Lim Aŋgàa Ntum 10

Konelur jáŋ Pita e wùn lav

1Wìr wùmòʼ wáa dzə e mvə̀mlaʼ Sisaria, aá yoŋ ji Konelur, a dzə̀ mfòómé rə̀r woó *Rom. Wù‑uù sáʼ shúu rər wo á yoŋ ji woó Itali, 2a wùn à wír vee wùn laʼ adzə̀me ghvə́m Nyùy. Wù‑uù bunrì Nyùy ghán sidzə̀m, sə́ wír veé Juda vee aŋgàa kitàn e ŋàŋ. 3Wìy lòo dzə e kishiíy kímóʼ kí shúy sitaár e ŋkuùr, kinjeenjèm ki wìy e wun si, wù yén nshìylav Nyùy feyì kijuŋ, a yì nəə́, e yòŋ wun jii, «Konelur.» 4Wù nèn a fàn, e tùy sí e wùn wó, e dzə̀r jii, «Dzə̀ ká, Tàr?» Yì bìnèr jii, «Nyùy yù ne bunrì yé, e kfə̀n yèn lim yé ye juŋe, e kuùmé wò. 5Túm ri wíri é Joppa, aá du, e jàŋ wír wo á yoŋ ji Simon, kfə̀n yoŋ ji Pita. 6Wù wìy, a shiíy wùn Simon wo wù yii tám júv, a lav rə dzə̀ é ghaa rìbà ndzəv.» 7Yì suúy bey, e nèn lò. Konelur siíy, e jàŋ və́ vé lìme abaà, e kfə̀n jàŋ sa ŋgaà rə̀r wo wù yii shiy wun, a wù ghvə́m sa Nyùy. 8Á wìy, wù fèr kinyo ke kí kooyin, e nèn tùm áwune é Joppa.

Nyùy súŋnin e Pita e njà kinjeenjèm

9Áwune bvəə́shí, e dù, a meé e mvə̀mlaʼ foo fèy, a sì e ntìntìn shùy, a Pita kì kòʼ é kitu ke lav, aá náŋsín moo nsaàlav, a bùnrì fo. 10Jìŋ nèn lò, a yar wun, wù wáa kòŋ e yikír, aá dzəə́ fer vifá ve yi férin. Kinjeenjèm ki nèn lò, a wìy e wùn si. 11Wù yén, a shúu yuví mvə́ʼə́m, kifá ki wáa səʼə́y fo fo, a kí dzə̀ moo kintsə̀m ké ndzə̀y kikuʼùn, aá ghár buú sikweè. 12Kfəə́ se nyàm se koʼoyín sí‑iì dzə̀ shó sinín, seé kwaʼ wùn à seé ndzəv sí, à menə́n mè. 13Wù yú, a jì wìr yóŋ wun jii, «Pita, nànène, a seerí, a kfər.» 14Pita bìnèr jii, «Nyaa mǒ Tàr, bó yòʼ dzə̀ m mùm. Bó m yòʼ‑oo yíi ne yì kifá ke kí kóʼoyì, ke kí kér *kifàn.» 15Jì rə̀y nèn kfə̀n sùúy sho jii, «Lá à yòʼ a nyaŋsí kifá ji kí kóʼoyì, a Nyùy suúy ne ji kí dzə̀ kijuŋ.» 16Kinyo kìy ki koóy bey akàŋ ataár, kifá kìy ki nèn kfə̀n é yuv.

