Hechos 28

Pablo yajpaady ma tu'ug naax mejy'agujkpu̶ mu̶dyiibu̶ xu̶u̶'ajtpu̶ñ Malta

1Ko u̶u̶ch nigu̶xyu̶ nu̶u̶bu̶dzu̶u̶mdaay ajku̶xy, chi u̶u̶ch oy nejwu̶u̶ygyu̶xy ko je̱'e̱ naax mejy'agujkpu̶ najty xyu̶u̶'áty Malta. 2Je̱'e̱ kunaax kugajpt u̶u̶ch janch mu̶j xypya'a''ayoogu̶x, chi je̱'e̱ ju̶u̶n mu̶j yajmu̶ju̶u̶ygyu̶xy, je̱' ko najty mu̶k jyanchtu̶u̶chkyu̶ch y jyanchtuubojy, y chi u̶u̶ch xyñu̶maaygyu̶xy ko u̶u̶ch miñ nxaamgu̶xy. 3Chi je̱'e̱ Pablo jya'axytyu̶'u̶dz kajpmujktu̶gu̶u̶y y pu̶daaky ju̶u̶njooty, chi je̱'e̱ awa'andza'añdy tu'ug pyu̶dzu̶u̶my; kye'egy najty mu̶u̶d je̱'e̱ anbu̶, y chi ñayyujkmu̶guijtu̶ y chu'tzu̶ ma je̱'e̱ kyu̶'u̶ju̶ñ. 4Ko je̱'e̱ kunaax kugajpt du'un ijxku̶xy ko je̱'e̱ awa'andza'añdy tyu̶u̶yña'ay ma je̱'e̱ Pablo kyu̶'u̶ju̶ñ, chi amíñ u̶xyu̶py ñayñu̶maayu̶gu̶xy: “Adayaaba ja'ay ja'ayyaj'o'kpu̶ adaa da'a, oy yu̶'u̶ mejyjyooty tu̶ kya'a'o'ogy, ka'p je̱'e̱ tu̶ydyuumbu̶ tzajpjootypyu̶#28.4 Je̱'e̱ tu̶ydyuumbu̶ tzajpjootypyu̶: dike, du'un je̱'e̱ xyu̶u̶'áty griego'e̱e̱mby. Y ko je̱'e̱ malta ja'ay du'un ijxku̶xy, chi je̱'e̱ dike kapxpaatku̶xy, je̱'e̱ griego ja'ay dyios ajku̶xy, je̱'e̱ tu̶ydyuumbu̶. a'ixu̶'u̶wu̶ch nu̶kxy jyakjugy'aty.”

5Chi je̱'e̱ Pablo kyu̶'u̶ winxu̶dikxy, oy je̱'e̱ awa'andza'añdy ju̶u̶njooty kya'ay, y ka'p ni nej jyajty. 6Y ku̶xyu̶ je̱'e̱ ja'ay najty jya'ay'e̱jxku̶xy mu̶naa y'okkixu̶'u̶gyu̶ñ o mu̶naa y'ok'o'ogyu̶ñ, peru̶ tu̶ najty janch jeky jya'aja'ay'e̱jxku̶xy, ko ijxku̶xy ko ka'p ni nej jyaty, chi je̱'e̱ wyinma'añ yajtu̶gajtzku̶xy y myu̶naangu̶xy ko je̱'e̱ Pablo najty dyiósu̶ch.

7Mu̶wingón je̱'e̱ jimbu̶ it lugaar jim najty yudaakt naax tu'ug mu̶dyiibu̶ je̱'e̱ ñiwindzú̶n xu̶u̶'ajtpu̶ñ Publio, je̱' najty je̱'e̱ jimbu̶ naax mejy'agujkpu̶ niwindzu̶n'ajtp y je̱' u̶u̶ch xyajja'ttaakku̶x y tu̶gu̶u̶g xu̶u̶ u̶u̶ch jim xyajkaay xyaj'uuky ajku̶xy. 8Y du'un jyajty je̱'e̱ Publio najty tyeedy pu̶jku̶p; ju̶u̶nba'am je̱'e̱ najty myu̶u̶d y mu̶u̶d je̱'e̱ ne'ptypya'am. Chi je̱'e̱ Pablo je̱'e̱ pa'amja'ay oy ku'ixy, chi je̱'e̱ Dios mu̶bu̶jktzooy, ku̶'u̶ni'ixajy y yajtzooky. 9Ko adaa ayuuk du'un mu̶doogu̶xy, chi je̱'e̱ wiing pa'amja'ay nandu'un ñú̶kxku̶xy je̱'e̱ mu̶dyiibu̶ najty jim tzu̶naaygyu̶xpu̶ñ ma je̱'e̱ jimbu̶ naax mejy'agujkpu̶ju̶ñ, y nan tzookku̶x je̱'. 10Mu̶u̶d adaa gyu̶xpu̶ u̶u̶ch nyajku'umaaygyu̶xy, y ko u̶u̶ch ja'adu'ook nbarcu̶tu̶gu̶u̶ygyu̶xy chi u̶u̶ch ku̶xyu̶ tijaty xymyooygyu̶xy, tijaty u̶u̶ch najty nyajmayjyajtku̶xypyu̶ñ je̱'e̱ nidu'uyo'oyu̶u̶k.

