Ɨfaʼ 25

Baolo a Bitɨ ngə́ á bɨ Tsagɨ Ɨsáʼ ɨyi a mbó Kaisa ghe

1Njwi tsi tárə́ tsanə, Fɛsɨto a yen a mu mbuʼ za. Wɛrə a ló a Seseria ngɛ́n a Yerosalɛm, 2adiʼ wa bɨntumshe bə wi abɔʼnɨ bɨntsagɨnɨ bɨ bə Yuda ghɨ́nɨ́ ɨsáʼ ɨwa a ɨnye Baolo ɨwu ə. Bo búʼ mbó a mbó Fɛsɨto 3ngə́ á ghɨ a mɨ ɨbɔŋ tse a nye bo, ndɔgɨ a Baolo ngyen nɨ wɛrə a Yerosalɛm, mbɨ́ʼ ngə́ bo kórɨ́nə a mɨnaŋ a njwítɨ́ wɛrə a ndómnji ɛ. 4Fɛsɨto a chwɨ́gɨ́ ngə́, “Bɨ lɛn a Baolo a Seseria tso ngaŋ atsáŋ ə. A nye məkum a nkfu, me mboŋ ma mɨ bə ghɛn ɨwu ə. 5A bɨntsagɨnɨ bɨŋ ghɛn a Seseria bɨgɨ bo nkaŋ ayi mbáʼ be a ghɨ anu zə tse za ka a kuʼnɨ ayi ɛ.”

6Fɛsɨto a bə́ nkwiʼ ntsi bo bo atú njwi tsi nɨfə̧ kə nɨghúm, ntiʼ ndo ngɛn a Seseria ghe. Njwi zɨ mɔʼɔ bənə ndán, wɛrə a shiʼtɨ ntsi a ngɔʼ abyɛn, ntiʼ soŋ ngə́ á bɨ lɔgɨ a Baolo ngyen nɨ zɨə. 7Baolo a yenə, bə Yuda ba bɨ lónɨ́ a Yerosalɛm ngyen lá lo ntɛm nkárɨ́sɨ́ ayi ntiʼ mbiʼnɨ nkáŋə́ ayi mbɨ́ʼ ɨnu tsɨ tən tsa bo kɨ chinɨ keʼ diʼ ngə́ tsɨ nɨ nkənu ə. 8Lá Baolo a ghám nɨgham nɨ ntsuʼ atú azhi ngə́: “Ka ma fə aghan anu zə tse a nye Nyɔngɔŋ bə Yuda kə a nye Ndáŋwi zɨ Ngwi, kə a nye Ɨfɔ bə Roma ghe.”

9Lá Fɛsɨto a kə́ ndǒ nkwarɨ ɨkum wu shiʼnɨ a mbó bə Yuda ghe. Ma lan, wɛrə a bítɨ́ a Baolo ngə́, “O mɨ kɔŋtɨ a ngen a Yerosalɛm á bɨ saʼ ɨsáʼ ɨgho ɨwu mbɨ́ʼ ɨnu tsen tsa bɨ kaŋnɨ agho mbɨ́ʼ a tsɛrə a ɨshi me lá le?”

10Baolo a chwɨ́gɨ́ ngə́, “Ma tɛm ɨghan lá a ngɔʼ abyɛn Kaisa, adiʼ wa bɨ tsinɨ nɨ ɨ sáʼ ɨsáʼ ɨghə. Ka ma fə aghə anu zə tse a nye bə Yuda, tsɛʼ adzaŋ za bɨŋ mboŋ nɨ kɨnɨ nkɨ nji ɨ shiʼnɨ lá. 11Be a be ngə́ ma fə anu zə tse a mu nyɔngɔŋ, nkɨ ngɨ anu zə tse za a kuʼnɨnɨ ngə́ á bɨ zhwitɨ aghan, ka ma ndǒ aghan a ndɛ́ʼ nɨvwo məniŋ ə. Lá be a be ngə́ ka nkənu tse tsi ayi a nye ɨnu tsa bo kaŋnɨ aghan mbɨ́ʼ a tsɛrə muŋ ŋwɔn tsɛrə a chi keʼ aghan a mbó bo ghaə. Ma bitɨ ngə́ á bɨ tsagɨ ɨsáʼ ɨghan a mbó Ɨfɔ bə Roma ghe.”

