Romanos 15

Je̱' mdúnu̶py je̱'e̱ mu̶dyiibu̶ je̱'e̱ mmu̶gu'ug kyu'umaaybyu̶ñ y ka'p jye̱'e̱ju̶ch je̱'e̱ mu̶dyiibu̶ miich ku̶'u̶m mgu'umaaybyu̶ñ

1U̶u̶ch ajtu̶m ajku̶xy je̱'e̱ mu̶dyiibu̶ je̱'e̱ mu̶bu̶jku̶ñ mu̶j nmu̶dajtu̶mbyu̶ñ ajku̶xy, tzu̶k pube̱jtu̶m ajku̶xy je̱'e̱ mu̶dyiibu̶ ame̱tzk jootme̱tzku̶u̶ygyu̶xpu̶ñ, je̱'e̱ mu̶dyiibu̶ je̱'e̱ myu̶bu̶jku̶ñ we̱e̱nu̶ mu̶dajtku̶xpu̶ñ, y ka'p je̱'e̱du̶'ajty nmu̶joottu̶gooyu̶mu̶py ajku̶xy je̱'e̱ mu̶dyiibu̶ ku̶'u̶m ngu'umáyu̶mbyu̶ñ ajku̶xy. 2Je̱' mu̶baad nigu̶xyu̶ nduunu̶m ajku̶xy je̱'e̱ mu̶dyiibu̶ je̱'e̱ nmu̶gu'ug kyu'umaaygyu̶xu̶byu̶ñ y nduunu̶mu̶ch je̱'e̱ oybyu̶ ajku̶xy, je̱'e̱ mu̶dyiibu̶ nyajmu̶dzojku̶mbyu̶ñ ajku̶xy, y wan je̱'e̱ myu̶bu̶jku̶ñ du'un jakpaatku̶xu̶ch. 3Je̱' ko nan ka'p je̱'e̱ Cristo ku̶'u̶m ñaygyu'umaayu̶; ni'igyu̶ je̱'e̱ du'un yajkuydyuuñ ma je̱'e̱ju̶ñ ma je̱'e̱ Dios ñaky du'un myu̶na'añu̶ñ: “Neby je̱'e̱ ja'ay xyaj'ama't xyajjootma'tku̶xyu̶ñ ko xy'ojku̶xy xyaaxku̶xy nan u̶u̶chpyaad je̱'e̱ xypyaady.” 4Ku̶xyu̶ mu̶dyiibu̶ jékyu̶p yajnigápx yajnimu̶dyaak ma je̱'e̱ Dios ñakyu̶ñ, mu̶u̶d u̶u̶ch kyu̶xpu̶ ajtu̶m ajku̶xy je̱'e̱ du'un yajkujaay, wan du'un n'ijx nnejwu̶u̶yu̶mu̶ch ajku̶xy, wan je̱'e̱ nme̱kxtujku̶ñ xymyooyu̶mu̶ch ajku̶xy y nbaattu̶mu̶ch je̱'e̱ jootkujk'ajtu̶ñ ajku̶xy ko naty nej njajt n'abe̱jtu̶m ajku̶xy, y mu̶'íttu̶tz nbaattu̶mu̶ch ajku̶xy je̱'e̱ mu̶dyiibu̶ nju̶jp'ijxu̶mbyu̶ñ ajku̶xy. 5Y je̱'e̱ Dios, je̱'e̱ mu̶dyiibu̶ je̱'e̱ me̱kxtujku̶ñ y je̱'e̱ jootkujk'ajtu̶ñ ye̱jkpu̶ñ, wan xypyube̱jt xypyudu̶gu̶u̶ygyu̶xy neby mu̶baad tu'ugyu̶ oy yajxón mdzu̶naay mjugy'ajtku̶xyu̶ñ amíñ u̶xyu̶py, du'un neby je̱'e̱ u̶xpu̶jku̶ñ y je̱'e̱ ijxpe̱jt jim mbaatku̶xyu̶ñ ma je̱'e̱ Cristo Jesúsu̶ñ, 6wan nigu̶xyu̶ tu'ugyu̶ mja'aymye̱jtz m'o'owu̶dajtku̶xu̶ch je̱'e̱ Dios y je̱'e̱ nWindzú̶n Jesucristo tyeedy ajtu̶m ajku̶xy.

