Guinuwa 22

1‘Tamagowo be nakae segowo, konovēgu bei imi wowókana alawoiwoiye.’

2Ego Paulo niyana sinove ikanaaiberiu, tauna situgau toina be sitaiyakekedoko. Tauyana idigo kana,

3‘Yau Diyuu guma Tasosi, moe Silisiya parovinsi sinaena. Ego ame asayana goi sivabibinigu go, Gameliyeli#Guinuwa 5:34-39. ivatulukoigu bego Yaubada ina Katukeda boi tubudao ivinidi, e ana kabikáwana akibobosidoko. Ago magu salau akasalegu Yaubada yaina nakae komi imi sinapu ame tuta. 4Moe pasina Yeisu ina Kenao ana tosabokuliyao avakaleyedi, nakae maniyedi guna lovina goi sikaumatedi. Guna vakaleyayana goi koroto be nakae vevina, ayoisidi be ayowóidi go, deri goi avaisiudi.#Guinuwa 8:3, 26:9-11.

5 Tonúwala Toolagaina be nakae tomoyamoya madabokidi itoboinedi ame guna sinapuyana sikamoitamoe. Tauyadi leta siginidi, sedao Diyuu Damasiko goi adi leta, e sivinigu moe guna tagona ana Kenaoyana ana tosabokuliyao amoko goi ayoisidi.

Tuwo letayadi akabidi ikavava, ana Damasiko bego tosabokuliyadi ayoisidi nimadi ayowóidi amedi ameko Yerusalema goi, e bei adi liuna sibabane.

6E anonoina, dine nakae Damasiko bogina avakakana go, mavada gagaina yábana goi isou itapasigigu. 7Itapasigigu go, akapusi asou poyapoya goi níyana tayamo anove ilatuwokoigu idigo kana,

“Saulo, Saulo, kaga unana kuvakaaleyegu? Moe tuwo kuyāto!”

8“Tomoya, kom avatau?” Yau kaegu.

Tauyana idigo kana,

“Yau Yeisu guma Nasareta kuvakaaleyegu.”

9E kidi go guna tovakitaunayao mavadayana moitamo sigite go, Tauyana ivaadigoigu niyana geya siyagoiyeta. 10E yau adigo kagu,

“Guna Tomoya, kaga bei aguinuwe?”

“Kutāoya, kūna Damasiko goi kusīu. Amoko goi tomota tamo bei ilatuwokoim kaga liliuna bogina akawoim bei kuguinuwedi”, Tomoyayana kaena.

11E mavadayana ina tomoéyala gagaina pasina geya itoboineguta bei agita, tauna guna tovakitaunayao nimagu siyoisidi sivakedegu, e kana Damasiko.

12E tayamo koroto Damasiko goi ikaaiyaka yoina Ananiyasi. Tauyana koroto kaasalaina Yaubada yaina, nakae Yaubada ina Katukeda ikabiikaone. Aiyuwoina Diyuu liliudi amoko goi sikaaiyaka sikaodeedevine. 13E kama Damasiko goi go, ame korotoyana ima kikigu goi itáoya ilatuwokoigu idigo kana,

“Siyagu Saulo, kugitāmna!”

Mainao matagu bogina sidedevina, itoboinegu tauyana agite. 14Tauyana kana,

“Tubudao idi Yaubada bogina ikinavem bei ina nuwonúwana kuyagoi, Tokibóbwata kugite be nakae ina livala kunove. 15Moitamo. Kom bei Tokibobwatayana ana totalavaita; e kaga liliuna bogina kuugitedi be nakae bogina kuunovedi bei kutalavaitedi tomota liliudi yaidi. 16Tuwo ame tuta kaga kutuuyaosi? Kutāoya, Tauyana yaina goi kududūwo go, kutagōna tomota sisayoyoim be nakae im goyo goi inikim.”

Tuwo nakae aguinuwe.

17E akaluvila ana Yerusalema goi. Tuta tayamo akaaiyaka Vada Kimaasabaina sinaena goi akaawanoi go, nukotogu goi akalayáusa. 18Guna kalayausayana goi Tauyana agite ilatuwokoigu idigo kana,

“Da Yerusalema im talavaita yau manugu bei geya sikabikaoneyeta, tauna kutāoya woilīm Yerusalema kwalāve.”

