Lim Aŋgàa Ntum 15

Kintatì ki tár kinyo ke Por fiʼtì

1Wír ámóʼó nèn wìy lò fo wòŋ woo Juda, e wìy e Antiyok, a yeʼéy aŋgàa biimé jii, bó yòʼ dzə̀ Nyùy lùŋèr áwune, a bó á sáŋ á *mbèʼ sév mo *Nsər Mooser dzəə̀n. 2Wùn à Por à Banabar rə́sí bìʼ sho, e bvəə̀rí. Kí gháʼ, á nèn sìysì jii, Por wùn à Banabar, à wír ámóʼó du é Jerusalem, e yèn aŋgàa ntum Jesus wùn aàtǎr vintatìi, aá tar á kinyo kee shooy.

3Mo kintatì ki tumen áwune, á nèn lò, a shaà dzə́ə fó wòŋ Fənisia wùn à woó Samariàa, a ghan aŋgàa biimé vee fó, a fìʼtì mo wír ve bó yòʼ dzəə̀n veé Judàa biimen ne sa kinyo ke Jesus. Wìr dzə̀m wáa yu, a sheʼrí feyì. 4Áwune dù, e mèé e Jerusalem, kintatì ki báʼtí wùn aàŋgàa ntum Jesuse, aàtǎr vintatìi, e səə̀sí áwune, Por wùn Banabar wáa fèr vinyo ve Nyùy‑iì sə́ áwune, aá yii vidzə̀m. 5Aŋgàa biimé ámóʼó wáa dzə fo a dzə̀ ve vé‑eè lem sa nsər se wìr veé mbìv *Farasi. Áwune nèn sàyín jii, á kù kér fó a saŋ mbèʼ se wìr ve bó yòʼ dzəə̀n veé Juda, e way wayín ji á wáa lèm a nsər se Mooser sidzə̀m.

6Mo á suuyin bey, aŋgàa ntum Jesus wùn aàtǎr vintatìi nèn kfə̀n dzə̀ʼə̀m ji á tar a kinyo kee shooy. 7Á rə́sí e sùŋnín, e dù kwaʼda. Pita nèn nànèn, a suúy jii, «Afə̀r vem, vèn kì sá ji Nyùy‑iì shòʼ a dzə̀ mo fo věn mvəm fó mbìy ji m wáa fìʼtì sáʼka və wo juŋ e wír ve bó yòʼ dzəə̀n veé Judàa, aá wáa yu, a biimé sa. 8A Nyùy wo wù kiìn melív me wìr dzə̀m‑eè lo bìnsí áwune ji wír və́. Wù‑uù fò áwune Kiyoy ke Ranén kí, réŋréŋ mo wù‑uù foon e vèsən fó mbìy. 9Wù kfən làysìn ajay vév, bìʼ fo áwune‑eè wayin shilív e Jesus wùn, e làa yòʼ a dìn jeéyjeéy fo vèsən à wír vee shooyi gheéy. 10Mo kí dzəə̀n bey, kfən yiì ka, bo vèn wáa tàʼ ji á wáa tinsín Nyùy, a neèr kibeʼèy áàŋgàa biimé vìné mbèʼ? Kibeʼèy kee shooy ki dzə̀, a vèsən aàtàr vesəné‑eè mùm ne ntéŋ. 11Ke vèsən biíme ki dzə̀ ji Nyùy luŋèr vèsən, a dzə̀ bìʼ koŋ ye Tàr wòsən Jesus‑eè kòŋèn vèsən, a wù kù luŋèr sa vee shooy vee wír réŋréŋ bey.»

12Pita fèr bèy, wìr dzə̀m nèn sə̀sín, a yuurí ji Banabar wùn Por wàá súŋnín. Áwune nèn a fèr mo áwune‑eè ghán fo wír ve bó yòʼ dzəə̀n veé Judàa, a Nyùy fó vitaáví, aá yii viŋgaʼnìn ve vinyò ve ví din vitaáví vé Nyùy. 13Áwune fèr vinyo vidzə̀m, ví mày, Jeem nèn a suŋnín, a suúy jii, «Afə̀r vem, vèn yuúrí kém kí. 14Simon#15.14: Simon: Lám Griki kér fèn ji Simeon, a dzə̀ dzə́ə yìmòʼ ye á sáŋ Simon sho. kì sùúy ne mo Nyùy‑iì kèʼèn, e dìn ji wun koŋ sa wír ve bó yòʼ dzəə̀n veé Juda, e shòʼtí ámóʼó fo áwuné mvəm ji və́ vee wír. 15A vinyo ve aŋgàa ntum Nyùyi‑iì sí suuy vi kù shémsin wùn à kee shooy ki. Vé‑eè sàŋ jii:

16 # Amos 9.11‑12. « ‹Wíy lòo dzə fo bàm, é m kfən wìy,

e nàŋsín lav Davir ye yì‑iì gbuùn.

M wíy siìr kinsàʼ ke lav kee shooy fo,

é yì kfə́n fó ji ŋkǐŋ.

17Wír ve bó yòʼ dzəə̀n veé Judàa wíy yen,

e nèn a tàʼ sa Nyùy Tàr.

A kù wíy a tàʼ wír ve m liìn ji vém adzə̀m.