Jesucristo y'ayuuk tyu̶y'ajt yajkapxwa'kxy ma je̱'e̱ ka'pu̶ jyudíoja'ayu̶chu̶ñ ajku̶xy

7Y du'unu̶tz, naygyu'ubu̶jku̶gu̶x amíñ u̶xyu̶py, du'un neby je̱'e̱ Cristo miich nandu'un xykyu'ubu̶jkku̶xyu̶ñ, wan je̱'e̱ Dios du'un ku'umáy y'ídu̶ch. 8Cham nnu̶maaygyu̶xy ko je̱'e̱ judío ja'ay je̱'e̱ Cristo ñimiin ko pube̱daangu̶xy, neby je̱'e̱ Dios du'un kuydyúnu̶chu̶ñ je̱'e̱ mu̶dyiibu̶ je̱'e̱ nmu̶j'áp nmu̶jteedy jékyu̶p yajwinwaanu̶u̶yu̶ñ y yajni'ixu̶'u̶waangu̶xy du'un ko je̱'e̱ Dios jaanch kuydyúñ je̱'e̱ mu̶dyiibu̶ y'awanu̶u̶ybyu̶ñ. 9Nan miin nandu'un neby je̱'e̱ ka'pu̶ jyudíoja'ayu̶ch je̱'e̱ Dios ja'aymye̱jtz o'owu̶dajtku̶xu̶chu̶ñ je̱' ko tu̶ pya'a''ayoowu̶gu̶xy, du'un neby je̱'e̱ Dios ñaky myu̶na'añu̶ñ:

“Paady miich nja'aymyé̱tz n'o'owu̶data'añ ma je̱'e̱ ka'pu̶ jyudíoja'ayu̶chu̶ñ ajku̶xy,

y nwin'u̶we̱e̱mby nwinya'axe̱e̱mby miich;

n'u̶bada'añ ngapxpada'añu̶ch je̱'e̱ mxu̶u̶.”

10Nandu'un je̱'e̱ Dios ñaky wiingtuum myu̶na'añ:

“¡Xoongu̶x ijtku̶x miich, je̱'e̱ ka'pu̶ jyudíoja'ayu̶ch ajku̶xy niguipxy mu̶u̶d je̱'e̱ Dios jya'ay ajku̶xy!”

11Y nandu'un je̱'e̱ Dios ñaky wiingtuum myu̶na'añ:

“Miich ka'pu̶ jyudíoja'ayu̶ch ajku̶xy y ku̶xyu̶ je̱'e̱ naaxwiiñjya'ay ¡ja'aymye̱jtz o'owu̶dajtku̶x je̱'e̱ Windzú̶n Dios!”

12Nandu'un je̱'e̱ Isaías je̱'e̱ Dios ñaky kujaayu̶:

Ma je̱'e̱ Isaí y'ok'ung y'ok'ana'ku̶ñ tu'ug pyu̶dzu̶ma'añ je̱'e̱ mu̶dyiibu̶ ane̱'e̱mu̶bu̶ñ ma je̱'e̱ ka'pu̶ jyudíoja'ayu̶chu̶ñ,

y je̱' y'a'ix jyu̶jp'íxu̶py ajku̶xy myooyu̶gu̶xu̶ch je̱'e̱ oy'ajtu̶ñ.”

13Wan je̱'e̱ Dios, je̱'e̱ mu̶dyiibu̶ yaj'a'ijxp yajju̶jp'ijxpu̶ñ; xyajjootkugu̶u̶ygyu̶xy y xymyooygyu̶xu̶ch je̱'e̱ jootkujk'ajtu̶ñ miich je̱'e̱ mu̶dyiibu̶ je̱' mu̶bu̶jkku̶xpu̶ñ, y nan xymyooygyu̶xu̶ch mu̶j ku̶je̱e̱ neby je̱'e̱ m'a'ijx mju̶jp'ijxku̶xu̶chu̶ñ mu̶u̶d je̱'e̱ Espíritu Santo myu̶k'ajtu̶ñ.