19“Go Tomoya, kidi bogina siyagoigu bego boi yau guna lovina goi guna topaisewayao sina Diyuu idi kaba tugugunayao badabadaidi goi im tonumisayao siyoisidi, deri goi sivaisiudi go, sidabidi. 20Aiyuwoina siyagoi bego tutayana im totalavaita Stiveni ikaikaina idaudau, yau nakae akaiyaka aatáoya ana tokaumatayao idi guinuwa akamoitamoe be nakae adi tanigo arugwausidi. Tauna neta ameko goi akaaiyaka, nakona bei nukotodi siwówana unana yau guna sinapu akaigavile, e bei sikabikaonegu”, #Guinuwa 7:58. yau kaegu.

21Go Tauyana idigo kana,

“Yau avamoleyem kuna aduwanau Totuyoyowo yaidi, tauna, to kūna.”’

22E boda sitaaiyakeke ana kadókana ina livala Totuyoyowo manudi sinovedi. Tuwo gamodi sigoyo niyadi gagaina goi sidigo kadi,

‘Ame korotoyana kokaumate! Geya itoboineyeta maa yawoina ikaaiyaka.’

23Ago bodayadi gamodi sigoyo toina, tauna siipodeda, adi tanigo siilavedi be nakae kaukau silavelave go, 24tokalikumatana ina tovayaviyayao ilovinaedi idigo kana,

‘Ida vada goi kovaisīu. Tauyana kodābi ana kadókana italavaita dókana, e bei tayagoi kaga pasina amo bodayadi madi egamogamogu siiduduwo bego ame tauyana takaumate.’

Tuwo moitamo Paulo sikabi, sikavale idi vada goi sivaisiu. 25E tovayaviyayao búyala sikabi sime Paulo nimana siyowóidi. Ikavava, bego sidabi go, tovayaviya adi tovakumgo tayamo Paulo kikina iitáoya, tuwo kina Paulo ilatuwoko idigo kana,

‘Roma ina lovina sinaena goi akaaiyaka. E yau nava geya guna kotumo go, manakae? Roma ina lovina itagona bego kodabigu gea geya?’

26E tovayaviya adi tovakumgoyana inove, tuwo ina ina tokalikumatana yaina italavaita idigo kana,

‘Ame kaga bego kuguinuwe? Amo korotoyana Roma ina lovina sinaena goi ikaaiyaka!’

27E tokalikumatanayana ibala ina Paulo ilumadade idigo kana,

‘Kulatuwokōigu, moitamo Roma ina lovina sinaena goi kwaaiyaka gea geya?’

‘U’, Pauloyana kaena.

28Go kina tokalikumatanayana idigo kana,

‘Yau mani gagaina goi aemáisa, e Roma ina lovina sinaena goi akaaiyaka.’

‘Go yau guna bíbina goi go, ima ame tuta Roma ina lovina goi akaaiyaka’, Pauloyana kaena.

29Tauna tovayaviyayadi bego Paulo sidabi go, ina livala sinove, tuwo mainao madi matoita sibisilovamo. E kina go tokalikumatanayana nakae imatoita unana bogina iyagoi bego Paulo Roma ina lovina sinaena goi ikaaiyaka go, aiyuwoina iyagoi bego Pauloyana nimana bogina iyowóidi!

Paulo ana wowókana ilawoiwoiye Diyuu idi kotu goi

30E vanuwo itomo, tokalikumatana latuwona iyagoi ava goyo kidi Diyuu sinuwonúwana Paulo iguinuwe. Tuwo Tonúwala Gagaidi be nakae Diyuu idi kotu madabokina ilovinaedi sima situgúguna. Ago ina tovayaviyayao ilovinaedi sina Paulo sitaligei go, sikabi sime tauyadi matadi goi sivatáoe. Tuwo moitamo sina Pauloyana sikabi sime.

Currently Selected:

Guinuwa 22: GVS

Highlight

Copy