Hechos 1
1
Je̱'e̱ Espíritu Santo mu̶dyiibu̶ je̱'e̱ Dios y'awaanu̶u̶yu̶ñ
1Ma je̱'e̱ jayu̶jpu̶ naky, mu̶gu'ug Teófilo, tu̶ du'un ku̶xyu̶ nyajnijayu̶'u̶y neby je̱'e̱ Jesús tyuuñu̶ñ, y du'un neby aga'an yaj'u̶xpu̶jktzonda'agyu̶ñ, 2u̶xtu̶ koonu̶ tzajpjooty pya'ttu̶gu̶u̶y. Ka'anu̶ najty tzajpjooty pya'ttu̶gu̶'u̶y, chi mu̶u̶d je̱'e̱ Espíritu Santo myu̶k'ajtu̶ñ je̱'e̱ y'apóstolestu̶jk ane̱'e̱mgu̶xy tii mu̶baad tuungu̶xyu̶ñ, je̱'e̱ mu̶dyiibu̶ najty tu̶ win'ixyu̶ñ, je̱'e̱ mu̶dyiibu̶ je̱'e̱ y'ayuuk tyu̶y'ajt kapxwa'kxu̶gu̶xu̶ñ. 3Ko najty je̱'e̱ Jesús tu̶ y'o'ogy, chi ka'anaag'ook ñayyajni'igu̶xu̶'ku̶ ma je̱'e̱ y'apóstolestu̶jku̶ñ. Y kujuxytyikxy xyu̶u̶ ñayyajni'igu̶xu̶'ku̶ oy wa'adz ko najty jyuugyu̶ch ma je̱' ajku̶xyu̶ñ y nan yajmu̶dmu̶dyaaku̶gu̶xy je̱'e̱ Dios y'ane̱'e̱mu̶ñ.
4Ko najty jim tu'ugmúky y'ijtku̶xyñu̶ mu̶u̶d je̱'e̱ Jesús, chi je̱'e̱ Jesús y'apóstolestu̶jk nu̶maay ko ka'p jim Jerusalén mu̶baad chóngu̶xy. Chi ñu̶maayu̶ ajku̶xy:
—Ja'ay'e̱jxku̶x je̱'e̱ tu̶u̶bu̶ u̶u̶ch je̱'e̱ nDeedy xyajwinwaanu̶u̶ygyu̶xy, je̱'e̱ mu̶dyiibu̶ nyajmu̶dmu̶dyaaku̶ñ ajku̶xy. 5Jaanch je̱'e̱ Juan Bautista ja'ay yajnu̶u̶bejty mu̶u̶d je̱'e̱ nu̶u̶, peru̶ tzojku̶ miich je̱'e̱ Espíritu Santo xy'adu̶gu̶'u̶wu̶ch xyjyoottu̶gu̶'u̶wu̶ch ajku̶xy.
Jesús tzajpjooty pya'ttu̶gu̶u̶yñu̶
6Mu̶dyiibu̶ najty jim ni'amugu̶'u̶ yajpaatku̶xpu̶ñ mu̶u̶d je̱'e̱ Jesús, chi yajtu̶u̶gu̶xy:
—Windzú̶n, ¿nej mbu̶da'age̱e̱mby je̱'e̱ ane̱'e̱mu̶ñ jada'achám neby je̱'e̱ Israel ja'ay ja'adu'uk'ook y'ane̱'e̱mgu̶xu̶chu̶ñ?
7Chi je̱'e̱ Jesús y'adzooy:
—Miich, ka'p miich xypyaatku̶xy mnejwu̶u̶ygyu̶xu̶ch je̱'e̱ xu̶u̶ je̱'e̱ tiempo mu̶naa naty tu̶ myu̶baad'ajtnu̶, mu̶naa je̱'e̱ Dios Teedy tijaty tuna'añ, je̱' je̱'e̱ ane̱'e̱mu̶ñ tu'kpajk mu̶dajtp mu̶naa tijaty tuna'añu̶ñ, 8peru̶ ko naty je̱'e̱ Espíritu Santo chu̶naaydyaakpú̶ky ma je̱'e̱ mjoot mwinma'añ ajku̶xyu̶ñ, mbaatku̶xu̶py je̱'e̱ mu̶k'ajt y chi mdzóngu̶xu̶ch y mnú̶kxyu̶ch xyñidu̶y'ajt'ajtku̶xy ya Jerusalén, y ku̶xyu̶ je̱'e̱ Judea naaxjooty y jim Samaria, y u̶xtu̶ mabaad je̱'e̱ naaxwiimbu̶ kyugu̶xu̶'u̶yu̶ñ.
