Romanos 13

1Nigu̶xyu̶ je̱'e̱ tuungmu̶u̶dpu̶du̶jk kapxymyu̶doogu̶x je̱'e̱ mu̶dyiibu̶ je̱'e̱ Dios tu̶ pu̶da'agyu̶ñ. Je̱' ko ka'p je̱'e̱ tuungmu̶u̶dpu̶ jii ni tu'ug mu̶dyiibu̶ je̱'e̱ Dios ka'p tu̶ pu̶da'agyu̶ñ; y je̱'e̱ mu̶dyiibu̶ jii ajku̶xy, je̱'e̱ Dios je̱'e̱ tu̶ pyu̶daaku̶gu̶xy. 2Y du'unu̶tz pu̶n je̱'e̱ tuungmu̶u̶dpu̶du̶jk ka'p kapxymyu̶doogu̶xyu̶ñ, je̱' naty je̱'e̱ du'un kya'akapxymyu̶dooby je̱'e̱ mu̶dyiibu̶ je̱'e̱ Dios tu̶ pu̶da'agyu̶ñ. Y ku̶xyu̶ pu̶njaty ka'p kyapxymyu̶doogu̶xyu̶ñ yajtzaachtyuungu̶xu̶p je̱'; 3je̱'e̱ tuungmu̶u̶dpu̶du̶jk ka'p je̱'e̱ jii pyaadyu̶ch ajku̶xy neby je̱'e̱ ja'ay chu̶gu̶u̶yu̶gu̶xu̶ch je̱'e̱ mu̶dyiibu̶ je̱'e̱ oybyu̶ tuungu̶xpu̶ñ, paady je̱'e̱ jii ajku̶xy neby je̱'e̱ ja'ay chu̶gu̶u̶yu̶gu̶xu̶ch je̱'e̱ mu̶dyiibu̶ je̱'e̱ ju̶bu̶kpu̶ tuungu̶xpu̶ñ. Mdzu̶na'a mjugy'adaamb jootkujk y ka'p je̱'e̱ tuungmu̶u̶dpu̶du̶jk naty maa mdzu̶gu̶'u̶y mju̶wu̶'u̶y. Pues ja'ay'át oy yajxón y mu̶'it je̱'e̱ tuungmu̶u̶dpu̶du̶jk xykyu'umáyu̶ch ko oy yajxón mja'ay'áty, 4je̱' ko Dios je̱'e̱ tu̶ pyu̶daaku̶gu̶xy mu̶u̶d miich kyu̶xpu̶ m'oy'ajtu̶ñ ajku̶xy. Peru̶ pu̶nu̶ mduundu̶gooby, mu̶'íttu̶tz je̱'e̱ tuungmu̶u̶dpu̶du̶jk mdzu̶gu̶'u̶wu̶ch, je̱' ko ka'p je̱'e̱ tuungmu̶u̶dpu̶du̶jk nigoo ñi'ituungmu̶u̶du̶ch, Dios je̱'e̱ tu̶ pyu̶da'agyii ko je̱'e̱ ja'ay tzaachtyúnu̶ch pu̶njaty je̱'e̱ ju̶bu̶kpu̶ tuumbu̶ñ. 5Paadyu̶tz, jatytimypyaattu̶p mgapxymyu̶doogu̶xu̶ch je̱'e̱ tuungmu̶u̶dpu̶du̶jk, ka'p pyaadyu̶ch ka'pu̶ myajtzaachtyuungu̶xu̶ch, kapxymyu̶doogu̶x wan je̱'e̱ m'aa mjoot du'un tu'uda'agy mmu̶dajtku̶xu̶ch. 6Paady miich mnayñigu'ube̱jttuuttu̶gu̶xy, je̱' ko je̱'e̱ Dios je̱'e̱ tuungmu̶u̶dpu̶du̶jk tu̶ pu̶da'agy, y je̱' je̱'e̱ ñi'igu̶'u̶tuung'ajtypy ajku̶xy.

7Mu̶gube̱jtku̶x nidu'ug nidu'ug neby pyadyiiju̶ñ; je̱'e̱ mu̶dyiibu̶ je̱'e̱ kajpt ajuyu̶'u̶ñ yajmujkpu̶ñ, mu̶gube̱jtku̶x ye̱jkku̶x je̱'e̱ m'ajuyu̶'u̶ñ. Je̱'e̱ mu̶dyiibu̶ je̱'e̱ ni'igube̱jttuutk yajmujkpu̶ñ, mu̶gube̱jtku̶x ye̱jkku̶x je̱'e̱ mni'igube̱jttuutk; je̱'e̱ mu̶dyiibu̶ mu̶baad mwindzu̶gu̶u̶ygyu̶xy, windzu̶gu̶u̶ygyu̶x; je̱'e̱ mu̶dyiibu̶ mu̶baad mdzojkku̶xy mgu'umaaygyu̶xy, tzojkku̶x ku'umaaygyu̶x.

