Fəə 29
29
Á yóʼ Aaron wùn à wón vəə́ ji atàá cù
(Cù 8.1‑36)
1 Nyùy Tàr kfən sùúy e Mooser jii, «Kinyo ke à kù wíy yiì, e bóo lèm Aaron wùn à wón vəə́ ji atàá cù, aáwune fíʼ a lìm lim yém kí dzə̀ jii, à wíy tàʼ wan nàʼ wùn à wón viyaʼa abaà, vee là nsem, 2e kfə̀n tàʼ meŋkfəŋ me *wit me juŋ mè, áà nèn tòn kibán kee là nyaà e meŋkfəŋ mèy mè. À wíy tòn kibán kìn dzə́ə sitaár, é kímóʼ kí wáa dzə kee là meŋgvə́r, é kímóʼ kí wáa ker meŋgvə́r, e tòn kibér e mentuʼ, e bóo yoʼ e meŋgvə́r mè. 3À maysì, à wày é ŋkaà, e wìy sho wùn à wàn nàʼ woo lumèn, à wón viyaʼ vee abaà víyi ji cu.
4«Áà nèn lì Aaron wùn à wón vəə́, e wìy sho e mǒ shùu *kibàn ké ntàsín, e sù áwune e mendzə́v mè. 5Mo à suùn, à nèn lì ndzə̀y sé Aaron, e màʼ e wun wùn, e kèʼ fo kikum ke da ke fəvír kí, e dù e ke səənén kí, e lì shiŋkèéy shé kikum, e màysì e kifìn keé nsaŋ, e nèn kur kinsiŋ ke shiŋkèéy shé kikum ke á bonen, e tsə̀m kiy. 6À kù wíy kur sa tán ye ndzəméné é kitu wo, e sòv kicí ké tan shó, ke kí din ji dzə̀ á wír wom woo jeéy. 7Áà nèn lì meŋgvə́r me yoʼ, e cuùrì e wun kitu, e yòʼ wun.
8«À wíy lì sa wón və́, e màʼ vikúm ve da ve fəvír ví aáwuné wùn, 9e kur vikuúví, e nèn kur sa tán sév. Á mo à wíy yoʼ Aaron wùn à wón vəə́ bey, é wùn à rám yéví ku wìy a lìm fo mò ji atàá cù, e wìy dù, e mày.
10«À wíy koʼór wan nàʼ e shùu kibàn ké ntàsín, é Aaron wùn à wón vəə́ neer wó yév é kitu wo, 11áà nèn seè fó, e mǒ si, 12e lì mensə́ memoʼ mè, e sə̀ʼ e wàn kiwo, e yoʼ loŋ se *kiy cù sho, e leér kibér e sar kiy cù. 13Áà nèn lì fóm se sí sə́ti vitó sidzə̀m, e kfə̀n lì kimbày ke bày, à ndzəʼ si wùn à fóm sə́ sí, e tàtí, e tòn e kiy cù. 14Yii bèy, áà ton jav nyàm wùn à jùv, à vitó vi, à jáŋe, à kibér ke kifa ki kidzə̀m a dzə̀ é shweesí. Kee shooy ki dzə̀ cu ajay.
15«Áà nèn lì kiyáʼ kee kimòʼón ki, é Aaron wùn à wóné neer wó yév é kitu wo, 16áà seé, e lì mensə́, e wàŋ é virəv vé kiy cù vee vikweè. 17Á kù wíy shètì nyam kiyaʼ yee shooy e vibàr vibàr, e sù vifá ve mvəm ví wùn à vikoy vi, e nèn baʼtí vibar wùn à kitú ki, e neèr vikoy wùn à vifá ve mvəm ví é kitu wo, 18e tatí, e tòn kidzə̀m e kiy cù. Dzə̀ cu Nyùy Tàr ye á ton e dzə̀m. Kù dzə̀ cu ye və́yí bin fo fo, kiyúy kfə́ kí rəʼtìn, boŋ mo féyì.
