Tateta 34

Yauwe Isileli tubunao ikanasiukoomneidi tetelina

1E Yauwe ilatuwokoigu idigo kana,

‘Gurewa aiyuwo kwabīdi, kumadagīdi paaevaidi nakae boi avinim go, kukauvisivisidi, e bei yatadi goi guna livalayadi aginidi. 2Go kwatubayāsi bei itomo nobuyana Sainai Koyaina goi kutūko kūma bei koyayana yatana goi kuvalobodegu. 3Go geya vatau tayaamo taiyao kotūko komamāima. Nakae geya vatau tayaamo kutagōne koyayana goi ikaaiyaka. Yoguyogu nakae. Taabu koyayana unana goi sikaaiyāka sikakāika.’

4Tuwo moitamo, ana gurewa aiyuwo akabidi amadagidi paaevaidi boi gurewayadi nakae. Ikavava, vanuwo itomo nobuyana giyaina atáoya, e gurewayadi aiyuwo nimagu goi akavaledi Koya Sainai goi atuko nakae Yauwe bogina ilatuwokoigu. 5E Yauwe gaota sinaena goi isou ima kikigu itáoya go, toinina yoina italavaite kana,

‘Yau Yauwe.’

6E Yauwe ivatabale matagu goi italavaita idigo kana,

‘Yauwe, Yau Yauwe.

Yau Yaubada nuwokaapisigu be kanuuwoiigu.

Ameesayágana.

Guna lokata ivakaigaga

be nakae Yau aba numisa toigu.#Yoyowo 14:18; Atukeda 5:9-10, 7:9-10; Niemaiya 9:17; Same 86:15, 103:8, 145:8; Iyoeli 2:13; Iyona 4:2.

7Guna lokatayana tomota yaidi ikaiyako vata.

Tomota idi tapepeko, idi kadoinana

be nakae idi bágala anuwootaoidi.

Go tomota madi tapepeko anuwokavatedi,

e bei natudiyao, tubudiyao

be natudiyao adi liuna avinidi.’

8E woiligu aegu avatugúyala, asakululu Yauwe yaina go, 9adigo kagu,

‘Guna Tomoya, moitamo im kanuwóiya bogina ababane, tauna akawanoi yaim, kuvakitāuma. Moitamo. Kidi taiyadi tuntunidi go, idi bágala be idi tapepeko kunuwotaōidi be kukabīma kai im kaba lovina.’

10E Yauwe idigo kana,

‘Kunōve. Kom mam bodao bei akanasiukoimi. Im bodao Isileli tubunao liliudi matadi goi bei guna kaba kainaopa aguinuwedi. Aba kainaopayadi geya vatau tayaamo ame poyapoya ana madabokina goi iguinuwedi. Boda liliudi yaim goi sikaaiyaka bei sigite guna guinuwa, e sopadi akaupatudi. Dogoiyana Yau aguuinuwe yaimi moe dogoi gagaina.

11Kom be Isileli tubunao liliudi, kaga liliuna ame Yau alatuuwokoimi kokabiikaōne. Kunōve. Kidi Emori tubunao, Kenani tubunao, Eta tubunao, Perisi tubunao, Ivai tubunao be nakae Iyebusi tubunao yaimi goi bei avatapiyedi sisiya. 12Ami dodōkana. Taabu amo toni kasayadi kokanasiiukōidi, govila bei kidi ami síkwana nakae. 13Idi kaba kasala koligēidi be idi dídiya kimaasabaidi kokauvisivisīdi be nakae Asera#34:13 Asera: Ame da Kenani idi basaleliu vavina tayamo yoina. Kówala sikaitáoe go, kowalayana Asera ana katumapu nakae. (Tateta 23:24). ana kówala aba sakululu kotalāidi.#Atukeda 12:3, 16:21. 14U, taabu kovaatugūyala kokanakabobo basaleliu yaina. Moe moitamo. Yau Yauwe yoigu Tovakókala; Yau Tokavavágana vakookoligu. 15Ami dodōkana. Taabu toni kasa kokanasiiukōidi. Kidi tomatagogoli nakae idi basaleliuyao yaidi sisaakululu be yoguyogu sikaumatedi sigabudi go, sikasaledi basaleliuyaoyadi yaidi. Go neta siduduwemi, taabu kononōina. Neta kona, bei kidi taiyao idi yoguyoguyaoyadi kaasalaidi kokáika. 16Aiyuwoina natudiyao vevina bei kokabidi natumiyao monediyao, e vevinayadi pasidi komi natumiyao koroto tomatagogoli nakae bei sisakululu idi basaleliuyaoyadi yaidi.

17Yaubadayadi kainum taabu komaadagīdi bego yaidi kosaakululu.#Tateta 20:4; Vininabeso 19:4; Atukeda 5:8, 27:15.

18 Beredi Pokaka Aikanina bei kowodūgu. Aikaninayana ame nakae: Maliyalina ainima aiyuwo goi beredi pokaka kokakāika tukówana Abib#34:18 Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana (Aba Vatowo 12:18). nakae bogina alatuwokoimi. Moe tukowanayana sinaena Itipita goi kosowóduwo.#Tateta 12:14-20; Vininabeso 23:6-8; Yoyowo 28:16-25.

