1 Korinta 11

1Nakae yau Guyau avatootowone, e kovatotowonēgu.#1 Korinta 4:16; Pilipai 3:17, 4:9; 1 Tesalonáika 1:6; 2 Tesalonáika 3:7,9.

Tomota dabadi adi kaba vatumna manuna

(1 Korinta 11:2-16)

2E dogoi liliudi goi bogina konuwaisigu be guna vatulúkwana liliudi boi bogina aavinimi nava koyoisikaavatedi, tauna ayapaliyemi. 3E latuwogu koyagoi bego koroto liliuda dabada moe Guyau. E vevina dabadi moe koroto. E Guyau dabana moe Yaubada. 4Kita go koroto liliuda neta takawanoi o neta Yaubada ina livala tomota matadi goi takabivalevale go, neta kunuda maanawena dabada goi isou, e moeko goi dabada o tadigo kada, ‘Guyau’, tagieomaemae. 5E komi go vevina liliumi neta kokawanoi o neta Yaubada ina livala tomota matadi goi kokabivalevale go, kunumi kovaligeidi, moe nakae dabami o tadigo kada, ‘Monemiyao’, kogieomaemaedi. Moitamo. Ana kaigigita aba omayamaya unana komi vevina nakae vevina neta kunudi madabokiina sitéui#11:5 Sitéui: Amo tutayana idi sinapu ame nakae: Neta vavina tayamo tomota sigite siwowoko kina toroerata, kunudi sivaligei. Go neta vavinayana siyagoi moitamo toina iroerata, kununa sitéui o sikupo kaakupina bego ona imayamaya ina goyo pasina. moe adi kaba omayamaya. 6Neta vavina kununa geya imeteta, tuwo nakae kununa ibōbo. Go neta kununayana ana bóbwana o ana téuina aba omayamaya, e tuwo kununa imēte. 7Moitamo. Koroto kita geya itoboinedeta kunuda tamete unana kita Yaubada ana tapata,#Aba Vatowo 1:26-27, 5:1, 9:6; Yemesa 3:9. moe nakae kita Tauyana ana káeyana kanukanununa. Ego komi vevina kai koroto ama káeyana kanukanununa. 8Ame moitamo. Koroto vavina goi geya isowoduwoita, go sem vavina koroto goi isowóduwo.#Aba Vatowo 2:18-23; 1 Timoti 2:13. 9Bogina koyagoi. Yaubada koroto imadagida geya kada vevina manudi geya, go sem vevina imadagidi kita koroto manuda. 10Moe pasina itoboine vevina toinidi dabadi manudi silovina dókana anerose pasidi. 11Guna masi ame nakae: Kita ida spwagógana ida Tomoya taiyao pasina komi vevina koroto sowoma. Nakae kai koroto komi vevina sowomi. 12Ame moitamo. Vavina unana moe koroto, e koroto nakae unana moe vavina. Ego kaga liliuna unada moe Yaubada. 13Komi toinimi kolovīna ame manuna: Manakae? Komi vevina itoboinemi bei kunumi kovaligeidi go, tomota matadi goi kokawanoi Yaubada yaina o geya? Geya ae? 14Kita da poyapoya ida sinapu bogina taayagoi. Neta kita koroto kunuda taametedi, moe ada kaba omayamaya. 15E komi go vevina neta kunumi koometedi, e moe ami kaba taimámina unana kunumiyana Yaubada ivinimi moe ami kaba vatumna, tauna ami kaba taimámina.

16Nakona tomota maniyedi nava latuwodi bego amo manuna sikaumakimaki go, moe tauna kai ima sinapu be nakae Yaubada ana totugugunayao liliudi idi sinapu.

Ida Tomoya ana káika manuna

(1 Korinta 11:17-34)

17E ida Tomoya ana káika manuna kootugúguna go, dogoi dedevidi geya sisowoduwoita, go sem dogoi goyogoyoidi siisowóduwo. Tauna guna lovina ame bei avinimi go, imi sinapu pasina geya kada ayapaliyemi geya. 18Ame moitamo. Valemi anove bego tutayana kootugúguna, koolivisi ta boda be ta boda. Ago valemiyana tupwana anumise. 19Moitamo. Komi kami,

‘Ta boda ta boda yaima itoboine.’