Pablo jim Roma jya'ady

11Tu̶gu̶u̶g po'o u̶u̶ch najty jim tu̶ n'ijtnu̶ ajku̶xy ma je̱'e̱ naax mejy'agujkpu̶ju̶ñ, chi u̶u̶ch nbarcu̶tu̶gu̶u̶ygyu̶xy ma tu'ug barco mu̶dyiibu̶ je̱'e̱ tu̶u̶chpyoj tiempo najty jim Malta tu̶ yajnáxyu̶ñ. Alejandría barco je̱'e̱ najty, y awinnax mu̶u̶d je̱'e̱ najty, je̱' najty y'awinnax je̱'e̱ myu̶dajtu̶py je̱'e̱ mu̶dyiibu̶ xu̶u̶'ajtku̶xpu̶ñ Cástor mu̶u̶d je̱'e̱ Pólux mu̶dyiibu̶ dyios'ajtypyu̶ñ ajku̶xy. 12Chi u̶u̶ch oy nja'tku̶xy ma je̱'e̱ barco ni'igu̶daaktaakt mu̶dyiibu̶ xu̶u̶'ajtpu̶ñ Siracusa, jim u̶u̶ch tu̶gu̶u̶g xu̶u̶ nwu̶'u̶mu̶u̶ygyu̶xy, 13y chi u̶u̶ch jim ndzóngu̶xy barcu̶jooty, nnú̶kxku̶xyu̶ch tu'kmejypya'a tu'kmejypya'a u̶xtu̶ nja'tku̶xyu̶ch jim Regio. Kujaboom je̱'e̱ ju̶u̶nboj oy pyu̶dzu̶my, chi u̶u̶ch oy kumaaxk nja'tku̶xy jim Puteoli,#28.13 Nije̱' wiingpu̶ versión myu̶na'añ: chi u̶u̶ch oy kume̱jtz xu̶u̶ nja'tku̶xy jim Puteoli. 14jim u̶u̶ch je̱'e̱ mu̶bu̶jkpu̶du̶jk nije̱' nbaatku̶xy, je̱' u̶u̶ch xymyu̶ju̶u̶ydyaak xymyu̶nukxtaakku̶x ko u̶u̶ch jim tu'ksumaan nwu̶'u̶mgu̶xu̶ch, y chi u̶u̶ch jim ja'adu'ook ndzóngu̶xnu̶ba nnú̶kxyu̶ch jim Roma ajku̶xy. 15Je̱'e̱ mu̶bu̶jkpu̶du̶jk mu̶dyiibu̶ najty jim Roma tzu̶naaygyu̶xpu̶ñ tu̶ najty je̱'e̱ ayuuk du'un ni'imu̶doogu̶xnu̶ ko u̶u̶ch najty jim nnú̶kxku̶xy, chi nije̱' chóngu̶xym oy u̶u̶ch xyjyu̶jpkubadu̶u̶ygyu̶xy ma xyu̶u̶'átyu̶ñ Foro de Apio y jakjim'e̱e̱mbyu̶ch oy jadyiiyu̶ xyjyakju̶jpkubadu̶u̶ygyu̶xy, ma xyu̶u̶'átyu̶ñ Tres Tabernas. Ko je̱'e̱ Pablo ju̶jpku'ixu̶u̶y je̱'e̱ mu̶bu̶jkpu̶du̶jk ajku̶xy, chi je̱'e̱ Dioskujuuyu̶p yejky, y chi jyootkugu̶u̶y. 16Ko u̶u̶ch jim Roma nja'tku̶xy,#28.16 Nije̱' jaaybyu̶du̶jk myu̶naangu̶xy: chi je̱'e̱ tziptuumbu̶ windzú̶n je̱'e̱ maybyujxtu̶jkja'ay ku̶'u̶yejky ma je̱'e̱ mu̶jsoldado windzú̶n. y'a'ixu̶u̶ygyu̶x ko je̱'e̱ Pablo abu̶ky chu̶na'awu̶ch ma tu'ug yujkwa'añdyu̶jku̶ñ, y je'eyu̶ najty je̱'e̱ tziptuumbu̶ tu'ug kyweentu̶'adyii.

