Lim Aŋgàa Ntum 12

Fòn Heror nyávrí e wír Jesuse

1Wáa dzə e ghan see shooy, Fòn Heror nèn kèʼ sa, a fo ŋgeʼ e wír veé kintatì ámóʼó. 2Wù suúy, á gwàr Jeem woo fər Joon. 3Wù lòo yen, a kí bóŋ wún wìr veé Juda, e nèn kfə̀n sùúy, á koó sá Pita. A vé‑eè koò é vishiíy ve vé‑eè yí *kibán kee là nyaà, rə́si *Ŋkǎʼ Yáʼayshaà. 4Á koó Pita, e fìn e lav, e lèm vé rərí viŋkàŋ vikweè, wír akweè akweè, á wáa shìy wun, a Heror‑iì wày wáyín ji Ŋkǎʼ Yáʼayshaà wíy shaà, é wun kóʼór Pita e wírí si, aá wàá sáʼ. 5Pita ku nèn a dzə e lav sháŋ, kintatì ki wáa bùnrì fo wun kitávín.

Nshìylav Nyùy fəə́r Pita fo sháŋ

6Wìy lòo dzə vitsə́ʼ ve Heror kì bvəə́shi, e fəə́r Pita kijàvndzə ji á sáʼ, Pita wáa buuné e vé rərí nsàn abaà, aá kúr wun asháŋ abaà. Vé rər ámóʼó kfə́n a shìy sa shúu lav. 7Nshìylav Nyùy Tàr nèn sàsìn, e bvə̀y fó, lav rán. Wù sə̀ʼsì Pita fo mbèʼ, wù yìmèn. Wù suúy shó jii, «Lò é yuv cér.» Sháŋ ku nèn bvə̀rkìr fo Pita koy. 8Nshìylav Nyùy kfən sùúy sho jii, «Kúr ndzə̀y sé si, e wày alábáʼá.» Pita wáy, wù kfən sùúy sho jii, «Màʼ kikúm ké ki, a wìy e mǒ bàm.» 9Pita ku nèn a jùmrì wun, a fəə, e làa yòʼ a kiíy ji kinyo ke nshìylav yii ki sà dzə̀ rú mo shí njèm wun a. 10Mo vé‑eè lèmèn vé rərí e virə̌ʼ virə̀ʼ, wùn Pita shaà vé mbìyi, e dù, e shaà vé bàmé, e mèé e shùu lav wúmóʼó wo dzəə̀n kisha, wo wú fəə́sin fo ndzə, wú nèn mvə̀ʼə̀m, wùn Pita fəə́. Á lòo səytí e dzəə, nshìylav Nyùy rə̀y nèn màʼtì Pita fo, a dù.

11Pita siíy, kinyo kìy ki wìy e wùn vifii, wù suúy jii, «M kìíy ne rúrú lèn ji kì tùm Nyùy nshìylav rə, yì wíy, e shòʼ mo fo Heror kitam, m bóy fó kinyò ke wír veé Judàa kì kwaʼtì ji á wíy yiì e mò.»

12Mo Pita kiiyin kinyo ke kí kooyin wun, e nèn dù e Maria woo yìy à Joon Maak lav, a wíri kì bàʼtí fó anín, a bùnrì. 13Wù kùmrì shúu kày, wánlè wiíy wìy, aá yoŋ ji Roda, a wù lim e lav foo fèy. 14Wù yú, a súŋnin Pita fo ndzə, kishéʼrì ki wáa yuy wun yúyín, wù nèn nyèŋ, e kfə̀n é bàm, e làysìn fó mvə̀ʼ shúu kày, e dù, e bì e wíri ji Pita tíy a e shùu kày. 15Á bìnèr jii, «À baá baán.» Wù kú a suúy ji dzə̀ á Pita. Á nèn sùúy jii, «Bo dzə̀ nshìylav Nyùy ye yì shiy wun.» 16A Pita kù tíy, kumrì shúu lav. Á lòo mvə̀ʼ, e yèn rú, a kì dzə̀ Pita, a ker gháʼ. 17Wù nəə́, e sə̀r áwune e kiwó ki, a fèr mo Nyùy kì yiìn, e bóo fəə́r wun fo sháŋ. Wù màysì, e sùúy jii, á fiʼti á kinyo kee shooy e Jeem, e kfə̀n fìʼtì aàŋgàa biimée adzə̀m, e nèn lò, a dù fomóʼó.

18Yì rán kibvəə́shí, vé rər víyi lòo leéy, e tàʼ Pita ntéŋ, a fàn, vifií vév ví wáa bvəərí ji sà kòóy ka Pita a? 19Fòn Heror yú, e fə̀ə́r wíri, á wáa ghan, a tàʼ. Á tàʼ ntéŋ, wù nèn kòʼór vé rər viy, a dzətí vinyo aáwune, e yiì lò, e sùúy ji á wàá li, e dù yùyrí. Mo kee shooy ki shaàn, Heror nèn lò fo mbìv wòŋ yee Juda foo fèy, e sə̀y é mvə̀mlaʼ Sisaria, a dzə fo.

Kpú Fòn Heror

20Wáa dzə e ghan see shooy, a Fòn Heror shwiiy kilòŋ fo wír veé Taya wùn à veé Sidone. Áwune nèn bàʼtí, a dù ji á yén a wun. Á dù, e tòmbìy koò Blatur woo taà ntoʼ e viŋkar, a lon nyaáŋ fo fòn, bìʼ fo woŋ wóví‑iì kér vifá ve yi a dzə̀ fo Fòn Heror wòŋ.

21Kishiíy kí gheén, Fòn Heror wáyrí vifá ve wòŋ, e kòʼ e wùn kàvàʼ, a suŋnín e wír vee shooyi. 22Á nèn lò, a buʼ a dzə̀ rəə́ jii, «Súŋnin Nyùy, bó yòʼ súŋnin wír.» 23Nshìylav Nyùy Tàr ku nèn màʼ yàsí e fòn wùn, bìʼ fo wù yòʼ‑oò lo siìr búrí yee shooy a dzə̀ e Nyùy. Menshun mè kèʼ, a kfər vitó fo fo, wù kpú.

24A kinyo ke Nyùy ki kù‑uù sí samèr, dù duùn fó mbìy, a wíri biíme. 25Mo vé‑eè tumen Banabar wùn Saul e Jerusalem, á màysì fo fo, e nèn a kfən e Antiyok. Á lòo kfən, e lì sa Joon Maak.

Currently Selected:

Lim Aŋgàa Ntum 12: LNB

Highlight

Copy

Compare