Ɨfaʼ 17

Ndum a Tesalonaika ghe

1Baolo bo Sailasɨ kə́ ngěn tsɛʼ ghɛnɨ ngɛn ntsa a mu Amfibolisɨ abɔʼnɨ Abolonia, ngɛn nkuʼ a Tesalonaika, adiʼ wa ndáŋwi bə Yuda tsínɨ́ ɨwu ə. 2Ndzɔ́ŋə́ a nye mbɔm ɨzhi, Baolo a ghɛ́n a ndáŋwi bə Yuda za. Atú Njwi Alaʼ Ŋwi tsi tárə́ wɛrə a kə́ ntǎŋ anu a Ŋwi bo bɨ ɨbɛn, ɨ fɨgɨ ɨnu a mu Aŋwaʼnɨ a Ŋwi 3ɨ fɨ́ʼtə́ nkə́ ndǐʼ nkənu a mu nɛrə ngə́ Wa bɨ Zɔ́ʼnɨ́ wa a tsí nɨ ndze ngɨ́ʼ, ɨ bə zhwemnɨ a mbó nɨvwo ə. Baolo a sóŋ ngə́, “Yeso wen wa ma ghamnə mbɨ́ʼ ayi a mbó bən lá, a lá Wa bɨ Zɔ́ʼnɨ́ wa.” 4Ɨbɛn ba bə tse zé nkənu a nye nɨgham nɨ Baolo, ntiʼ nkon a ngɔ́n bo bɨ Baolo bo Sailasɨ; ɨdɨtɨ bəngye bə ghaʼnɨ a ntáʼmbagə wa abɔʼnɨ bə Grikɨ ba bɨ kɨ́nə́ ngúʼsə́ a Ŋwi bə ghaʼnɨ kɨ́ nkón a ngɔ́n wəbɔʼ ə.

5Lá bə Yuda bə tse ghɨ́ʼnɨ́ anu məzen ntiʼ ngǒtɨ ngaŋ ngá ngɨ́ʼ, bo bo tiʼ ngǒtɨ a mandzɔŋ mbvugɨ ndum ə. Bo bo bvúgɨ́ ndum a mu ntáʼmbagə wu wi wa ɨtsum, ɨ shwɛ́tɨ́ ndá ŋwɔn tse wa bɨ kɨ́nə́ ntɔ́ŋə́ ngə́ Jesɨn a ndzé ngə́ bo chi tsɨrɨ a Baolo bo Sailasɨ ɨwu, ɨ chwa awa ɨ ghɛn nɨ bo a mbó ɨbɛn bɨ ntáʼmbagə wu wi wa. 6Lá mbáʼ bo sé tsɨ́rɨ́ awa ɨwu lá, bo chwá a Jesɨn bo bɨ ɨbɛn bə mɔʼɔ ba bɨ nɨ́ŋnɨ́ mɨntəm ɨma a nye Kristo ngɛn nɨ bo a ɨshi bɨsáʼ bɨ ɨlaʼ bɨ ntáʼmbagə wu wi wa ntiʼ ntɔnkɨ ngə́, “Ɨbɛn biŋ bvugɨ ndum ɨdiʼ ɨtsum ə! Tɨtsɔŋnɨ bo yenə nkuʼ a mu ntáʼmbagə wu wi ɨwɨgɨnə, 7Jesɨn a lɛn awa a mu ndá zɨə. Bo fə̌ a nyɔngɔŋ Kaisa, ɨ sóŋə́ ngə́ ɨfɔ wu mɔʼɔ a tsi ɨwu ɨkum ɨyi be Yeso ghe.” 8Mbáʼ bɨsáʼ bɨ ɨlaʼ bɨ ntáʼmbagə wu wi wa abɔʼnɨ ɨbɛn ba zúʼnɨ́ ɨnu tsen lá, tsɨ ghágɨ́ mɨntəm ɨma tsɛʼ nkə. 9Bɨsáʼ bɨ ɨlaʼ ba sóŋ ngə́ á Jesɨn abɔʼnɨ bə mɔʼɔ ɨbɛn tfu ndvuŋ nkáb tse bɔŋ a bɨ nyɛʼtɨ awa ghe. Bo tfú ndvuŋ nkáb məwen, bɨ tiʼ soŋ ngə́ á bo ghɛn awa ghe.

