Roma 3

Ŋwi a Ghɨə Anu za Zɨə Kaʼnɨ a Ngɨə ghe

1Abi za bə Yuda tiʼnɨ ntsi nɨ zɛrə ntsa ɨbɛn bə mɔʼɔ a tiʼ mbe ake le? Kə ɨlɨŋ tse lanɨ ntsi ɨwu a ntsəŋ alagɨ le? 2Tsɛʼ a nkənu, zə wi a tsi ɨwu a nye mɨndóm mɨtsum ə! A ntsambyi, Ŋwi a nɨ́ŋ mɨgham ɨmyi lá mu mbó bə Yuda ghe. 3Ake mɨ ghɨ mbáʼ be bə tse sé ghɨ ɨnu tsa bo tsínɨ́ nɨ ngɨə le? Məzen a diʼ lá ngə́ Ŋwi a mɨ keʼ bə ngɨ ɨnu tsa wɛrə a káʼnɨ́ a ngɨə le? 4A chi keʼ lá be! Ŋwi a sóŋə́ tsɛʼ nkənu nkfu tsum, lá ŋwɔn mɨsɔŋ a ntsu tsum a be ngaŋ ɨchwenu ə. Tso mbáʼ bɨ ŋwáʼnɨ́nɨ́ a mu Aŋwaʼnɨ a Ŋwi ngə́,

“Nkfu tsum za nɨ ghamnə, ŋwɔn tsum a tsi nɨ ndze nkənu a nye anu za nɨ sóŋnə́ ghe;

o dzɨ̌ ɨsáʼ ɨgho tsɛʼ nkfu tsum ə.”

5Lá be a be ngə́ ɨfənu ɨtsɨgɨnə baŋnə ndǐʼ adzaŋ za Ŋwi a chinɨnɨ, bɨgɨnə mɨ soŋ ngə́ ke le? Bɨgɨnə chi soŋ ngə́ Ŋwi a fə̌ anu mbáʼ be a nɨŋ ngɨ́ʼ tse a nye bɨgɨnə le? (Ma ghamə lá tso ŋwɔn mɨsɔŋ a ntsu ə) 6A chi keʼ lá be! Be a be mə lan, Ŋwi a chi tiʼ sáʼ atuəshe zen lá ɨ nə́ le?

7A mɨ be ɨ lə mbáʼ be a ntsǎ a ndzum ɨchwenu ɨtsan, nkənu Ŋwi tɛ́mə́ a ntáʼ asaŋəsaŋ a ngá nɨfáŋ a mbó wɛrə le? Bɨ chi tiʼ bə soŋ ngə́ ma vwo ɨsáʼ mbɨ́ʼ ngə́ ma nɨ ngaŋ ngɨ mɨbvu lá ngə́ ke le? 8Bɨ tiʼ keʼ soŋ ngə́, “A bɨgɨnə ghɨ ɨbvu taŋ á ɨbɔŋ ɨ zɔŋ ɨwu ngə́ ke le”? A nkənu, ɨbɛn bə tse zɔmnə aghan, nkáŋə́ aghan ngə́ ma sǒŋ anu məziŋ ə! Bɨ ghɨ sóŋ ngə́ bo vwo ɨsáʼ tsɛʼ adzaŋ za bɨ bénɨ́ sóŋə́.

Ka Ŋwɔn Tse a Chinɨ ayi ɛ

9Ma lan, bɨgɨ bə Yuda tsa a ba a se bə Yuda be a nye ndóm tse le? Kə́ kə́! Mbɨ́ʼ ngə́ ma kwɛnə soŋ ngə́ ɨbvu kubɨnɨ bə Yuda abɔʼnɨ ba a se bə Yuda be tsɛʼ bɨtsum ə. 10Adzaŋ za Aŋwaʼnɨ a Ŋwi a soŋnɨ ngə́:

“Ka ŋwɔn tse a chinɨ ayi a ɨshi ɨmɨgɨ Ŋwi,

11wu tse a keʼ nɨ zóŋ tsi kə ntsɔʼə aku a Ŋwi a ngúʼsɨ́ zɨə.

12Bɨtsum bɨ furɨ ndzum ɨza nga a mbó Ŋwi; bɨtsum bɨ fə̂; ka ŋwɔn tse a ngɨə ayi anu za a kuʼnɨnɨ, kə́ tsɛʼ táʼ ghe.

13Ɨchwenu ɨtsa chi zhwitɨ ɨbɛn; mɨgham mɨ ntsu ɨma nɨ mə ɨbvu, mɨgham mɨ nkyesɨ ma mɨ fúnə́ a ntsu bo fi ndyíʼ ɨnyo;

14anu atsum za bo ghamnə a nɨ ndɔʼ ɨbɛn abɔʼnɨ mɨgham mɨ mɨlwintɔŋ tɨbɔŋ ə.

15Bo yǎŋ ɨnye a nchwirɨ alɛm;

16adiʼ atsum za bo tsanɨ ɨwu, bo tsənkɨ ɨdiʼ adaŋədaŋə, ngɨə ɨbɛn zenɨ ngɨ́ʼə.

17Ka bo ndáʼə nkwáʼtə́ awa mbɔnɨ,

18ka bo nkə́ mbɔ́gɨ́tə́ awa a Ŋwi ə.”