14“Mu̶gu'uktu̶jk ajku̶xy, u̶u̶ch nmu̶u̶du̶ch je̱'e̱ tu̶y'ajt ko miich je̱'e̱ oyjya'ay'ajtu̶ñ mduungu̶xy y mmu̶dajtku̶xy je̱'e̱ wij'ajt ke̱j'ajtu̶ñ ku̶xyu̶, y mjajtku̶xypy neby amíñ u̶xyu̶py mnaywyingapx mnayjyu̶jpkapxu̶u̶yu̶gu̶xu̶chu̶ñ; 15peru̶ cham adaa naky nyajnijayu̶u̶ygyu̶xy. Nnu̶maaygyu̶xy tu̶y tu'uda'agy nyajja'aymye̱jtzku̶xy je̱'e̱ ayuuk tu'ug me̱tzk, ka'pu̶ mja'aydyu̶gooygyu̶xu̶ch. Nyajja'aymye̱jtzku̶xy adaa du'un; je̱'e̱ Dios u̶u̶ch je̱'e̱ du'un tu̶ xyajni'ipú̶ky je̱' ko u̶u̶ch xypya'a''ayóy, 16neby u̶u̶ch je̱'e̱ Jesucristo nmu̶dúnu̶chu̶ñ, mu̶u̶d je̱' gyu̶xpu̶ y'oy'ajtu̶ñ ajku̶xy je̱'e̱ mu̶dyiibu̶ ka'p jyudíoja'ayu̶chu̶ñ ajku̶xy. Je̱'e̱ tuung mu̶dyiibu̶ u̶u̶ch nduumbyu̶ñ du'un je̱'e̱ neby je̱'e̱ teedy tyuungu̶ñ, y je̱'e̱ je̱' ko u̶u̶ch je̱'e̱ ayuuk tu̶y'ajt ngapxwa'kxy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ je̱'e̱ Dios y'awanu̶u̶ybyu̶ñ, neby je̱'e̱ Dios je̱'e̱ ja'ay ku'ubú̶ku̶chu̶ñ je̱'e̱ ka'pu̶ jyudíoja'ayu̶ch ajku̶xy, du'un neby je̱'e̱ yojxu̶ñ je̱'e̱ mu̶dyiibu̶ je̱'e̱ Dios kyu'umaaybyu̶ñ, je̱'e̱ mu̶dyiibu̶ je̱'e̱ jyoot wyinma'añ tu̶ yajwaatzu̶yu̶ju̶ñ ajku̶xy mu̶u̶d je̱'e̱ Espíritu Santo.