Baolo bo Sailasɨ Ghɛn a Bəria ghe

10Tsɛʼ mbáʼ ɨtfúʼ ɨ fɨ́ŋnɨ́, ɨbɛn ba bɨ nɨ́ŋnɨ́ mɨntəm ɨma a nye Kristo tságɨ́ a Baolo bo Sailasɨ a Bəria ghe. Mbáʼ bo ghɛ́nɨ́ fú ɨwu lá, bo ghɛ́n a mu ndáŋwi bə Yuda ghe. 11Bə Yuda ba bɨ tsínɨ́ ɨwu kə́ nyɔ̌ŋ ɨnye ɨtsa a ɨshe a njwíʼtɨ́ anu, ntsa a ba bɨ tsínɨ́ a Tesalonaika ghe. Bo zhwíʼtɨ́ nkən wa nɨ mɨntəm ɨma mɨtsum ə. Njwi tsum bo kə́ ngyɛ̌ʼ aŋwaʼnɨ a Ŋwi a ndzé ngə́ ɨnu tsa Baolo kɨ́nə́ sóŋnə́ lánɨ́ mbe nkənu ə. 12Bo bə ghaʼnɨ nɨ́ŋ mɨntəm ɨma a nye Kristo; bəngye bə Grikɨ bə dɨtɨnɨ bə ghaʼnɨ a mu ntáʼmbagə wa abɔʼnɨ mbáŋnɨ́ bə Grikɨ bə ghaʼnɨ kɨ́ nɨ́ŋ mɨntəm ɨma a nye Kristo ghe. 13Lá mbáʼ bə Yuda bə Tesalonaika zúʼnɨ́ ngə́ Baolo a kɨ́ sóŋ anu a Ŋwi a Bəria lá, bo zɔ́ŋ ɨwu mbiʼnɨ ntótə́ nkə́ mbíʼə mɨntəm mɨ ɨnɔ ɨbɛn ə. 14Ɨbɛn ba bɨ nɨ́ŋnɨ́ mɨntəm ɨma a nye Kristo byí ntsagɨ a Baolo a ngə́rɨ́ sagɨrə wu ngwi; lá Sailasɨ bo Timotyo ghɔ́ŋ a Bəria ghe. 15Mbáŋnɨ́ tsa tsɨ kɨ́nə́ nkɨnkə a Baolo ghɛ́n nəghagɨ nəghagɨ bo bo ngɛn nkuʼ Atɛnsɨ ntiʼ mbə́n awa a Bəria ghe. Bo tɨnə tɨ bɨŋ ə, Baolo a soŋ a mbó bo ngə́ á bo soŋ a mbó Sailasɨ bo Timotyo ngə́ á bo tɛm tsɛʼ lan ngyen nkwatɨ ayi ɛ.

Baolo a Tsi Alaʼ Atɛnsɨ ə

16Mbáʼ Baolo a tsínɨ́ Atɛnsɨ ntsiŋə a Sailasɨ bo Timotyo lá, ntɔŋ ɨyi lwí tsɛʼ nkan adzaŋ za wɛrə a zɛ́nɨ́ ngə́ ntáʼmbagə wu wi wa lón nɨ ɨbɔ bɨ abe. 17Ma lan, wɛrə a táŋ ɨnu a mu ndáŋwi bə Yuda bo bɨ bə Yuda nkwiʼtɨ a ba a se bə Yuda be ba bɨ kɨ́nə́ ngúʼsə́ a Ŋwi ə. Wɛrə a kɨ́ ngɨ ma lan a mɨtan njwi tsum bo bɨ ɨbɛn ba bɨ tsínɨ́ ɨwu a nyom məwa. 18Bɨdiʼ bɨ aŋwaʼnɨ ba bɨ kɨ́nə́ ntɔ́ŋə́ awa ngə bə Ebikurianɨ abɔʼnɨ Stɔikɨ kɨ́ ndɨʼkɨ bo bo ghe. Bo bə tse bítɨ́ ngə́, “Ajwɔngam wen a lɔ́btə́ lá ɨ soŋ anu ake le?”

