Hechos 14

Pablo mu̶u̶d je̱'e̱ Bernabé yajpaatku̶xy jim Iconio

1Jim Iconio je̱'e̱ Pablo mu̶u̶d je̱'e̱ Bernabé nime̱tzk kipxy tyu̶gu̶u̶ygyu̶xy ma je̱'e̱ judío ja'ay ñaymyujktaakt ajku̶xyu̶ñ, y kapxwa'kxku̶xy je̱'e̱ Jesús y'ayuuk tyu̶y'ajt, y janch may je̱'e̱ judío ja'ay mu̶bu̶jkku̶xy y nandu'un je̱'e̱ ka'pu̶ jyudíoja'ayu̶ch ajku̶xy. 2Peru̶ je̱'e̱ judío ja'ay ajku̶xy mu̶dyiibu̶ je̱'e̱ ayuuk tu̶y'ajt najty ka'p mu̶bu̶jkku̶xyu̶ñ myu̶dzibu̶u̶ygyu̶x je̱'e̱ ka'pu̶ jyudíoja'ayu̶chu̶ñ ajku̶xy, wan ju̶bu̶k axu̶u̶g wyinmaaygyu̶xu̶ch mu̶u̶d je̱'e̱ mu̶dyiibu̶ je̱'e̱ Jesús y'ayuuk tyu̶y'ajt mu̶bu̶jkku̶xu̶ñ. 3Paady je̱'e̱ Pablo mu̶u̶d je̱'e̱ Bernabé jim jeky wyu̶'u̶mgu̶xy, y mu̶jootkujk'ajtku̶xy je̱'e̱ Windzú̶n Dios, nimu̶dyaakku̶xy wiinu̶u̶ju̶jp je̱'e̱ Windzú̶n Dios y'ayuuk tyu̶y'ajt ko je̱'e̱ Dios xychojku̶m xyjyu̶wu̶u̶yu̶m ajku̶xy, y je̱'e̱ Windzú̶n Dios je̱'e̱ mu̶k'ajt mooyu̶ ajku̶xy neby je̱'e̱ ijxpe̱jt y je̱'e̱ mu̶jwinma'añ mu̶baad tuungu̶xyu̶ñ mu̶dyiibu̶ ijxpe̱jt'adú̶bu̶ñ ko tyu̶y'ajtu̶ch mu̶dyiibu̶ kyapxypy myu̶dyaakypyu̶ñ ajku̶xy. 4Peru̶ je̱'e̱ kajptja'ay me̱jtzpú̶ky najty je̱'e̱ ajku̶xy, nije̱' je̱'e̱ judío ja'ay najty mu̶jpu̶daakku̶xy y nije̱' je̱'e̱ apóstolestu̶jk najty mu̶jpu̶daakku̶xy. 5Mu̶'it je̱'e̱ judío ja'ay ajku̶xy y nandu'un je̱'e̱ ka'pu̶ jyudíoja'ayu̶ch ñaygyapx ñayxiiku̶gu̶xy mu̶u̶d je̱'e̱ tuungmu̶u̶dpu̶du̶jk ko je̱'e̱ Pablo mu̶u̶d je̱'e̱ Bernabé mu̶dzibu̶'u̶waangu̶xy y timychaagu'uga'adzaangu̶xy. 6Ko je̱'e̱ Pablo mu̶u̶d je̱'e̱ Bernabé oy du'un nejwu̶u̶ygyu̶xy, chi kye̱e̱kku̶xy y ñú̶kxku̶xy jim Listra y Derbe jim Licaonia naaxjooty, y majaty je̱'e̱ naax kajpt winduuy wingónbu̶ju̶ñ, 7y jim je̱'e̱ oybyu̶ ayuuk tu̶y'ajt nandu'un kapxwa'kxku̶xy.

Pablo jim Listra tzaaga'tzku̶xy

8Jim Listra najty ja'ay tu'ug mu̶dyiibu̶ ka'p mu̶baad yo'oyu̶ñ. Ka'p najty je̱'e̱ nimu̶naa yo'oy, je̱' ko du'un najty je̱'e̱ tu̶ tyimymya'axung'áty tekymya'at. Je̱'e̱ tekymya'atpu̶ja'ay u̶ñaaby je̱'e̱ najty, 9amdo'ity neby je̱'e̱ Pablo myu̶na'añu̶ñ, y chi je̱'e̱ Pablo je̱'e̱ tekymya'atpu̶ ja'ay windu̶kxpejty, y ijxy ko je̱'e̱ mu̶bu̶jku̶ñ mu̶u̶du̶ch neby mu̶baad cho'ogyu̶ñ. 10Mu̶'it mu̶k nu̶maay:

—¡Pu̶du̶'u̶g y tu̶naaygyugu̶'u̶!

