Cù 19
19
Ghán yee Nyùy mbòv
1 Nyùy Tàr yòŋ e Mooser 2ji wù suúy á e wìr dzə̀m woó Isray jii, «Vèn wáa dzə aránén, bìʼ fo mo woo Nyùy Tàr woo Nyùy won dzəə̀n e ránén. 3Wìr mòʼón mòʼón fo vèn wáa ghvəm yè wov wùn tàr wov, a lèm kishiíy kém ké bam. Dzə̀ mo Nyùy Tàr woo Nyùy won.
4«Lá vèn yòʼ bìn ndzə̀m e mò, e fèr mebvə̀m e kisha ki ji anyùy vén, a ghvəm. Dzə̀ mo Nyùy Tàr woo Nyùy won.
5«Wìr seé nyam cù kikòŋnìn ji wun cu mo shó, wù yiì mo yí dzəə̀n, é m nèn səə̀sí cu yee shooy e ŋgaàŋ yir. 6Á kù wíy yi a dzə̀ é kishiíy ke á yiìn cu, kìn e ke kí batin kí. Kifá ki bér, lóo dzə e kishiíy kee taár, á tòn é və̀y, é kí shwí. 7Á yí kifá fo fo e kishiíy kee taár, bo sì lor, bo bó m yòʼ kfə̀n biíme cu yee shooy. 8A wìr wo wù yiin lì ne njò, bìʼ fo wù liìn kifá ke kí dzəə̀n jeéy ji ké Nyùy Tàr fó tèr, aá kù fəər wun fo wír vémé mvəm.
9«Vèn lóo kav vifá fo sum, lá vèn yòʼ a dìy ji á ku sìy súm siyín e dzə̀m, e meé e ŋguùŋè, kìn dzə̀ ji á kfə́nrí wuú, e sìyrí. 10Lá vèn yòʼ kù a dìy ji á síyrí á súm vitiír vé *vayin siyrín, kìn ji vèn wáa boŋrí báŋ se sí gbu. Vèn lem vee shooy vi ji vé aghéʼncey wùn à ji vé viŋgwìy. Dzə̀ mo Nyùy Tàr woo Nyùy won.
11«Lá wìr shòŋ, lá wìr yòʼ lòʼ wír, lá wìr yòʼ bòʼtí wír. 12Lá wìr yòʼ yiì kilìʼ, e kàn yír yém kisáŋ. A wù yiì bèy, bo wù lì ne yír yém fó tèr. Dzə̀ mo Nyùy Tàr woo Nyùy won.
13«Lá wìr yòʼ kùvrì wùmòʼ. Lá wù yòʼ faàsì kifá ke wìr. Wìr lim kilàʼ, ŋgaà làʼ kù làʼ ŋgaà lìm e si kishiíy, e làa yòʼ màʼtì é yì sə́n. 14Lá wìr yòʼ kuù kindzə̀mer, kìn ji wìr yii kisəə́y ji mfìr bayrin shó. Á bèy, vèn wáa ghvəm mo é mbòómbòŋ. Dzə̀ mo Nyùy Tàr.
15«Lá wìr yòʼ a tinén nsaʼ, a loʼ kiloʼ. Lá vèn yòʼ a bìn nsaʼ, a fo e ghéʼncey, kìn dzə̀ mó a bìn nsaʼ, a fàn sí ŋgaà mbàm. Á bèy, vèn kú a tinén nsaʼ se afə́r vén, a ker suuyrú. 16Lá wìr yòʼ a ghan, a kùnsìn wíri, kìn ji wù tiím vinjen ji fə̀r nəə́ é ŋgeʼ. Dzə̀ mo Nyùy Tàr.
17«Lá wìr yòʼ a ker fə́r və é shiliv. Wìr ku sìysì kinyo ke wùn fər və kérí síysin fó jay kinyo bìʼ ŋgaàŋ.#19.17: fó jay kinyo bìʼ ŋgaàŋ; Kìn jii: fó jay kinyo e fər və. 18Lá wìr yòʼ a siìr ŋkfə́tír. Lá wìr yòʼ a màʼ ŋkfəə́mé e fər və́ kitu. Wìr wáa kòŋ fə́r və mo wù koŋ kitú kfə́. Dzə̀ mo Nyùy Tàr.
19«Vèn wáa yunín nsər sém sí. Lá vèn yòʼ màʼtì, é nyàm ye sən wáa koo ye sən. Lá vèn yòʼ wày kfə́ə ŋgoòy jeéy jeéy súm e mòʼón. Lá wìr yòʼ a màʼ ndzə̀y se á baan, e shwìr alàv.
