San Juan 17
17
Jesús Dios mu̶bu̶jktzóy mu̶u̶d je̱'e̱ dyiscípulotu̶jk kyu̶xpu̶ ajku̶xy
1Ko je̱'e̱ Jesús du'un myu̶naandaay, chi tzajpjooty pya't'ijxy y myu̶naañ: “Dios Teedy, tu̶ je̱'e̱ tiempo cham paatnu̶: yajku̶xu̶'ku̶gyu̶ch je̱'e̱ n'oy'ajt nmu̶k'ajt, wan u̶u̶ch je̱'e̱ m'oy'ajt mmu̶k'ajt u̶u̶ch nandu'un nyajku̶xu̶'u̶gu̶ch. 2Je̱' ko tu̶ u̶u̶ch miich je̱'e̱ ane̱'e̱mu̶ñ xymyo'oy ma je̱'e̱ ja'ay nigu̶xyu̶ ajku̶xyu̶ñ neby u̶u̶ch je̱'e̱ jugy'ajtu̶ñ wiinu̶u̶xu̶u̶bu̶ mu̶baad nigu̶xyu̶ nmooygyu̶xyu̶ñ, je̱'e̱ mu̶dyiijáty u̶u̶ch miich tu̶ xymyo'oyu̶ñ. 3Je̱'e̱ jugy'ajtu̶ñ wiinu̶u̶xu̶u̶bu̶ mu̶'it je̱'e̱ yajpaady ko je̱'e̱ m'ayuuk mdu̶y'ajt miich xymyu̶bu̶jku̶ch ajku̶xy, je̱'e̱ tu'kpajkpu̶ jaanchpyu̶ Dios, y je̱'e̱ Jesucristo, je̱'e̱ mu̶dyiibu̶ miich ya naaxwiiñ tu̶ mguexyu̶ñ.
4“U̶u̶ch tu̶ u̶u̶ch je̱'e̱ m'oy'ajt mmu̶k'ajt ya nyajku̶xu̶'u̶gy ma je̱'e̱ naaxwiiñu̶ñ, y tu̶ u̶u̶ch je̱'e̱ mduung nyajmáy je̱'e̱ mu̶dyiibu̶ u̶u̶ch tu̶ xyaj'ane'emyu̶ñ ko u̶u̶ch ndúnu̶ch. 5Jada'achám Dios Teedy, mooygyu̶ch je̱'e̱ oy'ajt mu̶k'ajtu̶ñ jim mwinduuy je̱'e̱ mu̶dyiibu̶ u̶u̶ch ijty jim je'emy nmu̶dajtypyu̶ñ mu̶u̶d miich, maabu̶ je̱'e̱ naaxwiimbu̶ najty ka'p chonda'agyñu̶ju̶ñ.
6“Pu̶njaty miich mwin'ijx ma adayaaba naaxwiimbu̶ ko u̶u̶ch xymyo'owa'añ, tu̶ u̶u̶ch je̱'e̱ nyajnejwu̶u̶ygyu̶xy pu̶n miichu̶ñ. Miich ijty mja'ay je̱', y miich je̱'e̱ xymyooygyu̶x y tu̶ m'ayuuk mdu̶y'ajt je̱'e̱ xymyu̶bu̶jku̶ ajku̶xy. 7Jada'achám ñejwu̶u̶yñu̶py je̱'e̱ ajku̶xy ko ku̶xyu̶ je̱'e̱ u̶xpu̶jku̶ñ mu̶dyiibu̶ u̶u̶ch miich tu̶ xymyo'oyu̶ñ, miich mje̱' je̱'; 8tu̶ u̶u̶ch je̱'e̱ m'ayuuk mdu̶y'ajt nyajmu̶dmu̶dyaakku̶xy je̱'e̱ mu̶dyiibu̶ u̶u̶ch miich xymyooyu̶ñ, y je̱' tu̶ je̱'e̱ ku'ubu̶jkku̶xy. Y tu̶ je̱'e̱ du'un nejwu̶u̶ygyu̶xy ko u̶u̶ch jiiby jaanch tu̶ ndzooñ ma miichu̶ñ, y nan tu̶ du'un mu̶bu̶jkku̶xy ko miich xykye̱jx ya naaxwiiñ.
9“U̶u̶ch miich nmu̶bu̶jktzooby mu̶u̶d yu̶'u̶ gyu̶xpu̶ ajku̶xy. Ka'p miich nmu̶bu̶jktzóy mu̶u̶d je̱'e̱ naaxwiiñjya'ay gyu̶xpu̶ ajku̶xy, yu̶'u̶du̶'ajty je'eyu̶ ajku̶xy je̱'e̱ mu̶dyiibu̶ u̶u̶ch tu̶ xymyo'oyu̶ñ, je̱' ko miich mje̱' yu̶'u̶ ajku̶xy. 10Ku̶xyu̶ tijaty u̶u̶ch nje̱'e̱'ajtypyu̶ñ, nan miich mje̱' je̱', y je̱'e̱ mu̶dyiibu̶ miich mje̱'e̱'ajtypyu̶ñ, nan u̶u̶ch nje̱' je̱'; y je̱'e̱ n'oy'ajt nmu̶k'ajtu̶ch jii je̱'e̱ ñi'igu̶xu̶'u̶gy ma yu̶'u̶ chu̶naay jyugy'ajtu̶ñ ajku̶xyu̶ñ.