17Je̱' ko nmu̶bu̶jkypyu̶ch je̱'e̱ Cristo Jesús, paady u̶u̶ch jootkujk nayjyu̶wu̶'u̶yii ko u̶u̶ch je̱'e̱ Dios tyuung nduunu̶. 18Je̱' ko je̱'e̱du̶'ajtyu̶ch u̶u̶ch je'eyu̶ nmu̶dyaakypy je̱'e̱ mu̶dyiibu̶ je̱'e̱ Cristo ku̶'u̶m tu̶ tuñ ma u̶u̶chu̶ñ, neby u̶u̶ch je̱'e̱ ayuuk tu̶y'ajt ngapxwa'kxu̶chu̶ñ ma je̱'e̱ ka'pu̶ jyudíoja'ayu̶chu̶ñ ajku̶xy neby je̱'e̱ Dios kapxymyu̶doogu̶xu̶chu̶ñ; ka'p u̶u̶ch yam je̱' nmu̶dyaakypy nebyjyaty je̱'e̱ wiingpu̶ ja'ay tu̶ tyuungu̶xyu̶ñ. Tu̶ u̶u̶ch je̱'e̱ ayuuk tu̶y'ajt nyajmu̶bu̶jkku̶xy ko u̶u̶ch tu̶ nyajwingapxu̶u̶ygyu̶xy y ko u̶u̶ch tu̶ xy'ijxku̶xy je̱'e̱ mu̶dyiibu̶ u̶u̶ch tu̶ nduñu̶ñ, 19mu̶u̶d je̱'e̱ ijxpe̱jt y mu̶jwinma'añ myu̶k'ajtu̶ñ y mu̶u̶d je̱'e̱ Dios y'Espíritu myu̶k'ajtu̶ñ. Y du'un u̶u̶ch tu̶ nyajtu'uyo'oy oy yajxón; tu̶ ngapxwa'kxyu̶ch je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ Cristo kyu̶xpu̶; nyajtzondaakyu̶ch jim Jerusalén, y nwu̶dijttaayu̶ch xii yaa u̶xtu̶ jimbaad ma je̱'e̱ Iliria naaxjootyu̶ñ. 20Y du'un u̶u̶ch tu̶ nmu̶joottu̶góy tu̶ ngapxwa'kxyu̶ch je̱'e̱ aanu̶mu̶ ni'idzooku̶ñ ma je̱'e̱ Cristo y'ayuuk tyu̶y'ajt najty ka'p nimu̶naa yajmu̶dóyñu̶ju̶ñ, ka'p u̶u̶ch je̱'e̱ naax kajpt tu̶ ninu̶kxy ma je̱'e̱ wiingpu̶ ja'ay je̱'e̱ Cristo y'ayuuk tyu̶y'ajt najty tu̶ yajtzondaaku̶ju̶ñ ajku̶xy. 21Je̱' ko du'un je̱'e̱ Dios ñaky myu̶na'añ:

“Myu̶doogu̶xu̶py je̱'e̱ ja'ay Cristo y'ayuuk tyu̶y'ajt je̱'e̱ mu̶dyiibu̶ najty ka'p nimu̶naanu̶ mu̶doogu̶xyñu̶ju̶ñ ko yajnimu̶dya'agy;

wyinju̶wu̶u̶ygyu̶xu̶py je̱'e̱ ja'ay Cristo y'ayuuk tyu̶y'ajt je̱'e̱ mu̶dyiibu̶ najty ka'p nimu̶naanu̶ mu̶doogu̶xyñu̶ju̶ñ.”