19«À wíy maysì kiyáʼ kímóʼ kí, é Aaron wùn à wóné neer wó yév é kitu wo, 20áà nèn seè, e lì mensə́ mvə memoʼ mè, e kùm shóy kitùʼùr ké Aaron ke yìy kí shó, e kùm sa vituʼùr vé won və́ shó, e kfə̀n kùm sa aáwuné viyìy vé wo ve yìy ví, e kùm e viyìy vé wuù vé yìy ví, e nèn waŋ kibér e virəv vé kiy cù vidzə̀m. 21À wíy ŋèʼ mensə́ memoʼ mè fo kiy cù, e ŋèʼ sa meŋgvə́r me yoʼ, e waŋ vidzə̀m e Aaron wùn, e kfə̀n waŋ e wun ndzə̀y, e waŋ e wón vəə́ wùn, e waŋ sa aáwuné ndzə̀y. À yii bèy, bo à tsə̀ʼ ne Aaron wùn à wón və́ə, e lèm jeéy ji wír vém, e lèm sa ndzə̀y sév jeéy ji kifá kém.
22«À wíy fətí fóm si fó kiyaʼ, e fəə́r kún wùn à fóm sə́ sí,#29.22: Kiyáʼ keé mbìv wòŋ woo Isray ki dzə̀, a kí kér kún e faŋèn, a fóm si dzə̀ shó sigháʼán. à fóm se mvəm sí, à kimbày ke bày ki, à ndzəʼ si sidzə̀m wùn à fóm sə́ sí, áà kfən fə̀ə́r sa kibiy ke yìy kí, bìʼ fo dzəə̀n kiyáʼ ke á yóʼ taà cù sho. 23Áà nèn fə̀ə́r ntuʼ se kiban kee là nyaà fó ŋkaà kiban ye à kì foon e mò, ntuʼ e mòʼón mòʼón fo kfəə se kiban sidzə̀m, ke kí yòʼ kér meŋgvə́r, à ke à tovin wùn à meŋgvə́r mè, à ke á tònèn é mentuʼ, e yòʼ yóʼón e meŋgvə́r mè, 24e way vifá vìn e Aaron wùn à wóné wo, aá nan é yuv e mò woo Nyùy Tǎr si, ji sì á cu yém yee jeéy. 25Áwune nanè, áà nèn sə̀ kidzə̀m fo áwuné wo, e dzə̀sì e nyàm ye á kì yíi tòn, e tòn kidzə̀m e kiy cù, é kiyúy kfə́ kí wáa rə̀ʼtìn, a bòŋ mo. Dzə̀ cu Nyùy Tàr ye və́yí bìnèn fó fo.
26«À wíy shoʼ shúu shilív kiyaʼ ke á yóʼ Aaron sho və̀n jeéy, e nàn e yuv ji cu ye á foon e mò bey, é yee shoon yee mbìv nèn a dzə ye. 27Á wíy lóo yoʼ taà cù, á kù a shoʼ shúu shiliv wùn à kibiy ki fó kiyaʼ ke cù, a fo ji cu yém yee jeéy, aá nèn fò áàtàá cùu. 28Kù sì nsìysì wom bey ŋkuuŋkùŋ. Wír vémé yii cu kikòŋnìne, bo shúu shilív kiyaʼ wùn à kibiy ki dzə̀ ké atàá cù, bìʼ fo dzəə̀n yéem yee mbìv fó nyàm ye wír veé Israyi cu mo shó.
29«Aaron wíy kpú, á lì ndzə̀y sə́ sé taà cù, e fò e njìlaʼ və, é wù maʼ é ghan se á yóʼó, aá kù wíy a yiì bèy e ŋgwàʼ sí ŋgwàʼ si. 30Wan Aaron woo njìlaʼ və wíy lòo kèʼ lim rə́ ji taà cù wo wù nəə e kibàn ké ntàsín, a cù mo e mǒ kirə̀ʼ kee jeéy kí, é wù shiíy e ndzə̀y sin si é wùn kishiíy saàmbà.
31«Ké kiyaʼ ke à wíy yoʼ Aaron wùn à wón və́ə shó, à wíy lì nyám rə, e naá e kirə̀ʼ ké cù, 32é Aaron wùn à wón vəə́ yí e mǒ shùu kibàn, aá kù yí e kiban ke kí berin é ŋkaà. 33Kù wíy yi áwune vifá ve á manen ajay sho e ghan se á yoʼon áwune. Kù wíy a yi atàá cù cáʼ, bìʼ fo dzəə̀n vidzə̀ vém. 34Ndzə wáa jàv, a nyàm bér, kìn bèr kibán, bo á tonè, é la wìr yòʼ dzəə yì, bìʼ fo dzəə̀n vidzə̀ vé Nyùy Tàr.