11“U̶u̶ch ka'p u̶u̶ch ya naaxwiiñ n'ok'idaanu̶, peru̶ yu̶'u̶ idaamb yu̶'u̶ ya naaxwiiñ ajku̶xy. U̶u̶ch jiiby u̶u̶ch nu̶kxy n'idaanu̶ ma miichu̶ñ. Dios Teedy, je̱'e̱ wa'adzpu̶ jyoot wyinma'añ, kweentu̶'ajtku̶x mu̶u̶d je̱'e̱ mmu̶k'ajtu̶ñ, je̱'e̱ mu̶k 'ajtu̶ñ mu̶dyiibu̶ u̶u̶ch tu̶ xymyo'oyu̶ñ,#17.11 Je̱'e̱ mmu̶k'ajtu̶ñ mu̶dyiibu̶ u̶u̶ch tu̶ xymyo'oyu̶ñ: nije̱' wiingpu̶ jaaybyu̶du̶jk myu̶naangu̶xy: je̱'e̱ mu̶dyiibu̶ u̶u̶ch tu̶ xymyo'oyu̶ñ. wan du'un tu'ugyu̶ y'ijtku̶xu̶ch du'un neby u̶u̶ch tu'ugyu̶ n'ijtu̶mu̶ñ. 12Ko u̶u̶ch najty nyaanu̶ju̶ch ma adayaaba naaxwiiñu̶ñ, ngweentu̶'ajtypyu̶ch y nniwe̱e̱mbyu̶ch yu̶'u̶ najty ajku̶xy mu̶u̶d je̱'e̱ mmu̶k'ajtu̶ñ, je̱'e̱ mmu̶k'ajtu̶ñ mu̶dyiibu̶ u̶u̶ch tu̶ xymyo'oyu̶ñ. Y ka'p je̱'e̱ m'ayuuk mdu̶y'ajt ni tu'ug tu̶ xyajtu̶gooyu̶ ajku̶xy, tu'ug je̱'e̱ m'ayuuk mdu̶y'ajt je'eyu̶ tu̶ xyajtu̶gooyu̶, je̱'e̱ mu̶dyiibu̶ najty je'emy tu'ug tyu̶gooydyuum yajpaatpu̶ñ. Wan du'un yajkuydyúnu̶ch neby je̱'e̱ Dios ñaky myu̶na'añu̶ñ.
13“Jada'achám u̶u̶ch nnu̶kxnu̶ ma miichu̶ñ, peru̶ paady u̶u̶ch du'un nmu̶na'añ ma u̶u̶ch yam ya naaxwiiñ nyajpaadyñu̶ju̶ñ; wan je̱'e̱ mja'ay du'un oy jyootkugu̶u̶ygyu̶xu̶ch du'un neby u̶u̶ch njootkujku̶chu̶ñ. 14U̶u̶ch tu̶ u̶u̶ch je̱'e̱ m'ayuuk mdu̶y'ajt nyajmu̶dmu̶dya'agy ajku̶xy, peru̶ ka'p je̱'e̱ naaxwiiñjya'ay y'ixa'añyii ajku̶xy, je̱' ko je̱'e̱ du'un ka'p yajpaatku̶xy neby je̱'e̱ naaxwiiñjya'ay ajku̶xyu̶ñ, je̱' ko nan ka'p u̶u̶ch du'un nyajpaady neby je̱'e̱ naaxwiiñjya'ay ajku̶xyu̶ñ. 15Ka'p yam du'un nmu̶bu̶jktzóy ko myajpu̶dzú̶mu̶ch ma adayaaba naaxwiiñu̶ñ, mniwa'anu̶py ni'igyu̶ ma je̱'e̱ ju̶bú̶kpu̶ju̶ñ. 16Je̱' ko ka'p u̶u̶ch ndu'unu̶ch neby je̱'e̱ naaxwiiñjya'ay ajku̶xyu̶ñ, nan ni yu̶'u̶ kya'adu'unu̶ch ajku̶xy neby je̱'e̱ naaxwiiñjya'ay ajku̶xyu̶ñ. 17Yajwaatzu̶ je̱'e̱ jyoot wyinma'añ ajku̶xy mu̶u̶d je̱'e̱ tu̶y'ajt, je̱' ko je̱'e̱ m'ayuuk je̱' je̱'e̱ tu̶y'ajtu̶ñ mu̶u̶d. 18Du'un neby u̶u̶ch miich ya naaxwiiñ xykyejxyu̶ñ, nandu'un u̶u̶ch yu̶'u̶ yam ngue̱jxku̶xy ma je̱'e̱ naaxwiiñjya'ay ajku̶xyu̶ñ. 19Y mu̶u̶d yu̶'u̶ gyu̶xpu̶ u̶u̶ch je̱'e̱ njoot ku̶'u̶m nyajwa'ach ma miichu̶ñ, wan je̱'e̱ jyoot wyinma'añ nandu'un yajwa'atzku̶xu̶ch ma miichu̶ñ mu̶u̶d je̱' tu̶y'ajt.
