1 King 11
11
Solomon Byalüngürr ⌊Lodkagab⌋
1Solomon go abün mogob kol ngyaep yarilürr. Wa ngaen-gógópan Izipt kingan óp olom upadórr, da solkwat ama Moab, Amon, Idom, Sidon, akó It kol bumiógürr tóba kolóm. 2Lod ngaen Isrrael pamkolpam igó nilóp wagó, “E sab nanabwób kol bumióggu, kürübóka umul-kók nidipko, akó ibü pam yabü kol koke ki bumiógnüm. E ne sab nóma tónggapónane, i sab yabü moboküp nyalüngrre tibiób god ⌊ótókóm⌋.” A Solomon ma ene kol tóba dalgüpdü simarrurr. 3Solomonón amkoman kol 700 kwarilürr, kingab ópal olmal nidi kwarilürr. Oya ma akó 300 ngibürr kol kwarilürr. Ene kolabme wa tóba moboküp yalüngürr Godkagab. 4Solomon myang nóma bain yarilürr ene mogob kola oya moboküp yalüngóp tibiób godódó. Wa Lodón tai koke mamoan yarilürr oya aba Deibidzan kain yarilürr. 5Solomon ama Astorretón ótók yarilürr, Sidon isab kol god, akó Molek, Amon isab ngazirr god.
7Podo kwitüm, abüsa nólgabi banikda Zerrusalemgab, Solomon nis ⌊alta⌋ we tónzapónórr. Darrü Kemosón ótókóm, Moab pamkolpamab ngazirr god, akó darrü ama Molekón ótókóm, Amon pamkolpamab ngazirr god. 8Solomon ta akó dadan poko tónggapónórr tóba blaman mogob kolabkü, wa, i sab tibiób godódó morroal ilang buru akó ngibürr elklaza ia angan korale.
9-10Da Lod Solomonka nis münüm inzan okaka tübyónürr oya gyabi angrinüm mogob god bütókgum, a kinga ama kak amaikürr oyaka, Isrrael pamkolpamab God. Solomon oya arüng bóktan kokean arrkrru yarilürr, da wa Solomonka ngürsilüm we bainürr. 11Oyaka we bóktanórr wagó, “Zitülkus ma inzan pamla, ma kürü ⌊alkamül-koke tónggapórrón bóktan⌋ akó kürü arüng bóktan koke amorrandóla, ka sab marü balngomól bwób marükagab ipudo, ama marü zaget olom ekyeno. 12Da ka büsai koke mürrkino ma arrólzanla, zitülkus kürü gyaur marü abdó Deibidka asine. A ka sab marü oloman tangdógab irrkino. 13Ka ma sab blaman oyakagab ini bwób koke ipudo, a ka sab oya darrpan zitül ekyeno alngomólóm, Deibidünbókamde, kürü zaget pam, akó Zerrusalemónbókamde, ka kólbankü ne wirri basirr ipadórró.”
Solomonón Büdül
42Solomon Zerrusalemgab Isrrael 40 pailüm alngomól yarilürr. 43Wa nóma nurrótókórr, oya gapók oya ab Deibidün Basirrdü ilüngóp. Oya olom Rreoboam kingüm bainürr oya pabodó.
Tugup bóktan: Rreoboam wata Zuda zitül akó Benzamin zitül nolngomólólórr. Ngibürr Isrrael zitüla oyaka kak semónóp. Zerroboam ibü kingüm bainürr.
Rreoboamón balngomól kakóm, ngibürr kinga Zuda pamkolpam idi balngomól kwarilürr kókó Asa kingüm bainürr.
Currently Selected:
1 King 11: TOF
Highlight
Share
Compare
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