Pablo wyinmay ñu̶kxa'añ jim Roma

22Ko u̶u̶ch je̱'e̱ Cristo y'ayuuk tyu̶y'ajt xii yaa ngapxwa'kxu̶yu̶, paady u̶u̶ch ka'p nnu̶kxyñu̶ ma miich ajku̶xyu̶ñ, janch may'ook u̶u̶ch du'un tu̶ nja'aniwinmayu̶'u̶y nnu̶kxa'añu̶ch jim. 23Peru̶ chi jada'achám, tu̶ u̶u̶ch je̱'e̱ nduung nyajmáy ma adayaaba naaxjootyu̶ñ, y je̱' ko jékyu̶p u̶u̶ch nja'atu̶gu̶yñu̶kxaambu̶, nu̶kx ngu'ix nmu̶gapxaangu̶xy. 24Chamnu̶ u̶u̶ch da'a jim nnaxu̶'u̶wu̶ch ko u̶u̶ch naty jim España nnu̶kxy. Y ko naty tu̶ n'okmu̶gapx n'okku'ijxku̶xy, nju̶jp'ijxypyu̶ch xypyube̱jtku̶xu̶ch miich neby u̶u̶ch njaktu'uyo'oy'adu̶'u̶dzu̶chu̶ñ. 25Peru̶ jayu̶jp u̶u̶ch jim Jerusalén n'oknu̶kxa'añ; nú̶kxyu̶ch je̱'e̱ meeñ we̱e̱nu̶ nnajtzkonu̶'u̶wa'añ ma je̱'e̱ mu̶bu̶jkpu̶du̶jk ajku̶xyu̶ñ je̱'e̱ mu̶dyiibu̶ jim tzu̶naaygyu̶xpu̶ñ. 26Je̱' ko tu̶ je̱'e̱ Macedonia y je̱'e̱ Acaya mu̶bu̶jkpu̶du̶jk meeñ we̱e̱nu̶ yajmujkku̶xy, ku̶'u̶m je̱'e̱ tu̶ yajmujkku̶xy y ka'p du'un u̶u̶ch tu̶ nnu̶maaygyu̶xy y ke̱xaangu̶xy ma je̱'e̱ mu̶bu̶jkpu̶du̶jk ayoobu̶du̶jk ajku̶xyu̶ñ je̱'e̱ mu̶dyiibu̶ jim Jerusalén tzu̶naaygyu̶xpu̶ñ. 27Ku̶'u̶m je̱'e̱ tu̶ yajmujkku̶xy y ka'p du'un u̶u̶ch tu̶ nnu̶maaygyu̶xy, y oy je̱'e̱ du'un ko du'un pube̱jtku̶xy, je̱' ko jim je̱'e̱ ka'pu̶ jyudíoja'ayu̶ch je̱'e̱ tu̶y'ajt tu̶ paatku̶xy ma je̱'e̱ judío ja'ay ajku̶xyu̶ñ, y paady paattu̶p ajku̶xy pube̱jtku̶xu̶ch je̱'e̱ judío ja'ay ajku̶xy. 28Y du'unu̶tz ko u̶u̶ch naty je̱'e̱ meeñ oy jim Jerusalén tu̶ nyeky ma je̱'e̱ mu̶bu̶jkpu̶du̶jku̶ñ, mu̶'it u̶u̶ch España nnu̶kxa'añ, y jim tzojku̶ ngu'ijx nmu̶gápxku̶xu̶ch ko u̶u̶ch naty jim nnaxu̶'u̶y. 29Nnejwu̶u̶ybyu̶ch wa'adzu̶ ko u̶u̶ch naty jim nnu̶kxy ma miich ajku̶xyu̶ñ xykyuwa'an xykyunúkxu̶bu̶ch je̱'e̱ Cristo mu̶j ku̶je̱e̱, ko u̶u̶ch naty je̱'e̱ y'ayuuk tyu̶y'ajt ngapxwa'kxu̶ maa miich ajku̶xyu̶ñ.

30“Mu̶gu'uktu̶jk, mu̶u̶d je̱'e̱ Jesucristo kyu̶xpu̶ y mu̶u̶d je̱'e̱ tzojku̶ñ ju̶wu̶u̶yu̶ñ je̱'e̱ mu̶dyiibu̶ je̱'e̱ Espíritu xymyooyu̶mbu̶ñ ajku̶xy; cham nmu̶nukxtaakku̶xy, pube̱jt pudu̶gu̶u̶ygyu̶ch ajku̶xy, mu̶bu̶jktzoogu̶x je̱'e̱ Dios mu̶u̶d u̶u̶ch kyu̶xpu̶. 31Mu̶bu̶jktzoogu̶x je̱'e̱ Dios wan u̶u̶ch xyñiwa'an xykyuwa'anu̶ch ma je̱'e̱ ja'ay ajku̶xy je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶jkku̶xyu̶ñ jim Judea, y wan u̶u̶ch je̱'e̱ meeñ jim Jerusalén oy nmu̶ja'adu̶ch ma je̱'e̱ mu̶bu̶jkpu̶du̶jku̶ñ y oy yajxón ku'ubu̶jkku̶xu̶ch, 32wan u̶u̶ch jim xi'ig xon nja'adu̶ch, pu̶nu̶ je̱'e̱ Dios naty du'un tzojkp; ngu'ijx nmu̶gápxku̶xu̶ch jim y njootkugu̶'u̶wu̶chu̶ch ko naty n'ijxku̶xy. 33Wan je̱'e̱ Dios je̱'e̱ mu̶dyiibu̶ je̱'e̱ jootkujk'ajtu̶ñ ye̱jkpu̶ñ yajpaady ma miich nigu̶xyu̶ ajku̶xyu̶ñ. Jaanch adaa du'un.

Currently Selected:

Romanos 15: MIXE

Highlight

Copy

Compare