1 Korinta 6

Da Korinta idi bágala kotu manuna

1Manakae? Komi geya imi omayamayamo? Neta semiyao nuumisaidi idi píkwana yaimi goi, kaga unana tauyadi konavedi tolovina geya adi numisamo matadi goi koekotuyedi? Go kaga unana geya konavedita tauyadi Yaubada ina kimasabayao matadi goi koekotuyedi? 2Nakona komi geya koyagoiyeta bego kita Yaubada ina kimasabayao tauyadi geya adi numisamo bei tatakinoidi ae? Neta amo tauyadi bei kotakinoidi, manakae? Geya itoboinemita píkwana giyaidi komi tonumisa yaimi goi kotakinoidi? 3Nakona komi geya koyagoiyeta anerose bei tatakinoidi ae? Nakae bei taguinuwe, tauna imi guinuwa poyapoya ame goi toinimi kotakinōidi. 4Neta píkwana sikaaiyaka yaimi goi, kaga unana kotu goi tolovina moetala konumisedi imi kotu manuna? Tauyadi geya basabasaidimo komi Yeisu ana totugugunayao yaimi goi. 5Moe alatuuwokoimi, latuwogu agieomaemaemi. Manakae? Geya tayaamo tomota yaimi goi mana nanamsa itoboine semiyao idi kaumakimaki itakinoidi ae? 6Go sem tolovina geya idi numisamo go, matadi goi koroto nuumisaina siyana iekotuye. 7Tutayana semiyao koekotuyedi, e madabokimikova Yaubada matana goi bogina toinimi kobugoyaimi. Neta ami tobugoyoyao be ami tovaobunayao yaidi goi to kotogagamo! 8Go komi geya ae? Go sem komi to tobugoyo be továobuna ae? Go imi guinuwayadi koguuinuwedi moe toinimi semiyao nuumisaidi yaidi goi. 9Nakona geya koyagoiyeta toogoyoidi geya adi kaiguyaumo Yaubada ina kalibúbuna sinaena. Taabu kokatuubaūmi. Tomasisi goyogoyo, basaleliu adi tosakululu, toroerata, tauyadi koroto koroto taiyao simasisi, 10tovaináwana, tomatakónana, tonim ginagina, totagíwaya, továobuna Yaubada ina kalibúbuna goi geya sisiuta geya! 11Moe sinapuyadi boi komi maniyemi nakae koguuinuwedi go, ame tuta moe komi nakae geya, go sem Yaubada bogina inikimi, bogina ikimasabemi toinina umana, ida Tomoya Yeisu Guyau yoina goi be Yaubada Balomaina ina guinuwa goi bogina ivayokoimi komi Tauyana nuwona ana tokibobwatayao. Tauna amo sinapuyadi goyogoyoidi taabu koguuinuwēdi!

12Komi kodigo kami,

‘Dogoi liliuudi mama tagona kaguuinuwedi.’

Go yau kagu,

‘Dogoiyadi maniyedi geya basabasaidimo kita yaida.’

Komi kami,

‘Dogoi liliuudi mama tagona kaguuinuwedi.’

Go yau kagu,

‘Geya tayaamo kaga bei tatagone ilovinaeda.’#1 Korinta 10:23.

13Nakona maniyemi kami,

‘Awoinu ikaaiyaka gamoda manudi, e gamoda sikaaiyaka awoinu manuna. Ago Yaubada nava bei aiyuwokova ikausaolidi. Tauna ame tuta kaga nakae latuwoda taguinuwe wowoda goi, itoboineda taguinuwe.’

Moeko goi komi konuwonúwana bego masisi goyogoyoina itoboinemi nakae koguinuwe. Go wowoda sikaaiyaka geya masisi goyogoyoina manuna geya, go sem ida Tomoya ina guinuwa manuna. Nakae wowodayadi moe ida Tomoya ina kaba lovina. 14E kina go Yaubadayana ina togaga goi ida Tomoya wowona bogina ikaitaoemnei go, kita nakae wowoda bei ikaitaoemneidi. Tauna masisi goyogoyoina tavakilīsi! 15Manakae? Komi geya koyagoiyeta bego kita wowodayadi moe Guyau talainao? Manakae? Itoboineda Guyau talaina tayamo takabi tanave tomatagogoli goi tasipatuko gea geya? Moe geya, geya tooina! 16Nakona geya koyagoiyeta bego avatau neta tomatagogoli taiyao sisávina, e simalawówana tayamo. Bogina koyagoi. Yaubada idigo kana,

‘Adi taiyuwokova wowodi tayamo.’ #Madiu 19:5; Maki 2:7; Epeso 5:31.

Aba Vatowo 2:24

17Go avatau neta Tomoya taiyao sisávina, e balomaidi tayamo. 18Tuwo masisi goyogoyoina kovasiyasiyāe. Goyo liliudi tomota siguuinuwedi moe wowodi toluyedi goi go, tomasisi goyogoyo toinina wowona ibugoyai. 19O nakona geya koyagoiyeta bego wowoda moe Baloma Kimaasabaina ina Vada Kimaasabaina? Balomayana Yaubada goi ima ikaaiyaka yaida goi. Tauna kita wowoda moe geya kita konada geya, go sem Yaubada konana.#Roma 8:9, 14:7-8; 1 Korinta 3:16; 2 Korinta 6:16; Epeso 2:21-22; Iberiu 3:6; Nuwogau 21:3. 20Moe moitamo. Yaubada bogina itakoneda, maisada gagaina. Tauna wowodayadi goi Yaubada ina togaga ana káeyana tavagitakōe.

Currently Selected:

1 Korinta 6: GVS

Highlight

Copy

Compare