Madiu 15

Yeisu ina vatulúkwana Diyuu tubudiyao idi gulagula manuna

(Maki 7:1-23)

1E tuta amo Parisi be nakae Yaubada ina Katukeda ana tovatulukwanayao Yerusalema goi sima Yeisu silumadade sidigo kadi,

2‘Kaga unana im tovatotowanayao tubudao idi gulagula sikapipilavedi? Tutayana bego sikáika go, nimadi geya siinikidi. Kaga unana nakae siguuinuwe?’

3Go kina Yeisu idigo kana,

‘Go komi nakae. Kaga unana Yaubada ina lovina kokapipilave toinimi imi gulagula ana sabokuli pasina? 4Apipilovayana manuna boi Yaubada Mosese ilatuwoko idigo kana,

“Tamamiyao be sinamiyao kowowooinēdi.”#Madiu 19:19; Maki 10:19; Luke 18:20; Epeso 6:2.

Tateta 20:12; Atukeda 5:16

Aiyuwoina kana,

“Avatau neta tamana o sinana igieomaemae, e to kokaumateyāmo.”

Tateta 21:17; Vininabeso 20:9; Atukeda 5:16

5Go komi kotagona tomota tamana o sinana ilatuwoko kana,

“Yabobona ame bego avinim go, geya itoboineguta avaitem unana bogina akasale Yaubada yaina.”

6Tuwo tamana o sinana geya itoboineyeta iwowoine. Tauna yabobonayana geya ivinidita unana yabobonayana bogina kaasalaina. Moeko goi toinimi imi gulagula dogoi gagaina go, Yaubada ina livala dogoi besobeso. 7Komi todedevimi polapola! Boi nimatu tutayana Aiseya Yaubada ina livala itaalavaite, e italavaitedokoimi, idigo kana,

8“Ame tomotayadi sopadi goi siwowooinegu go,

yau atedi goi geya.

9Idi vatulúkwana moe tomota idi nuwonúwana,

tauna idi sakululu yau yaigu, moe sakululu besobeso.”’

Aiseya 29:13

10Yeisu ibóbwara ikavava, boda iduduwedi sima ilatuwokoidi idigo kana,

‘Konovēgu go, kopoikīki guna livala koyagoi! 11Kaga tobuda goi isiu, geya ikibaibailideta, go sem kaga tobuda goi isowóduwo, e moe ikibaibailida.’

12E tuwo kai Yeisu ina tovatotowanayao kama Tauyana yaina kama,

‘Tomoya, kidi Parisi im livala sinove, gamodi igoyo.’

13Go kina Yeisuyana idigo kana,

‘Náuna liliudi neta Tamagu guma yábana geya ibagulidita bei ilabudi. 14Amo tauyadi kokalavēdi. Tauyadi tovakeda tokebo nakae. Neta tokebo ipoikíkina bego kebosiyana ivakede, e adi taiyuwokova bobosiu goi isouyedi.’#Luke 6:39.

15E Pita idigo kana,

‘Livalakaibalayana kulumavivīsi bei kayagoi.’

16E Yeisu kana,

‘Komi nakae nava nukotomi geya itaporeta? 17Manakae? Moe geya koyagoiyeta ae? Kaga liliuna tobuda goi sisiu, sisou sina gamoda goi namliyeta sisowóduwo sina mosamosa. 18Go kaga tobuda goi siisowóduwo moe nuwoda goi sima, e moe dogoiyadi sikibaibaailida.#Madiu 12:34. 19Tomota nuwodi goi nuwogau goyogoyoidi, aumata, roerata, masisi goyogoyoina, vaináwana, totalavaita polapola be nakae tagíwaya sisowóduwo. 20Ame dogoiyadi sikibaibailidi. Go neta takáika go, nimada geya tanikidita, e moe geya ikibaibailideta.’

