Hechos 24

Pablo ñaygyugapxyii ma je̱'e̱ gobernador Félix wyinduuyu̶ñ

1Kumu̶gooxk xu̶u̶ je̱'e̱ Ananías, je̱'e̱ teedy windzú̶n nigu'ubajk'ajtpu̶ jya'ty jim Cesarea mu̶u̶d je̱'e̱ judío amu̶jja'aydyu̶jk nije̱' ajku̶xy y mu̶u̶d je̱'e̱ wingapxpu̶ tu'ug mu̶dyiibu̶ najty xu̶u̶'ajtpu̶ñ Tértulo. Chi je̱'e̱ gobernador winguwa'agu̶u̶ygyu̶xy, xu̶'u̶waangu̶xy je̱'e̱ Pablo. 2Ko je̱'e̱ Pablo yajmiiñ ajku̶xy, chi je̱'e̱ Tértulo tyu̶gu̶y xu̶'u̶bu̶, nu̶maay je̱'e̱ Félix:

—Dioskujuuyu̶p miich, windzú̶n gobernador, jootkujk je̱'e̱ naax kajpt y'ity y ka'p je̱'e̱ tzip ma'ad maa, y Dioskujuuyu̶p je̱' ko mu̶u̶d je̱'e̱ mwij'ajt mke̱j'ajtu̶ñ je̱'e̱ nnaax ngajpt tu̶ xyaj'oyu̶u̶yu̶ch ajku̶xy. 3Nigu̶xyu̶ ngu'umaaygyu̶xy wantimymya'eembyu̶ch, miich mu̶jtuungmu̶u̶dpu̶ Félix. 4Ka'pu̶ je̱'e̱ mdiempo mu̶j nyajtu̶gooyu̶yu̶ch, tun may'ajt amdo'ijtu̶ygyu̶ch je̱'e̱ n'ayuuk tu'kjaxu̶'u̶gy ajku̶xy. 5Je̱' ko tu̶ u̶u̶ch nnejwu̶u̶ygyu̶xy ko adayaaba ja'ay mu̶j'ayo'on yeky wantimymya'eembyu̶ch; xii yaa je̱'e̱ judío ja'ay win'u̶u̶ngu̶xy y yajnaymyu̶dzibu̶u̶yu̶gu̶xy, y yu̶'u̶ je̱'e̱ nigu'ubajk'ajtp je̱'e̱ nazareno ja'ay y'u̶xpu̶jku̶ñ ajku̶xy. 6Nan tu̶ nandu'un jya'atuundu̶goya'añ ma je̱'e̱ mu̶jtzajptu̶jku̶ñ, paady u̶u̶ch nmajch ajku̶xy, [y chi u̶u̶ch nja'atu̶ydyunaangu̶xy du'un neby u̶u̶ch je̱'e̱ ngu'utujku̶ñ y'ane'emyu̶ñ ajku̶xy; 7peru̶ je̱'e̱ comandante Lisias mu̶kta'agy yajtu̶gu̶u̶y, chi u̶u̶ch adzip xypyu̶jku̶ ajku̶xy y xyñu̶maaygyu̶xyu̶ch ko pu̶njaty najty tu̶ xyu̶'u̶yii wan miingu̶xy ma miichu̶ñ.]#24.7 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy 8Y miich mu̶baad ku̶'u̶m myajtú̶y, y du'un je̱'e̱ tu̶y'ajt ku̶xyu̶ mnejwu̶'u̶wu̶ch neby u̶u̶ch yu̶'u̶ nxu̶'u̶yu̶ñ ajku̶xy.

9Y je̱'e̱ judío ja'ay ajku̶xy mu̶dyiibu̶ najty jim gobernador winduuy ajku̶xyu̶ñ, agu̶ du'un najty je̱'e̱ nandu'un myu̶naangu̶xpu̶. 10Mu̶'it je̱'e̱ gobernador je̱'e̱ Pablo nidziiwu̶u̶y ko wan kapxy, y chi je̱'e̱ Pablo myu̶naañ:

—Janch jootkujk u̶u̶ch yam naygyugapxyii ma miichu̶ñ Félix, je̱' ko nnejwu̶u̶ybyu̶ch ko miich mu̶jtuungmu̶u̶d ma adayaaba naax kajptu̶ñ cham je̱'e̱ xu̶u̶ jumu̶jt ñu̶kxkojnu̶. 11Mu̶baad miich ku̶'u̶m mu̶du̶y myajtú̶y wan je̱'e̱ tu̶y'ajt mbaadu̶ch, je'eyu̶ cham ñi'imajme̱tzxu̶u̶ju̶'u̶y mu̶naa u̶u̶ch jim Jerusalén nja'adyu̶ñ Dios o'owu̶dajtpu̶. 12Y ka'p u̶u̶ch yu̶'u̶ du'un xypyaatku̶xy; ndzipkapxy n'awa'angápxyu̶ch mu̶u̶d pu̶n du'umbu̶, ni nga'aja'aywyin'u̶u̶ñ nga'aja'ay'agapxu̶'u̶yu̶ch ma je̱'e̱ mu̶jtzajptu̶jku̶ñ, ni ma je̱'e̱ naymyujktaaktu̶ñ y ni wiingtuum. 13Adaa ja'ay ajku̶xy ka'p yu̶'u̶ ni tii tu̶y'ajt mu̶dajtku̶xy neby u̶u̶ch yu̶'u̶ xyjya'axu̶'u̶gu̶xyu̶ñ. 14Peru̶ je̱'e̱ mu̶dyiibu̶ u̶u̶ch ngu'ubu̶jkypy ma miichu̶ñ, je̱' je̱' ko u̶u̶ch je̱'e̱ Dios nmu̶dúñ, je̱'e̱ Dios mu̶dyiibu̶ u̶u̶ch je̱'e̱ nmu̶j'áp nmu̶jteedy myu̶duungu̶xu̶ñ du'un neby je̱'e̱ jembyu̶ Dios ñu̶u̶ tyu'u y'ane'emyu̶ñ, je̱'e̱ u̶xpu̶jku̶ñ mu̶dyiibu̶ tyijku̶xypyu̶ñ ko ka'p y'óyu̶ch, je̱' ko nmu̶bu̶jkypyu̶ch du'un ku̶xyu̶ neby kyuja'ayu̶chu̶ñ ma je̱'e̱ Moisés ñakyu̶ñ y ma je̱'e̱ Dios y'ayuuknajtzkapxu̶u̶ybyu̶du̶jk ñaky ajku̶xyu̶ñ. 15Nan nmu̶bu̶jkypyu̶ch neby yu̶'u̶ nandu'un ajku̶xyu̶ñ ko je̱'e̱ Dios yajjuugypyu̶ge̱e̱mbyu̶ch pu̶njaty tu̶ y'o'ogyu̶ñ, je̱'e̱ tu̶u̶bu̶ je̱'e̱ oybyu̶ tuungu̶xy y je̱'e̱ tu̶u̶bu̶ je̱'e̱ ju̶bu̶kpu̶ tuungu̶xy. 16Paady u̶u̶ch je'emy naymyu̶joottu̶goyii nmu̶dátyu̶ch je̱'e̱ njoot nwinma'añ oy wa'adz Dios winduuy y ja'ay winduuy.

17“Ka'anaag jumu̶jt u̶u̶ch najty oy wiingtuum tu̶ nwu̶dity, chi u̶u̶ch jim Jerusalén nwimbijty limoosnu̶ ye̱jkpu̶ y windzu̶gu̶'u̶ñ ye̱jkpu̶. 18Du'un u̶u̶ch najty nduñ ko u̶u̶ch je̱'e̱ judío ja'ay oy nije̱' xypyaatku̶xy ma je̱'e̱ mu̶jtzajptu̶jku̶ñ, mu̶dyiibu̶ tzóngu̶xpu̶ñ Asia naaxjooty, tu̶ u̶u̶ch najty nayyajpokyñi'iwa'achyii du'un neby kyostumbre'atyu̶ñ, ka'p najty mayjya'ay maa y nan ka'p najty pu̶n maa ya'axy jyoky. 19Je̱'e̱ mu̶dyiibu̶ u̶u̶ch xy'ijxku̶xu̶ñ ma je̱'e̱ mu̶jtzajptu̶jku̶ñ je̱' u̶xyu̶py ya tu̶ myiingu̶xy, xyu̶'u̶wu̶chu̶ch ajku̶xy, pu̶nu̶ jaanch du'un tyu̶y'ajtu̶ch neby adayaaba ja'ay myu̶naangu̶xyu̶ñ. 20Y je̱' ko ka'p je̱'e̱ tu̶ myiingu̶xy, wan adayaaba ja'ay mu̶dyiibu̶ ya cham ajku̶xy nigápxku̶xy pu̶nu̶ xypyaattu̶ch je̱'e̱ nboky ngu̶dyeey ajku̶xy je̱'e̱ mu̶naabu̶ u̶u̶ch xytyu̶ydyuungu̶xyu̶ñ ma je̱'e̱ judío ja'ay myu̶jjúntu̶ ajku̶xyu̶ñ. 21Je̱' da'a du'un mdijku̶xypy ko u̶u̶ch nmu̶kkapxy mu̶jjuntu̶jooty, nmu̶naañu̶ch: ‘Paady u̶u̶ch miich cham xytyu̶ydyuungu̶xy, je̱' ko u̶u̶ch nmu̶bu̶ky ko je̱'e̱ Dios yajjuugypyu̶ga'añ je̱'e̱ tu̶u̶bu̶ y'o'kku̶xy.’