18Sùúy Nyùy wo wù‑uù yiìn,

wíri kiíy kinyo kee shooy fo ŋgùʼ.›

19«M nén a yen kém jii, lá vèsən yòʼ kfə̀n dzə́ə a jivír wír ve bó yòʼ dzəə̀n veé Juda ve á wayin shilív e Jesus wùn. 20Á ku sàŋ fo áwune cáʼcáʼ jii, á wáa leʼ vifá ve á cuùn anyùy sho. Vee shooy vi kóʼoy kòʼòyín, e kfə̀n a leʼ liì woo kùm kinjàŋ, a leʼ nyám yee là seé, a leʼ mensə́. 21Aá kù sàŋ bey, bìʼ fo vé‑eè sí fiʼtì vinyo ve Mooser vìn virə́ʼ vidzə̀m, e kèʼ fo ŋgùʼ, a wíri yú. Aá kù dzəə́ yoŋ fo ŋwàʼ lèn e ŋgày se bùnrì vishiíy vé bam vidzə̀m.»

Atǎr kintatìi sáŋ ŋwàʼ fo wír Kristu ve bó yòʼ dzəə̀n veé Judàa

22Aŋgàa ntum Jesus wùn aàtǎr vintatìi, aàŋgàa biimé adzə̀me nèn biìmé kee shooy, e sìysì jii, á shóʼ á wír ámóʼó fo áwuné mvəm, e tùm, é wùn à Banabar à Por du é Antiyok. Á nèn shòʼ Judar wo vé‑eè yoŋ sa ji Basabar, e kfə̀n shòʼ Silar, a dzə̀ vilìmbìy veé kintatì. 23Á sáŋ ŋwàʼ wo á kì yíi tum áwune shó, a wú dzə̀ jii:

«Ver vee afə́r vén vee aŋgàa ntum Jesus wùn aàtǎr vintatìi shaʼtì ven vee afə́r vér ve bó yòʼ dzəə̀n wír veé Juda, ve á dzəə̀n é Antiyok wùn à ve á dzəə̀n é wòŋ woo Siiriàa, à veé wòŋ woo Silisiàa adzə̀m. 24Vèr‑iì lo yù ji wír ámóʼó lò fo věr mvəm, e wìy, a taà vinyo, a jivír ven shó, a bvəə́r vifíi vén, a bó yòʼ‑oò tùm ver wír vee shooy. 25Vèr nen dzə̀ʼə̀m wir dzə̀m, e biìmé ji bòŋ aá shóʼ wír ámóʼó, e tùm fo věn wùn, aá wiy wùn à ŋkar sesən see Por wùn Banabar, 26ve dzəə̀n wír ve vé‑eè sùmèn kpú bìʼ kinyo ke Tàr wòsən Jesus Kristu. 27Vèr nen tùm Judar wùn Silar wùn áwune, aá yíi wìy, e kù suúy a dzə̀ kinyo ke vèr saŋen é ŋwàʼ fèn. 28A kí dzə̀ jii, Kiyoy ke Ranén kí‑iì lo yiì, vèr yén ji bó yòʼ dzə̀ vèr wàa rəʼə́y ven ve bó yòʼ dzəə̀n wír veé Juda e kibeʼèy kímóʼ kí, e shaà vinyo ve ví dzəə̀n é shií jii, 29vèn kú a leʼ vifá ve á cuùn anyùy sho, a leʼ nyám yee là seé, a leʼ mensə́, e kfə̀n a leʼ liì woo kùm kinjàŋ. A vèn lò, a baàmè vinyo vìn, bo vèn yii réŋ. Á bèr ne.»

30Á sáŋ bey, e nèn tùm wír vìy sho. Á dù e Antiyok, e bàʼtí aŋgàa biimé adzə̀m, e fò ŋwàʼ və̀y. 31Áwune yòŋ, wú rəə̀r melív mev, á wáa sheʼrí feyì. 32Mo Judar wùn Silar‑iì dzəə̀n sá wír ve á lo, á wàa tiisí ntum Nyùy, á nèn kfə̀n a suúy vinyo vímóʼ ví vinín, a tir áwune shó, a tavír melív mev. 33Áwune bónén, e dzə̀ʼə̀m fo wùn áwune. Á wìy lòo lò, aŋgàa biimée shàʼtì áwune ji á ghán á kijuŋ, e kfə̀n fo wír ve vé‑eè tumen áwuneé wùn. [34Yii bèy, Silar nèn yèn ji wun‑éè goʼ á kfə́ é Antiyok foo fèy.] 35Por wùn Banabar ku nèn a dzə e Antiyok, a fìʼtì kinyo ke Jesus wùn à wír ámóʼó anín, a yeʼéy wíri.

Por wùn Banabar jávsín

36Ghán sí lòo koʼtí, Por suúy e Banabar jii, «Wòsò kfən dù e ntèʼ se wòsò‑oò fiʼtì kinyo ke Nyùy sho sidzə̀m, a ghan fo aŋgàa biimée, a leéy mo áwune dzəə̀n.» 37Banabar nèn a kòŋ fó lì Joon Maak, é wùn áwune wáa ghan, 38yii bèy, la Por yòʼ a kòŋ gheéy, bìʼ fo Maak‑iì leʼen, e màʼtì áwune é wòŋ woo Pamfilia, e làa yòʼ màysì ghán ye wùn áwune‑eè kérí. 39Wùn Banabar rə́sí, e kìŋnìn ŋkóŋkóŋ, e nèn jàvsìn. Banabar lì Maak, wùn wun dù, e nə̀ə́ e kikoŋ, a dù e wòŋ woo Saypur. 40Por shóʼ kfə́ a dzə̀ Silar. Wùn wun lòo lò, aŋgàa biimée bùnrì, e wày áwune e Nyùy kiwo. 41Por nèn lì Silar, a dù, a shaà dzə́ə fó wòŋ woo Siiria wùn à woo Silisiàa, a ghan, a tavír aŋgàa biimé vee fó.

Currently Selected:

Lim Aŋgàa Ntum 15: LNB

Highlight

Copy

Compare