20“Ka'p u̶u̶ch miich yam nmu̶bu̶jktzóy mu̶u̶d yu̶'u̶du̶'ajty ajku̶xy; nnmu̶bu̶jktzooybyu̶ch miich nandu'un mu̶u̶d je̱'e̱ mu̶dyiibu̶ u̶u̶ch je̱'e̱ n'ayuuk ndu̶y'ajt jiinu̶ xymyu̶bu̶gaanu̶pyñu̶ ajku̶xy, ko u̶u̶ch naty yu̶'u̶ ndiscípulotu̶jk du'un xymyu̶doowu̶ ajku̶xy, kapxwa'kxku̶xy je̱'e̱ n'ayuuk ndu̶y'ajtu̶ch. 21Cham nmu̶bu̶jktzóy ko wan tu'ugyu̶ oy yajxón ijtku̶xy, wan du'un tu'ugyu̶ yajpaatku̶xy mu̶u̶d u̶u̶ch ajtu̶m. Miich Dios Teedy, du'un neby miich myajpaady ma u̶u̶chu̶ñ y u̶u̶ch yajpaatp ma miichu̶ñ. Du'un wan tu'ugyu̶ oy yajxón ijtku̶xy, wan je̱'e̱ naaxwiiñjya'ay du'un mu̶bu̶jkku̶xu̶ch ko miich ya naaxwiiñ tu̶ xykyexy. 22Tu̶ u̶u̶ch je̱'e̱ oy'ajt mu̶k'ajt nmooygyu̶xy du'un neby u̶u̶ch je̱'e̱ oy'ajt mu̶k'ajt miich tu̶ xymyo'oyu̶ñ, wan du'un tu'ugyu̶ yajpaatku̶xu̶ch, du'un neby miich y u̶u̶ch tu'ugyu̶ nyajpaatu̶mu̶ñ. 23U̶u̶ch naty yajpaatp ma yu̶'u̶ ajku̶xyu̶ñ y miich naty yajpaatp ma u̶u̶chu̶ñ, wan du'un tu'ugyu̶ y'ijtku̶xu̶ch, y du'un je̱'e̱ naaxwiiñjya'ay nejwu̶u̶ygyu̶xu̶ch ko miich ya naaxwiiñ tu̶ xykyexy, y nan ko yu̶'u̶ nandu'un mdzojkku̶xy du'un neby u̶u̶ch miich xychokyu̶ñ.
24“Dios Teedy, miich je̱'e̱ tu̶ xymyooygyu̶xy, y du'un u̶u̶ch ndzoky ko wan ijtku̶xy mu̶u̶d u̶u̶ch ma u̶u̶ch naty n'ida'añu̶ñ, wan u̶u̶ch je̱'e̱ n'oy'ajt nmu̶k'ajt xy'ijxu̶ch ajku̶xy, je̱'e̱ oy'ajt mu̶k'ajt mu̶dyiibu̶ u̶u̶ch miich tu̶ xymyo'oyu̶ñ, je̱' ko je'emy u̶u̶ch miich najty xychoky xyjyu̶wu̶'u̶y maabu̶ je̱'e̱ naaxwiimbu̶ najty ka'p myajkojyñu̶ju̶ñ. 25Dios Teedy, tu̶y'ajtu̶ñ miich mu̶dya'agy, je̱'e̱ naaxwiiñjya'ay ka'p je̱'e̱ xy'ixy'ajtku̶xy, peru̶ u̶u̶ch n'ixy'ajtypyu̶ch miich, y nandu'un u̶u̶ch adaa ndiscípulotu̶jk ajku̶xy ñejwu̶u̶ygyu̶pxypy adaa du'un ko miich ya naaxwiiñ tu̶ xykyexy. 26Tu̶ u̶u̶ch je̱'e̱ du'un nyajnejwu̶u̶ygyu̶xy pu̶n miichu̶ñ, y njakyajnejwu̶'u̶we̱e̱mbyñu̶ch ajku̶xy tu̶y tu'uda'agy, wan du'un ñaychogu̶u̶ ñayjyu̶wu̶'u̶wu̶u̶ju̶ch ajku̶xy neby u̶u̶ch miich xychoky xyjyu̶wu̶'u̶yu̶ñ, y wan u̶u̶ch tu'ugyu̶ nyajpaadu̶ch ma yu̶'u̶ ajku̶xyu̶ñ.”
Currently Selected:
San Juan 17: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005