Pablo jim Roma yajpaady

17Tu̶gu̶u̶g xu̶u̶ju̶u̶by najty maabu̶ jim Roma jya'adyu̶ñ, ko je̱'e̱ Pablo kapxyñiguejxy je̱'e̱ judío win'ixy tyuumbu̶du̶jk ajku̶xy mu̶dyiibu̶ najty jim Roma tzu̶naaygyu̶xpu̶ñ. Ko ñayyo'oymyujku̶ ajku̶xy, chi nu̶maaygyu̶xy:

—Mu̶gu'uktu̶jk ajku̶xy, oy u̶u̶ch tu̶ nga'atuundu̶góy ma je̱'e̱ judío ja'ay ajku̶xyu̶ñ y ma je̱'e̱ nmu̶j'áp nmu̶jteedy kyostumbre ajku̶xyu̶ñ, peru̶ je̱'e̱ judío ja'ay u̶u̶ch xymyajtzku̶x y xykyu̶'u̶ye̱jkku̶xyu̶ch ma je̱'e̱ romano tuungmu̶u̶dpu̶ju̶ñ jim Jerusalén, 18y ko u̶u̶ch xytyu̶ydyuungu̶xy, mu̶'it u̶u̶ch xyjya'anajtzmadzu̶'u̶waañ ajku̶xy ko ti poky ka'apaatku̶xy ma u̶u̶chu̶ñ mu̶dyiibu̶ u̶u̶ch xyajku'u'o'ogu̶'u̶wu̶bu̶ñ ajku̶xy. 19Peru̶ ka'p je̱'e̱ judío ja'ay du'un ku'ubu̶jkku̶xy ko u̶u̶ch nyajnajtzmadzu̶'u̶wu̶ch, y chi u̶u̶ch nayñibu̶jktzowu̶u̶yu̶ ko u̶u̶ch ya nyajtu̶ydyúnu̶ch ma je̱'e̱ Roma mu̶j'ane̱'e̱mbu̶ju̶ñ, oy u̶u̶ch tii xu̶'u̶wu̶ñ nga'amu̶u̶du̶ch mu̶u̶d u̶u̶ch je̱'e̱ nmu̶gunaax nmu̶gugajpt ajku̶xy. 20Paady tu̶ ngapxyñigue̱jxku̶xy ko n'ixaangu̶xy y nyajmu̶dmu̶dya'agaangu̶xy tii u̶u̶ch ko nbujxtu̶jk'u̶ña'ay. Je̱' ko u̶u̶ch ajtu̶m ajku̶xy je̱'e̱ Israel ja'ay nja'ay'e̱jxu̶m ajku̶xy ko je̱'e̱ Dios je̱'e̱ ja'ay yajjuugypyu̶ga'añ je̱'e̱ tu̶u̶bu̶ y'o'kku̶xy, paady u̶u̶ch jada'achám mach cadeenu̶ mu̶u̶d nyajpaady.

21Chi je̱' y'adzoogu̶xy:

—U̶u̶ch ajku̶xy ka'anu̶ u̶u̶ch ni tii naky xyñija'tku̶xyñu̶ mu̶dyiibu̶ jim Judea tzombu̶ñ mu̶u̶d miich kyu̶xpu̶, y ni tu'ug je̱'e̱ nmu̶gu'ugtu̶jk ajtu̶m ajku̶xy je̱'e̱ judío ja'ay ju̶bu̶k tu̶ xykya'anigápx xykya'animu̶dyaakku̶xy mu̶dyiibu̶ ya tu̶ jya'tku̶xyu̶ñ, tu̶ chóngu̶xy jim. 22Peru̶ nja'a''amdo'idaangu̶xypyu̶ch neby miich mmu̶dya'aga'añu̶ñ, je̱' ko nnejwu̶u̶ygyu̶xypyu̶ch ko oy ma'eemby je̱'e̱ ja'ay jembyu̶ u̶xpu̶jku̶ñ mu̶dzip'ajtku̶xy.