Moe livisiyana bego avatauwa yaimi goi neta Yaubada iuyaonemi itoboineda takinanedi! 20E tutayana kootugúguna, komi bego ida Tomoya ana káika#11:20 Tomoya ana káika: Ame aikayana Yeisu ina tonumisayao siguinuwe bego ina kámasa sinuwokavate nakae boi ina tovatotowanayao ilatuwokoidi siguinuwe. Aikayana goi oine sinim be beredi sikivisi sikáika. Tomota maniyedi ame tuta kadi, ‘Sakaramen.’ kokáika go, geya. 21Moe moitamo. Komi tamo tamo toinimi avami kokakáika go, avamiyadi geya kokaiguyauyeta semiyao geya avadimo yaidi goi, tauna maniyemi yaimi loga kokámasa go, maniyemi toinimi imi oine konim ginagina koyaluwo go, semiyao geya adi oinemo! 22Kaga unana nakae koguuinuwe? Manakae? Geya imi vadamo bei moeko goi kokakáika be konimnim? O nakona Yaubada ana totugugunayao kokubuyevedi, e maniyedi geya avadimo kogieomaemaedi. Manakaegu alatuwokoimi? Bego ayapaliyemi? Moe manuna geya ayapaliyemita! 23Guna nuwonúwana ame nakae: Kaga boi ida Tomoya yau ilatuuwokoigu bogina alatuwokoimi bego boi sabamgoyana Yudasa ida Tomoya Yeisu inuwotuluye, Yeisuyana beredi ikabi, 24manuna ikauyagu Yaubada yaina namliyeta ikivisi. Ikivisi ikavava, ina tovatotowanayao ivinidi go, idigo kana,

‘Moe wowogu nakae akasale komi manumi. Moe tuta liliuna kokakāika bei konuwokaavategu.’#Luke 22:19; Madiu 26:26; 1 Korinta 10:16, 11:25.

25Sikáika ikavava, keiga nakae ikabi, ina tovatotowanayao ivinidi bego sinim go, idigo kana,

‘Moe oine ma keigaina moe ikaikaigu nakae komi manumi. Ikaikayana goi Yaubada ina kanasiuna vau iguinuwe yaimi.#Tateta 24:8; Yeremaya 31:31-34; Luke 2:20. Oineyana konīm go, tuta tamo tamo konimnīm, konuwokaavatēgu.’

26Bogina koyagoi. Tuta tamo tamo beredi ame takakáika be keiga goi tanimnim, moe nakae ida Tomoya ina kámasa tatalavaite ana kadókana ikaluvilamna ima.

27Tauna avatauwa neta berediyana sikáika besobeso o ida Tomoya ina keiga goi sinim besobeso, amo tauyadi Yaubada ina liuna bei sibabane unana ida Tomoya wowona be ikaikaina geya siwowoinedita. 28E toinida ida nuwonúwana tadovatusīdi. Neta nukotoda geya isabutukoidita, berediyana takáika be keigayana goi tanim. 29Ame moitamo. Avatauwa neta beredi sikakáika be keiga goi sinimnim go, geya sikinaneyeta bego kita madabokidakova ida Tomoya wowona talainao, e moe nakae aikayana be nimyana goi toinidi adi liuna siyato. 30Moe pasina tomota maniyedi yaimi goi sineneta o sikatówana go, maniyedi bogina sikámasa. 31Go neta toinida tagimidovatusidokoida go, goyo geya tababaneyeta, e Yaubada liuna geya itakinoideta bego itoboineda liuna tababane. 32Ego tutayana ida Tomoya itakinoida, moe nakae isapida o ikitototoida bego da poyapoya taiyao geya itakinoideta toogoyoida.

33Tauna segowo, tutayana kootugúguna bei ida Tomoya ana káika kokakáika, semiyao kotuyaosīdi bei koyagoi avatauwa geya avadimo. 34Avatauwa komi neta loga kokámasa, toinimi imi vada goi kogimikāika, govila bei imi tugugunayana pasina imi liuna kobabane.

E vatulúkwana maniyedi nava sikaaiyaka go, niga bei ao avatulukoimi.

Currently Selected:

1 Korinta 11: GVS

Highlight

Copy

Compare