9Tu̶ najty du'un yajnu̶maaygyu̶xy y jim najty wyindu̶kxnaaygyu̶xy, chi je̱'e̱ Jesús yajpa'ttu̶gu̶u̶yu̶nu̶, y chi je̱'e̱ jok ye̱e̱g myiiñ mu̶dyiibu̶ yajni'idu̶gooydyaayu̶ju̶ñ y ka'p ok'ijxku̶xnu̶. 10Du'un najty tzajpjooty jyanchpa't'ijxku̶xy neby je̱'e̱ Jesús yajpa'ttu̶gu̶u̶yu̶ju̶ñ, mu̶'it je̱'e̱ ja'ay nime̱tzk ñayyajni'igu̶xu̶'ku̶ ma je̱' ñamu̶jk ajku̶xyu̶ñ poob wit mu̶u̶d, 11y chi ñu̶maayu̶ ajku̶xy:
—Galilea ja'ay ajku̶xy, ¿Ti ko tzajpjooty mjanchpa't'ijxku̶xy? Yu̶'u̶ Jesús mu̶dyiibu̶ tu̶ y'ity mu̶u̶d miich ajku̶xy y tu̶ yajnu̶kxyii tzajpjooty, minaamb je̱'e̱ ja'adu'ook du'un neby tu̶ m'ijxku̶xyu̶ñ tu̶ pya'ttu̶gu̶'u̶y.
Matías yajwin'íxy ko je̱'e̱ Judas tyuung wan ju̶jptu̶gu̶yu̶u̶yu̶
12Mu̶'it je̱'e̱ Jesús y'apóstolestu̶jk chóngu̶xnu̶ ma je̱'e̱ kopt mu̶dyiibu̶ xu̶u̶'ajtpu̶ñ Olivos, y wyimbijtku̶xnu̶ jim Jerusalén: ka'p jyu̶gué̱mu̶ch, mu̶baad pokxyxyu̶u̶#1.12 pokxyxyu̶u̶: Adaa Sábado du'un tyijpy yaj'yo'oy du'un neby je̱'e̱ Moisés kyu'utujku̶ñ y'ane'emyu̶ñ. 13Ko jya'tku̶xy ma je̱'e̱ kajptu̶ñ, chi pye̱jtku̶xy ma je̱'e̱ ni'ibe̱ttu̶jku̶ñ, ma najty tu̶ jya'ttaakku̶xyu̶ñ. Jim najty je̱'e̱ Pedro, je̱'e̱ Juan, je̱'e̱ Santiago, je̱'e̱ Andrés, je̱'e̱ Felipe, je̱'e̱ Tomás, je̱'e̱ Bartolomé, je̱'e̱ Mateo, je̱'e̱ Santiago je̱'e̱ Alfeo y'ung, je̱'e̱ Simón je̱'e̱ Celote, y je̱'e̱ Judas je̱'e̱ Santiago y'ung.#1.13 Nije̱' wiingpu̶ versión myu̶na'añ: Judas, je̱'e̱ Santiago pyuya'ay. 14Nigu̶xyu̶ najty jim je'emy yajpaatku̶xy tu'ugmúky Dios mu̶bu̶jktzoogu̶xy, mu̶u̶d je̱'e̱ Jesús myu̶gue̱'e̱xk ajku̶xy, mu̶u̶d je̱'e̱ María, je̱'e̱ Jesús tyaj, y mu̶u̶d je̱'e̱ wiingpu̶ to'oxyu̶jktu̶jk nandu'un ajku̶xy.