Bə mɔʼɔ chwɨ́gɨ́ ngə́, “A be tso a ghamə mbɨ́ʼ bɨŋwi bɨ atom ə.” Bo sóŋ ma lan lá mbɨ́ʼ ngə́ a kə́ ngamə mbɨ́ʼ a Yeso abɔʼnɨ nzhwemnə a mbó nɨvwo ə. 19Ma lan, bo lɔ́gɨ́ a Baolo ngɛn nɨ zɨ adiʼ wa bɨ kɨ́nə́ sǎʼ mɨsáʼ ɨwu, za bɨ kɨ́nə́ ntɔ́ŋə́ ngə́ Ariobagusɨ, ntiʼ soŋ wəmbo ngə́, “Bɨgɨ mɨ kɔŋ a ndzúʼ anu zə fi zen za o ghamnə mbɨ́ʼ a zɛrə lá. 20Ɨnu tsɨ mɔʼɔ tsa bɨgɨ zuʼnɨ o soŋənə, tsɨ nɨ ɨnu tsa bɨgɨ láʼnə mbvurɨ tɨ zuʼ, bɨgɨ mɨ kɔŋ nji anu za tsɨ diʼnə.” 21Bə Atɛnsɨ abɔʼnɨ bɨngyen-yenɨ ba bɨ kɨ́nə́ nchyɛ̌ ɨwu kɔ́ŋ ɨ zhwɨgɨ ɨ chyɛnə tsɛʼ a mɨə, ɨ kɨ zhwiʼtɨ nkfu ɨtsum anu zə fi za a byínɨ́ fú tsɛʼ funə.

22Baolo a tɛ́m a ɨshi Ariobagusɨ wa ɨ soŋ ngə́, “Ma zɛn ngə́ a nye mɨndóm mɨtsum bɨŋ ɨbɛn bɨ Atɛnsɨ, nɨ ghúʼsə́ bɨŋwi ɨbən nɨ mɨntəm ɨmən mɨtsum ə. 23Mbɨ́ʼ ngə́ adzaŋ za ma kɨ chinə ntsǎ a mu ntáʼmbagə wu wi ɨwən, ma kɨ liŋ ɨdiʼ tsa nɨ ghúʼsɨ́nɨ́ bɨŋwi ɨbən, ma kɨ zɛn bɨ ŋwaʼnɨ atú atú a mɨkuʼ zə mɔʼɔ ngə́, ‹A mbó ŋwi wa ka bɨ zhi ayi ayi ɛ›. Wa nɨ ghúʼsɨ́nə́ tɨ zhi lá, a nɨ wɛrə wa ma tiʼnə nchwítə́ anu azhi a mbó bən tɨtsɔŋnɨ ə. 24Ŋwi, zɨ wa a káʼnɨ́ atuəshe abɔʼnɨ ɨdzúm ɨtsum tsa tsɨ tsinɨ wə mu, a nɨ zɨ wa a nɨ Maʼmbyí fɔməbvurə abɔʼnɨ atuəshe, ka a nchyɛ̌ ayi lá a mu mɨshwim ma bɨ nyɛtɨnɨ nɨ mbó ə. 25Ka wɛrə a kə́ ndǒ ayi azúm zə tse za be bɨgɨnə gha wəmbo a ntsǎ a ndzum ɨ faʼə wəmbo, mbáʼ a ghánə́ wɛrə zɨmboŋ ngǎ azhwi a ntsi ntən nɨ ɨdzúm tsə mɔʼɔ ɨtsum a mbó ŋwɔn tsum lá. 26Wɛrə a tsá mbyi nkaʼ a táʼ ŋwɔn ə. A ntsǎ a ndzum táʼ ŋwɔn məwen, wɛrə a tíʼ nkáʼ ngwəgɨ ŋwɔn mɨsɔŋ tsum atuəshe, nkɨ ngɨ bo chyɛnə a mu atuəshe atsum ə. Bɔŋ á wɛrə a nkáʼə awa, wɛrə zɨmboŋ a kwɛ́nə ntsɔ́ʼ a mu ntəm zɨ ndvuŋ nkfu abɔʼnɨ bɨtəndenə bɨ ɨdiʼ tsa bo mɨ chyɛnə ɨwu ə. 27Wɛrə a ghɨ́ ma lan lá, taŋ á bo ntsɔ́ʼnə́ aku azhi, aghagɨ a tsɛrə ɨ zɛn ayi adzaŋ za bo númnə́ shwítə́ ayi ɛ. Lá, ka aghagɨ a Ŋwi a sagɨ ayi a nye ŋwɔn nɨ bɨgɨnə wu tse; 28adzaŋ za ŋwɔn tse a soŋnɨ ngə́,