20«A wiíy woo kwàn lò a dzə, aá fó ne e wìr, yii bèy, aá yóʼ ne tìn, kí koóy ji lùmèn wùmòʼ li, e shìíy sho, bo á yíi fo áwune ŋgeʼlàʼ,#19.20: bo á yíi fo áwune ŋgeʼlàʼ; Kìn jii: bo á yíi sòv kinyo kév. e làa yòʼ yuyrí, bìʼ fo wù yòʼ‑oò ló ne bòy fo vikwàn. 21Á bèy, é lùmèn woo shooy wiy e kiyáʼ ki, e yèn Nyùy Tàr shó e shùu *kibàn ké ntàsín ji cu rə́ làʼnjò. 22Wù wiy sho, bo taà cù yíi lì kiyáʼ ke cù njò kin, e cù Nyùy Tàr shó, e taŋrí ŋgaàŋ, e man jay və, é Nyùy Tàr laysin jay woo shooy.
23«Vèn nəə e nsay Kanan, biy kfəə́ se vici se á yii yí báŋ si, ví keʼ koóm, lá vèn yòʼ mùm, e yì, a bó viyá vi shaá vitaár. Vèn ku lì ji dzə̀ á vifá ve ví kér nsər. 24Lóo dzə e kiya ke kí meen ji kweè, vèn bàʼtí báŋ sidzə̀m ji nshwǐ Nyùy Tàr, e fò ji cu ye á suyrì wun sho. 25Kiyá ki lóo mee ji tàn, bo a dzə̀ lèn vèn wàa yi. A vèn lò, a yiì vinyo vìn vidzə̀m, bo vicí ví yíi a koóm, a jàmtìn jàmtìn. Dzə̀ mo Nyùy Tàr woo Nyùy won.
26«Lá vèn yòʼ wìy yì nyám e mensə́ mè sho. Lá vèn yòʼ wìy a shweŋ fú, kìn dzə̀ ji á wáa bay sə́m. 27Lá vèn yòʼ wìy a kèŋrì búbúʼ sí. Lá vèn yòʼ a fàr sa kighev. 28Lá vèn yòʼ wìy a shunrí wún bìʼ aŋkfə, kìn dzə̀ mó a yiì nsáŋtí. Dzə̀ mo Nyùy Tàr.#19.28: Nyùy sháʼnin vinyo vìn fo wír vəə́, bìʼ fo dzəə̀n vinyo ve wír veé Kanane‑eè yii, aáwune‑eè méŋ kév Nyùy méŋén.
29«Lá vèn yòʼ fò wón vén ji asàkì veé lav se anyùy,#19.29: Asàkì veé lav se anyùy: Vikìy víne‑eè dzə̀ é lav se anyùy wìr veé Kanan. Vé‑eè biìmé kév jii, móo shiíy e vikìy víne, kee shooy ki yii, a nsay boŋ vifá, a nyám si kfə̀n dzəə. é kí wáa shoór áwune. A vèn yiì bèy, bo vèn wíy lò, a beè anyùy kisaŋe, e yiì, é nsay bír, e kfə̀n ji ye yìi kisaŋe. 30Vèn kù wíy a lèm kishiíy kém ké bam, a ghvəm kibàn kém ké ntàsín. Dzə̀ mo Nyùy Tàr.
31«Lá vèn yòʼ a dù, a beè vé fùú, kìn ve á ká aŋkfə. A vèn wìy a yiì bèy, bo vèn wíy bivír vitú vén, e kfən ji vé *kifàné. Dzə̀ mo Nyùy Tàr woo Nyùy won.
32«Vèn wáa ghvəm ŋgày sén sé wìr, a gvəʼtí, a ghvəm mo woo Nyùy Tàr é mbòómbòŋ. Dzə̀ mo woo Nyùy Tàr.
33«A kiŋgwìy ki dzə́ e věn nsay, lá vèn yòʼ a nə̀ʼsì wun. Lá vèn yòʼ a jay kinyo sho. 34Vèn wáa ker kiŋgwìy ki moo wan nsay, a kòŋ wun mo vèn koŋ vitú vén. Vèn wáa kuumé ji vèn‑eè dzə̀ sáa viŋgwìy e wòŋ Ejiv. Dzə̀ mo Nyùy Tàr woo Nyùy won.
35«Lá vèn yòʼ wìy a fìʼ kifá, a loʼ, kìn dzə̀ fó vidà, kìn fó vidzəə̀sì, kìn dzə̀ fó vikùʼùy. 36Vèn ku kìv mfìʼ si réŋréŋ, kìn dzə̀ sé vidzəə̀sì, kìn dzə̀ sé vifa vímóʼ ví. Dzə̀ mo Nyùy Tàr woo Nyùy won, wo wù‑uù fəərin ven fó wòŋ Ejiv. 37Vèn kú a yunín nsər sém sí sidzə̀m, à ntir sém sí, a yiì vidzə̀m. Dzə̀ mo Nyùy Tàr.»
Currently Selected:
Cù 19: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
