1 Korinta 16

Da Korinta idi vininabeso manuna

(1 Korinta 16:1-4)

1E imi lumadádana kidi Yaubada ina kimasabayao tookaidi adi mani ana lamgógana manuna alatuwokoimi. Kaga nakae boi Yaubada ana totugugunayao Galetiya goi alatuuwokoidi siguuinuwe, e komi nakae koguinūwe.#Guinuwa 16:6; Roma 15:25-26. 2Nakonakae Yaubada mani goi ivaaitemi, e komi tamo tamo imi mani toinimi imi vada goi koyatōidi. Go wiki tamo tamo ana maliyalina vakuumgoina#16:2 Wiki tamo tamo ana maliyalina vakuumgoina: Ame Sande. goi komemēdi kolamgōgo, govila bei ao, matagu goi imi mani kolamgogo.

3E tutayana asowóduwo yaimi, ava korotova bogina kodovatusidi go, bogina kogitedi kidi kabikaaonidi nakae adi tagona adi leta koginidi, e moe tauyadi bei aetunedi imi vininabeso sinave Yerusalema goi. 4Go neta itoboinegu yau nakae ana, e tauyadi bei sivakitaugu.

Paulo ina livala vaamliyaina

(1 Korinta 16:5-24)

Paulo ina losinapu ina koidádana manuna

5E namliyeta ana Mesadoniya goi avaníbita, bei ao. Bogina koyagoi. Latuwogu mainao bei ana Mesadoniya.#Guinuwa 19:21. 6E nakona yaimi goi bei akaaiyaka mamanao o nakona akaaiyaka ana kadókana tula ana tuta ikavava bego niga itoboinemi bei kovakinaregu guna koidádana manuna, e bei ava dadava goi latuwogu, anonoina. 7Moitamo. Geya latuwogu tuta kaakupina kaka taiyao takaaiyaka. Neta ida Tomoya itagona, alotuta bei yaimi goi tuta tupwana maanawena akaaiyaka. 8Go ameko Epeso goi#Guinuwa 19:8-10. bei akaaiyaka ana kadókana Pentikosi#Vininabeso 23:15-21; Atukeda 16:9-11. ana tuta ikavava, namliyeta baige ao. 9Ameko Yaubada ina kaleyayao badabadaidi sikaaiyaka go, tuwo totom bogina ikatupáeve bei itoboinegu Vala Dedevina atalavaite, e tomota sinumise.

10E tutayana Timoti#Guinuwa 16:1,3, 17:14-15, 18:5, 19:22, 20:4; Roma 16:21; 1 Korinta 4:17; 2 Korinta 1:19; Pilipai 2:19; 1 Tesalonáika 3:2,6; 1 Timoti 6:20; Iberiu 13:23. iwo, kogitēmi bego tauyana ana gogo yaimi moe dedevina, e bei geya imatoiteta geya. Tauyana ida Tomoya ina paisewa iguuinuwe yau nakae. 11Tauna geya vatau tayaamo tauyana ikaolilīve. E tutayana ikalavemi, mana tuboina be ma nimatoona koetūne ima yaigu. Tauyana be sedao maniyedi taiyao atuyaaosidi sima.

12E siyada Apolosi#1 Korinta 16:12; Taito 3:13. manuna kolumadádana, e bei alatuwokoimi. Tauyana bogina akatuliwoledoko bego sedao taiyao sikaluvila siwo yaimi go, geya latuwona ame tuta iwo. Go tutayana tuta ana toboine isowóduwo, e bei iwo.

Paulo ina lovina da Korinta ivinidi

13Koyauyāusa. Vatulúkwana mooitamoina goi kotaoyaakavāta. Kokatepātu nakae kotogāga. 14Kaga liliuna koguuinuwedi, mami matakoi koguuinuwēdi.

15E Stepana#1 Korinta 1:16. mana bodayáuwo bogina koyagoidi bego tauyadi Yeisu ana togiminumisayao Akeya goi go, bogina toinidi sikasaledi kita Yaubada ina kimasabayao yaida goi bego sivaiteda. E tauna akatuliwolemi 16bego komi nakae kokasalēmi tauyadi yaidi be nakae ava tovaita tauyadi nakae neta sipaaisewa o Yeisu manuna sipooisógana yaidi goi. 17E Stepana be Potunatu be Akaiko bogina sima. Tauyadi komi imi katumapu sivaitegu, tauna tauyadi idi sowóduwo pasina auyáwana. 18Komi be yau balomaida sikitogagedi. Tauna tomota amo tauyadi nakae kowowoinēdi.

Auyagu be yabobona da Korinta yaidi

19Kidi Yeisu ana totugugunayao Esiya dadavina goi idi yabobona yaimi. Akuila be Pirisika#Guinuwa 18:2,18,26; Roma 16:3,19; 2 Timoti 4:19. be nakae tauyadi idi vada goi sisaakululu, e imi spwagógana ida Tomoya taiyao pasina idi yabobona sietune iwo yaimi. 20Sedao ameko goi idi yabobona yaimi. Sedao moeko goi koyoowoiīdi nakae komi kimaasabaimi Yaubada umana itoboinemi.

21Ame guna yabobonayana yau Paulo toinigu nimagu goi agini. Yau nakae guna yabobona yaimi.

22Avatauwa komi neta ida Tomoya geya komatakoiyeta, Yaubada itoboine ikatubolatemi.

Ima Tomoya, kūma!#16:22 Ima Tomoya, kūma: Da Giriki niyadi ameko kadi, ‘Marana tha.’ Moe aníyana yoina Arameika. Ana yagoina kada, ‘Ima Tomoya, kūma!’

23Ida Tomoya Yeisu ina kanuwóiya bei ikaaiyaka yaimi goi.

24Guna matakoi madabokimi yaimi ida spwagógana Guyau Yeisu taiyao pasina.

Yau Paulo be Sositeni

Currently Selected:

1 Korinta 16: GVS

Highlight

Copy

Compare