Tateta 17
17
Isileli tubunao aiyuwoina sikaukuulukúluwo bwae pasina tetelina
1E kai Isileli tubunao liliuma katáoya Sini Yoyowoina kakalave, kaketoiya nakae Yauwe ilatuwokoima. Kakanaliya kana asa Rapidim goi katunagu. Ego amoko goi bwae geya.#Yoyowo 20:2-13, 33:12,14. 2Tuwo tomotayadi sikaumakimaki yaigu, sidigo kadi,
‘Bwae kuvanīmma!’
Go yau adigo kagu,
‘Kaga unana kokaumakimaki yau yaigu? Kaga unana Yauwe kovakakone?#Atukeda 6:16; Madiu 4:7; Luke 4:12. Nakona Yauwe geya konumiseyeta!’
3Go kidi maedi siyápasa toina, e sikaukulukúluwo yaigu sidigo kadi,
‘Ame manakae Itipita goi kumema? Bego natumao be ima yoguyoguyao taiyao maema adi yápasa goi kukimatema?’
4E atumadádana Yauwe yaina adigo kagu,
‘Ame tomotayadi bei manakaegu avekoidi? Giyakainava bei gurewa goi sikaumategu.’
5Yauwe idigo kana,
‘Im kaituko boi sákala Nairi kusapisapi kwābi, e nakae tomoyamoya Isileli tubunao yaidi goi kukinavēdi kwabīdi taiyao kōna tomota liliudi matadi goi. 6Kunōve. Yau bei matam goi aatáoya, amoko gurewa yatana Koya Korevi#17:6 Koya Korevi : Ame youyuwoina moe Koya Sainai. goi. E gurewayana kulāui, e bwae bei idau go, tomotayadi itoboinedi sinim.’
Tuwo nakae aguinuwe. Tomoyamoyayadi matadi goi atáoya, gurewayana aláui, e bwae idau. 7Tuwo asayana avayou Mesa#17:7 Mesa: Ame youyana ana yagoina moe vakakona. be Meriba#17:7 Meriba: Ame youyana ana yagoina moe aumakimaki. unana boi Isileli tubunao sikaumakimaki be nakae Yauwe sivakakone tutayana kadi,
‘Seki Yauwe ikaaiyaka yaida o geya?’
Tauna you aiyuwo avini.
Isileli tubunao sivaayaviya Amaleki ina bodao taiyao tetelina
8E Amaleki#Aba Vatowo 36:12. tubunao sima Rapidim goi Isileli tubunao taiyao sivayaviya. 9E tuwo Iyosuwa#17:9 Iyosuwa: Ame youyana ana yagoina moe Yauwe toyava. alatuwoko adigo kagu,
‘Kūna koroto kukinavēdi yaviya manuna. Ikavava, itomo taiyao kōna Amaleki tubunao taiyao kovayavīya. Yau bei koya yatana goi aatáoya go, Yaubada ina kaituko nimagu goi ayoyoisi.’
10Tuwo Iyosuwa iguinuwa kaga nakae bogina adige. Korotoyadi taiyao sina sivayaviya Amaleki tubunao yaidi. Kai go Eroni, Kure be yau katuko kana koya yatana. 11Tutayana nimagu akatulagasidi, e Isileli tubunao sitogaga go, neta nimagu akatusobuyedi, e kidi Amaleki tubunao sitogaga. 12E nimagu bogina sineneta, tuwo Eroni be Kure sina gurewa gagaina sipuli sime siyato guna kaba tusobu. Tuwo yatana atusobu go, tauyadi nimagu sikatulagasidi sikalipaiwolidi, tayamo dadavina, tayamo dadavina. Tauna nimagu sikasa ana kadókana níyala isaliu. 13Tuwo Iyosuwa mana tovayaviyayao sitogaga, e Amaleki tubunao sisi goi sivasobusobuyedi.
14E yaviya ikavava, Yauwe ilatuwokoigu idigo kana,
‘Buki goi livala ame kugīni namliyeta kwatuyāivi bei Iyosuwa inove. Livalayana ame nakae: Amaleki tubunao valedi bei poyapoya ame goi atauwedoko.’#Atukeda 25:17-19; 1 Samwera 15:2-9.
15Tuwo dídiya akaudakodako aba kasala manuna go, aba kasalayana avayou Yauwe Guna Bísala. 16Adigo kagu,
‘Yauwe ina bísala takatulagāsi! Tauyana bei ivayaviya vata Amaleki tubunao yaidi.’
Currently Selected:
Tateta 17: GVS
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
