Tito 2
2
Je̱'e̱ oybyu̶ wa'adzpu̶ u̶xpu̶jku̶ñ
1Je̱'e̱ mu̶dyiibu̶ naty miich myaj'u̶xpu̶jkypyu̶ñ, tu'ugyu̶ je̱'e̱ du'un myaj'u̶xpú̶gu̶ch mu̶u̶d je̱'e̱ oybyu̶ wa'adzpu̶ u̶xpu̶jku̶ñ. 2Miich m'u̶u̶wij mgapxwiju̶p je̱'e̱ amu̶jja'aydyu̶jk ajku̶xy ko wan oy tu'uda'agy ja'ay'ajtku̶xy, wan yajwindzu̶gu̶u̶ygyu̶xy y wan wijy kejy ja'ay'ajtku̶xy, wan je̱'e̱ Dios y'ayuuk tyu̶y'ajt tu'ug'aa tu'ugjoot mu̶bu̶jkku̶xy, wan je̱'e̱ jyuugy myu̶gu'ug tzojkku̶xy ju̶wu̶u̶ygyu̶xy y mu̶dajtku̶xu̶ch je̱'e̱ mu̶k'ajt neby mye̱kxtujkku̶xu̶chu̶ñ ma je̱'e̱ tzaachpyu̶ ayo'on paatku̶xy ijxku̶xyu̶ñ. 3Nan timydyu'un je̱'e̱ amu̶jja'aydyo'oxyu̶jktu̶jk wan je̱'e̱ mu̶jpu̶ windzu̶gu̶'u̶ñ yajtuungu̶xy ma je̱'e̱ Diosu̶ñ, y ka'p je̱'e̱ myu̶gu'ugtu̶jk ni'oj niyaaxu̶u̶ygyu̶xu̶ch, nan ka'p anaxy y'u'ugu̶ch jyú̶kxu̶ch ajku̶xy, wan je̱'e̱ oybyu̶ ijxpe̱jt ye̱jkku̶xy. 4Y yajni'ixu̶'u̶wu̶ch je̱'e̱ tzaando'oxyu̶jktu̶jk ajku̶xy neby je̱'e̱ ñiya'aydyu̶jk mu̶baad tzojkku̶xy ju̶wu̶u̶ygyu̶xyu̶ñ y je̱'e̱ y'ung y'ana'k ajku̶xy, 5neby mu̶baad wijy kejy jya'ay'ajtku̶xyu̶ñ, neby mu̶baad oy yajxón chu̶naaygyu̶xy jyugy'ajtku̶xyu̶ñ, neby je̱'e̱ jyu̶u̶n tyu̶jk mu̶baad oy yajxón kweentu̶'ajtku̶xyu̶ñ, neby mu̶baad amu̶gu'ug jya'ay'ajtku̶xyu̶ñ, neby je̱'e̱ ñiya'aydyu̶jk mu̶baad u̶u̶mu̶doogu̶xy kapxymyu̶doogu̶xyu̶ñ, ka'pu̶ je̱'e̱ Dios y'ayuuk tyu̶y'ajt ni pu̶n ni'oj niyaaxu̶'u̶wu̶ch.
6Miich Tito, mjatytimy'u̶u̶wij mjatytimygyapxwiju̶py je̱'e̱ tzugajy'ana'ktu̶jk nandu'un ajku̶xy neby mu̶baad wijy kejy jya'ay'ajtku̶xu̶chu̶ñ, 7y miich ku̶'u̶m mo'o je̱'e̱ oybyu̶ ijxpe̱jt ku̶xyu̶ tii mdimytyuumbyu̶ñ. Ko naty je̱'e̱ myaj'u̶xpú̶ky ajku̶xy, yaj'u̶xpu̶jkku̶x mu̶u̶d ku̶xyu̶ je̱'e̱ oyjyoot oywyinma'añ y tu'uda'agy'ajtu̶ñ. 8Cham mmu̶gápxku̶xy oy yajxón mu̶u̶d je̱'e̱ oygyapxy oymyu̶dya'agy, mu̶dyiibu̶ ka'p mu̶baad pu̶n agapxtukyu̶ñ, y du'un cho'oydyúnu̶ch ajku̶xy pu̶njaty naty xymyu̶dzip'ajtku̶xpu̶ñ y ka'p mu̶baad ju̶bu̶k axu̶u̶g xy'oknigapx xy'oknimu̶dyaaku̶nu̶ ajtu̶m.
