Kèʼlo 34

Mo vé‑eè ghatin Dina

1Nyùy wìy sə̀r Dina wo Jakov‑iì dzəən wùn Lea, wù fəə́ ji wun du, e ghan a wónlě ŋgòn veé wòŋ Kanan foo fèy, 2wù lòo dù, Shekem woo wan Hamor yén wun. A Hamor və̀n dzə̀ wír woó ram Hiv, e kfə̀n a dzə taà ntèʼ. Mo Shekem yenen Dina, wù tó sí rə́, wù nèn ghàtí e dzəə. 3Mo wù ghatin bey, Dina woo wan Jakov nəə́ e wun shiliv, wù nèn kèʼ mboòrì. 4Wù boòrì bèy, e lò mbaà tàr wov woo Hamor sho jii, «Kii wò, ku nə̀ə́ wánlè ŋgòn və̀n e fò e mò.»

5Kí nèn tò e Jakov kitùʼùr ji á ghàtí ne a wán və, a wón və́ vee vilume dzə̀ é kwaʼ wùn à nyám si, wù nèn gòʼ kisə́sə, a shìy áwune. 6Hamor woo tàr à Shekem nèn wìy, e yèn Jakov ji wùn wun wàá súŋnín. 7Wón Jakov vee vilume lòo wìy fo kwaʼ, e yù kinyo ke kí‑iì kooyin, kí nəə́ aáwuné vighìy. Á wáa ŋeèy bìʼ joonè wo Shekem‑eè yiìn e jèmèr yev, kí wìy e woómé si aáwuné kfəə yeé Isray. 8Hamor nèn a toŋ, a suúy jii, «Shilív shé wan wom shí tíy e Dina wùn, a m lón ji vèn fó á sho ji wíiy və. 9Vèsən nəə́nín viŋkar, é vèn wáa juùr wón vén e vèr, é vèr wáa juùr sa vér e vèn. 10Vèsən wáa dzə, woŋ və̀ne sì sá wón. A dzə̀ vèn wàa dzə fo vèn koŋè, a kavnín wáy, a koo sa virə́ʼ ji vén.»

11Shekem nèn kfə̀n sùúy e tàr à Dina wùn aàfə́r və́ə jii, «A vèsən fen tàr shuu, vèn biímé mo ji sə́ won, é m fó kifá kidzə̀m ke vèn lo dzər e mò. 12Vèn dzə́r juu ye dzə̀ vèn dzə̀rí, é m fó. Kidzə̀m ki dzə̀ ji vèn ku fò á wiíy və̀n e mò.»

Wón Jakovi siír ŋkfə́tír

13Wón Jakovi‑iì biíme kinyo ke Shekem wùn tàr wov Hamor‑iì suuyì e lámé é bvə̀m, bìʼ joonè wo Shekem‑eè yiìn e jèmèr yev. 14Á nèn lò, e bìnèr aáwune jii, «Bó yòʼ dzə̀ kí kòóy ji vèr fó jemèr yer e wìr wo bó á yoʼ sàŋ mbèʼ sə́, bìʼ fo kí yíi a shoór ver. 15A dzə̀ vèr biìmé kinyo kén, aá fen sàŋ mbèʼ se vilum vén adzə̀m, vèn wáa dzə moo ver. 16Kù dzə̀ é bǎm mbèʼ se saŋén sí cáʼ fo dzə̀ vèsən nəə̀nín visə́ vé juù, a dzə wír amòʼón. 17Yii bèy, a vèn tèn fóo yu kinyo ke vèr suuyì, aá sáŋ mbèʼ sén, bo vèr lo, e lì jemèr yer, a dù sho.»

18Jí sév sí nèn ghèén Hamor wùn Shekem woo wán və. 19La Shekem yòʼ dzəə lì ghán fóo yiì kinyo kìn, bìʼ fo wù‑uù wayin shilív e Dina wùn ŋkóŋkóŋ, wun woo Shekem kfə́n a dzə sa wír, a kfə́ə yéví‑iì ghvə́m wun e ŋàŋ. 20Hamor wùn Shekem nèn lò fəə̀sín e kirəsí keé shùu ŋkàlaʼ, e sùúy e wír véví jii, 21«Wír vìne dzə̀ ŋkar sesən, vèsən maʼti, aáwune wáa dzə e vèsə́n wòŋ, a kavnín wáy, a ghan e ŋgèŋgèr. Woŋ wosəné dzə̀ e kuʼùn féyì. Vèsən áwune lóo dzə, é vèsən wáa juùr wón vesən aáwune, aáwune wáa juùr sa vév vee wón e vèsən. 22Kinyo ki dzə̀ kimòʼón ke dzə̀ vèsən kù yiì, é bo áwune fiʼ biìmé ji vèsən áwune wáa dzə, a dzə ji wír amòʼón. Kí dzə̀ jii, lùmèn dzə̀m e vèsə́n mvəm sáŋ á mbèʼ sə́ moo áwune bey. 23A vèsən biìmé, vèsən áwune wáa dzə, bo bó nyanyày nyàm sév sin wùn à kéŋ yév rə́ne yòʼ dzə̀ vifá vesən a? Vèsən ku biìmé kinyo kév kin.» 24Lùmèn dzə̀m woó kitum foo fèy ku nèn biìmé nshù Hamor wùn Shekem, á nèn sàŋ mbèʼ sév.

25Wáa dzə e bǎm vishiíy vitaár mo vé‑eè saŋen mbèʼ sév, a sí kù dzəə́ yárí, Simeon wùn Levi vee afə́r Dinàa nèn lì nyùy sév, e sàsìn shèm é ntèʼ fóo fèy, e gwàtì vilum adzə̀m, e yùyrí. 26Á yúyrí sá Hamor wùn wan və woo Shekem e nyùy, e nèn lì jemèr yev fo Shekem lav, e dù sho. 27Á yúyrí wíri, e màysì, e nèn nə̀ə́ e ŋkàlaʼ, a tayrí vifá ve wíri ji á siir á ŋkfə́tir joònè wo vé‑eè yiìn e jèmèr yev. 28Á faàsì anàʼ wùn aànjiì véví, à bvə́y si, e lì vimbèʼbìy wùn à vifá ve ví‑iì dzəə̀n é ŋkàlaʼ vi, e kfə̀n kàv veé sum, 29e kùúy sa bùʼ wov e dzə̀m, wùn à wón véví, à vikìy véví, à kifá kidzə̀m ke kí‑iì dzəə̀n é melav ki, e dù sho.

30Jakov dù, e sùúy e Simeon wùn Levi jii, «Vèn wìy ne e lòné e mǒ kitu. Vèn yiì ne, m bír fo wír veé Kanane, à wír veé Peris ve á dzəə̀n é wòŋàne, a wìr dzə̀m sí yiì a bàn mo. Wír vémé dzə̀ ashàr, a wír vìne bàʼtí, e kèʼ rə́r vèsən áwune, bo á yíi laàr vèsən adzə̀m.»

31Áwune nèn bìnèr jii, «Jwè və̀n‑eè lòvtí e jèmèr yer moo sàkì bìʼ ka?»

Currently Selected:

Kèʼlo 34: LNB

Highlight

Copy