Cù 11
11
Nyam kifàn, à ye yòʼ dzəə̀n ye kifàn fo wír veé Israyi
(Remrí 14.3‑21)
1 Nyùy Tàr lò, e yòŋ e Mooser wùn Aaron jii, 2«Kinyo ke m yoŋ e wír veé Isray ki kíne. Fo nyám se sí yii ghán a dzə̀ é nsay si sidzə̀m se dzə̀ vèn yì sí dzə̀ jii, 3nyam mfay ye yì shám kfə̀n kóʼorì, a dzə̀ vèn yì. 4Yii bèy, a nyàm dzə̀, a yì shám, kóʼorì, a yì yòʼ kér mfay, kìn dzə̀ ye yì kér mfay, a yì yòʼ shám, kóʼorì, lá vèn yòʼ yì. A dzə̀ ji nyàm yee moo *kamer, mo wù fə̀m shám, kóʼorì, a bó wù yòʼ kér mfay, yì kù dzə̀ nyam *kifàn fo vèn. 5Yìmòʼ ji kùv, mo wù fə̀m shám, kóʼorì, a bó wù yòʼ kér mfay, yì kù dzə̀ nyam kifàn fo vèn. 6Yìmòʼ ji waàŋgáa, mo wù yii shám kfə̀n kóʼorì, yii bèy, mo bó wù yòʼ kér mfay, kù dzə̀ nyam kifàn fo vèn. 7Yìmòʼ ji kǔnnyàm, mo wù fə̀m kér mfay, a bó wù yòʼ shám, kóʼorì, kù dzə̀ nyam kifàn fo vèn. 8Lá vèn yòʼ mùm, e yì nyám see shoon, kìn ji wìr kum dzə́n sév. Kù dzə̀ kifàn fo vèn.
9«Mbìv vifa veé ndzəv, kifá kidzə̀m ke kí kér ŋgáʼ si, kfə̀n kér ntum si, a dzə̀ vèn yì, kìn dzə̀ ke kí dzəə̀n é rìbà ndzə̀v, kìn ke kí dzəə̀n é ndzəv ye leŋéné. 10Yii bèy, wáa dzə kifá keé rìbà ndzə̀v, kìn keé ndzəv yee rəy, a bó kí yòʼ kér ŋgáʼ si, kfə̀n kér ntum si, bo kù dzə̀ kifá ke koʼoyín kí fo vèn, kìn dzə̀ kifá ke ŋeerín kí, kìn ke kuʼkìn kí. 11Vifá vìn vidzə̀m vi kù dzə̀ vifá ve koʼoyín ví fo vèn, lá vèn yòʼ wìy yì. Lá vèn yòʼ wìy kùm sa dzə́n sév, bìʼ fo siìn vifá ve koʼoyín ví. 12Kifá keé ndzəv kidzə̀m ke kí yòʼ kér ŋgáʼ si kfə̀n kér ntum si, kù sì kifá ke koʼoyín kí fo vèn.
13«Fo mbìv menə̀n me mè kóʼoy fo vèn, me bó yòʼ dzə̀ vèn yì mè dzə̀ jii, lùŋ wo wiy wùn à kilùŋŋgùrúʼ kí, à kilùŋŋgùrúʼ ke sənér kí.#11.13: Menə́n memoʼ mè me á yoŋ fèn mè dzə̀, a bó á yòʼ kì jeéyjeéy və kijuŋ. 14Memoʼ mè jii, kòy wùn à vilùŋ vi, mo kfə́ə sév sí dzə̀kìn, 15à viŋaʼ vi, mo kfə́ə sév sí dzə̀kìn sá, 16à kiŋkfə̀y ke loŋ ki, à kighvəŋ ki, à kilùŋ keé màndzə̀v kí, à nòkìndzəʼ, mo kfə́ə sév sí dzə̀kìn, 17à sə́tí, à kiŋkoòsə ki, à kintùŋàshàʼshàʼ ki, 18à gwàgwa ndzə̀v, à kigùʼshuù ki, à kilùŋŋgùrúʼ ke fəvír kí, 19à kilìmbìy ki, à ŋgáʼ shinə̀n shé ndzəv shí, à fèn, e bóo lì kilíim.
20«Fo mbìv vintàn, kifá kidzə̀m ke kí kér vav si, kfə̀n ŋaŋrì vikoy vikweè, kù dzə̀ kifá ke koʼoyín kí fo vèn. 21Yii bèy, a vikoy və́ ví dzə̀ ve dzə̀ kí lìy shó, bo dzə̀ á kfə̀r. 22Fo vee shooy vi, bo dzə̀ vèn wàa kfər ŋguùmé, mo kfə́ə sév sí dzə̀kìn, a kfər sa ŋguùmé see là wuy, mo kfə́ə sév sí dzə̀kìn, à ŋwàyi, mo kfə́ə rəə́ dzəə̀n. 23Yii bèy, kibér ke vintàn ve ví kér vav si, kfə̀n ŋaŋrì vikoy vikweè, kù sì kifá ke koʼoyín kí fo vèn.
24«Kí nén a dzə jii, fo vifá ve kifàn vin vi, a wìr kùm kimkpú kév, bo wù kù lì ne kifàn, kí góʼ é wùn wó, e dù, e meé e ŋkuùr. 25Wìr beʼey kibar fo kimkpu ke vifa vìn, bo wù lo, e sù ndzə̀y sə́, e kù a dzə e kifàn kí wùn, e dù e meé e ŋkuùr. 26Nyám sidzə̀m se mfay si fìʼìn fíʼin, e làa yòʼ jàvsìn, kìn nyám se sí yòʼ shám kfə̀n kóʼorì, kù sì kifàn fo vèn. A wìr kùm kimkpú kfə́, bo wù kù lì ne kifàn. 27Nyám se kighìy si sidzə̀m, fo nyám see vikòy vikweè si, sí dzə̀ sá kifàn fo vèn. A wìr kùm kimkpú ke nyàm sìn, bo wù kù sí kér kifàn, e meé e ŋkuùr. 28Wìr beʼey kimkpú ke nyàm fo nyám sìn si, bo wù lo, e sù ndzə̀y sə́, yii bèy, e kù a dzə e kifàn kí wùn, e dù, e meé e ŋkuùr. Vimkpú ve nyàm sìn vi kù dzə̀ kifàn fo vèn.
