Fəə 4
4
Nyùy fó Mooser vitaáví ve wù wáa yiì viŋgaʼnìn ve vinyò sho
1Mooser nèn bìnèr e Nyùy Tàr jii, «Áwune yòʼ yíi yuurí kinyo ke m suuyì. Áwune yòʼ yíi biimé kinyo kém, bìʼ fo áwune yíi a kìnèn ji à yoʼ lò wìy, e sùŋnín a e mò.»
2 Nyùy Tàr dzə́r e wun jii, «Ke à kér e kiwo kìy ki dzə̀ ka?» Wù bìnèr ji dzə̀ á mbàŋ.
3 Nyùy Tàr suúy jii, «Màʼ fó nsay.» Mooser màʼ fo nsay, yì nèn bìnkìr e yò, wù líy fó ghaŋ wo. 4Nyùy Tàr kfən sùúy e Mooser jii, «Ràmsì kiwó ké ki, e ghàr shó fo kùn.» Wù ràmsì kiwó, e bàm shó, yì nèn siì kfə̀n ji mbàŋ. 5Nyùy Tàr suúy jii, «Ku yiì kinyo kìn ki aáwuné si, aá fiʼ biìmé ji Nyùy Tàr, Nyùy woo wo atàr vév vee Abraham wùn à Aysi, à Jakov lo wìy rú á fo wò.» 6Nyùy Tàr kfən sùúy sho jii, «Wáy kiwó ké ki é sar ndzə̀y e wò shùu shiliv.» Mooser wáy, e lòo fəə́r, a shìvnsay koó ne kiwó kfə́, kí káʼáy, a fər fərín moo mentíy bèy. 7Wù kfən sùúy jii, «Siìr kiwó ké ki é mvə̀m ndzə̀y.» Mooser siìr, e lòo fəə́r, a kí bónén ne, e kfə̀n fó réŋréŋ mo kí kì dzəə̀n. 8Nyùy Tàr suúy jii, «Aá tèn fóo yu wò, kìn á tèn fóo biimé kiŋgaʼnìn ke kinyò ke mbìy ki, tàm aá biímé ke kí batin. 9Yii bèy, aá dzə̀ làa yòʼ fə̀m biimé viŋgaʼnìn ve vinyò vee vibaà vin, kìn á tèn fóo yu jí yè, à sèr mendzə́v fó ndzəv yee Naay, e sə̀r fo nsay, é mendzə́v me à serin fó ndzəv mee shooy mè binkir ji mensə́.»
Aaron yíi a sə Mooser
10Mooser wáa lon Nyùy Tàr jii, «Éè Nyùy Tàr, m yoʼ càʼ e kisuŋnìn. M yòʼ‑oò lo càʼ fo ŋgùʼ, e bóo fə̀m càʼ lèn wo à kèʼèn, a suŋnín e mò woo ŋgaà lìm wò.»
11 Nyùy Tàr nèn dzə̀r e wun jii, «Lo fò la shuu e wìr? Lo yiì la, bo wìr wáa dzə nsəərì kìn ji kindzə̀mer? Lo yiì la, bo wìr wáa yen virə́ʼ kìn ji wù wáa dzə mfìr? Bó yòʼ dzə̀ mo woo Nyùy Tàr a? 12Dù ri lèn, m yíi a sə wò, áà wáa suŋnín, e kfə̀n a naàrì wò kinyo ke à wáa suúy.»
13Mooser yòŋ jii, «Éè Nyùy Tàr, kii wò, ku tùm wír wo sən.»
14 Nyùy Tàr yú kinyo ke Mooser kìn, kilòŋ kí shwiíy wun e ŋàŋén, wù dzə́r e Mooser jii, «Bó mbìy yè Aaron woo wír woó ram Levi yòʼ dzə̀ a? M kí ji a dzə̀ wù sùŋnín kijuŋ. Wù sí wiy lèn ji wun wiy, e yèn wò, a wù yíi yen wò, é wúné boŋ wun. 15À yíi a yòŋ kinyo sho, é wù wáa suúy. M yíi a sə ven, é vèn wáa suŋnín, é m kfə́n a naàrì kinyo ke vèn wáa yiì. 16Aaron yíi a sə wò, a suŋnín e wíri. Wù yíi a suŋnín a dzə̀ kisúŋnìn ké, áà wáa dzə fo wun ji mo woo Nyùy. 17Lì ri mbàŋ yè rə̀y e wò kiwo, e dù, a yiì viŋgaʼnìn ve vinyò vi shó.»