17Pita ku nèn a dzə, a rə̀m ji kinyo ke wun yenen kin ki sà din a dzə̀ ka á? A wír ve Konelur kì tumen víyi siíy ne, e dzə̀r lav Simon, e wìy, a tiy e shuù lav. 18Áwune yòŋ lav, e dzə̀r jii, «Ŋgaà kiŋgàn wùmòʼ dzə̀ fen, a yírí dzə̀ Simon Pita a?» 19A Pita kù dzəə́ dzə́, kwaʼtì kinyo kìy. Kiyoy ke Ranén kí nèn sùúy sho jii, «Leéy, wíri wìy, a tàʼ wò ataár. 20Sə́ʼə́y, é vèn áwune wáa dù fo á du. À lóo dù, lá à yòʼ a rə̀m ntéŋ, tùm mo wír vee shooy.» 21Pita nèn sə̀ʼə́y, e sùúy e wír vìyi jii, «Dzə̀ mo wo vèn taʼà. Vèn wìy ji ka?» 22Á bìnèr jii, «Tùm Konelur woo mfòóme rə̀r woó Rom ver. Wù dzə̀ wír wo juŋ, ghvə́m Nyùy, a wír veé Judàa búri wun adzə̀m. A nshìylav Nyùy sìíy, e wìy, e sùúy sho jii, wù jaŋ wò e wùn lav, e yù á kinyo ke à yíi suúy e wun.» 23Pita nèn lì wír vee shooy, wùn áwune shiíy.

Pita dú ntum Nyùy e Konelur lav

Yì rán kibvəə́shí, wùn áwune nèn lò, a dù. Aŋgàa biimé veé Joppa ámóʼó wáa dù sa wùn áwune. 24Á ghán, e shìíy, e kfə̀n bvəə̀shí, e ghàn, e bóo nəə́ e Sisaria. A Konelur siíy ne bèy, e jàŋrì kfə́ə rə́ wùn à ŋkar sə́ se ru sí, wùn áwune wáa dzə, a shìy Pita. 25Pita wìy, e lòo nəə́ e lav, Konelur tsə́m é si wo, a fo ghvə́m sho. 26Pita ghár, e sùúy sho jii, «Lò é yuv, m dzə̀ sá wír moo wò.» 27Wù nèn lò, wùn Pita wáa suŋnín, a nəə́ e lav. Pita yén, a wíri báʼtí fó anín, 28wù suúy aáwune jii, «Vèn kì sá kijuŋ ji dzə̀ nsər fo wìr woó Juda tátí wùn wìr kitum ke sən kí, bo taaka ji wù nəə́ e ŋgaàŋ lav. Yii bèy, a Nyùy dìn ne e mò ji lá m yòʼ a nyaŋsí wír wùmòʼ ji ŋgaà *kifàn. 29M nen wìy fèn mo vé‑ee jàŋèn mo, là kinyo. A m dzə́r e vèn jii, vèn sà‑aa jaŋ mo ji ka á?»

30Konelur bìnèr jii, «Yì‑iì dzə̀ moo lèn, shúy sitaár, e bǎm vishiíy vitaár, a m bunrì e mǒ lav. M sàsìn, e yèn wír, a wù tíy e mǒ si, a ndzə̀y sə́ sí njaʼkìr njàʼkìn. 31Wù yòŋ mo jii, ‹Konelur, Nyùy yù ne bunrì yé, e kfə̀n kuùmé mo à rə́si sə́ vé kitàne. 32Túm wír e Joppa, é wù du, e jàŋ wír wo á yoŋ ji Simon, kfə̀n yoŋ ji Pita. Wù wìy fo, a shiíy wùn wìr wo á yoŋ ji Simon wo wù yii tám júv, a lav rə dzə̀ é ghaa rìbà ndzə̀v.› 33M yú bey, e kù nèn tsə̀nsí ntum ji à wiy. À wíy ben, kí bóŋ féyì. Vèr nén a dzə fèn lèn adzə̀m e Nyùy si, a shìy ji á yú kinyo ke Nyùy Tàr tiisin ji à wiy, e fèr e vèr.»