12Fɛsɨto a tsúmnɨ́ bo bɨ ɨbɛn ba bɨ tɨ́gɨ́tɨ́nə́ ayi ntiʼ nchwɨgɨ ngə́, “O bitɨ ngə́ á Ɨfɔ bə Roma a zuʼ ɨsáʼ ɨgho, ma lan, o mɨ ghɛn wəmbo ə.”

Fɛsɨto a Gham mbɨ́ʼ a Baolo a mbó Ɨfɔ Agɨrɨba ghe

13Abaŋ a ghɨnə mbé ɨwu, Ɨfɔ Agɨrɨba bo Bɛrɨnisɨ yen a Seseria a ngántɨ́ Fɛsɨto ɨ ghɨ a yiŋ ɨ shiʼnɨ wəmbo ə. 14Bo ghɨnə ntsí ɨwu atú njwi tsɨ tse, Fɛsɨto a fɨʼtɨ anu mbɨ́ʼ a Baolo a mbó Ɨfɔ wa ɨ soŋ ngə́: “Ŋwɔn tse a tsi ɨghan wa Fɛligɨsɨ a kɨ nɨŋnɨ ayi atsáŋ ɨ nyɛʼtɨ ɨwu ə; 15mbáʼ ma kɨ ghɛnɨ a Yerosalɛm lá, bɨntumshe bə wi bɨ bə Yuda abɔʼnɨ bɨkum bɨ alaʼ ɨba kɨ kaŋ ayi, ɨ soŋ a mbó me ngə́ á ma soŋ ngə́ wɛrə a vwo ɨsáʼ ə. 16Lá ma kɨ soŋ a mbó bo ngə́ bɨgɨnə bə Roma se tsi nɨ mbɔm ɨ fom tintɨ a ŋwɔn wa bɨ kaŋnɨ ayi mbɨ́ʼ afənu zə tse ɨ gha a mbó ɨbɛn ba bɨ kaŋnɨ ayi tɨgha bo bo bomnkɨ a ngɔʼ abyɛn, á wɛrə a gham nɨgham nɨ ntsuʼ atú azhi mbɨ́ʼ ɨnu tsa bɨ kaŋnɨ ayi nɨ tsɛrə ghe. 17Bo ghɨnə ngyén ɨghan, ma kaʼ nkfu tse tsənkə. Njwi zɨ mɔʼɔ byí ndán, ma shiʼtɨ ntsi a ngɔʼ abyɛn, ɨ soŋ bɨ tɔŋ a ŋwɔn wa a kon ngyiŋə. 18Ɨbɛn ba bɨ káŋnɨ́ ayi ghɨnə ntɛ́m atɨ́ nkaŋ ayi, ma kaʼ zuʼ ɨnu tsɨ tɔmnɨnɨ tsa ma kwáʼtɨ́nɨ́ ngə́ bo mɨ kaŋ ayi mbɨ́ʼ a tsɛrə ghe. 19Atsum za bo kɨ́nə́ nkwənkə mbɨ́ʼ a zɛrə a bé mbɨ́ʼ mɨndóm ɨma ma bo zhinɨ a Ŋwi, nkɨ mbe mbɨ́ʼ a ŋwɔn tse wa ɨkum ɨyi bénɨ́ Yeso, mbáʼ a kwɛ́nə nkfo; lá Baolo a kaŋnə ngə́ ŋwɔn məwen a bvurɨ ntsi atú ntɨŋ ə. 20Atú azan a bvúrɨ́ adzaŋ za ma chinɨ tsɔʼnɨ aku ɨnu tsen ɨ zhi ɨ shiʼnɨ, ma lan, ma bítɨ́ a Baolo ngə́ a mɨ kɔŋ a ngen a Yerosalɛm á bɨ sáʼ ɨsáʼ ɨyi ɨwu le. 21Lá Baolo a sóŋ ngə́ á bɨ tsagɨ ɨsáʼ ɨyi a mbyi ɛ. Wɛrə a sóŋ ngə́ á bɨ lɛn ayi atsáŋ, ɨ kuʼ nkfu za Kaisa a mɨ tɛgɨnɨ ɨsáʼ ɨyi ɛ. Ma lan, ma tíʼ sóŋ ngə́ á bɨ ndyɛ́mə́ ayi ɨ kɔʼ kuʼ nkfu za ma ghɨ tsagɨ ayi a mbó Kaisa ghe.”