19Tɨtsɔŋnɨ bɨgɨnə zhi ngə́ anu atsum za bɨ ŋwáʼnɨ́nɨ́ a mu Nyɔngɔŋ a tsi a mbó ɨbɛn ba Nyɔngɔŋ wa a nɨ ɨwa, taŋ á ɨbɛn keʼ nɨ anu zə soŋnɨ tsi, ɨ ghɨ á ŋwɔn tsum a mu mbyi tsum a tɛm a ɨshi Ŋwi mbə́rɨ́ mɨto ɨmyi ɛ. 20Be ŋwɔn a ghɨ ɨnu tsa Nyɔngɔŋ a soŋnɨ, ka məza a diʼ ayi ngə́ wɛrə a chinɨ a ɨshi ɨmɨgɨ Ŋwi ə, lá Nyɔngɔŋ a ghɨə be ngə́ á ɨbɛn zhi ngə́ bo ghɨ mɨbvu a nye Ŋwi ə.

Adzaŋ za bɨ Ghɨnə Bɨgɨnə Tɛmnɨnə a Ɨshi Ɨmɨgɨ Ŋwi ə

21Lá tɨtsɔŋnɨ Ŋwi a diʼnə ndóm wa ɨbɛn chinɨ tsa ɨwu ɨ chinɨ a ɨshi ɨmɨgɨ zɨə. Nyɔngɔŋ Mǒse abɔʼnɨ ntóm Ŋwi kɨ́ ngam mbɨ́ʼ ndóm məwiŋ ə. 22Ŋwi a chísɨ́ ɨbɛn bo bo tsinə a mbúm ntsǎ lá a ndzum abeməntəm aza a nye Yeso Kristo ghe. Ŋwi a ghɨə a məzen a mbó ŋwɔn tsum wa a nɨŋnɨ ntəm ɨyi a nye Kristo, mbɨ́ʼ ngə́ ka líʼ a tsi ayi ɨwu tsɛʼ mɨnyiə ghe: 23mbɨ́ʼ ngə́ ŋwɔn tsum a ghɨnɨ ɨbvu nchi keʼ ghɛn fátɨ́ nɨfáŋ nɨ Ŋwi ə. 24Lá a ndzum azúm zə ghanɨ za a nɨ abɔŋəntəm a Ŋwi, Ŋwi a bem ngə́ ŋwɔn tsum a chinɨ a ɨshi ɨmɨgɨ zɨ ntiʼ ntsi bo zɨ ntsa a ndzum Kristo Yeso, zɨ wa a kyɛtɨnə mɨnkɨ mɨ abuʼ a nye bo lá. 25Ŋwi a ghá ayi ngə́, á alɛm azhi a tiʼ mbe ndómnji wa ɨbɛn tsanə ɨwu bɨ lɨgɨnɨnɨ mɨbvu ɨma ntsa a ndzum abeməntəm aza a nye Kristo ghe. Məzen a tsí lá a ndiʼə adzaŋ za Ŋwi a chinɨnɨ, mbɨ́ʼ ngə́ a mu nchigə ɨzhi tso Ŋwi, wɛrə a kə́ ngwágɨ́nə́ mɨbvu mɨ ɨbɛn a mbyi ɛ; 26lá tɨtsɔŋnɨ, ka wɛrə a mbvúrə́ ngwágɨ́nə́ ayi mɨbvu mɨ ɨbɛn, taŋ ɨ diʼ ngə́ zɨə chinɨ ə. Adzaŋ məwen Ŋwi a diʼə ngə́ zɨə chinɨ nkɨ mbem a ŋwɔn tsum wa abeməntəm azhi a tsinɨ a nye Yeso tso ɨbɛn ba bɨ chinɨnɨ a ɨshi ɨmɨgɨ zɨə.

27Bɨgɨnə chi tiʼə tɛrɨnə lá nɨ ake le? Kə́ kə́! Yentəzɔʼ a tiʼ mbe ake le? A be lá mbɨ́ʼ ngə́ bɨgɨnə lěn a Nyɔngɔŋ Ŋwi le? Ngáŋ, be mbɨ́ʼ ngə́ bɨgɨnə tsi nɨ abeməntəm ə. 28Mbɨ́ʼ ngə́ bɨgɨnə kwɛnə nji ngə́ Ŋwi a bémə́ ngə́ ŋwɔn a chinɨ a ɨshi ɨmɨgɨ zɨ be mbɨ́ʼ abeməntəm azhi nkeʼ be be ngə́ a lěn ɨnu tsa Nyɔngɔŋ a sóŋnə́ ghe. 29Kə Ŋwi a lá tsɛʼ wu bə Yuda le? A se Ŋwi ba a se bə Yuda be kɨ mbe le? Tsɛʼ a nkənu, Ŋwi a kɨ mbe Ŋwi ba a se bə Yuda be ə. 30Ŋwi a nɨ wi mɔ́ʼɔ́ ghe; wɛrə a mɨ bem ngə́ bə Yuda chinɨ a ɨshi ɨmɨgɨ zɨ mbɨ́ʼ abeməntəm aza ɨ kɨ bem ngə́ ba a se bə Yuda be chinɨ a ɨshi ɨmɨgɨ zɨ mbɨ́ʼ abeməntəm aza ghe. 31Məzen a tiʼ ndiʼ lá ngə́ bɨgɨnə mɨ nyɛʼ a Nyɔngɔŋ Ŋwi mbɨ́ʼ abeməntəm məzen le? Ngáŋ, a se mə lá be; bɨgɨnə baŋnɨ ntsi nɨ nchwa Nyɔngɔŋ Ŋwi á təntɨ ə.

Currently Selected:

Roma 3: MNT

Highlight

Copy

Compare