Vavina Totuyoyowo ina numisa tetelina

(Maki 7:24-30)

21Yeisu itáoya kai taiyao dadavayana kakalave go, kana Taya be Saidoni adi dadava goi. 22Ago amo dadavayana goi Totuyoyowo tayamo Kenani vavinaina ima Yeisu yaina iduduwo idigo kana,

‘Tomoya Devida tubuna, natugu vavina ikinagova gagaina! Kunuwokapisiyēgu!’

23Go Yeisu geya ikatumapuyeta. Tuwo kai ina tovatotowanayao kama kakawanoi kadigo kama,

‘Tomoya, vavinayana mlida goi iiduduwo, tauna kuvalilīve ina.’

24E Yeisu itugavila vavinayana ilatuwoko idigo kana,

‘Tamagu ietunegu ama komi Isileli tubunao amitava yaimi goi; komi tauyami sipi sulaaigidi nakae.’

25E vavinayana ibala ima Yeisu matana goi aena ivatugúyala idigo kana,

‘Tomoya, kuvaitēgu.’

26Go kina Yeisuyana idigo kana,

‘Geya itoboineguta gogómana avadi bei akuliuye go, alave komi weiniya yaimi.’

27‘U, moe moitamo, Tomoya go, weiniyayadi adi towosiyao idi teboro ogalaoina goi gogomanayadi avadi mgumguna sikasámdala’, vavinayana kaena.

28Tuwo Yeisu idigo kana,

‘Vavina, im numisa gagaina, tauna nakae latuwom bogina isowóduwo.’

Tuwo moitamo natunayana mainao idedevina.

29E Yeisu kai ina tovatotowanayao taiyao katáoya dadavayana kakalave go, kaiwo kana Galili Bwaena labutabutaina goi kavayali. Niga Yeisu ituko ina koya goi itusobu. 30Iitusobu go, boda sima Tauyana yaina. Bodayadi moe topem, togoyogoyo, tokebo, maedi moumoudi be nakae tokatówana simedi Tauyana matana goi siyatoidi, e ikidedevinedi. 31Tauna tutayana bodayadi sigite kidi maedi moumoudi sibóbwara, togoyogoyo sidedevina, topem siketoiya be nakae tokebo sigita, e sikainaopa go, kai Isileli tubunao ima Yaubada ina togaga ana káeyana sikamoitamoe.

Yeisu boda 4,000 ivaakanidi tetelina

(Maki 8:1-10)

32E kina go Yeisu kai ina tovatotowanayao iduduwema kama ilatuwokoima idigo kana,

‘Ame bodayadi bogina maliyalina aito sikaaiyaka go, geya avadimo. Geya latuwogu madi loga alatuwokoidi sisáwala, govila bei enao goi simataginigini. Tauna anuwokapisiyedi.’

33Ago kai ina tovatotowanayao kadigo kama,

‘Ame yoyowo go! Nako goi beredi takabidi nakae bei itoboineda boda gagaina ame tavakanidi sikáika gamodi?’

34Go kina Yeisu idigo kana,

‘Aivina imi beredi moedi?’

‘Geya, ainima aiyuwo go, nakae íyana giyaidi maniyedi amedi sikaaiyaka’, kai kaema.

35Tuwo bodayadi ilatuwokoidi poyapoya goi situsobu. 36Situsobu ikavava, berediyadi ainima aiyuwo be nakae iyanayadi ikabidi, manudi ikauyagu Yaubada yaina. Ikavava, ikivisidi, ivinima. E kai kakabidi kanavedi kakaiguyauyedi bodayadi yaidi. 37Tuwo boda sikabidi, sikáika gamodi. Sikáika ikavava, valala kakatunokunokudi, bayao gagaidi ainima aiyuwo sikayaoda.

38E kidi go tokaikayadi yaidi goi vevina be gogómana geya kakatuyaividita, go sem koroto kaka kakatuyaividi, adi badabada moe 4,000. 39Boda sikáika ikavava, Yeisu itáoya, ilatuwokoidi sisáwala go, oga kasowoya, kakailova kana Magadani ana dadava.

Currently Selected:

Madiu 15: GVS

Highlight

Copy