1 Timoti 4

Paulo ina vatulúkwana Timoti ina sinapu manuna

(1 Timoti 4:1-16)

Paulo ina katumátala tovatulukwana polapola manudi

1E kina go Baloma Kimaasabaina bogina italavaitedoko bego tuta ana kaba lukavava goi tomota maniyena ida numisa ana vatulúkwana bei sikalave unana baloma polapolaidi o tadigo kada, ‘Dimoni’ idi vatulúkwana yaidi goi sikasaledi. 2Vatulukwanayadi tonumisa polapola idi pola goi sima. Ago idi polayadi manudi geya siomaayamaya geya. 3Tauyadi nai sisanabode be nakae awoinu maniyena sivatabuyedi. Go awoinuyadi kina Yaubada iwodugudi bego kita nuumisaida ana Nanamsa Mooitamoina taayagoi liliuda mada kauyagu tauyaonedi. 4Moe unana kaga liliuna Yaubada iwodugudi moe dedevidi.#Aba Vatowo 1:31. Tauna geya tayaamo kaga vaatabuna kita yaida geya neta mada kauyagu tauyaone. 5Ame moitamo. Dogoiyadi Yaubada ina livala goi be kita ida kawanoi goi bogina ikimasabedi ma basabasaidi. Tauna itoboineda tauyaaonedi.

Paulo ina livala Timoti ina sinapu manuna

6Moe vatulukwanayadi sedao kuvatuulukōidi. Neta nakae, e kom Guyau Yeisu ana tovaita dedevina unana ida numisa ana livala be nakae vatulukwana dókana ana livala bogina kusabokuliyedokoidi. Tauna livalayadi goi balomaim kuuvavani. 7E da poyapoya idi vatuta besobeso geya basabasaidimo Yaubada manuna. E vatutayadi kuvakiilisīdi. E nakae balomaim kwatubayāsi bei im sinapu nakae yábana sinapuna.

8Neta wowoda takatubaayasidi,

moe ana dedevina giyaina.

Go neta balomaida takatubaayasidi yábana sinapuna manuna,

moe ana dedevina gagaina kaga liliuna manuna

unana moeko goi yawoida moitamo toina

ame tuta be nakae ámasa mlina goi tababane.

Tauna balomaim kwatuubayāsi.

9Mae livalayadi livala aba numisa #1 Timoti 1:15, 3:1; 2 Timoti 2:11; Taito 3:8. nakae itoboineda tauyaonedokoidi. 10Mae manuna mada salau tapooisógana be taakokóila! Bogina kuyagoi. Taalotuta Yaubada maa yawoina bei iguinuwe nakae idige. Tauyana tomota liliudi adi Toyava. Go moe moitamo toina kita ana tonumisayao manuda.

Timoti ana lovina yawoina manuna

11Moe vatulukwanayadi tomota kuloviinaēdi be kuvatuulukōidi siguuinuwedi. 12Nakona tomota latuwodi sivasobusobuyem unana kom tubuwau go, taabu kutaagonēdi nakae siguuinuwe, go sem im bóbwara, yawoim, im matakoi, im numisa be im sinapu maavadaina goi tonumisa yaidi kuvagiitakōim kom numisa ana kaba kinana. 13Imi tugúguna goi mam salau kukaasalēm Gínina Kimaasabaina ana katuyáiva goi, tomota adi liwola goi be nakae adi vatulúkwana goi ana kadókana awokoim. 14Boi Baloma Kimaasabaina im kaiguyau ivinim tutayana tomoyamoya nimadi sikailagasidi dabam goi Yaubada ina nuwonúwana kom manum sikabivalevale. E moe aiguyauyana taabu kukaligaagaīye. 15Moe sinapuyadi kuguuinuwēdi be nakae yaidi goi toinim kukaasalēm bego tomota liliudi sigitem im numisa goi kubibíbina. 16Kumatakavateedokōim be nakae im vatulúkwana kumataakavāte. Moe dogoiyadi kusokikiinakōidi. Neta nakae kuguuinuwedi, e Yaubada kom be am totaiyakekayao taiyao bei iyavemi.

Currently Selected:

1 Timoti 4: GVS

Highlight

Copy

Compare