9Wingapx ju̶jpkapxu̶'u̶ je̱'e̱ tuumbu̶du̶jk ni'idoogypyu̶ ajku̶xy, wan je̱'e̱ wyindzú̶n wyindaj u̶u̶mu̶doogu̶xy kapxymyu̶doogu̶xy neby naty y'ane̱'e̱mu̶gu̶xyu̶ñ, wan oy yajxón ja'ay'ajtku̶xy y ka'p win'adzow ju̶jp'adzówu̶ch ajku̶xy. 10Y ka'p mye̱e̱dzu̶ch ajku̶xy, wan oy tu'uda'agy ja'ay'ajtku̶xy y wan je̱'e̱ ja'ay du'un ku̶xyu̶ y'ijxu̶gu̶xu̶ch ma je̱'e̱ chu̶naay jyugy'ajtu̶ñ ajku̶xyu̶ñ ko je̱'e̱ Dios y'u̶xpu̶jku̶ñ jyanch'óyu̶ch, u̶u̶ch je̱'e̱ nniwaambu̶ nyajtzookpu̶ ajtu̶m ajku̶xy.
11Dios tu̶ je̱'e̱ myay'ajtu̶ñ xyaj'ijx xyajnejwu̶u̶yu̶m ajku̶xy, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ ma je̱'e̱ naaxwiiñjya'ay ku̶xyu̶ ajku̶xyu̶ñ. 12Y je̱'e̱ Dios myay'ajtu̶ñ, je̱'e̱ xyajnejwu̶u̶by ajtu̶m ko je̱'e̱ ju̶bu̶kwinma'añ mu̶baad n'u̶xmajtzu̶m ajku̶xy y je̱'e̱ mayñaxpu̶ adzojku̶ñ ya naaxwiiñ, y ndzu̶naay njugy'ajtu̶mu̶ch ajku̶xy ya naaxwiiñ mu̶u̶d je̱'e̱ wijy kejypyu̶ joot winma'añ, mu̶u̶d je̱'e̱ tu'uda'agy'ajtu̶ñ y nmu̶duunu̶mu̶ch je̱'e̱ Dios oy yajxón ajku̶xy. 13Ndzu̶naay njugy'ajtu̶mu̶ch ajku̶xy cham nju̶jp'ijxu̶m xi'ig xon du'un neby tu̶ xyajwinwaanu̶u̶yu̶mu̶ñ ajku̶xy ko ja'adu'ook myina'añ ya naaxwiiñ mu̶u̶d je̱'e̱ y'oy'ajt myu̶k'ajtu̶ñ, u̶u̶ch je̱'e̱ nmu̶jpu̶ nDios y nniwaambu̶ nyajtzookpu̶ Jesucristo ajtu̶m ajku̶xy. 14Je̱' naygyu̶'u̶ye̱jku̶ ma je̱'e̱ o'ku̶ñ mu̶u̶d u̶u̶ch kyu̶xpu̶ ajtu̶m ajku̶xy y du'un oy xyaj'awa'adzpu̶dzu̶u̶mu̶m ma je̱'e̱ ju̶bu̶kpu̶ kú̶xyu̶ju̶ñ, y xywyinme̱kxtaayu̶ je̱'e̱ nboky ngu̶dyeey ku̶xyu̶ ajtu̶m ajku̶xy, neby du'un mu̶baad xyjya'ay'ajtu̶m ajku̶xy y nijoot'ajtu̶mu̶ch je̱'e̱ oybyu̶ tuung ajku̶xy.
15Adaaju̶tz je̱' je̱'e̱ mu̶dyiibu̶ je̱'e̱ mu̶bu̶jkpu̶du̶jk myaj'u̶xpú̶gu̶byu̶ñ, myajku'ubú̶gu̶ch ajku̶xy y m'óju̶ch mmu̶gápxu̶ch ajku̶xy mu̶u̶d je̱'e̱ ane̱'e̱mu̶ñ ku̶xyu̶. Ka'p mnayye̱gu̶u̶ju̶ch nu̶kxy pu̶n xykya'amu̶j'íxy xykya'amu̶jpu̶da'agy.
Currently Selected:
Tito 2: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005