Mooser kfə́n é Ejiv
18Mooser nèn kfə̀n é bàm fo Jetro woo sə́ və, e sùúy sho jii, «Kii wò, ku màʼtì, é m kfə́n é bàm fo wír vémé é Ejiv, e yèn ó ji á sà dzə̀ə́ sho atin a?»
Jetro suúy shó jii, «Dù ri kijuŋ.»
19Nyùy kfən sùŋnín e Mooser, a wù dzə̀ə́ e Midian jii, «Kfə́n é bàm é Ejiv, bìʼ fo wír ve vé‑eè taʼ, e yuyrí wòo kpùkír ne adzə̀m.» 20Á bèy, Mooser nèn lì wíiy və wùn à wón vəə́,#4.20: Wón və́ víne dzə̀ Gershom wùn Eliser. Leéy: 2.22; 18.3‑4. a dzə̀ vilum vilum, e dzə̀ʼə̀r e kitu ke kimbèʼbìy, wùn áwune wáa kfən e bàm é Ejiv. Wù lì sa mbàŋ ye Nyùy kì yòŋèn e wun rə̀y e kiwo.
21 Nyùy Tàr kfən sùúy e Mooser jii, «À kfə́n e bàm é Ejiv, à mùm ji à yii á viŋgaʼnìn ve vinyò vidzə̀m ve m foon wò vitaáví ji à yii e Farao si. Yii bèy, m yíi yiì, é wù táv kitú, e làa yòʼ màʼtì wír veé Isray ji á lo. 22Áà kfən sùúy e Farao ji mo woo Nyùy Tàr suuy a jii, ‹Isray dzə̀ wán wom mbìy woo lumèn, 23a m suuy e wun a jii, màʼtì wan wom woo lumèn və̀n, é wù du, a cù mo. Yii bèy, aà tèn fóo màʼtì, é wù du, bo m yíi yuyrí wan wò mbìy woo lumèn.› »
Tsippora sáŋ mbèʼ se wan
24Mooser lòo dù, e mèé e kirə̀ʼ ké meèmè, Nyùy Tàr wìy, a tàʼ yuyrí wun. 25Á bèy, Tsippora nèn lì tíy ye njiméné, e sàŋ mbèʼ#4.25: sáŋ mbèʼ: Wír veé Hibrùu‑uù yii sáŋ mbèʼ se won vee vilum ji kisəəm ké mensàŋ me áwune kér wùn à Nyùy. se wan shó, e nèn lì júv yee shooy, e kùm wuú Mooser sho,#4.25: e kùm wuú Mooser sho; Kìn jii: e kùm wún vilum Mooser sho. a suúy jii, «Rúrú, à sì lúm wom, bìʼ fo mensə́ mesò mè tatin ne.» 26Nyùy Tàr nèn màʼtì wun e ghan se wiíy kì suuy sho jii, «À sì lúm wom, a wòsò tàtí ne mensə́ bìʼ mbèʼ se wan se saŋén sí.»
Mooser nəə́ é Ejiv
27Kí wáa koóy bèy, a Nyùy Tàr kì sùúy ne e Aaron ji wù du á e kirə̀ʼ ké woʼ kí, é wùn Mooser tárnín fó. Aaron dù, wùn Mooser tárnín e Nyùy gwan,#4.27: e Nyùy gwan: Á yoŋ Gwan Nyùy və̀n ji «Sinay», kìn ji «Horev.» (Leéy: 3.1). wù baámé Mooser. 28Mooser nèn sùúy e Aaron kinyo kidzə̀m ke Nyùy Tàr kì tumen wun ji wun wàá suúy, e kfə̀n naàrì viŋgaʼnìn ve vinyò vidzə̀m ve wù foon wun vitaáví ji wun wáa yiì. 29Mooser wùn Aaron nèn dù e Ejiv, e bàʼtí vilìmbìy veé Isray vidzə̀m. 30Aaron nèn fèr aáwune kinyo kidzə̀m ke Nyùy Tàr kì suuyin e Mooser. Mooser#4.30: Lám Hibru kér fen cáʼ ji wù. kfən yiì viŋgaʼnìn ve vinyò aáwuné si, 31áwune nen biìmé ntum yev. Á lò, e yù ji Nyùy Tàr kì wìy ne ji wun shám á wír veé Isray, a wù yén ne ŋgeʼ se áwune yéné, á nèn gvə̀ʼə́r vitú vév, a ghvəm Nyùy.
Currently Selected:
Fəə 4: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