Chi je̱'e̱ tekymya'atpu̶ ja'ay tu'ktú̶py ñajtztu̶bu̶u̶y, y yo'oydyu'ubu̶jky. 11Ko je̱'e̱ mayjya'ay du'un ijxku̶xy neby je̱'e̱ Pablo je̱'e̱ pa'amja'ay najty tu̶ yajtzo'ogyu̶ñ, mu̶'it yaaxtu̶gu̶u̶y jyojktu̶gu̶u̶ygyu̶xy, mu̶u̶d je̱'e̱ Licaonia ayuuk myu̶naangu̶xy:

—¡Dios du'un tu̶ kyu̶daakku̶xy neby je̱'e̱ ja'ay ma u̶u̶ch ajtu̶m ajku̶xyu̶ñ!

12Y myu̶naangu̶xy ko je̱'e̱ Bernabé najty je̱'e̱ dios Zeus, y je̱'e̱ Pablo je̱'e̱ dios Hermes, je̱' ko je̱' najty kapxp. 13Peru̶ je̱'e̱ Zeus teedy mu̶dyiibu̶ najty jim teedy'ajtp ma je̱'e̱ Zeus chajptu̶jk kajppa'abu̶ju̶ñ, je̱' je̱'e̱ waj mu̶miingu̶x y je̱'e̱ pu̶jy ujtz, y je̱' mu̶u̶d je̱'e̱ mayjya'ay du'un je̱'e̱ Pablo mu̶u̶d je̱'e̱ Bernabé najty o'owu̶dattaangu̶xy y yaj'o'ogaangu̶xy je̱'e̱ waj najty neby je̱'e̱ windzu̶gu̶'u̶ñdyu̶ñ. 14Peru̶ ko je̱'e̱ Bernabé mu̶u̶d je̱'e̱ Pablo du'un nejwu̶u̶ygyu̶xy neby je̱'e̱ ja'ay najty y'adu̶'u̶dzaangu̶xyu̶ñ, chi je̱'e̱ wyit ku̶'u̶m agu̶u̶dzu̶u̶ygyu̶xy, tyu̶gu̶u̶ygyu̶xy mayjya'ay agujk cham myu̶naangu̶xy:

15“Mu̶gu'uktu̶jk, ¿ti ko du'un m'adu̶u̶tzku̶xy? U̶u̶ch ja'ayu̶ch ajku̶xy du'un neby miich ajku̶xyu̶ñ. Paady u̶u̶ch tu̶ n'okja'amiingu̶xpu̶ ma je̱'e̱ mnaax mgajpt ajku̶xyu̶ñ, neby nnu̶ma'awaangu̶xy ko adaa du'umbu̶ winma'añ m'u̶xmajtzku̶xnu̶ch mu̶dyiibu̶ ka'p chobaady ma je̱'e̱ Diosu̶ñ, y mjootwimbijtku̶xnu̶ch ma je̱'e̱ juugypyu̶ Dios mu̶dyiibu̶ je̱'e̱ tzajp yajkoju̶ñ, je̱'e̱ naaxwiimbu̶, je̱'e̱ mejy y ku̶xyu̶ tijaty ya n'ijxu̶mbyu̶ñ. 16Dios y'u̶xmajtz je̱'e̱ ja'ay jékyu̶p ko wan tuungu̶xy tii tyimychojkku̶xypyu̶ñ, 17oy je̱'e̱ tu̶y'ajt najty ja'ayéky ko je̱' Dios; y ja'atúñ je̱'e̱ oybyu̶ najty mu̶u̶d miich kyu̶xpu̶ ajku̶xy. Dios je̱' yajtuub yajtajxp, y xymyooygyu̶xy je̱'e̱ oybyu̶ pu̶da'aky y nan xymyooygyu̶xy mu̶j ku̶je̱e̱ mu̶dyiibu̶ mgaaygyu̶xu̶py m'uukku̶xu̶byu̶ñ neby mjootkujk'ajtku̶xu̶chu̶ñ.

18Oy najty je̱'e̱ Pablo mu̶u̶d je̱'e̱ Bernabé mayjya'ay du'un ja'anu̶maaygyu̶xy ko je̱'e̱ waj ka'p yaj'o'kku̶xu̶ch ko najty wyindzu̶gu̶'u̶waanu̶gu̶xy y y'o'owu̶dattaanu̶gu̶xy, peru̶ ka'p mu̶madaakku̶xy.