34Pita nèn kèʼ, a suŋnín, a suúy jii, «M yèn ne rú lèn ji bó Nyùy yòʼ nyaʼ wír. 35A wìr ghvə́m Nyùy, yii réŋ, a ŋgaàŋ fə̀m dzə̀ wír woó kitum kiné kí, bo wù ghèén fo Nyùy. 36Vèn kù‑uù lo yù sá ntum ye Nyùy‑iì tsənsin fo wír veé Israyi ye yì dzəə̀n ji Jesus Kristu‑uù wìy ji wíri fiʼ kòóy nyaáŋ wùn à Nyùy. A Jesus Kristu və̀n dzə̀ Tàr à wíri adzə̀m. 37A ntum rə̀n‑eè jumrì ye Joon‑eè fiʼtì, wáy wíri é ndzəv. Yì‑iì kèʼ fó Galeli, e sàmèr woŋ Juda e dzə̀m. 38Vèn kù‑uù lo yù ji Nyùy‑iì fò Kiyoy ke Ranén kí e Jesus woó Naasarer woo shooy, e kfə̀n fò wun vitaáví, a shìy wun, wù wáa ghan virə́ʼ vidzə̀m, a yiì vinyo ve juŋ vi, a fèr wír ve vé‑eè yén ŋgeʼ e Satan wo. 39A vèr‑iì lo yèn vinyo vee shooy e sí yérí. Vèr‑iì yèn ve wù‑uù yii e Jerusalem, kfə̀n yii e wír veé Judàá wòŋ foo fèy vidzə̀m. Wír veé Judàa nèn lò, e yùyrí wun móo tam e kintam. 40Yii bèy, vishiíy ví lòo meé vitaár, Nyùy fəə́r wun fo kpu, e dìn, wíri yén. 41A bó yòʼ‑oò yèn wir dzə̀m. Kù‑uù yèn ver ve Nyùy‑iì shoʼon fó mbìy ji á wáa fìʼtì kinyo ke Jesus. Vèr à Jesus‑eè ló a yinín, a nonín, a Nyùy fəə́r ne wun fo kpu, 42wù wáa suúy e vèr ji á wáa fìʼtì kinyo ke Nyùy e wíri, a suúy a jii, Nyùy‑iì lèm a dzə̀ wun woo Jesus ji wír wo wù wíy saʼ nsaʼ wìr ve tine wùn aàŋkfəə. 43A dzə̀ Jesus və̀n wo aŋgàa ntum Nyùyi‑iì fiʼtì ji a wìr wày shilív é wùn wó, bo Nyùy kù wíy làysìn ajay ŋgaàŋ bìʼ wun.»

Kiyoy ke Ranén kí wíy fo wír ve bó yòʼ dzəə̀n veé Judàa

44Pita kú a suŋnín bèy, Kiyoy ke Ranén kí nèn wìy, e nə̀ə́ e wír ve vé‑eè yuúri kinyo kfəə́ meliv adzə̀m. 45-46Aŋgàa biimé vee wír veé Juda ve wùn à Pita kì wìyìn fó Joppàa yú, a wír vìyi ló ne, a súŋnin kfəə́ se làm símóʼ sí jeéy jeéy, a burí vikuʼùy vé Nyùy, á wáa ker gháʼ mo Nyùy foon sá fómo və wo dzəə̀n Kiyoy ke Ranén kí e wír ve bó yòʼ dzəə̀n veé Juda vìyi. Pita nèn dzə̀r jii, 47«Mo Kiyoy ke Ranén kí wìyìn fo wír vìne réŋréŋ mo kí‑iì wìyìn sá fo vèsən vee wír veé Juda, a dzə̀ wìr kfə̀n shèm fo á wáy wír vìn e ndzəv á?» 48Wù nèn sùúy, á wáy wír vìy e ndzəv e Jesus Kristu yir. Á nèn yiì lò, a lon ji Pita ku dzə̀ʼə̀m a wùn áwune vishiíy vishàr, e bó a lò.

Currently Selected:

Lim Aŋgàa Ntum 10: LNB

Highlight

Copy

Compare