8Ka'p ni pu̶n mmu̶nukxy'ajtku̶xy, naychojk nayjyu̶wu̶u̶yu̶gu̶x amíñ u̶xyu̶py; je̱' ko je̱'e̱ mu̶dyiibu̶ je̱'e̱ myu̶gu'ug tzojkp ju̶wu̶u̶ybyu̶ñ tu̶ naty je̱'e̱ Dios y'ane̱'e̱mu̶ñ du'un ku̶xyu̶ kuydyuundaayu̶ neby y'ane'emyu̶ñ. 9Du'un je̱'e̱ Dios y'ane̱'e̱mu̶ñ myu̶na'añ: “Ka'p je̱'e̱ wiingpu̶ to'oxyu̶jk mmu̶dtuundu̶góyu̶ch, ka'p mja'ayyaj'o'ogu̶ch, ka'p mme̱e̱dzu̶ch,#13.9 Nije̱' jaaybyu̶du̶jk myu̶naangu̶xy yaa: ka'p je̱'e̱ mmu̶gu'ug mni'iwaambé̱du̶ch. ka'p je̱'e̱ mmu̶gu'ug m'adzojkku̶yu̶ch tii myu̶dajtypyu̶ñ,” peru̶ adayaaba y je̱'e̱ jakwiingpu̶ Dios y'ane̱'e̱mu̶ñ yajwinju̶wu̶u̶by adaa du'un mu̶u̶d je̱'e̱ mu̶dyiibu̶ du'un mu̶naambu̶ñ: “Tzok ju̶wu̶'u̶ je̱'e̱ mmu̶gu'ug du'un neby miich ku̶'u̶m mnaychogyii mnayjyu̶wu̶'u̶yiiju̶ñ.” 10Pu̶n je̱'e̱ tzojku̶ñ mu̶dajtpu̶ñ, ka'p je̱'e̱ myu̶gu'ug mu̶duundu̶góy; y du'unu̶tz ko je̱'e̱ tzojku̶ñ mu̶dádu̶ch mu̶'it je̱'e̱ Dios y'ane̱'e̱mu̶ñ naty du'un wa'adzu̶ tu̶ kuydyuundaayu̶.

11Kweentu̶tuungu̶x adaa ku̶xyu̶ je̱'e̱ xu̶u̶ tiempo ma yam ndzu̶naay njugy'ajtu̶mu̶ñ ajku̶xy, y nejwu̶u̶ygyu̶x ko tu̶ je̱'e̱ hooru̶ paatnu̶ mu̶naa je̱'e̱ mjoot mwinma'añ mu̶baad myajmiin myajme̱jtzku̶xyu̶ñ. Je̱' ko cham tu̶ tyimywyingoonu̶ mu̶naa je̱'e̱ aanu̶mu̶ ni'idzooku̶ñ nbadaanu̶mu̶ñ ajku̶xy ni'igu̶ ka'p jékyu̶p, mu̶naa je̱'e̱ ayuuk tu̶y'ajt nmu̶bu̶jku̶mu̶ñ ajku̶xy. 12Ka'pxnu̶py je̱'e̱ xu̶u̶ tiempo, y tyimyajmu̶baad'ajtnu̶py je̱'e̱ Dios, paady tzu̶k u̶xmajtzu̶nu̶ ajku̶xy je̱'e̱ ju̶bu̶kpu̶, je̱'e̱ mu̶dyiibu̶ je̱'e̱ ja'ay tyuungu̶xypyu̶ñ je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p nejwu̶u̶ygyu̶xyu̶ñ, tzu̶k je̱'e̱ ju̶bu̶ktzu̶naay ju̶bu̶kjugy'ajtu̶ñ yajtu̶gajtzu̶m ajku̶xy y tzu̶k tzu̶naay jugy'ajtu̶m ajku̶xy mu̶u̶d je̱'e̱ Dios y'ayuuk tyu̶y'ajt, du'un neby je̱'e̱ tziptuumbu̶tu̶jk tyuumbe̱jt yajtu̶gajtzku̶xyu̶ñ mu̶dyiibu̶ mu̶u̶d chiptuungu̶xyu̶ñ. 13Tzu̶k tu'uda'agy ja'ay'ajtu̶m ajku̶xy, du'un neby je̱'e̱ ja'ay jya'ay'ajtku̶xyu̶ñ je̱'e̱ mu̶dyiibu̶ je̱'e̱ Dios y'ayuuk tyu̶y'ajt mu̶bu̶jkku̶xpu̶ñ. Ka'p m'ajoknu̶u̶'ajtku̶xu̶ch y ka'p je̱'e̱ xu̶u̶ tzuu mbawu̶dijtku̶xy ma je̱'e̱ ja'ay kyaaygyu̶xy y'uukku̶xyu̶ñ, ka'p je̱'e̱ wiingpu̶ to'oxyu̶jk mmu̶dtuundu̶gooygyu̶xu̶ch y ka'p ku̶xyu̶ tii m'adzojkku̶xy y ka'p je̱'e̱ tzip ma'ad myajpu̶du̶'kku̶xy, y ka'p je̱'e̱ mmu̶gu'ug oy tii mga'ayajmu̶'oy'ijxku̶xu̶ch. 14Ni'igyu̶ miich je̱'e̱ ju̶bu̶ktzu̶naay ju̶bu̶kjugy'ajtu̶ñ yajtu̶gajtzku̶xnu̶, y kuydyuungu̶xnu̶ je̱'e̱ Windzú̶n Jesucristo y'ayuuk tyu̶y'ajt, du'un neby je̱'e̱ tziptuumbu̶tu̶jk tyuumbe̱jt yajtu̶gajtzku̶xyu̶ñ mu̶dyiibu̶ mu̶u̶d chiptuungu̶xyu̶ñ, y ka'p je̱'e̱ ju̶bu̶k adzojku̶ñ mguydyuungu̶xy je̱'e̱ naaxwiiñjya'ay winma'añ.

Currently Selected:

Romanos 13: MIXE

Highlight

Copy

Compare