22Agɨrɨba a sóŋ a mbó Fɛsɨto ngə́, “Ma mɨ kɔŋ a ndzúʼ anu za ŋwɔn wen a mɨ soŋ me mboŋ ə.”

Fɛsɨto a chwɨ́gɨ́ ngə́, “O mɨ zuʼ wəmbo ɨzo ghe.”

Bɨ Yen nɨ Baolo a Ɨshi Agɨrɨba bo Bɛrɨnisɨ ə

23Njwi zɨ mɔʼɔ lanə, Agɨrɨba bo Bɛrɨnisɨ yen, tɨ yiŋə ngyíŋə́ tsɛʼ nɨfɔ nɨfɔ a mu ntáʼmbagə wu wi wa. Wɛrə a kón a mu tsa wa bo bɨ bɨtantso nkwiʼtɨ mbáŋnɨ́ tsə dɨtɨnɨ a mu ntáʼmbagə wu wi wa. Fɛsɨto a tíʼ sóŋ bɨ yen nɨ Baolo ghe. 24Fɛsɨto a sóŋ ngə́, “Ɨfɔ Agɨrɨba abɔʼnɨ ŋwɔn tsum wa a tsinɨ ɨghan bɨgɨnə bo: Nɨ zɛn a ŋwɔn wa bə Yuda bɨtsum ɨghan nkwiʼtɨ a bə Yerosalɛm ŋwaʼnɨnɨ mbɨ́ʼ ɨnu tsa a fanɨ a nye bo a mbó me lá. Bo tɔ́nkə́ ngə́ á keʼ bə mbvurɨ ntsi atú ntɨŋ ə. 25Lá ma kɨ sa zɛn ngə́ wɛrə a ghɨ anu zə tsɛrə za be bɨ zhwitɨ ayi ɛ. Lá, mbáʼ wɛrə a kɨ bitɨnɨ ngə́ á bɨ lɔgɨ ɨsáʼ ɨyi ngɛn nɨ wɛrə a ɨshi Kaisa lá, ma tsɔʼnə a mu ntəm me a ntsagɨ zɨ ɨwu ə. 26Lá ka ma tsi aghan nɨ ngótɨ́ anu za ma mɨ ŋwaʼnɨ mbɨ́ʼ ayi a mbó Kaisa ghe. Ma lan, ma yen nɨ zɨ a ɨshi bən — tɨ́sə́n tɨ́sə́n, a ɨshi gho Ɨfɔ Agɨrɨba! — taŋ ma mɛtɨ a ntsɔ́ʼnɨ́ aku anu məzen, ma chi tiʼ tsi nɨ anu zə tse a ŋwaʼnə ghe. 27Mbɨ́ʼ ngə́ a mbó me ka a wɛm ayi nkyi a ntsagɨ ŋwɔn a mbó Kaisa tɨ ŋwaʼnɨ ɨ shiʼnɨ anu za bɨ kaŋnɨ ayi mbɨ́ʼ a zɛrə ghe.”

Currently Selected:

Ɨfaʼ 25: MNT

Highlight

Copy

Compare