Tateta 25
25
Yauwe ina Kaba Kaiyaka
(Tateta 25:1—31:18)
Yauwe ina Kaba Kaiyaka yoyou ana yógana
(Tateta 35:5-19)
1E Yauwe ilatuwokoigu idigo kana,
2‘Isileli tubunao kulatuwokōidi latuwogu idi vagidi sikabidi simedi sikasaledi yaigu. Avatau neta ina vininabeso itagone, e kukābi. 3Vagidiyadi bei kwabidi ame nakae: Goura, siriba be nakae kopwa, 4búyala noyanoyaidi buruu, kalaakovidi toidi be nakae kayakayaidi. Nakae areko dedevidi toidi, goti unuunudi, 5sipi bolamo sakavaidi go, sakavayadi bogina sikaredi kayakayaidi. E nakae yoguyogu sakavaidi,#25:5 Yoguyogu sakavaidi: Ame livalayana Isileli tubunao niyadi goi geya imavadeta. Nakona ame tomadao sakavaidi go, nakona ame kulikuliyava sakavaidi o sipi bolamo sakavaidi. gaigíyala,#25:5 Gaigíyala: Dimdim kadi, ‘Acacia’ go, alovayana gaigíyala maisiyana nakae alova kasakasaina. 6oribe mumuna rampa manuna, alova sakavaidi dedevidi, pútuma aba kaipaku manuna be nakae insensi ma mainina dedevina.#25:6 Insensi: Nimowo sigabu ana kadókana pauda nakae isowóduwo. Paudayana alova sisina be nakae náuna bwaena taiyao sipopolidi ikasa. Niga itoboinedi sigabu mainina dedevina (Tateta 30:34-35). 7E gurewa esaaesaidi yoidi anikisi be nakae gurewa dedevidi Tonúwala ana kwama manuna. Kwamayadi aiyuwo, tayamo tolobona ana kwama manuna, e tayamo kasikasina ana saisaira manuna. 8E kulatuwokōidi latuwogu guna kaba kimasaba siyowo, e bei yaimi goi akaaiyaka. 9Nakonakae guna Kaba Kaiyaka yoyou ma konanina liliudi makayaudi bei avatulukoim, e tauna nakae kutapatēdi go, Isileli tubunao kuvatulukōidi simadagidi.’
Vatulúkwana aba vatulúkwana dedeogaina ana madágina manuna
(Tateta 37:1-9)
10E Yauwe tuwaina kana,
‘Tomota kulatuwokōidi latuwogu gaigíyala taalaidi sikabidi, dedeoga tayamo bei simadagi. Ana mamanao panetayataya aba katugúyala go, ana papaeva panetayataya go, ana tukotuko panetayataya. 11Ikavava, goura maavadaina sikabi sikaupapaeve, e dedeogayana goi bei sikaupatuko, tauna dedeogayana toluyena be sinaena goura. Ikavava, ana papa kinababaina goi goura bei sikaupatuko. 12Ikavava, rini goura aivasi bei simadagidi, matakubuna aivasi goi siyatoidi, dadava aiyuwo, dadava aiyuwo. 13Ikavava, aitakeo aiyuwo gaigíyala bei sibobóidi go, goura paaevaidi sikabidi aitakeoyadi goi sikaupatukoidi. 14Ikavava, riniyadi goi sivaisiudi bei itoboinedi dedeogayana sikaitakeve. 15Aitakeoyadi bei sikaiyako vata dedeoga ana rini goi. Taabu sibuuyagīdi. 16Aba vatulúkwana moe gurewa aiyuwo goi aaginidi bei avinim, e dedeogayana sinaena goi kudodōidi sikaiyaka.
17E tomota kulatuwokōidi latuwogu goura maavadaina sikabi, dedeogayana ana katukábwala simadagi. Atukabwalayana moe aba núwala. Aba nuwalayana ana kakainaki ame nakae: Ana mamanao panetayataya aba katugúyala go, ana papaeva panetayataya.#Roma 3:25; Iberiu 9:5; 1 Iyoni 4:10. 18Ikavava, goura bei situtu, yábana ana tomatakavatayao aiyuwo#Aba Vatowo 3:24; Iberiu 9:5. simadagidi tokwalu nakae. Simadagidi ikavava, bei aba núwala yatana goi siyatoidi, 19tayamo matakubuna, tayamo matakubuna goi sipakitaoidi. Tauna aba núwala yatana goi tayamo dadavina, tayamo dadavina. 20Yábana ana tomatakavatayaoyadi ma panepanedi bei simadagidi go, panepanediyadi siyosaledi, e aba nuwalayana bei sitakabobo bei simataakavate. Adi taiyuwo matana matana sikaaiyaka go, sikandosobu aba núwala sigitegite. 21Simadagidi ikavava, aba vatulúkwana moe lovina yawou gurewa goi aaginidi bei avinim go, kom kudodōidi dedeoga sinaena goi sikaaiyaka. Ikavava, aba núwala bei sikabi, dedeoga yatana sikailagasi. 22Aba nuwalayana yatanaina goi yábana ana tomatakavatayao adi taiyuwo nauyayanaidi bei avalobodem. Amoko goi bei alatuwokoim guna lovina liliudi Isileli tubunao manudi.’