23Chi je̱'e̱ xu̶u̶ tzuu agapxy ajku̶xy. Ko oy paaty mu̶naa najty je̱'e̱ xu̶u̶ tzuu tu̶ agápxku̶xyu̶ñ, chi je̱'e̱ mayjya'ay ñayyo'oymyujku̶gu̶xy ma je̱'e̱ Pablo jya'ttaakt najty mu̶u̶du̶chu̶ñ. Janch jopyñu̶ kyapxtu̶gu̶u̶y myu̶dyaaktu̶gu̶u̶ygyu̶xy u̶xtu̶ oychuunu̶ oy yajmaaygyu̶xy. Ja'ayajmu̶dmu̶dyaaku̶gu̶x je̱'e̱ Pablo je̱'e̱ Dios y'ane̱'e̱mu̶ñ, jya'ayajmu̶bu̶gaanu̶gu̶xy je̱'e̱ Jesús y'ayuuk tyu̶y'ajt neby je̱'e̱ Moisés y'ane̱'e̱mu̶ñ, y neby je̱'e̱ Dios y'ayuuknajtzkapxu̶u̶ybyu̶du̶jk ñaky kyuja'ayu̶chu̶ñ ajku̶xy. 24Nije̱' mu̶bu̶jkku̶xy neby je̱'e̱ Pablo najty myu̶na'añu̶ñ, y nije̱' ka'p mu̶bu̶jky ajku̶xy. 25Y je̱' ko ka'p najty amíñ u̶xyu̶py ñay'ayuukwinju̶wu̶u̶yu̶gu̶xy, chi ixy ka'a'íxy yo'oychóngu̶xnu̶. Chi je̱'e̱ Pablo ñu̶maayu̶gu̶xy:

—Tu̶y tu'uda'agy je̱'e̱ Espíritu Santo yajkápxy je̱'e̱ nmu̶j'áp nmu̶jteedy ajtu̶m ajku̶xy, ko je̱'e̱ y'ayuuknajtzkapxu̶u̶ybyu̶ Isaías, myu̶naañ:

26‘Nu̶kx je̱'e̱ ja'ay nu̶maaygyu̶x:

Miich ajku̶xy oy miich mja'amu̶doogu̶xu̶ch, peru̶ ka'p mwinju̶wu̶u̶ygyu̶xu̶ch;

y oy miich mja'awindú̶kxku̶xu̶ch, peru̶ ka'p m'ijxku̶xu̶ch.

27Je̱' ko janch juuñ adayaaba ja'ay jyoot wyinma'añ ajku̶xy,

aduky tyadzak yu̶'u̶ ajku̶xy,

y nan wiimbi'idz yu̶'u̶ ajku̶xy,

ka'pu̶ y'ijxku̶xu̶ch y ka'pu̶ myu̶doogu̶xu̶ch,

y ka'pu̶ tii winju̶wu̶u̶ygyu̶xu̶ch;

y nan ka'pu̶ jyootwimbijtku̶xu̶ch ma u̶u̶chu̶ñ,

y ka'pu̶ u̶u̶ch nyajtzo'ogu̶ch ajku̶xy.’

28Nejwu̶u̶ygyu̶x miich, ko jada'achám y neby je̱'e̱ xu̶u̶ tiempo jyaknu̶kxa'añu̶ñ, Dios y'awaanu̶u̶by je̱'e̱ aanu̶mu̶ ni'idzooku̶ñ ma je̱'e̱ ka'pu̶ jyudíoja'ayu̶chu̶ñ ajku̶xy, y je̱'e̱ju̶tztú̶y y'amdoo'ídu̶py je̱' ajku̶xy. 29[Ko je̱'e̱ Pablo du'un myu̶naañ, chi je̱'e̱ judío ja'ay ñu̶kxtaaygyu̶xnu̶ cham amíñ u̶xyu̶py ñaywyingapx ñayjyu̶jpkápxu̶gu̶xy.]#28.29 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.

30Me̱jtzjumu̶jt je̱'e̱ Pablo jim ka'pxy y'ijty ma je̱'e̱ tu̶jk mu̶dyiibu̶ najty y'ajuydyujkypyu̶ñ jim Roma, y oy yajxón najty jim u̶u̶'adzóy kapx'adzoy ku̶xyu̶ pu̶njaty najty nu̶kxy kyu'ixy myu̶gapxyiiju̶ñ. 31Agujk jootkujk najty je̱'e̱ Dios y'ane̱'e̱mu̶ñ u̶u̶wa'kxy kapxwa'kxy y yaj'u̶xpú̶ky je̱'e̱ Windzú̶n Jesús y'ayuuk tyu̶y'ajt, y ni pu̶n najty ni nej kya'atúñ kya'anu̶ma'ayii y nan ni pu̶n najty kya'a'agapxtugyii.

Currently Selected:

Hechos 28: MIXE

Highlight

Copy

Compare