29«Fo mbìv vifa ve ví ŋaŋrì ŋàŋrìn é nsay, ve dzəə̀n kifàn fo vèn ví dzə̀ jii, lùm wùn à mbàv, à kfə́ə kibarí e dzə̀m, 30ŋkùnáyóyo, à kibár ké njòŋ ki, à kibár keé siy ki, à kòm, e lì ghvəə́y. 31Á vifá ve ví dzəə̀n ji kifàn fo vèn fo mvə̀m vifa ve ví ŋaŋrì ŋàŋrìn é nsay. Wìr kum dzə́n kifa fo vifa fèn, bo wù sí kér kifàn, e dù, e meé e ŋkuùr. 32A kifá fo vifa vìn ki lò, e kpù, dzə́né túm, e kùm kifá ke wíri yii kérí, bo kí sí kér kifàn. Kìn dzə̀ kifá ke á fèrìn e kicí kí, kìn e ndzə̀y sí, kìn e jùv, kìn e ndzə̀y see gùm si, kí kù kér kifàn, a fə̀m dzə̀ kifá ke á yii a dzə̀ ka shó, á kù sə̀v kifá kee shooy e mendzə̀v, é bo kifàn kí may e ŋkuùr. 33A dzə́n kifaa tùm é kìŋ ye á fèrìn e mbóm, bo kifá kidzə̀m ke kí dzəə̀n shó ki sí kér kifàn. Ké kìŋ, aá bvə́ʼtí bvəʼtín. 34Wáa dzə, aá kì sèr ne mendzə́v fó kìŋ fóo fèy, bó a kiíy, a mè kúm ne kifá ke yi, bo kí sí kér kifàn. Kifá ke noón kí kidzə̀m ke kí dzəə̀n é kìŋ yee ben ki kù kér kifàn. 35Kifá kidzə̀m ke dzə́n fó dzən sé vifa vìn vi tumen shó ki kù sí kér kifàn. Lóo dzə kíy mbóm, kìn kíŋ, bo á kù bvə́ʼti. Sì kifàn, a kù sì kifàn bey fo vèn. 36Yii bèy, a yí tùm a dzə̀ é dàn ndzə̀v, kìn é bií mendzə̀v me leerín mè, la kifàn kí yòʼ a dzə, fə̀m mo vifá vímóʼ ví vidzə̀m vi kù li kifàn. 37A kibar ke kimkpu ke vifa vìn ki tùm, e kùm ŋgoòy kifa ye á yíi way, bo ŋgoòy yee shooy kù goʼ là kifàn. 38Yii bèy, aá sə̀v ne ŋgoòy, kimkpú ke kifa kee ben ki kum ŋgoòy rə̀n, bo yì sì kifá ke kifàn kí fo vèn.
39«A nyàm ye á yii kfə́rí kpù, wìr kum, bo wù lì ne kifàn, kí góʼ é wùn wó, e meé e ŋkuùr. 40Wìr kfə́r kimkpú ke nyàm kìn, bo wù lo, e sù ndzə̀y, e kù a dzə e kifàn kí wùn, e dù, e meé e ŋkuùr. Wìr beʼey sá kimkpú ke nyàm kìn, bo wù kù lo, e sù ndzə̀y sə́, e kù a dzə e kifàn kí wùn, e dù, e meé e ŋkuùr.
41«Kifá kidzə̀m ke kí ŋaŋrì ŋàŋrìn é nsay ki dzə̀ kifá ke koʼoyín kí. Lá vèn yòʼ wìy yì, 42kìn dzə̀ ve ví són e bvə́me, kìn ve ví ghán e vikoy vi vikweè, kìn ve ví kér vikoy nyanyày, lá vèn yòʼ wìy yì, bìʼ fo dzəə̀n kifá ke koʼoyín kí. 43Lá vèn yòʼ lòr vitú vén e vifá ve ŋaŋrìn vin vi, fóo lì kifàn, a koʼóy. 44Dzə̀ mo woo Nyùy Tàr wo dzəə̀n Nyùy won. Vèn ku fò vitú vén ji vém vee wír, a dzə aránén mo m dzəə̀n e ránén. Lá vèn yòʼ lòr vitú vén e kifá ke ŋaŋrìn kí, 45bìʼ fo mo woo Nyùy Tàr, m fə̀ə́r ne ven fó wòŋ Ejiv, e bòyìr ven fó vikwàn ji m wáa dzə Nyùy won. Vèn kú a dzə aránén, bìʼ fo m dzəə̀n e ránén.
46«Á nsər see kùm nyám si wùn à menə́n mè, à kifá ke ŋeʼèn ke kí ghán e ndzəv kí, à ke kí ŋaŋrì ŋàŋrìn é nsay ki kidzə̀m. 47Vèn kú a kiíy jeéyjeéy fo kifá ke kí kér kifàn, à ke kí yòʼ kér ki, a kiíy sa jeéyjeéy fo kifá ke dzə̀ á kfə̀r, à ke bó yòʼ dzə̀ á kfə̀r kí.»
Currently Selected:
Cù 11: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