Vatulúkwana teboro ana madágina beredi manuna
(Tateta 37:10-16)
23E Yauwe tuwaina kana,
‘Tomota kulatuwokōidi latuwogu gaigíyala taalaidi bei sikabidi, teboro tayamo simadagi. Teboroyana ana kakainaki ame nakae: Ana mamanao panetayataya kasikasi go, ana papaeva aba katugúyala go, ana tukotuko panetayataya. 24Go teboroyana goi goura maavadaina go, paaevaidi sikaupatukoidi. Ikavava, kinababaina goi ana papa goura bei sikaupatuko. 25Sikaupatuko ikavava, teboroyana yatana goi tupaota goura siyatoidi ivaníbita. Tupaotayadi adi tukotuko nimakulemwasi tayamo. Go tupaotayadi goi ana papa goura sikaupatuko. 26Ikavava, rini aivasi goura maavadaina simadagidi, teboro matakubuna aivasi goi siyatoidi. 27Tupaota kikina go, sobuyekoina riniyadi sikaaiyaka bei aitakeo goi teboroyana sikaitakeve. 28Rini siyatoidi ikavava, e aitakeoyadi gaigíyala aiyuwo sibobóidi, goura paaevaidi goi sipaimidi go, gourayadi sikaupatukoidi. 29Ikavava, e goura maavadaina sikabi, teboroyana ana noko, insensi ana pereiti, teboroyana ana botori be ana borodisi simadagidi. Botoriyana be borodisiyana moe imi oine vininabeso manuna. 30Latuwogu tuta liliuna teboroyana yatana beredi#25:30 Beredi: Ame berediyadi pokaka, geya adi istimo tauna kakaaraiina. E beredi adi badabada yawou aiyuwo sikaaiyaka moe nakae Isileli tubunao adi dala adi badabada yawou aiyuwo manudi. kimaasabaidi umagu matagu goi siiyatoidi.’#Vininabeso 24:5-8.
Vatulúkwana rampa adi kaba yata ana madágina manuna
(Tateta 37:17-24)
31E Yauwe tuwaina kana,
‘Tomota kulatuwokōidi latuwogu goura maavadaina sikabi situtu, e rampa adi kaba yata#25:31 Rampa adi kaba yata: Ame dogoiyana goi rampa giyaidi ainima aiyuwo siyatoidi adi mavada manuna. bei simadagi. Aba yatayana alova maisiyana, tauna sipona, tolobona, unana, gadona be nakae senina vagana simadagidi go, madabokina ana lamgógana goura tayamo. 32Go laonina nakae ainima tayamo tolobona goi simadagidi situko, dadavina aito, dadavina aito. 33Senina vagana ma gadona aito laoninayadi tamo tamo goi bei sikaaiyaka. Seninayadi taniya#25:33 Taniya: Ame taniyayana Dimdim siduduwe kadi, ‘Almond.’ Go keuwoina taniya maisiyana nakae ana káika taniya nakae. Ame alovayana ma seninaina tupwana gagaina. maisiyana. 34Go rampa adi kaba yata tolobona goi senina vagana ma gadona aivasi bei sikaaiyaka. 35Nako goi laonina sisowóduwo tolobona goi, e senina vagana ma gadona bei sikaaiyaka. 36Go senina gadonayana be laoninayana goura maavadaina situtudi go, ana lamgógana goura tayamo. 37Rampa adi kaba yatayana manuna rampa giyaidi ainima aiyuwo bei simadagidi. Ikavava, rampa adi kaba yata sipona yatadi goi siyatoidi, e bei rampa adi kaba yata matana goi imavada. 38Go ina wiki ana kaba kalikaina be nakae ana noko moe goura maavadaina goi bei simadagidi. 39Go goura mavadainayana ana moumou nakae kilo#25:39 Goura mavadainayana ana moumou nakae kilo: Kidi Isileli tubunao kadi, ‘Talent.’ Go moe nakae kilo ana badabada teti. ana badabada 30 bei sikabi rampa adi kaba yata be nakae konanina adi madágina manuna.
40Go am dodōkana bei dogoiyadi boi mainao koya goi bogina avatulukoim, e tauna nakae kutapatēdi.’#Tateta 26:30; Yoyowo 8:4; Guinuwa 7:44; Iberiu 8:5.
Currently Selected:
Tateta 25: GVS
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
