2 Korinta 6
6
1E Tauyana taiyao kaapaisewa, tauna nakae kakawanoi makimaki ina kanuwóiya kouyaōne go, anuwoiyayana kotagōne yawoimi goi ikeuwoe. 2Moitamo. Yaubadayana idigo kana,
‘Tuta ana toboine goi anovem, e akatumapu;
nakae am yava ana maliyalina goi ao avaitem.’
Aiseya 49:8
Konōve! Ame tuta moe tuta ana toboineyana. Konōve! Ame moe ami yava ana maliyalinayana.
3Geya kada tayaamo aba kapusi tomota idi numisa goi kayato geya, govila bei tomota itoboinedi ima paisewayana sitagiwoi. 4Go sem kakamoitamoema kai Yaubada ina tovaitayao, tauna dogoi liliudi goi toinima kavagitakoima yaimi be itoboinemi konumisema go, dogoiyadi liliudi goi kamesayágana gagaina. Dogoiyadi ame nakae:
Ima mou goi, o ima gedageda goi, o ima kaiyakomou goi,
5o ama láuwo goi, o ima tuta deri goi, o ama vakaleya goi, o ima poisógana gagaina goi, o nakae geya kamasiisi dókana, o ima loga goi.#Guinuwa 16:23.
6Ima paisewayana goi mama sinapu maavadaina, mama nanamsa, mama mesayágana, mama yabobona, mama kaiguyau, Baloma Kimaasabaina goi, mama matakoi mooitamoina,
7mama bóbwara mooitamoina be nakae Yaubada ina togaga goi.
Mama kaipíyama nimakakataima be nimakekelima goi kaguuinuwa.
Ima kaipiyamayadi moe Yaubada ina kibóbwata ina kanasíuna manuna.
8Tomota maniyedi sitaimaminema go,
maniyedi sikisobuyema.
Maniyedi sikaogoyoema go,
maniyedi sikaodedevinema.
Ima paisewa goi nakona tomota siwowokoima bego kai tovasuláiga go,
kai kabóbwara moitamo.
9Nakona geya yoimamo tomota maniyedi yaidi go,
maniyedi yaidi kai maa yoima.
Nakona ámasa ivakaosima go,
konove, nava maa yawoima.
Nakona dábina kababane go,
geya kakamaseta.
10Nakona mama nuwomou go,
tuta liliuna kaauyáwana.
Nakona katokai go,
esaesa mooitamoina kakaiguyauye tomota badabadaidi yaidi.
Nakona poyapoya ame goi kai geya konamamo go,
yábana konanina liliudi sikaaiyaka yaima.
Paulo ina kawanoi bego da Korinta siuyaone
11Geya kada giyaiina ima nuwonúwana kavagagale yaimi geya, go sem madabokiina kalumavivisi yaimi! Komi da Korinta, atema madabokina goi ima matakoi bogina kakaiwoduwe yaimi! 12E kai ima matakoi geya kavagagalakoimita go, komi imi matakoi kovagagaalekoima. 13E ima matakoi nakae kokatumāpu, e atemi goi komatakoiyēma. Ame nakae komi natugowo, tauna alatuwokoimi.
14Taabu tauyadi geya sinuumiseta taiyao koospwagōgana. Moe moitamo. Manakae? Kibóbwata be apipilova itoboinedi sispwagógana? Geya. Manakae? Mavada itoboine mamaníwana taiyao sikabivekoveko? Geya. 15E manakae? Guyau be Beliyala#6:15 Beliyala: Ame Kaleya yoina tayamo nakae go, ana yagoina moe geya basabasainamo. itoboinedi taiyao sieboda tayamo? Geya. Manakae? Kita tonumisa be kidi geya sinumiseta ida nuwonúwana sivavasa? Geya. 16E manakae? Yaubada polapola itoboinedi Yaubada mooitamoina ina Vada Kimaasabaina goi sikaaiyaka? Geya ae? Moe moitamo. Kita Yaubada maa yawoina ina Vada Kimaasabaina, yaida goi ikaaiyaka, tauna taabu basaleliu taiyao taaebōda tayamo.#Roma 8:9; 1 Korinta 3:16, 6:19; Epeso 2:21-22; Iberiu 3:6. Moe nakae Tauyana idige kana,
‘Yaidi goi bei akaaiyaka
be nakae yaidi goi aaketoiya.
Yau bei idi Yaubada go,
kidi yau guna bodao.’#Isikeli 37:26-27; Yeremaya 32:38; Nuwogau 21:3.
Vininabeso 26:11-12
17Tauna kana,
‘“Tauyadi geya sinumiseguta yaidi goi kosowōduwo;
taabu dogoi baailidi kobisiikonēdi, e bei auyaonemi”,
Yauwe kaena.’
Aiseya 52:11
18Nakae kana,
‘“Yau bei komi Tamami#1 Tétala 17:13. go,
komi yau natugowo koroto be vevina”,
Yauwe Tokalika kaena.’
2 Samwera 7:14
Tauna taabu tauyadi geya sinuumiseta taiyao koospwagōgana!
Currently Selected:
2 Korinta 6: GVS
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