19Mu̶'it xu̶u̶ je̱'e̱ judío ja'ay oy nije̱' jya'tku̶xy, chóngu̶xy jim Antioquía y jim Iconio, y chi je̱'e̱ mayjya'ay nu̶maaygyu̶xy ko je̱'e̱ Pablo mu̶u̶d je̱'e̱ Bernabé wan mu̶dzibu̶u̶ygyu̶xy. Chi je̱'e̱ Pablo mu̶k'eemby mu̶dzibu̶u̶ygyu̶xy y ka'tzku̶xy, y du'un je̱'e̱ myu̶naangu̶xpu̶ tu̶ ndijy najty je̱'e̱ du'un yaj'o'kku̶xy, chi pawijtz papo'tku̶xy oy u̶xju̶bijpku̶xy kajppa'a. 20Peru̶ ko je̱'e̱ mu̶bu̶jkpu̶du̶jk jyu'ubigu̶u̶yu̶gu̶xy, mu̶'it je̱'e̱ Pablo pyu̶du̶'ky y ñu̶kxy kajptjooty ja'adu'ook, y kujaboom choñ mu̶u̶d je̱'e̱ Bernabé y ñú̶kxku̶xy jim Derbe.

21Ko je̱'e̱ Pablo mu̶u̶d je̱'e̱ Bernabé je̱'e̱ oybyu̶ ayuuk tu̶y'ajt jim Derbe kapxwa'kxku̶xy, janch may je̱'e̱ ja'ay Jesús y'ayuuk tyu̶y'ajt jim mu̶bu̶jkku̶xy, y chi jim Listra, jim Iconio y jim Antioquía wyimbijtku̶xnu̶bu̶. 22Jim je̱'e̱ mu̶bu̶jkpu̶du̶jk jootmu̶kmu̶gápxy ajku̶xy, y wingapx ju̶jpkapxu̶u̶ygyu̶xy ko wan tu'kju̶jp mu̶bu̶jkku̶xy je̱'e̱ Dios y'ayuuk tyu̶y'ajt y ka'p y'u̶xtu̶gu̶'u̶wa'kku̶xu̶ch, nu̶maaygyu̶xy ko naty ndu̶gu̶'u̶waanu̶m ajku̶xy ma je̱'e̱ Dios y'ane̱'e̱mu̶ñ tzipku̶xp je̱'e̱ ayo'on may nmu̶najx nyajnajxu̶mu̶ch ajku̶xy. 23Kajpt kajpt majaty je̱'e̱ mu̶bu̶jkpu̶du̶jk yajpaatku̶xyu̶ñ, jim je̱'e̱ mu̶bu̶jkpu̶du̶jk yajni'ibu̶jkku̶xy ko je̱'e̱ mu̶bu̶jkpu̶du̶jk wan nigu'ubajk'ajtku̶xy, y ko najty tu̶ yajni'ibu̶jktaaygyu̶xy, chi je̱'e̱ Dios mu̶bu̶jktzoogu̶xy y y'ayuu'ajtku̶xy, y chi je̱'e̱ Windzú̶n Dios yajku̶'u̶waanu̶u̶yu̶gu̶xy mu̶dyiibu̶ najty tu̶ mu̶bu̶jkku̶xyu̶ñ.

Pablo mu̶u̶d je̱'e̱ Bernabé wyimbijtku̶xnu̶ba Antioquía jim Siria naaxjooty

24Pablo mu̶u̶d je̱'e̱ Bernabé najxku̶x je̱'e̱ Pisidia naaxjooty, oy jim Panfilia naaxjooty jya'tku̶xy. 25Kyapxwa'kxku̶x je̱'e̱ Jesús y'ayuuk tyu̶y'ajt jim Perge, y chi jim Atalia ñú̶kxku̶xy; 26jim byarcu̶tu̶gu̶u̶ygyu̶xy ñú̶kxku̶xy jim Antioquía ja'adu'ook, je̱'e̱ kajpt ma je̱'e̱ Dios chojku̶ñ najty tu̶ yajni'ibu̶gyiiju̶ñ ajku̶xy mu̶u̶d je̱'e̱ tuung mu̶dyiibu̶ najty tu̶ yajmaaygyu̶xyu̶ñ. 27Ko jim Antioquía jya'tku̶xy, chi je̱'e̱ mu̶bu̶jkpu̶du̶jk woomujky ajku̶xy y yajmu̶dmu̶dyaaktaaygyu̶xy ku̶xyu̶ mu̶dyiibu̶ je̱'e̱ Dios najty tu̶ tuñu̶ñ mu̶u̶d je̱' ajku̶xy, y neby je̱'e̱ Dios nu̶u̶ tu'u najty tu̶ yaj'awa'achu̶ñ ma je̱'e̱ ka'pu̶ jyudíoja'ayu̶chu̶ñ ajku̶xy, neby je̱'e̱ Jesús y'ayuuk tyu̶y'ajt mu̶baad nandu'un mu̶bu̶jkku̶xyu̶ñ. 28Jeky je̱'e̱ Pablo mu̶u̶d je̱'e̱ Bernabé jim y'ijtku̶xy mu̶u̶d je̱'e̱ mu̶bu̶jkpu̶du̶jk ajku̶xy.

Currently Selected:

Hechos 14: MIXE

Highlight

Copy

Compare