15Je̱'e̱ mu̶'it xu̶u̶ je̱'e̱ mu̶bu̶jkpu̶du̶jk ñayyo'oymyujku̶gu̶xy, jii najty da'a ñaybyaattu̶gu̶xy mu̶go'px ja'a'ípxtu̶ ja'ay. Chi je̱'e̱ Pedro tyu̶naayu̶'ky kujkjooty y ñu̶maayu̶ ajku̶xy: 16“Mu̶gu'uktu̶jk, jatytimyyajkuydyunaamb najty je̱' neby je̱'e̱ Espíritu Santo myu̶naañu̶ñ ma je̱'e̱ ñaky mu̶dyiibu̶ kuja'ay ijtp, ma je̱'e̱ David jaayu̶ñ je̱'e̱ Dios y'ayuuk, ma je̱'e̱ Dios je̱'e̱ Judas nigapxyu̶ñ, je̱'e̱ mu̶dyiibu̶ kudu'u'ajt mu̶naaba je̱'e̱ judío ja'ay je̱'e̱ Jesús majtzku̶xyu̶ñ. 17Je̱'e̱ Judas tu'ugyu̶ najty je̱'e̱ y'ity mu̶u̶d u̶u̶ch ajtu̶m ajku̶xy, y paattu̶p najty je̱'e̱ Dios tyuung ku̶xyu̶ mu̶u̶d u̶u̶ch ajtu̶m ajku̶xy. 18Peru̶ chi je̱'e̱ Judas ñu̶kxy y juuy je̱'e̱ naax tu'ug mu̶u̶d je̱'e̱ myu̶ju'uñ mu̶dyiibu̶ najty tu̶ myo'oyii mu̶u̶d je̱'e̱ jyu̶bu̶kwinma'añ. Chi jim mu̶k'eemby tzijxku'ude̱e̱n kya'ay, chi je̱'e̱ myox pyu̶jy y chi je̱'e̱ tyiinch ku̶xyu̶ pyu̶dzu̶u̶mdaay. 19Ko je̱'e̱ ja'ay du'un nejwu̶u̶ygyu̶xy je̱'e̱ mu̶dyiibu̶ najty jim Jerusalén tzu̶naaygyu̶xpu̶ñ, chi je̱'e̱ naax xu̶u̶mooygyu̶xy Acéldama, je̱'e̱ mu̶dyiibu̶ du'un wimbu̶dzu̶u̶mb ma je̱'e̱ y'ayuuk ajku̶xyu̶ñ: ‘Ne'pty ñaaxjooty.’ 20Je̱' ko du'un jiiby kyuja'ayu̶ch ma je̱'e̱ Salmo nakyu̶ñ:
‘Abak je̱'e̱ tyu̶jk wyu̶'u̶mu̶ch,
y ka'p pu̶n yajtzu̶na'awu̶'u̶ju̶ch.’
Y nandu'un myu̶na'añ:
‘Wiingpu̶ je̱'e̱ tyuung wan tuunu̶xu̶.’
21“Chaa je̱'e̱ ja'ay cham chooñu̶ch ajku̶xy mu̶dyiibu̶ je'emy tu̶ nmu̶dwu̶dijtu̶mu̶ñ ajku̶xy mu̶naaba je̱'e̱ Windzú̶n Jesús najty ya yajpaadyñu̶ mu̶u̶d u̶u̶ch ajtu̶m ajku̶xy, 22mu̶naaba je̱'e̱ Juan yajnu̶u̶bedyii u̶xtu̶ ma xypyuyo'oydyuuttu̶m ajku̶xy ko tzajpjooty pya'ttu̶gu̶u̶y. Tzipku̶xp je̱'e̱ ja'ay wan nidu'ugtu̶ yajwin'íxy y du'un kipxy nidu̶y'ajt'ádu̶ch mu̶u̶d u̶u̶ch ajtu̶m ajku̶xy ko je̱'e̱ Jesús jyuugypyu̶jky.”
23Mu̶'it je̱'e̱ Jesús y'apóstolestu̶jk ja'ay me̱tzk win'ijxku̶xy: tu'ug mu̶dyiibu̶ xu̶u̶'ajtpu̶ñ José, mu̶dyiibu̶ najty yajtijpu̶ñ Barsabás y nan Justo najty yajtijy, y mu̶u̶d je̱'e̱ Matías. 24Y chi je̱'e̱ Dios mu̶bu̶jktzoogu̶xy, myu̶naangu̶xy: “Windzú̶n Dios, miich m'ijxypy mnejwu̶u̶by ku̶xyu̶ je̱'e̱ ja'ay jyoot wyinma'añ, yajni'ixu̶u̶ygyu̶ch ajku̶xy adaa me̱tzkpu̶ ja'ay mu̶dyiibu̶ miich nidu'ugtu̶ tu̶ mwin'ixyu̶ñ, 25wan je̱'e̱ tuung ju̶jptu̶gu̶yu̶'u̶wu̶ch je̱'e̱ apóstol'adyiibyu̶ mu̶dyiibu̶ je̱'e̱ Judas tu̶ yajtu̶góyu̶ñ ko tyuundu̶gooy ko ñu̶kxy ma najty pyaadyiiju̶ñ.”
26Chi je̱'e̱ suerte ijxku̶xy, y je̱'e̱ Matías je̱'e̱ suerte oy ñiga'ayii, y mu̶'ityu̶ je̱'e̱ Matías puwa'agu̶u̶y je̱'e̱ nimajktu'ugpu̶ Jesús y'apóstolestu̶jk ajku̶xy.
Currently Selected:
Hechos 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005