìr yòʼ lìm lim e kishiíy fen moó vishiíy vímóʼ ví.
37«Á ŋkàʼ se á lèmèn ji sé Nyùy Tàr se vèn wíy a kaarí, a bùnrì wun, a cù wun e cu se və́yí bin fo fo si. A dzə̀ jii, cu ye tonèné, à yé vifa ve yii, à yé kikòŋnìne, e lì sa yé melùʼ. Yee shó e wun kishiíy mo nsər dinè. 38Ŋkàʼ sin si bàr kishiíy ké bam ke Nyùy Tàr, a cu se ŋkàʼ sin si bàr afómo ámóʼó ve vèn fó e Nyùy Tàr wùn à cu sén símóʼ sí moo yé ŋkàʼmé, à yé kimbòŋwùné.
39«Ké *Ŋkǎʼ Tàv sé Ghan ki nén a dzə jii, lóo dzə e kishiíy kee nshòv sitàn e ghvə̀m fo ŋwee woo saàmbà#23.39: ŋwee woo saàmbà: Á yoŋ ŋwee və̀n ji Tishiri, a dzə̀ ŋwee woo saàmbà mo kiyá keé Isray kee kùm ŋkàʼ sí kí yii dzə́. Lóo dzə mo ŋwee se á táŋ mo á lim súm sí dzəə̀n, bo kiyá ki sí ndzəy e ŋwee fèn, aá káv ne vifá, ví máy. (Leéy: Fəə 23.16)., a vèn káv ne vifá fo kwaʼ, ví máy, vèn lèm ŋkǎʼ Nyùy Tàr kishiíy saàmbà. Kishiíy ké ŋkàʼ vən ké mbìy ki kù dzə̀ kishiíy ké meèmè kee jeéy kí, a ke kí meen ji waamé kí kù dzə̀ sá bèy. 40Lóo dzə e kishiíy ké mbìy kìn ki, é vèn ku tày báŋ si fó vici ve ví koom báŋ se juŋ si, e tàʼ viyáŋ ve ten, à tám se vici se rəŋsìn sí, à tám se kici ké *wilo fo ghaa ndzəv, e kèʼ, a ndzəʼ e Nyùy Tàr woo Nyùy wón si, aá kù yíi a sàvnìn bèy, kishiíy saàmbà. 41Vèn kú a lèm ŋkàʼ və́ne, a ghvəm Nyùy Tàr shó, kishiíy saàmbà e kitu ke kiya. Sì nsər bèy, e wìy dù mày mo ŋgwàʼ sén sí wíy a dzə. Vèn ku lèm e ŋwee wo wú meen ji saàmbà. 42Vèn kù wíy a shiíy e tàv sé ghan kishiíy saàmbà. Wìr dzə̀m woo dzəə́ yeé Isray kù wíy a shiíy a dzə̀ é tàv sé ghan vishiíy vee saàmbà vìn, 43é rám sén sí fiʼ wìy a kiíy ji Nyùy Tàr‑iì yiì, wír veé Israyi wáa shiíy e tàv sí, e ghan se wù‑uù fəərin áwune fó wòŋ Ejiv. Dzə̀ mo Nyùy Tàr woo Nyùy won.»
44Mooser ku nèn naàrì ntò se ŋkàʼ sé Nyùy Tàr e wír veé Israyi bey.
Currently Selected:
Cù 23: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
