Tateta 27
27
Vatulúkwana aba kasala kopwa ana madágina manuna
(Tateta 38:1-7)
1E Yauwe tuwaina kana,
‘Tomota kulatuwokōidi latuwogu gaigíyala taalaidi sikabidi, aba kasala simadagi. Ana mamanao be nakae ana papaeva moe ovatayamo panetayataya go, ana tukotuko moe ovatayamo. 2Simadagi ikavava, e ana sakusaku aivasi simadagidi matakubuna aivasi goi siyatoidi go, sakusakuyadi be aba kasala alova tayamo goi simadagidi. Siyatoidi ikavava, kopwa paaevaidi sikabidi, aba kasalayana goi sikaupatukoidi. 3Ikavava, e kopwa tuwaina sikabidi, aba kasala konanina simadagidi. Konaninayadi ame nakae: Silekau ana kaba vadoda, ana sabwero, ana borodisi, ana sisiwo be nakae pokova ana kaba vadoda simadagidi. 4Ikavava, e kopwa tuwaina sikabi, ana vátala simadagi yeu ana kaba dímila manuna. Go vatalayana matakubuna aivasi goi rini kopwa sikaupatukoidi go, sisowóduwo aba kasalayana toluyena goi. 5Ikavava, e aba kasala sinaena nauyayanaina goi sidodoi. 6Ikavava, aba kasala ana kaitakeo gaigíyala aiyuwo sibobóidi. Niga kopwa paaevaidi goi bei sipaimidi. 7Ikavava, aitakeoyadi sivaisiudi riniyadi aba kasala toluyena goi, dadavina tayamo, dadavina tayamo, e bei itoboinedi aba kasalayana sikaaitakeve. 8Aba kasalayana timba paaevaidi goi bei simadagi. Go sinaena daakakaina be nakae dibuna geya ana kaubodamo. Latuwogu simadagi nakae makayauna boi koyayana goi bogina avatulukoim.’
Vatulúkwana Aba Kaiyaka yoyou ana kali ana madágina manuna
(Tateta 38:9-20)
9E Yauwe tuwaina kana,
‘Tomota kulatuwokōidi latuwogu guna Kaba Kaiyakayana sikali. E areko dedevidi sikabidi, guna Kaba Kaiyakayana ana kali simadagi. Aliyana youya dadavina ana mamanao moe ova 30. 10Kówala ana badabada 20 adi kaba táoya kopwa goi sivataoedi. Kowalayadi adi takudukudu goi rini#27:10 Rini: Ame nakona siriba paaevaina sikabi, sikinuboili, e rini nakae siwodugu. Kówala sipona goi riniyana sivalilivi go, kówala ana takudukudu sobuyekoina (Tateta 38:17). be aba talagegeta siriba siyatoidi. 11Yawéyana dadavina goi nakae. Ana mamanao moe ova 30 go, kówala ana badabada 20 madi kaba táoya kopwa goi. Kowalayadi adi takudukudu goi rini be aba talagegeta siriba siyatoidi. 12E aliyana koiboga dadavina ana mamanao moe ovayawou ovanima go, kówala ana badabada yawou adi kaba táoya kopwa goi sivataoedi. Go sipodi goi rini be aba talagegeta siriba siyatoidi. 13E aliyana ana kaba siu goi moe bomatu dadavina, ana mamanao nakae ovayawou ovanima. 14-15Aba siu dadavina ana mamanao ovavasi panetayataya, dadavina ovavasi panetayataya. Go ana kówala dadavina aito, dadavina aito adi kaba táoya goi sivataoedi. E kowalayadi goi arekoyadi sivakosainedi. 16E búyala noyanoyaidi buruu, kalaakovidi toidi be kayakayaidi be nakae areko dedevidi sikabidi, gíluma ana tokatanaki sivini, ali ana kaba siu ana taboda kaarekoina igilumi. Go tabodayana ana mamanao moe ovanima ovayuwo. E kówala aivasi adi kaba táoya goi sivataoedi go, kowalayadi goi tabodayana sivakosaine. 17Kówala liliudi ali goi madi rini siriba be nakae madi kaba talagegeta siriba. Go kowalayadi adi kaba táoya moe kopwa. 18Ali ana mamanao moe ova 30 go, ana papaeva moe ovayawou ovanima. Go aliyana ana tukotuko moe ovatayamo panetayataya. Aliyana moe areko dedevidi go, kówala adi kaba táoya moe kopwa. 19Guna Kaba Kaiyakayana ana turu liliudi kopwa. E nakae ana kaba kokavata be nakae ali ana kaba kokavata liliudi moe kopwa.’
Vatulúkwana rampa ana pútuma manuna
20E Yauwe tuwaina kana,
‘Isileli tubunao kulatuwokōidi latuwogu sina oribe mumuna dedevina toina sikabi rampa manuna, e bei rampayadi lavilavi tamo tamo silotuvaninimidi sininínima. 21Guna Kaba Valoboda#27:21 Aba Valoboda: Ame nakona Yauwe ina Kaba Kaiyaka youyuwoina (Tateta 33:7). Tayamo yoyou parai nakae Mosese iyowo go, amoko goi Yauwe ivalobode, tauna paraiyana yoina Aba Valoboda. sinaena go, vabodaupa kaarekoina toluyena, e rampa adi kaba yata bei ikaaiyaka. Latuwogu rampayadi Eroni ma natunao sirugwausidi sininínima lavilavi ina nobuyana. Ame lovinayana ikaiyako vata Isileli tubunao yaimi.’
Currently Selected:
Tateta 27: GVS
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