19Botomoya liliudi, tomota imi botomoyayao be nakae yoguyogu idi botomoyayao, neta bulumakau o sipi o goti, idi botomoyayao liliudi guna kaba lovina.#Tateta 13:2. 20Imi aseyao adi botomoyayao bolamo lami goi kotatetēdi. Lamiyadi kokaumatēdi kokasalēdi yaigu. Go neta geya kotatetedita, e nukotodi kokiguyalīdi.#Tateta 13:13. Imi botomoyayao koroto liliudi lami goi kotatetēdi. Taabu nima kaka komamāima matagu goi, go sem mami vininabeso kōma yaigu.

21Maliyalina ainima tayamo goi kopaisēwa go, maliyalina ainima aiyuwoina goi kowaiwāsi. Bágula ana tuta be dibayoya ana tuta nakae, maliyalina ainima aiyuwoina goi kowaiwāsi.#Tateta 20:9-10, 23:12, 31:15, 35:2; Vininabeso 23:3; Atukeda 5:13-14; Luke 13:14.

22Wiki Aikanina#34:22 Wiki Aikanina: Niga Yeisu ina tuta goi ame aikayana yoina Pentikosi.#Vininabeso 23:15-21; Yoyowo 28:26-31; Guinuwa 2:1. koowodūgu. Ame youyuwoina Keuwokumgo Aikanina. Ame Aikaninayana goi dibayoya keuwokumgoina bei kokasāle yaigu. Aiyuwoina Lolágata Aikanina#Vininabeso 23:39-43. koowodūgu tala ana kaba lukavava goi tutayana távina ikavava.

23Sivato tala tayamo goi komi koroto kōma kosowōduwo Yau Yauwe imi Tomoya, komi Isileli tubunao imi Yaubada, matagu goi. 24Bei avakumgoiyemi go, boda liliudi avatapiyedi bei sisiya. Nakae imi túwana bei avatudedededi. E kidi geya sipoikikineta bei imi poyapoya sikabimnei tutayana sivato tala tayamo goi koma kosowóduwo Yau Yauwe imi Yaubada matagu goi.

25Neta yoguyogu bego kokasale yaigu, e yoguyoguyana ikaikaina taabu beredi mana isti taiyao kokaasalēdi yaigu. Nakae yoguyogu Basitáwana Aikanina manuna taabu talainao maniyedi sikesakēsa vanuwo itomo goi.#Tateta 12:10.

26Keuwokumgo dedevina toina imi poyapoya goi bei komēdi Yau Yauwe imi Yaubada yaigu.#Atukeda 26:2.

Neta goti bonatuna iwoina kovaipoluye, taabu sinana nununa bwaena goi kovaaipōlu.’#Tateta 23:19; Atukeda 14:21.

27E tuwaina Yauwe idigo kana,

‘Ame livalayadi kuginīdi. Livalayadi goi bogina akanasiukoimi, kom be nakae Isileli tubunao liliumi.’

28E tuwo maliyalina 40 be nakae sabamgo 40 goi akaaiyaka Yauwe taiyao go, áika be nakae bwae nim geya. Ago gurewayadi aiyuwo goi Yauwe ina kanasíuna ana livala aginidi moe ina lovina yawou.

Mosese maisina itoomoéyala tetelina

29E aginidi ikavava Koya Sainai goi gurewayadi aiyuwo asouyedi, gurewayadi goi Yaubada ina kaba vatulúkwana ikaaiyaka. Go tutayana asouyedi, sakavaigu maisigu goi itoomoéyala#Madiu 17:2; 2 Korinta 3:7-16. unana Yauwe taiyao kabobóbwara. Go geya ayagoiyeta bego itomoéyala. 30E Eroni be nakae Isileli tubunao liliudi sigitegu, maisigu itomoéyala go, simatoita bego simekoigu. 31Tuwo aduduwedi, e Eroni be nakae Isileli tubunao adi tomoyamoya liliudi sima alatuwokoidi. 32Alatuwokoidi ikavava, Isileli tubunao liliudi sima go, lovinayadi liliudi boi Yauwe Koya Sainai goi iivinigu, e tomotayadi alatuwokoidi. 33Tutayana alatuwokoidi ikavava, areko tayamo akabi, maisigu atabode. 34Go tuta tamo tamo asiu ana Yauwe matana goi avadigo, e arekoyana avayoini. Nakae ikaaiyaka ana kadókana asowóduwo. Tutayana asowóduwo, ana Isileli tubunao alatuwokoidi kaga nakae Yauwe bogina ilatuwokoigu. 35Go tutayana sigite bego sakavaigu maisigu goi itomoéyala, e arekoyana akabi, maisiguyana atabodemnei ana kadókana akaluvila ana Yauwe avadigo.

Currently Selected:

Tateta 34: GVS

Highlight

Copy

Compare