35«À kù wíy yoʼ Aaron wùn à wón vəə́ bey kishiíy saàmbà mo m yòŋèn e wò. 36Kishiíy kidzə̀m, à wíy a yiì cu yee bìʼ ajay e nàʼ woo lumèn, e fíʼ a man ajay vév, é kíy cùu wáa dzə sa e ránén. Áà nèn kfə̀n yòʼ kíy cù yóʼón, é wú wáa dzə ji kifá kém. 37Ku wìy a yiì bèy, kishiíy kee saàmbà kidzə̀m, é kíy cùu nèn wìy a dzə jeéy ji kifá kém ŋkuuŋkùŋ. Kifá ki kumè, bo kí kù sì sá kifá kee jeéy kí.#29.37: A dzə̀ nsàv yìmòʼ wàa dzə jii: Kifá kee kiy ki kumè, kìn kùm wír woo və̀y, bo vitaáví vé kifa ke Nyùy kìn vi shòv ne kifá kee shooy, kìn ŋgaàŋ.
Cu yee vishiíy vidzə̀m
(Kintaŋ 28.1‑8)
38«Vifá ve à wíy a yiì cu sho e *kiy cù kishiíy kidzə̀m vi dzə̀ wón viyaʼ abaà vee kiyá kiyá. 39A dzə̀ ji wan kiyaʼ kijàvndzə, wùmòʼ e ŋkuùr.#29.39: Fo wír veé Israyi, ghán sé cù yeé kishiíy sí‑iì dzə̀ jii, shúy bvə̀ʼə̀ kijàvndzə, à shúy sitaár e ŋkuùr. 40Ké wàn kiyaʼ woo kijàvndzə ki wíy a dzə jii, à wíy tatí wùn à meŋkfəŋ me kpuún mè kilu e mòʼón, aá tóv e meŋgvə́r me *oliv me juŋ mè lita e fur,#29.40: lita e fur: Keé Lǎm Hibru ki dzə̀ jii: kintóʼ ke hin kimòʼón fo vee vikweè vi. Leéy: 30.24. e kfə̀n lì sa lita melùʼ me á yíi màʼ ji cu. 41Lóo dzə e ŋkuùr, áà wáa yiì sa bèy e wàn kiyaʼ wo wù bérí, e tatí wùn à meŋkfəŋ mè, à meluʼ mè réŋréŋ mo à kì yiìn kijàvndzə. Kee shooy ki dzə̀ cu ye və́yí bin fo fo, a kiyúy kfə́ kí rəʼtìn, boŋ mo. 42Cu rə̀ne kù wíy a dzə e ŋgwàʼ sí ŋgwàʼ si mo rám sén sí wíy a dzə. Á wíy a tòn cu rə̀n e shùu *kibàn ké ntàsín, e mo woo Nyùy Tǎr si. Dzə̀ fóo fèy, fo wòsò wíy a tarnín, é m wáa suŋnín wòsò. 43Dzə̀ sá foo fèy, fo vèr à wír veé Israyi wíy a tarnín. M wiy fo, é vikuʼùy vém ví yii, é kirə́ʼ kee shooy ki kfə́n ji kém kee jeéy kí. 44M wíy shoʼ kibàn ké ntàsín wùn à kíy cùu jeéy. A m wíy lèm Aaron wùn à wóné, aá wáa lìm lim yém ji atàá cù. 45M wíy a dzə e wír veé Israyí mvəm, a dzə Nyùy wov. 46Áwune wíy kiíy ji dzə̀ á mo Nyùy Tàr wo dzəə̀n Nyùy wov, wo m fəərin áwune fó wòŋ Ejiv ji m fíʼ a dzə aáwuné mvəm. Kù dzə̀ mo Nyùy Tàr, wo dzəə̀n Nyùy wov.
Currently Selected:
Fəə 29: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