22Ko je̱'e̱ gobernador Félix du'un mu̶dooy, je̱' ko ñejwu̶ydyaaby najty wa'adzu̶ neby je̱'e̱ jembyu̶ Dios ñu̶u̶ tyu'u tyu'uyo'oyu̶ñ, chi je̱'e̱ kapxy ayuuk du'un u̶xmajch y ñu̶maayu̶ ajku̶xy:

—Ko naty je̱'e̱ comandante Lisias myiñ, mu̶'it u̶u̶ch je̱'e̱ mxu̶'u̶wu̶ñ oy njaknejwu̶ydya'awu̶ch ajku̶xy.

23Mu̶'it je̱'e̱ gobernador Félix ane̱'e̱mu̶ñ yejky nu̶maay je̱'e̱ tziptuumbu̶ windzú̶n ko je̱'e̱ Pablo wan yajkweentu̶'áty, y wan yajpu̶dzú̶mu̶ch tu̶wiing tu̶ba'ay, y pu̶nu̶ jii je̱'e̱ myu̶gu'ugtu̶jk kyu'ix myu̶gapxa'añyii ajku̶xy, mu̶baad kyu'ixy myu̶gapxyii ajku̶xy y yajkáy yaj'u'ugu̶u̶ju̶ch ajku̶xy.

24Tu̶ najty je̱'e̱ xu̶u̶ tiempo we̱e̱nu̶ ñajxkojnu̶ ko je̱'e̱ gobernador Félix ja'adu'ook jya'ty mu̶u̶d je̱'e̱ tyo'oxyu̶jk Drusila, mu̶dyiibu̶ najty judíoja'ayu̶ñ. Y chi je̱'e̱ gobernador Félix kapxyñiguejxy je̱'e̱ Pablo ko wan miñ yajmu̶dmu̶dya'agyii neby je̱'e̱ ja'ay Jesucristo mu̶bu̶kyu̶ñ. 25Peru̶ ko je̱'e̱ Pablo yajmu̶dmu̶dyaaku̶ je̱'e̱ tu̶y'ajt neby je̱'e̱ Dios tzokyu̶ñ ko je̱'e̱ ja'ay wan tu'uda'agy tzu̶naay juugy'ajtku̶xy y ane̱'e̱mgu̶xu̶ch je̱'e̱ ñi'kx kyopt ku̶'u̶m oydyuum, y nu̶maay du'un ko je̱'e̱ Dios ja'ay jiinu̶ ku̶xyu̶ tu̶ydyuna'añ, chi je̱'e̱ gobernador Félix mu̶k chu̶gu̶u̶y y myu̶naañ:

—Nu̶kxnu̶ miich cham, u̶xtu̶ ko u̶u̶ch naty xyñibadu̶u̶yu̶ mu̶'it nu̶kxy ja'adu'ook nyajwoyii.

26Y je̱'e̱ gobernador Félix je̱'e̱ najty je̱'e̱ jya'ay'ejxypy mu̶naa je̱'e̱ Pablo y'okmeeñymyo'oyiiju̶ñ, y mu̶'itnu̶ najtzmadzu̶'u̶wa'añ; paady najty nu̶kxy ja'anaam ja'atzojk yajwoyii neby mu̶dkapx mu̶dmu̶dya'agu̶chu̶ñ. 27Me̱jtz jumu̶jt du'un y'ijty, mu̶'it je̱'e̱ Félix gyobernadorpu̶dzu̶u̶mnu̶, y gyobernadortu̶gu̶u̶y je̱'e̱ Porcio Festo. Félix wyu̶'u̶ma'añ oy, mu̶u̶d je̱'e̱ judío ja'ay ajku̶xy, paady je̱'e̱ Pablo tzumy yajwu̶'u̶my.

Currently Selected:

Hechos 24: MIXE

Highlight

Copy

Compare