‹A ntsǎ a ndzum mɨtən ɨmyi, bɨgɨnə chyɛ̌ nkə́ númə́

nkárə́ nkɨ ntsi nɨ ntsi ntɨŋ ə.›

A tsi lá tsɛʼ tso mbáʼ ngaŋ ŋwaʼnɨ ɨŋwaʼnɨ ɨtsən tsə mɔʼɔ soŋnə ngə́,

‹Bɨgɨnə kɨ mbe lá ɨbɔ ɨbyi ɛ.›

29Mbáʼ bɨgɨnə nɨ ɨbɔ bɨ Ŋwi lá, á bɨgɨnə keʼ kwaʼtɨ ngə́ mbě ɨzhi tsi tso azúm zə tsɛrə tso ŋwaʼŋwaʼ kə tsə́ŋtsə́ŋ kə ngɔʼ, za ŋwɔn mɨsɔŋ a ntsu a kwaʼtɨnɨ ɨ nyɛtɨ nɨ mbó ɨmyi ɛ. 30Ŋwi a sé nɨ́ŋ ngɨ́ʼ a nye ɨbɛn a nkfu za bo sé ayi zhi, lá tɨtsɔŋnɨ wɛrə a sóŋə́ a mbó bo ɨdiʼ ɨtsum ngə́ á bo bəŋ mɨntəm ɨma a nye ɨnu tsə tɔmnɨnɨ tsa bo ghɨnə ghe. 31Mbɨ́ʼ ngə́ wɛrə a len njwi za wɛrə a ghɨnɨ sáʼ mbyi tsum tɨ nkyerɨ ɨ tsa a ndzum ŋwɔn tse wa wɛrə a tsɔʼnə ghe. Wɛrə a diʼnə a mbó ŋwɔn tsum ngə́ a ghɨ bé adzaŋ məwen lá a ntsǎ a ndzum nzhwemnɨ ŋwɔn məwa a mbó nɨvwo ə!”

32Mbáʼ bo zúʼnɨ́ Baolo a gham mbɨ́ʼ nzhwemnə a mbó nɨvwo lá, bo bə tse wérɨ́ ayi, lá bə mɔʼɔ sóŋ ngə́, “Bɨgɨ lǒ ndzuʼə o kwiʼ nkwatɨ a məziŋ ə.” 33Adiʼ məwen, Baolo a nyɛ́ʼtɨ́ awa ghe. 34Mbáŋnɨ́ tsɨ tse ló ndzɔŋ ayi ntiʼ ntsi a bagɨ zɨ nkɨ nɨŋ mɨntəm ɨma a nye Kristo ghe. A tɨtərɨ məbiŋ ɨbɛn Dionishɔsɨ, táʼ ŋwɔn Ariobagusɨ a tsí ɨwu abɔʼnɨ mangye tse wa ɨkum ɨyi bénɨ́ Damarisɨ abɔʼnɨ ɨbɛn bə mɔʼɔ ghe.

Currently Selected:

Ɨfaʼ 17: MNT

Highlight

Copy

Compare