Kèʼlo 40

Joosev tóʼtí njèm se vé sháŋé

1Mo Joosev dzəə̀n é sháŋ bey, vishiíy ví lòo tumsín, nshìylav fàáy yee kitú fo se sí yii jav bóm yeé ntoʼ wùn à nshìylav fàáy yee kitú fo se sí yii fer vifá ve yi veé ntoʼ nèn lò jày kinyo e tàr wov woo fon woó Ejiv. 2Fòn shwiíy kilòŋ wùn áwune, 3e wày áwune é sháŋ wo wù‑uù dzəə̀n e kitú ke vé rər ve vé‑eè shiy ntoʼ kí laʼ, a dzə̀ fo Joosev‑iì dzəə̀n sá. 4Kitú ke vé rər kiy ki nèn shòʼ Joosev ji wù wáa lìm fo áwune. Áwune ku nèn a dzə e làv sháŋ ntàmda.

5Wáa dzə vitsə́ʼ vímóʼ ví, a nsheèlav se faáy sé fòn woó Ejiv sìy si dzə̀ə́ e sháŋ, njèm shí áwune vee wír abaà, nshìylav fàáy ye yì leey fo bom wùn à ye yì leey fo vifa ve yi, a ye wìr yee njèm kù kér nsàv rə jeéy. 6Ndzə bvəə́shí, e jàv, Joosev wìy ji wun yén áwune, e yèn, aáwune dzə́ arəə́yín. 7Wù dzə́r aáwune jii, «Vèn kiʼ lán arəə́yín ben, a dzə̀ ka?»

8Áwune bìnèr jii, «Njèm si sìíy, e shì ver, la vèr yòʼ a ker wír wo wù tóʼtí e vèr.»

Joosev suúy jii, «Kù jòʼsì Nyùy wo wù yii fó vifií e wìr, é bo wù wáa toʼtí njèm. Vèn naari ri njèm sén sí e mò.»

9Nshìylav fàáy ye yì leey fo bóme suúy e Joosev jii, «Njèm‑ee siíy, e shì mo, a kitiír ké *vayin ki tíy e mǒ si, 10a kí kér tám sitaár. Sí ku nèn tòkír, e sàám, e kòóm, e lò bàŋ, 11a m kér bóm fòn e mǒ kiwo. M nen kòy báŋ si, e kàm e fòn bom, e fò shó.»

12Joosev suúy jii, «Yuúrí nsàv njèm rə̀n. Tám se kitiír see sitaár si din a dzə̀ vishiíy vitaár. 13Kí dzə̀ jii, vishiíy ví yíi shaà vitaár, é Farao fəə́r wò fo sháŋ, e siìr wò, áà kfə́n e wò kiliŋ ke lìm fo wò‑oò dzəə̀n, a fo bóm e fòn. 14Kii wò, kinyo ké ki yií boŋè, à kù kuùmé mo. Ku naàrì kinyo kém kí e Farao, é wù fəə́r mo fó sháŋ fen. 15Vé‑eè koò mo koón e vitaáví ví fo věr wòŋ, woŋ wìr veé Hibru, e bóo wìy sho e Ejiv fèn. Á kfən wày mo é sháŋ, a bó m yoʼ jày kinyo kímóʼ kí é wòŋ fèn.»

16Mo nshìylav fàáy ye yì leey se sí yii fer vifá ve yi veé ntoʼ yuun mo Joosev toʼtin kijuŋ, yì nèn sùúy sho jii, «Njèm‑ee shí sá mo, a m béʼ ŋkaà se kiban sitaár, e kitu, 17a kfəə́ se kiban ke tonèn sé Farao si dzə̀ é ŋkaà yee fó yuv, a menə́n mè saʼà, yí fo mǒ kitu.»

18Joosev suúy jii, «Yuúrí nsàv njèm rə̀n. Ŋkaà see sitaár si din a dzə̀ vishiíy vitaár. 19E bǎm vishiíy vitaár, é Farao fəə́r wò, e shèr kitú ké, e səŋ dzə́n yé e kici, é menə́n mè wáa sàʼ.»

20Wáa dzə e bǎm vishiíy vitaár, a dzə̀ kishiíy ke Farao‑oò kuúme kishiíy ke vé‑eè dzəən wun, wù yií ŋkàʼ fo vé lìm vəə́ adzə̀m. Wù nèn lò, e fə̀ə́r nshìylav fàáy yee kitú fo se sí‑iì jav bóm wùn à ye yì‑iì leey fo wír ve á fer vifa ve yi si, e tìír e vé lìm vəə́ si, 21e nèn siìr nshìylav fàáy ye yì‑iì leey fo bóme e wun kiliŋ ke lìm fo wù‑uù dzəə̀n, wù kfə́n a fo bóm e fòn. 22Yii bèy, wù suúy, á keèrì nshìylav fàáy yee kitú fo se sí‑iì fer vifá ve yi veé ntoʼ e kici. Vinyo vìn vi ku nèn kòóy réŋréŋ mo Joosev‑iì suuyin. 23Yii bèy, la nshìylav fàáy ye yì‑iì leey fo bóme yòʼ dzəə kuùmé Joosev, e nèn kù làysìn wun láysin.

Currently Selected:

Kèʼlo 40: LNB

Highlight

Copy

Compare